日本招牌維也納腸厚披薩 ( 8-MAR-2023 )

 ( 8-MAR-2023  WED )

今朝 6 點 40 分都醒咗   但都懶床到 6 點 50 分先起身去徑步   都徑咗 20 分鐘   都算唔錯啦   話哂咁耐無徑步嘛   哈哈 ~

早餐食甜餐包 & 麥包   里奧大人幫手焗熱啲包   咁我就可以慳番啲時間呢 ~

菇場忙呀   咁樣就似番工喇 ~

做做下嘢   聽到阿爽話阿齋成日借嘢   唔係螺絲批就鉸剪   好似打劫咁   呢句好笑   哈哈哈哈 ~

Lunch Time 出去行下   因為未餓   但其實對腳有啲攰   所以行咗 20 分鐘就買炒麵番菇場喇 ~

   

諗住開餐啦   家姐打嚟話頭先喺地鐵入面搭 Lift   話啲制濛查查無哂顏色咁   點知按咗求救信號個制呀   之後即刻話 Sorry Sorry 按錯制   真係笑死我呀   哈哈哈哈 ~

忙下停下   4 點幾就食下午茶   西瓜話今日三八婦女節   所以公司請食下午茶呀   感恩感恩 ~

放工即走   但今晚唔駛煮呀   不過我就買個薄餅番屋企焗比里奧大人食 ~

里奧大人 6 點半先番到屋企   真係時間啱啱好 ~

幫佢洗埋碟就去做機   其實都攰   但唔做唔得啦   頭先食得太飽了 ~

做咗 25 分鐘都夠皮   因為對腳好鬼攰 ~

沖埋涼就睇 2 集 "Island"   今晚都係 10 點半瞓覺 ~

苦瓜炒豆豉鯪魚 ( 7-MAR-2023 )

( 7-MAR-2023  TUE )

尋晚係咁發夢   自己買咗切開咗一片片嘅冬瓜   又去花店買花   買完就打爛咗個花樽   我坐喺地下喊呀   之後又要去搭巴士   有小朋友叫我玩韆鞦   最勁係有按摩功能呀   仲有零零碎碎嘅夢   好在起身都精神咋 ~

不過今朝里奧大人出去做嘢   其實我 7 點 10 分都醒咗   但就懶床到 7 點 20 分先起身呢 ~

早餐仍然係食香芋瑞士卷   有時覺得有 Cream 係幾好食   因為口感無咁乾爭爭咁 ~

菇場忙呀   開心開心 ~

Lunch Time 出去行下   之後就買牛腩河番菇場慢慢食 ~

仍然忙   好快就放工咁 ~

放工即走   里奧大人 5 點左右番到屋企   仲沖埋涼   所以我都快啲煮晚餐 lu ~

是日晚餐 - 苦瓜炒豆豉鯪魚

苦瓜炒豆豉鯪魚 - 炒苦瓜嘅時間係最耐   里奧大人話苦瓜無油麥菜咁油   呢樣我都覺呢 ~

洗埋碗就開機洗衫   之後沖涼休息 ~

無啦啦又頭暈   唔知係咪食咗苦瓜呢 ?!   但炒過應該無咁涼㗎喎 ~

今晚睇 2 集 "Island"   其實追字幕先最攰   哈哈哈哈   所以睇完 10 點半都即刻瞓覺了 ~

茄子炒豬肉 ( 6-MAR-2023 )

尋晚食剩嘅雞絲炒麵   里奧大人連食 3 餐   哈哈

( 6-MAR-2023  MON )

感恩瞓得都唔錯   不過星期一就比較攰啲   哈哈 ~

里奧大人要番上晝   真係好在買咗早餐   唔係就要各自食 lu ~

早餐食香芋瑞士卷   因為唔想搽麵包 ~

菇場忙咗一陣就 hea 過   今日 3D   要好好珍惜   哈哈哈哈 ~

Berry 拎自己啲公仔   放喺家姐張床   好搞笑呀

Lunch Time 出去行陣   行咗半個鐘就番菇場喇   因為無着外套有啲凍 ~

今日食 Flakes + 乳酪   好耐無食   覺得好味   但食完好凍 ~

好少見佢咁到咁樣

之後好快轉身望住家姐

又上網又傾下偈   所以好快就 5 點半喇   開心開心 ~

放工即走   買埋麵包就番屋企 lu ~

是日晚餐 - 茄子炒豬肉

茄子炒豬肉 - 今次用蠔油豆板醬做調味   我求其整咋   估唔到幾好味   頭先醃肉諗住落糖   點知手快快又無睇 Label   原來落咗鹽   嚇到我要撩番出來   因為我重手落咗好多呀   諗起上次先話家姐落錯鹽   依家自己都係咁 ~

