長洲半天遊 + 勝利大排檔 @ 九龍灣 ( 3-MAY-2014 )

潮州二寶 - 菜脯好味呀   不過就咁食就鹹咗啲   所以叫碗白粥   一齊食好好味

干炒牛河 - 想試下炒嘢   都唔錯

鮑汁螺片扒西蘭花 - 個芡汁太杰喇

頭抽蜜絲豬扒 - 我今次勁喇   完全無食過呢個餸囉   見到都驚   我今次又問水姑   問佢如果無咗呢個餸   佢仲嚟唔嚟   佢諗咗一下話唔嚟   笑爆咀呀   佢真係好愛好愛呢個餸囉   上次話 10 年都會食呢個餸   同埋原來佢一個星期仲會外賣幾次呢個餸番屋企食   佢話懶諗食咩喎   我超勁佩服佢可以咁食法   

( 3-MAY-2014  SAT )

終於每月一 Off   對於我嚟講係大日子㗎喇   哈哈   雖然我好攰   但都想出去行下   散散啲負能量呢 ~

瞓到 9 點半就醒咗 lu   之後懶床   差唔多 10 點先落去食早餐 ~

牛肉腸

炒蛋配牛油多士

五香肉丁腸仔出前一丁 - 不過啲肉丁唔好食

11 點幾出門口   坐 619 再轉 603   去到中環三號碼頭就坐船去長洲   感恩有豪華位   仲要係上船無耐就開船呀   雖然坐慢船要 1 個鐘   不過唔緊要喎   因為我都係瞓覺   仲要係勁好瞓嗰隻添 ~

我坐窗邊位   好在唔曬   哈哈

都好多人入長洲呀

影呀影

呢張好好 Feel 咁噃

一棟棟好似積木

 

我哋唔係坐呢啲船   

仍都唔係坐呢啲船呢   我哋坐大船   所以好定   唔會暈船浪   但又會令妳好好瞓   哈哈

里奧大人話好大浪呢   不過坐大船又唔覺好拋噃

一出碼頭就見到好多人   可能啲人嚟睇包山同拜神啦 ~   

我最鍾意嘅紮染裙同紅鞋子

里奧大人周圍影

動作一致

我唔知里奧大人影咗咩   咁 Load 相嘅時候我又無咩認真睇   我話呢張好溫馨   第時我哋兩個老咗咁休閒就好 lu   之後佢話紅色衫嗰個係男人   哈哈   鬼知咩

繼續影

居然比里奧大人影到好嘢   呢個女人棟高隻腳傾電話   里奧大人仲話當時好大風   佢條裙吹起咗   佢話好在唔係企喺佢前面影咋   

差唔多 1 點就去蘇波記食 Lunch   佢話今日廚房得一個師傅   所以一係 Set 好哂嘅套餐   咁我問個男仔有無得散叫   佢話無   咁我諗住走㗎喇   不過再問老闆娘   佢話有得散叫   不過會等好耐   咁我哋都無問題   因為我唔想試另一間   不過今次都整得唔好食囉   同埋居然要加一服務費   食咁耐都未試過咁加一囉   同埋今餐都唔飽   但就一定唔會加單   因為唔知等幾耐呢   食完都已經 3 點   平時無問題   但今晚探媽咪   所以要爭取時間呀 ~

豉汁蒸鯧魚 - 個汁超勁好味   自己整到就好 lu

豉汁炒蟶子 - 今次份量都幾多

椒鹽鮮魷 - 求其到暈

蒜泥白肉 - 個汁 OK   但所謂嘅白肉完全係肥豬肉   根本食唔到嘅   呃錢

大藍妹 - 熱呀   所以里奧大人叫啤酒飲   我飲咗 2 啖都無飲 lu   因為想飲可樂呢

因為坐出面食嘛   所以焗到有啲眼瞓添   出番大街就舒服好多   只不過無咁焗   但就好熱囉   同埋超勁多人   都無咩 Mood 行同影相 ~

好似比寵物玩嘅玩具

我第一次親眼見到包山呢

係咪代表 3 支香呢 ?!

後面係咁嘅

平時呢度係球場

巨香

都唔知幾多年無見呢 d 風車咯

影埋日子最好   下次唔好揀 5 月初嚟長洲   因為實在太多人喇 

睇呢張相   我第一句就好想講   邊個細路曳呢   我就質佢個頭埋去

點讀呢 ?!

