豆豉鯪魚炒油麥菜 + 海龍海馬瘦肉湯 ( APR-2009 )

今日早餐被迫食得豐富啲   因為我想食沙律醬汁而要食吉列魚柳呢   哈哈 ~

晏晝請假陪媽咪去醫院 "度" 眼   所以同埋媽咪 朱朱一齊食 Lunch 喇 ~

諗住 "度" 完眼就去九龍城食泰國嘢   所以我只食件奶油多 (燶啲再要多奶油)   唔咁強調就唔好食㗎   朱朱又眼定定想食嘢咁款   所以叫咗塊火腿   $3 好唔抵呀   哈哈 ~

食完就出發去醫院   半個鐘搞掂   都好快手 ~

同媽咪去九龍城小曼谷食 Tea   食咗 串燒 3 串 (雞 / 牛 / 豬) + 龍眼冰 + 清湯牛丸湯河    個湯粉落埋辣椒粉一齊食真係好好味呀 ~

之後同媽咪行啲泰國雜貨店   拖住媽咪隻手行街   感覺媽咪真係老喇   細細個媽咪拖   依家掉轉頭拖媽咪   好感慨呢 ~

途經寵物店   見到張狗仔床好似好舒服   所以即買比朱大姐   盛惠 $158   我覺得好抵呀 ~

送完媽咪番屋企   我就番屋企煮飯喇   媽咪話朱朱一瞓落床就唔願出落床呀   咁就好喇 ~

是日懶餐 - 豆豉鯪魚炒油麥菜 + 海龍海馬瘦肉湯

豆豉鯪魚炒油麥菜 - 有魚又有菜   最緊要方便   妳知啦   頻樸咗成日   有煮飯已經好好㗎喇    唔係我自己讚自己㗎 ~

海龍海馬瘦肉湯 - 媽咪特登朝早煲㗎   所以我又慳番唔少時間滾湯呢 ~

食完飯就食媽咪喺百佳買嘅長柄士多啤梨   好香好靚   但超級勁酸呀 ~

炒粒粒 + 隔夜湯 ( APR-2009 )

早餐又食三文治 + 奶茶

Lunch Time 嘅時候驚落雨   所以同里奧大人去菇場附近茶餐廳食   我明明叫牛丸米   點知黎咗豬肉丸米   我最憎最憎食豬肉丸   但係幫我寫單嗰位哥哥應該係新嚟   我費事佢比人鬧   所以我哽哂去   勁難食呀   好在里奧大人叫嘅涼瓜排骨飯超好味   食咗少少   個人都開心番啲呀 ~

是日晚餐 - 炒粒粒

炒粒粒 - 材料有 1 個大紅椒 ($8) + 2 件豆腐乾 ($3) + 粟米 ($4) + 菜脯   加糖加雞粉炒呀炒   好香好好味呀   因為我好鍾意食菜脯粒㗎 ~

煎雞翼 + 薑蔥粒炒飯 + 南瓜粟米栗子豬骨湯 + 徑步 ( APR-2009 )

星期日喇   天氣又唔錯  心情真係好好呀   10 點半起身梳洗   再出發去食早餐喇 ~

等緊早餐嘅時候   隔離張長枱有 2 個大人加 6 個小朋友   大約 8-10 歲左右玩啤牌   妳知啦   小朋友玩起上嚟會 Out of control   加埋個大人又一齊玩   嘈到呢   所以我要調位坐   我唔想係一個咁嘈吵嘅環境下食早餐呀 ~

同里奧大人去徑步同買餸   番屋企梳洗   抖到 3 點幾再去食 Tea ~

是日懶餐 - 煎雞翼 + 薑蔥粒炒飯 + 南瓜粟米栗子豬骨湯

煎雞翼 - 用韓式醬汁醃一晚   勁入味呀   不過煎嘅時候就好計易燶   因為成日心急用大火   唔關醬汁事㗎 ~

薑蔥粒炒飯 - 薑蔥茸真係好有益   所以炒飯嘅時候都會加   好好味 ~

南瓜粟米栗子豬骨湯 - 材料有南瓜半個 ($8) + 粟米 3 條 ($10) + 栗子半磅 ($4) + 豬骨 ($20) + 南北杏少許   煲 2 個半鐘   超超超超甜呀 ~

