住家飯 @ 媽咪屋企 ( 7-SEP-2012 )

釀青紅尖椒

鮫魚餅

冬菇燜雞

魚雲

叉燒 / 燒鴨 (外賣)

炒白菜

牛蒡紅蘿蔔粟米豬骨湯

New York Cheese Cake / White Chocolate Raspberry Cheese Cake

( 7-SEP-2012  FRI )

Happy Friday   又係食咩都開心過人   哈哈 ~

菇場忙呀   好快到 Lunch Time   出去萬寧買嘢先番嚟食糭   終於食哂啲糭   超勁開心 ~

放工去一田買 Cheese Cake   之後番媽咪屋企食飯   明明話 2 餸 1 湯   所以我買 Cheese Cake 做甜品   點知又整好多餸   最後我飽到連 Cake 都食唔落 ~

里奧大人差唔多 9 點半先喺大陸番嚟   番到嚟都 11 點   陪下佢   又打下機都已經 12 點幾   要即瞓喇 ~

叙苑粉麵茶餐廳 @ 九龍灣 ( 6-SEP-2012 )

( 6-SEP-2012 THU )

早餐食腸粉   再飲埋杯咖啡   熱到我呢 ~

菇場忙咗一個鐘就 Hea 啦   不過一望電腦又好快 12 點   再叮埋飯   好快就 12 點半喇   依家好多時都帶 Lunch Box   因為驚晏晝落雨呀   出街好煩㗎 ~

放工去旺角拎 $100 百佳 Coupon   搭地鐵原來去油麻地係總站   點知自己佐敦落車   過咗對面線   好在望一望   原來係去唔到油麻地   原來我係唔駛落車   因為油麻地係總站 ~

去到跟指示   人哋 7 點收工   我 6 點半仲喺條街度搵   最後都係打比佢哋   好在家樂嗰邊都熟咋   唔係慘喇   因為佢叫我 "捐入商場行快啲   見到地產就屈入去   再行去咗手邊過對面就係㗎喇"   當我唔熟個環境   再加上佢咁講   我肯定暈都似 ~ 

拎完再周圍望行認下路   原來係可以行一條直路   途經美味棧   買咗 2 Pack 午餐肉就走人   再去信和買金罐牛油同芝士就搭小巴番屋企喇 ~ 

7 點幾打比里奧大人   佢話走喇   咁我話等埋佢一齊食飯   佢收線之後再打嚟問我知唔知佢喺大陸   我梗知啦   我反正唔太餓   可以等到嘛 ~

一落小巴行幾步   見到 Ivy 過馬路   仲諗住嚇唔嚇佢   但佢已經見到我喇   真係搞笑   我好少呢個時間出現家嘛   咁都撞到   真係唔好做衰嘢呀   哈哈 ~  

里奧大人想食排骨炒麵   所以去叙苑開餐   8 點半落樓   到咗無耐里奧大人又到喇 ~

食完去書局買書   今次特登去買 "騎呢.Weak 7.搞大咗"   因為我覺得佢咃發放好多正能量   講嘢又搞笑   其實之前都買咗佢本 "騎呢.Weak 7.拍拍拖"   又係好搞笑   再之前就買咗本焗曲奇嘅食譜   最近呢兩次就係跟住焗   口感同味道真係正好呢 ~

黑椒牛仔骨意粉 ( 5-SEP-2012 )

( 5-SEP-2012  WED )

星期三喇   今朝 7 點半醒咗就唔想再瞓 lu ~

早餐食奶醬多   真係好彩食細醬多   如果食沙爹牛肉肯定真係食唔落   因為途中見到巨強行出嚟   個男人好驚咁避佢   之後巨強行咗去我前面張卡位   個女人又係避佢   我心諗快啲消滅佢啦   點知隻巨強又行番出嚟   我超級勁驚呀   我大聲叫 "阿姐阿姐"   再指住巨強   之後佢一腳消滅佢   嘔心 ~

菇場呀   我唔要好嘈   但比番少少生氣可唔可以呀 ~

Lunch Box 係紅豆糭同前晚嘅魚餅   食到好飽   所以出去超市行   諗住消化下   不過又忍唔住試食咗 2 件唔同味嘅芝士蛋糕   口感好似食雪糕咁好得意呀   但食完好飽囉   明明諗住出街行下幫助消化家嘛 ~ 

今晚唔駛買餸   所以去萬寧買下嘢   之後就番屋企喇 ~

預備好晚餐再熨衫   居然唔駛開冷氣住   不過煮飯嘅時候就開定喇   因為次次入完廚房出廳係好熱呢 ~

里奧大人同客開 Conf. Call Meeting   所以差唔多 8 點半先走呢   好在我自己食咗飯先咋 ~

是日懶餐 - 黑椒牛仔骨意粉

黑椒牛仔骨意粉 - 媽咪又買咗好多牛仔骨比我   我要清咗啲舊嘅   加埋之前買咗嘅洋蔥同埋細半包意粉   再加一碗什豆   一碟過搞掂最開心 ~

源發潮州粉麵 @ 九龍灣 ( 4-SEP-2012 )

( 4-SEP-2012  TUE )

8 點起身   之後 Shopping   再食麥記   10 點番到菇場   爽呀 ~

上下網   周圍望就已經 12 點   叮下飯就已經 12 點半 lu   今日 Lunch Box 又係糭   食多餐就 KO 哂所以糭   之後見到糭都會驚呢 ~