真識做生意喇

排長龍買平安包

不斷蒸

我鍾意食壽包多啲

雞屎滕   即刻諗起雞屎勝呀   哈哈

行海灘呢邊

咁大桶啤酒   如果比我   我真係唔知飲幾耐   

我好鍾意門口放好多花   但屋主寫明 "內有惡犬"   咁就驚啦

第一次見到呢種花   好特別呀

大紅大愛

曬乾啲蝦

之後變成蝦乾 ?!   佢哋排得好整齊   好靚呀  

兜咗個大圈就走喇   見到碼頭排長龍呀   所以去麥當勞食下嘢   過下冷河先走   食完就見到無哂人龍   咁即走喇   聽到有豪華位飛賣   就更加要加快腳步   因為走咗呢班船   要再等半個鐘先有船   但我哋要探媽咪   所以唔會等囉 ~

坐船真係好好瞓   我又瞓咗半個鐘啦   我真係好少一日瞓咁多次呢   所以我肯定係好攰   哈哈 ~   

去到中環碼頭都已經 5 點半   所以坐地鐵再喺九龍灣打的去醫院   去到又係 6 點 15 分   一入去都見到家姐 lu ~

探到 8 點就走喇   兜埋工人番屋企   再去搵水姑食晚飯   其實晏畫都問里奧大人今晚食咩好   點知水姑就打嚟約今晚食飯   咁又好喎   唔駛諗食咩  哈哈 ~

水姑差唔多 9 點先到   所以食完都 10 點半   無啦啦又落雨   所以又要打的番屋企   又係兜埋水姑番屋企   我哋先番屋企呢 ~

番到屋企即沖涼呀   呢幾晚真係攰到唔想沖涼   不過一定唔得啦   唔沖涼絕對唔會發生喺我身上   哈哈 ~

整下呢樣整下嗰樣   原來已經 12 點半   時間過得勁快   唔瞓唔得 lu ~   

蒜蓉豆豉蒸排骨淮山 + 蜜糖雞翼 + 芥蘭 + 松子仁炒飯 ( 2-MAY-2014 )

( 2-MAY-2014  FRI )

尋晚瞓得唔好   今朝超級勁攰呀   勁想唔番工   不過唔得啦 ~

早餐食奄列餐   食飽啲精神啲 ~

菇場忙呀   不過 11 點幾就搞掂哂   真係要抖抖咯 ~

Lunch Time 去買車仔麵番菇場食   順便幫埋 PMS 買   因為佢想瞓覺   但我話我腳痛   所以買完會即番菇場   我番到菇場嘅時候佢仲瞓緊   我叫一叫醒佢   佢應咗我一下話唔該之後我就走喇   不過佢原來繼續瞓   仲瞓到 1 點 15 分先起身食   勁呀 ~

勁眼瞓呀   放工即走啦   今晚 5 點 53 分先有 11X   所以我差唔多 6 點 15 分先到醫院   不過依家唔駛買嘢食比媽咪   我都唔會打的   慳番唔少㗎 ~

家姐今晚拎張櫈比我   所以我 7 點半一定要走喇   約咗 8 點喺屋企停車場交收   好在里奧大人又啱啱番到屋企樓下   咁叫佢嚟停車場幫手拎番屋企喇 ~

番到屋企勁忙啦   因為要煮飯呀   因為啲餸已經醃好咗   咁媽咪又唔會咁快出院   如果唔食就
要掉   所以我點都要煮囉 ~

好開心今日終於用番自己部相機   Canon 真係好唔錯啦   有送貨服務   因為我喺菇場交收唔太方便   所以就送貨去里奧大人公司喇   呵呵 ~

是日晚餐 - 蒜蓉豆豉蒸排骨淮山 + 蜜糖雞翼 + 芥蘭 + 松子仁炒飯

蒜蓉豆豉蒸排骨淮山 - 媽咪比咗 3 條淮山   咁尋晚已經浸好咗   所以今晚一定要食   但媽咪多數就咁烚嚟食   我就上網睇到可以加埋排骨一齊蒸   咁樣就會惹味啲呢   我啲蒜蓉豆豉唔夠味   正確嚟講無味   哈哈 ~

