金滿庭京川滬菜館 @ 九龍灣 ( 7-JAN-2017 )

肉絲兩面黃 - 好感動呀   終於叫新嘢   估唔到又幾好味   所以下次應該會出現



招牌燻魚 - 今次好味   個皮好脆   同埋夠熱辣辣呢



宮保雞丁 - 次次叫完又話唔好食   今次又係咁   又食剩半碟   咁唔好鬼叫呢個餸啦   煩



回鍋肉 - 我都鍾意食回鍋肉   其實佢哋成日問我鍾意食咩   到我叫咗新嘢   仍然會叫番佢哋食嘅舊嘢   咁我不如唔叫 lu   無謂食唔哂又嘥



榨菜肉末配叉子燒餅 - 咁 1 Set 係 $98   水姑想再食叉子燒餅   但 $34 話唔抵   但當時仲剩半碟榨菜肉末   最後佢話食得哂啲肉末   所以叫多 1 Set   但最終都係食剩一碟肉末   麻鬼煩   一早都話叫叉子燒餅得啦   之後姑奶仲話啲肉末會留到下星期二   睇下用啲咩來炒比我哋食喎   我即刻話我唔食㗎   隔夜已經唔好  妳仲隔咁多夜   黐線咩   之後仲好有心得咁教我   放入冰格兩星期都唔會壞㗎   依家問題係食唔哂就唔好叫咁多   每人要夾硬拎啲番屋企嘛   咁我話我要半碟啦   聽晚可以煮麵



( 7-JAN-2017  SAT )

尋晚好好瞓呀   今朝鬧鐘響   完全嚇到彈醒咗   哈哈 ~

但約咗家姐食早餐   所以一定唔會懶床呢 ~



同家姐食到 8 點 50 分先走   好在老闆出 Trip   唔係有機會同佢同 Lift   因為佢多數 9 點 10 分左右番到菇場呢   呵呵 ~

做埋啲 Urgent 嘢又 Load 相   太耐無 Load 相   Load 咗陣先知有啲仲未搞掂   之後拿拿聲整好去   唔係又唔記得㗎喇 ~

放工搭地鐵去九龍灣   以為一蚊雞   點知係兒童優惠價   只怪自己睇到 $1   就以為只係用 $1 就搭到車囉   等我仲同阿齋講添   樣衰到爆   哈哈 ~

里奧大人 12 點幾都剪完髮   咁叫佢喺 Zara 等啦 ~

行多陣德福就去得寶食麻辣熨同煎釀 3 寶   好耐無食喇   覺得勁好味 ~





            

食完就搭車番屋企   又執下櫃   之前執好出面啲嘢   依家就執入面啲嘢喇   因為有啲係一見有位就攝   但我今日的起心肝再分類   整齊好多   因為真係好驚明明見到   但又搵唔番嘅感覺   搵嚟搵去咁好浪費時間囉 ~

5 點 45 分去到舖頭幫手   咁順便拎啲嘢去舖頭 lu ~

幫到 9 點就約埋姑奶一齊食飯   食到 9 點幾   之後打的去姑奶屋企   放低啲嘢   又拎埋淘寶啲 嘢同埋車厘子就打的番屋企喇 ~

11 點半先番到屋企   即沖涼喇   勁攰 ~

睇咗陣 "流氓皇帝"   再望個鐘   原來已經 1 點 45 分喇   要瞓喇 ~

住家飯 @ 姑奶屋企 ( 6-JAN-2017 )

炸豬扒 - 其實都幾好味   只可惜係凍囉  



腐皮卷 - 應該係外賣啦   我好鍾意食㗎



釀豆腐 - 都好味道   但都係凍嘅  



老少平安 - 如果呢個都係凍   我就會出聲㗎喇   真係接受唔到樣樣係凍   我知一個人煮辛苦   但都唔好咁早煮定哂嘛   妳預我哋 7 點半番到嚟   6 點開始煮囉   我次次煮飯真係等埋里奧大人放工   我先預備煮㗎    我寧願急   都好過啲餸凍冰冰   做咗一日嘢咁辛苦   雖然我煮嘅未必好味道   但起碼熱辣辣囉          



( 6-JAN-2017  FRI )

尋晚瞓瞓下覺隻左腳瓜 "long" 抽筋   勁痛呀   忍唔住大叫里奧大人   嚇到佢以為咩事   之後佢鍊兩鍊就話放鬆唔會痛   之後瞓着咗喇   似乎佢好攰咁喎   哈哈 ~

早餐食餐蛋治   以前同事朝早日日食三文治   我睇見都厭   估唔到依家自己係咁 ~

用呢隻杯飲奶茶真係好正   飲到最尾都係熱 

             

 