放工即走   急步去超市買 100 plus   平時覺得要行好耐   但今次覺得好似好快到咁   可能無咁熱   同埋有目標做一件事呀   一去到即拎藍   再衝去掃 16 罐原味 100 plus   再比錢   前後唔駛 5 分鐘搞掂   好感恩仍都趕到平時坐嗰班車   所以唔駛 6 點就番到屋企呢 ~

今晚唔煮喇   食咗藥真係無 Mood 煮   勁想食粉果   所以等埋里奧大人收工去源發   8 點開餐   算早㗎喇 ~

番到屋企本來想熨衫   但都係唔熨喇   真係好唔想郁呀 ~ 

煎魚餅 + 紅豆糭 + 通菜 ( 3-SEP-2012 )

( 3-SEP-2012  MON )

今朝食熱狗餐   其實唔想食咁多腸仔   不過真係好想食熱狗囉 ~

條腸又痛   尋晚瞓得又勁差   所以好想瞓呀 ~  

晏晝叮蝦子麵   諗住食完就瞓   不過又瞓唔到 ~

4 點開始好眼瞓呀   又痛喎   所以更加想瞓   我試下合埋眼   真係差啲瞓得着呢   好驚 ~

放工睇醫生   醫生話應該腸胃有問題   唔似婦科病   唔似盲腸炎   咁都無咁擔心 ~

去完惠康買嘢就番屋企喇   勁想唔煮   不過尋日買咗鯪魚肉同通菜   所以都係煮喇 ~

是日懶餐 - 煎魚餅 + 紅豆糭 + 通菜

煎魚餅 - 好再尋日買唔到三色椒   唔係釀埋仲要多時間整   依家求其煎香就算喇 ~

紅豆糭 - 媽咪星期六無啦啦整糭   又係都要比我   所以蒸嚟食囉 ~

通菜 - $5 份好抵   就咁蘸腐乳都好好味呢 ~

里奧大人 8 點半番到屋企   我煮出前一丁比佢食算喇   幫佢洗埋碗   我再拖埋地就沖涼   10 點半瞓覺 lu ~ 

泡菜芋絲肥牛鍋 + 煙三文魚 (外賣) + 日式拚盤 (外賣) ( 2-SEP-2012 )

( 2-SEP-2012  SUN )

10 點 20 分起身   梳洗完就落去食早餐   番到屋企抖陣沖涼   不過條腸仲痛痛哋   所以最後唔番教會   喺屋企休息 ~

差唔多 2 點半就出去食 Tea   好想食麻辣米線呀 ~  

里奧大人就番屋企瞓陣  我就自己去買餸   熱到呢   番到屋企又要再沖涼喇 ~

差唔多 6 點就預備晚餐   里奧大人去跑步   沖完涼無耐   家姐就上到嚟喇   仲喺媽咪屋企拎埋糭同蕃鬼荔枝比我添 ~

是日懶餐 - 泡菜芋絲肥牛鍋 + 煙三文魚 (外賣) + 日式拚盤 (外賣)

泡菜芋絲肥牛鍋 - 明明見到金菇唔買住   諗住行遠啲會唔會平   點知番到屋企煮完之後先記得無買金菇   激鬼氣呀 ~

煙三文魚 (外賣) - 之前家姐買㗎   所以實會叫埋佢一齊食呢 ~ 

日式拚盤 (外賣) - 又係家姐買   每樣夾咗 1/3 咋   睇嚟要食多 2-3 次先食哂咯   我好想快啲清哂呀   可以冰箱可以清咁啲嘢 ~

里奧大人又開始做公司嘢 lu   家姐就玩 Ipad   玩到 9 點就走 lu   我就沖涼再按摩   好舒服呀 ~

大食會 @ 姑奶屋企 ( 1-SEP-2012 )

壽司拚盤

花之戀壽司 / 三文魚壽司 / 炸春卷 / 蝦 / 餃子 / 三文魚骨 / 雞 / 肉醬意粉 / 炒飯

( 1-SEP-2012  SAT )

瞓到 8 點先起身   爽呀   不過可以繼續瞓就梗爽啦 ~

明明 9 點前都仲藍天白雲㗎喎   我出門口時   里奧大人仲話天文台又話落雨   但好陽光到不得了   都係唔好信天文台   點知我食完早餐都係 9 點 05 分啫   無啦啦落超大雨   之得望下出面先走啦   完全無諗過會落雨   避咗陣就跑啦   唔知落到幾時   好在有報紙遮一遮 ~ 

番到菇場拎袋放嘢嘅時候   居然見到個袋原來係有把遮 ~

今日上大陸按摩   所以放工即走   喺淘大 Join 埋里奧大人行去德福坐大巴去落馬州   差唔多 3 點就去到   一路練腳一路食嘢一路睇電視   好快就 45 分鐘喇   即轉去按身   不過又係要等房   下次都係 Off 先上嚟   唔駛成日等   雖然唔係等好耐   但如果 12 點到真係咩都唔駛等呢 ~

差唔多 6 點就搞掂   我個按摩師就麻麻   同埋我條腸無啦啦又扯住痛咁   好在里奧大人個按摩師好好   佢話按完鬆咗好多呀 ~

今次去福田口岸落車   坐火車再轉的士去大埔姑奶屋企食飯呀 ~

8 點半就走喇   同埋 2 個姑奶一齊坐的士去大埔中心   坐巴士番屋企呢 ~

頻頻樸樸咁又過咗一日 lu   好在聽日可以休息下啫 ~