食完飯就睇旅遊節目同飲食節目   好開心呀 ~

酸辣米線 @ 大埔 + 徑步 ( APR-2009 )

難得假期   當然會瞓晏少少   不過最多比自己瞓到 10 點半   因為再瞓嘅話就會無早餐食   要自己煮呢 ~

運動無 Warm Up   所以下腹肌肉痛   要去睇醫生   不過我都有徑步㗎   只不過係超慢龜速咁囉 ~

突然好想飲珍珠奶茶   所以順便又食埋街頭小食當 Tea 喇   食腸粉 + 燒賣 + 粉果 + 冷冷撈   超正呀   不過超多味精超口渴呀 ~

食完行陣就番屋企抖抖   再番教會   今晚唔會煮飯   因為肌肉酸痛無 Mood 呀   就算煮咗都唔會好食㗎 ~

所以決定同里奧大人去食酸辣米線   不過食埋今次可能唔會再去得咁密 lu   因為里奧大人話依家食辣嘢   嗰日會打噴嚏好辛苦喎 ~

今日真係好彩   因為 Jusco 買嘢有現金回贈   最高回贈有 $200   咁啱想買屏幕   咁啱做 $1,998   所以有 $200 回贈   好抵呀 ~

住家飯 @ 媽咪屋企 ( APR-2009 )

星期四晚  (翻焗 + 粟米湯)

夜晚番到去徑步先   之後再焗番晏晝食剩嘅嚟做晚餐   放滿一碟擺入焗爐焗   勁方便呀 ~

不過硬係覺得里奧大人好似好慘咁   所以整多碗粟米湯   但佢居然話唔飲   話厭喎   麻鬼煩煩   之得唔煲啦 ~

~~~~

星期五

朝早食芝士蘑菇雞肉腸片治烘底 + 奶茶    雖然一路睇報紙一路食   但係都係無假期果隻 relax  咁噃 ~

呢排瞓得唔好   再加上菇場無嘢做   所以個人無無聊聊仲更加攰呀 ~

諗住興記拆咗   原來做到 5 月尾   咁都好嘅   多個選擇嘛 ~

真係唔想食豬扒麵   所以我今次食奶醬多 ( $4.5) + 炸雞全翼 ($7)   估唔到奶醬多好好食   所以再 Encore 件呢   仲肥過食個餐呀 ~

夜晚里奧大人去奶奶屋企食   所以我番媽咪屋企食飯   我始終都係想見媽咪同朱朱多啲嘛 ~

媽咪好鍾意食 Italian Tomato 嘅 Cake   所以又買兩件比佢食喇 ~

其實食完飯再食 Cake 真係幾飽下   不過飯後有甜品又果真幾滿足咁呢 ~

炒粒粒 / 蝦醬炒通菜 / 炸菜蒸梅頭 / 蒸火點 (其實唔係好記得係乜名) / 清保涼鱷魚肉豬展湯 / 焗蕃薯

怪味雞柳 + 菜心 + 徑步 ( APR-2009 )

一早醃好咗雞扒   放工買菜就搞掂 ~

是日懶餐 - 怪味雞柳 + 菜心

怪味雞柳 -  其實唔記得 Exactly 醬汁係點   只記得有蒜蓉 + 薑蔥茸 + 鎮江醋 + 豉油 + 糖 + 麻油 + 水呢幾樣嘢   所以求其整埋當係怪味汁   不過今次唔想落辣椒油   所以無咁惹味   但都好好食㗎 ~

菜心 - 要健康   所以菜心只會灼   唔落油同鹽   但都好甜㗎 ~

食完抖陣   就同里奧大人徑步去 lu ~

~~~~

今日請假   因為媽咪有白內障   所以請假陪媽咪驗眼 ~

第一件事當然同朱朱食早餐啦   不過好大風   只係抱住佢落街呢   驚佢吹親呀   其實佢食完營養糊仔之後就多數瞓覺   所以我食早餐嘅時候   佢都好乖咁無話要嘢食   咁我就可以舒舒服服咁食喇 ~