菇場唔忙呀   揀下相又傾下偈   好快又 Lunch Time 喇 ~ 

本來想食 K   但又好餓咁   所以最後都係叮米粉食呢 ~

仍然 hea 到放工   今次集運又甩底   之得唔番去姑奶屋企食飯啦 ~

放工去 H & M 睇 Legging   不過無貨   咁再埋榮華換 3 斤臘腸同潤腸   之後再周圍行啦   去到冒險樂園見人玩擲彩虹   咁就睇人玩   有個男人拎住一大袋 Token   我估起碼有 2,000 個   佢一隻手掌都放成 40 個咁滯   見佢拎啲 Token 出嚟   個袋仍然係滿滿嘅   佢仲係擲同一位置   睇佢擲到好機械式咁   但又真係比佢掟到特別獎   真係好難擲中㗎   如果我擲中啲特別大獎   我就會收手㗎   會玩其他   哈哈 ~  

里奧大人 6 點 45 分放工   見到我即刻講話集運個司機好唔掂   明明話 5 點-6 點   咁 5 點 45 分都未到   所以打比佢   點知話仲係粉嶺   咁明知嚟唔到   係咪要通知聲呢 ?!   之後約佢聽日 12點-2 點   佢又話唔知得唔得   咁問佢幾點又話唔知   黐線咩   最後里奧大人忍唔住打去集運到啦   啲人又係推卸責任   仲好意思比個永遠都無人聽嘅電話比里奧大人   叫佢打去投訴 ~

快快食完飯   再整埋啲嘢就打的番屋企喇   咁開埋機洗衫就沖涼喇 ~

今晚好攰   所以都係唔熨衫喇 ~

睇埋最後一集 "阿爺廚房"   再睇埋新聞   差唔多 12 點先瞓覺呀 ~

住家飯 @ 姑奶屋企 ( 5-JAN-2017 )

炸魚仔 - 炸到脆脆哋真係幾好味   可惜見到有魚鱗   之後唔敢再食 lu   

燒肉 - 姑奶話番到屋企試咗一嚿   啲皮唔脆   所以唔會再幫襯呢間燒味檔
  
豆豉鯪魚炒油麥菜 - 應該唔係珠江橋牌豆豉鯪魚   因為味道唔係好濃呢

桑椹 - 好味呀   有啲似沙田柚味道

( 5-JAN-2017  THU )

尋晚瞓得唔係咁好   其實我次次一郁   里奧大人就會好緊張問我係咪熱   所以佢都應該瞓得唔好㗎喇 ~

早餐食芝腿治   依家一入茶餐廳   侍應就會熱奶茶少奶   有時未坐定   杯奶茶已經嚟到   好在依家奶茶夠熱   飲到最尾都仲係熱   最鍾意咁呢   哈哈 ~




菇場唔太忙   終於有時間做 Filing   清得幾多得幾多啦   唔想張枱太多文件   感覺做極唔完咁囉 ~

Lunch Time 出去買酸辣米線   突然間好想食呀   但等咗 20 分鐘囉   1 點先番到菇場   食得勁趕 ~




仍然 Hea 等放工   今日里奧大人 3 點喺葵興見客   5 點唔夠都見完   叫佢行住 APM 等我 ~

放工即走   Join 埋里奧大人一齊行 APM   行咗陣就去姑奶屋企食飯 ~

今晚早咗食飯   所以 8 點就可以同里奧大人出去散散步   散咗半個鐘就番去喇 ~

沖埋涼睇陣電視   睇埋 "阿爺廚房" 就瞓覺 lu ~ 

住家飯 @ 姑奶屋企 ( 4-JAN-2017 )

蒸紅鮋 - 唔食魚唔得   因為得唯一一樣嘢係熱

南乳煎雞翼 - 一拎出嚟嚇鬼死我啦   燶到咁嘅   但有兩隻啲皮又好似無煎咁

灼菜心 - 黃咁咁

( 4-JAN-2017  WED )

今朝無咁凍喇   仲有春天嘅感覺添   最驚大回南㗎喇   人特別攰   衫又特別難乾 ~

早餐食魚柳餐   諗住一個人靜靜哋嘆下   但坐得無耐   8 卦又嚟埋   明明話唔嚟家嘛 ~



菇場忙埋 Report 就 Hea 過喇   爽 ~

Lunch Time 出去行陣   再買燒賣炒麵番菇場慢慢食 ~



揀下相又傾下偈   話咁快就放工 lu ~

放工又行下商場   同冰姑傾下偈又到 6 點半   里奧大人放工喇 ~

番到去又可以即刻開飯喇   食完再食埋提子就抖陣   之後沖涼   抖陣又執個衣櫃   整整齊齊最好啦   拎嘢上嚟都順手   哈哈 ~

打下機   睇下電視    再睇埋 "阿爺廚房" 就瞓覺 lu ~

住家飯 @ 姑奶屋企 ( 3-JAN-2017 )

芹菜炒蝦醬豬肉 - 我好鍾意食芹菜㗎   但上網睇話好涼   所以唔可以食咁多呢

煎三文魚骨 - 一魚兩食最好   

豆卜燜排骨 - 我以為係隔夜餸添  

蒜蓉炒菠菜 - 凍冰冰嘅   所以我無咩點食
      
蕃茄薯仔洋蔥三文魚骨湯 - 好奇怪點解三文魚湯會有隻雞腳   哈哈 

( 3-JAN-2017  TUE )