蜜糖雞翼 - 其實呢個餸應該係另一餐嚟㗎   我諗住一晚煮排骨淮山   一晚就煮雞翼同芥菜   但兩樣肉都醃咗   聽日又出街   所以唔食唔得囉 ~

芥蘭 - 尋晚浸好咗   又係一定要食 ~

松子仁炒飯 - 本來諗住蒸熱啲飯就算   不過隻鑊蒸緊排骨   所以我就用 Grill Pan 炒飯啦   順便清埋啲松子仁   嘻嘻 ~

搞掂哂都已經 10 點   超級勁攰呀   抖陣先沖涼 ~

今晚差唔多 12 點先瞓   好在聽日 Off   唔係暈都似   哈哈 ~

叙苑粉麵茶餐廳 @ 九龍灣 ( 1-MAY-2014 )

( 1-MAY-2014  THU )

我今朝 9 點 15 分都醒咗   不過諗住懶床到 10 點先醒   點知 9 點半電話響   勁驚呀   因為如果假期   我屋企人唔會打比我嘈醒我家嘛   點知一聽電話就收線   仲要喺無來電顯示   最鬼憎 ~

反正都醒咗   所以落去食早餐喇 ~

去到大快活又無位   所以去 KFC 食早餐 lu ~

里奧大人做公司嘢   我就睇雜誌同打機啦   之後差唔多 3 點先去食 Tea ~

番到屋企里奧大人話瞓晏覺   咁我唔瞓喇   驚夜晚瞓唔着   所以又打機啦   差唔多 7 點就開始預備晚餐喇 ~

我諗住淥菜   但啲水未滾   咁我打比媽咪   點知佢話 5 點幾量血壓就 160   頭先再量上壓係 228   嚇到我呢   之後我叫佢 5 分鐘後量多次   如果再係 228 就陪佢入院   咁再打比佢   佢話都係 228   咁我同里奧大人即刻打的去媽咪屋企呢 ~

7 點幾去到媽咪屋企   我哋一入屋都覺得焗   之後里奧大人開咗風扇就舒服好多   咁再叫媽咪量血壓   都係 227   咁我即打平安鐘喇   因為媽咪有糖尿病   血壓太高驚危險呀 ~

差唔多 8 點工人就番到嚟   救護車無耐又到   所以我叫里奧大人同工人打的去急症室   我就跟車陪媽咪   救護員問我嘢嘅時候   電話又響咗 2 次   仲要來電顯示係 "未知"   第 1 次就無出聲   之後打第 2 次嚟   我已經想鬧佢   不過好在無鬧咋   原來係晴晴打嚟   不過我話唔得閒傾   叫佢遲啲先打嚟 ~

今次去分流病房   但媽咪血壓高得滯   所以量咗好耐都量唔到   要用急症室部血壓機先量到   又係量咗好耐呀   好在最後都量到   但都係 227   之後姑娘比咗粒藥丸比媽咪食   再 Check 埋心電圖   之後食粒血壓丸   再量多次   仲係 228   所以要去觀察病房 ~

媽咪次次入院都好驚青   咁佢驚我都明嘅   但佢最搞笑係話佢唔驚但緊張   咁樣都會影響血壓家嘛   之後家姐同里奧大人問我   媽咪點解無啦啦血壓高   我話醫生無講   同時我又無問喎   所以比佢哋問一問完   我即刻問姑娘點解咁情況啦   佢話醫生 11 點前會到   咁我就直接問醫生呢 ~

感恩醫生 10 點 45 分嚟睇媽咪   不過佢話都唔知媽咪點解血壓高喎   可能食藥影響都未定   所以今晚要喺觀察病房瞓一晚   咁我都走喇   叫工人留低陪媽咪呢 ~

我陪媽咪入院   我都會好緊張   所以好多嘢都會甩甩漏漏   咁我諗住走家嘛   咁里奧大人就問我有無比定錢媽咪   咁番屋企都有錢喎   咁又係嘅   但媽咪有帶手袋   所以我知道佢有錢嘛   之後我打比家姐話媽咪要留一晚院   如果無事就聽朝可以出院   咁家姐又問我有無比定錢媽咪   哈哈   佢同里奧大人講嘅嘢都一樣   咁我都即刻入去病房比錢媽咪啦 ~

11 點喇   但里奧大人好餓呀   所以去食麵   之後佢笑住話好在頭先瞓咗 2 個鐘   唔係就會好眼瞓喎 ~

其實頭先我已經滾好啲湯   又煮好飯   又浸好哂啲菜同淮山   所以番屋企即沖涼   之後即刻將所有嘢放番入雪櫃   想抖都唔得 ~

差唔多 1 點先瞓   其實個人係超級勁攰   但心掛掛瞓唔着   不過唔瞓唔得啦   聽朝要番工嘛 ~