食完上屋企抖陣   就同媽咪出發去驗眼 lu ~

我真係好感恩   因為有次同媽咪飲茶   見佢好辛苦咁望嘢   仲以為佢眼鏡度數唔啱   但佢話有少少白內障   諗住 6 月覆診再問醫生   我即刻話唔好喇   睇私家好啲政府等好耐   真係盲咗都未做呀   所以就 Book 咗私家睇喇   媽咪食好多藥   上次我無無聊聊咁 Mark 低喺記事薄   估唔到今次用得着   因為醫生話藥物都會有影響   媽咪仲好愕然點解我會有佢食藥嘅資料添呀   所以真係好感恩呢 ~

驗完眼就同媽咪去 King Ludwig Beerhall 食德國菜   去到嘅時候差不多 1 點半   估唔到無乜人喎 ~

今次同媽咪 Order 2 個 Lunch Set (三文魚湯律  + 德國脆皮鹹豬手 + 甜品 + 餐飲 & 甘筍忌廉湯 + 炸魚蕃茄天使麵 + 甜品 + 餐飲)   再散叫 1 個農夫包   個 Waiter 好好人   話不如叫兩個 Set 算啦   驚我哋太多食唔哂   但我話真係好想試埋個農夫包囉 ~

每枱都有嘅蒜蓉包 - 脆卜卜   勁香蒜蓉味   超正

甘筍忌廉湯 - 我媽咪飲嘅   話有粒粒甘筍蓉

德國脆皮鹹豬手 - 超脆卜卜嘅皮   啲肉都好滑   但覺得好似有陣羶味

三文魚沙律 - 兩塊三文魚都幾大塊   但最有驚喜係粒車厘茄   超甜呀

炸魚蕃茄天使麵 - 我覺得無乜味   唔知係咪食咗鹹豬手呢

農夫包 - 超超超超正   外脆內軟   正到難以形容   下次再嚟必食呀

鵝肝醬 - 我好小食鵝肝   但覺得好好味

酸忌廉芝士醬 - 我鍾意食呢個醬   但比較漏

士多啤梨忌廉蛋糕 - 好飽   所以無咩點食

不過最後食剩差唔多半隻豬手同碟炸魚天使麵   所以我就可以當晚餐咁整比里奧大人食喇 ~

同埋媽咪一齊番屋企   陪下媽咪陪下朱朱   5 點半先番屋企   一日頻頻撲撲真係好攰呢 ~

雙重粟米肉粒碟頭飯 ( APR-2009 )

尋日膝蓋痛呀   無咩心機咁   所以好唔想煮飯   好想去打邊爐   又好想食壽司   總之好唔想煮咁啦 ~

諗住里奧大人 8 點番到屋企   點知 8 點先放工   加上我又唔會徑步   咁即係大把時間   都係煮飯啦 ~

我相信里奧大人食住家飯會開心好多   所以呢個就係我好攰都會煮飯嘅原動力喇 ~

是日懶餐 - 雙重粟米肉粒碟頭飯

雙重粟米肉粒碟頭飯 - 材料係 1 盒粟米湯 + 1 條超甜栗 + $10 豬林肉 + 2 粒紅蔥頭   今次我又覺得自已整得好好味   可能我鍾意食粟米啦 ~

~~~~

今朝天氣非常之好呀   所以心情都非常之好呀 ~

食咗兩朝甜早餐   今朝要食鹹嘅   食芝士蘑姑雞肉腸片三文治烘底 + 奶茶    好滿足呀 ~

依排番到菇場無嘢做   所以成日對住電腦上網   睇到眼濛濛   焗完杯菊花杞子圓肉茶   真係無咁濛喎 ~

天氣清清涼涼   一於行遠啲   同里奧大人去海皇粥店食 Lunch   最正係食滿 $25 可以用 $5 cash Coupon   所以就食艇仔粥 + 炒麵 + 蒸蘿蔔糕 + 炸兩    不過食完行番菇場覺得好熱添 ~