尋晚個肚抽住咁痛   瞓得勁唔好   好後悔唔食藥呀   哈哈 ~

早餐食腿蛋治   但其實唔餓   唔知做咩鬼叫咗佢 ~



菇場忙呀   又要做長命 Report ~

Lunch Time 出去食粥   之後去惠康買即沖麥皮   再買埋麵包比里奧大人就番菇場喇   好攰呀 ~

仍然做 Report   最慘係做做下又要做其他嘢   想一次過做哂係永遠唔得囉 ~

放工去馬莎幫里奧大人買底底   超級感恩呀   居然減到 $99/Pack   之前最平都係 $178 再 6 折都無依家咁抵呀   所以一口氣買 6 pack 比里奧大人   再望下西褲   又比我見到 Tailored Fit 灰色褲減到 $249/條   一路睇 Size 個心一路卜卜跳   勁驚無嘛   我睇完一次係無   咁再認真睇多次   真係有啱里奧大人嘅 Size   好在我無放棄再搵咋   最後一條都比我買到   好開心呀 ~

買完就坐陣先比錢   因為條腰同個肚有啲扯住痛呢 ~

比埋錢就去過數去集運中心   之後 Join 埋里奧大人一齊搭車去姑奶屋企 ~

一坐得已經有得食喇   但今晚唔係咁餓囉 ~

食完飯抖陣   頂唔順食粒止痛藥   唔係郁嚟郁去瞓唔到   我同里奧大人都好慘 ~

差唔多 9 點先沖涼   再睇埋 "阿爺廚房" 就瞓喇   今日痛咗成日   所以今晚應該好好瞓   哈哈 ~

翠河餐廳 @ 官塘 ( 2-JAN-2017 )

中式牛柳



方魚肉碎粥 - 勁想食粥   但呢碗嘢真係好難食囉   無味嘅






( 2-JAN-2017  MON )

今朝 10 點都自然醒喇   梳洗之後就去麥當勞食早餐   好耐無食喇 ~



食完行陣就番屋企   沖埋涼就抖喇   個肚有啲赤赤扯住痛   今次每月一到好 OK 喎   個肚居然無冤痛   但量就多咗   應該無嘢啩   哈哈 ~

里奧大人睇雜誌   我就睇 "流氓皇帝" 喇   係幾好笑嘅   所以呢排應該會睇佢   哈哈 ~

2 點半落去食下午茶   食完番屋企 lu ~




   
里奧大人之後飲啤酒   佢拎啤酒之前就裝下我   原來佢想食泡菜點心麵但驚熱氣   因為好奇怪點解咁早飲啤酒囉   我話呢啲無益嘢嘛   唔係咁想佢成日飲呢 ~

越坐越凍   個肚仍然赤赤地痛   所以我又係睇電視又瞓下 ~   

7 點半落樓食嘢喇   聽日要番工   都唔周圍行咯 ~         

番到屋企開機洗衫   之後就沖涼休息   再睇埋 "阿爺廚房" 就瞓喇 ~

金沙餐廳 @ 官塘 ( 1-JAN-2017 )

雜菌稻庭烏冬配吉列豬扒

黑椒雞扒蟹鉗意粉 

( 1-JAN-2017  SUN )

話咁快又 2017 年喇   祝大家都身體健康   工作順利 ~

今朝 11 點半起身呀   即刷牙落樓食早餐 lu ~



食完番屋企   開埋機洗衫   沖埋涼就抖陣喇 ~

今日要分類好啲錢呀   我儲咗好多公仔頭硬幣   我想一包包入袋   咁真係好放好多㗎   同埋由兩箱變到一箱   感覺又好似無咁多嘢咁呢 ~

執到天昏地暗都未執完   咁要去食下午茶喇 ~

唔想食咁飽   所以加個米粉算喇   估唔到份量都幾多呢



食完番屋企再執   初初里奧大人叫我唔好分類㗎   但我話反正執咗出嚟   咁分埋啦   之後佢見我分得咁整齊   佢都覺得我好勁   哈哈 ~

6 點出發去姑奶屋企   咁放低兩袋嘢   之後唔駛又拎嚟拎去   爽呀 ~

搞掂哂都 7 點幾   咁去食嘢喇   諗住去試新嘢   點知間間要排隊   咁唔等 lu   求其去一間唔駛等位就入去喇 ~

食完再去買綠豆涼粉同紅豆大菜糕番屋企   里奧大人果然好鍾意食呀下 ~

今晚睇 "流氓皇帝" 大結局   其實我都係睇啲唔睇啲   但最尾果 Part 就有睇喇   都幾感人 ~

聽日再睇番呢套戲先   冰姑話好好笑喎   信佢啦   哈哈 ~

今晚又 12 點先瞓   好在聽日係補假   又可以休息一天   勁開心呢 ~