8 點出去行陣   行到 8 點 40 分就番屋企 lu ~

沖埋涼就睇陣電視   今晚好攰   同里奧大人一齊 10 點半就瞓覺喇 ~

海蜇手撕雞 (外賣) + 椰菜 ( 4-MAR-2023 )

 ( 4-MAR-2023  SAT )

今朝瞓到 7 點 40 分都自然醒   但本身都係 7 點 50 分起身嘅   不過最恐怖係望手機時間係8點35分   呢下真係嚇死囉   仲諗住要搭的士番工添呀 ~

早餐食甜餐包   搽多啲花生醬可以飽啲   哈哈哈哈 ~

差唔多番到公司就見到辣姐   佢話大半年無見過我   仲話成日望住個門口都唔見我   佢講得好搞笑 ~

咁同佢傾咗陣   我都唔記得你星期六要番工添   之後我話我星期六要番工   不過無嘢做㗎   所以好想唔駛番工   但佢話要感恩有工番呀   呢句真係點醒咗我啦   點解我無咗感恩嘅心咁㗎   真係要好好反省呢 ~

菇場唔忙   所以好想快啲放工   不過其實上下網又真係好快 1 點嘅   哈哈 ~

放工即走   里奧大人負責買外賣番屋企   因為我話星期六特別快餓   可能比平時遲咗個幾鐘食飯呀 ~

呢個豉椒支竹牛仔肉飯好味呀

諗住飯後甜品   但我食唔落   留到 6 點先食   唔知係咪凍咗關係   食完個人勁唔舒服呀   下次焗熱先敢食

食完就抖下先   之後叫里奧大人陪我還書   咁順便行下嘛 ~

里奧大人就番工   我再去超市買珍珠米   買滿 $100 有 9 折   行來行去唔知買咩先滿 $100   之後見到洗衣珠同芝士就過哂 $100   實在太好   因為唔想買零食嘛 ~

番屋企放低再拎百力滋比探訪對象   傾咗 15 分鐘就走人 ~

要去街市買餸   又買生果同凍肉   差唔多 5 點半先番屋企   唔經唔覺出咗去 3 個鐘   行咗 15,000 步呀   對我嚟講算多㗎喇   所以今晚唔做運動 lu ~

紡優美 5 合 1 洗衣珠 ($139.9 買一送一) - 家姐話算抵喎   所以我買喇

笑口牌原味芝士  ($33 買一送一) - 好耐無食   見特價先買呢

里奧大人 7 點幾放工   叫佢沖埋涼先食   咁我有時間煮個麻油一丁   今晚要 Share 食   因為唔係咁餓 ~

是日懶餐 - 海蜇手撕雞 (外賣) + 椰菜

海蜇手撕雞 (外賣) - 食剩大半盒呀   咁留聽聽日炒麵 ~

 

椰菜 - 都食剩 1/3   又係要留番聽晚 ~

洗完碗就開機洗衫   之後沖涼休息喇 ~

同里奧大人睇 1 集 "Island "   里奧大人就睇書   我就睇 "出貓特攻隊" 都幾緊張   不過睇到接近12 點瞓都瞓喇 ~

芝士焗金沙排骨 + 偽元綠冷辣辣麵 + 鹽味沙律汁青瓜 ( 3-MAR-2023 )

 ( 3-MAR-2023  FRI )

感恩瞓得都唔錯   起身都精神   但里奧大人就唔係咁舒服   所以要休息半日呢 ~

早餐食自家制蛋糕同芝麻包   咁都幾飽下   哈哈 ~

菇場忙咗一陣又 Hea 過   但星期五感覺時間係過得特別快啲 ~

我覺得佢瞓到好似條蛇咁

Lunch Time 出去買 4 個裝超力米粉   因為買 1 送 1 ($16)   我又問家姐抵唔抵 ?!   因為我好少食但見網上啲人話好抵   咁我先買   佢話 $2 個米粉仲想點呀阿妹 ?!   哈哈哈哈   咁我話即買 6 Pack 啦   佢要就可以比 Pack 佢咁囉 ~

次次一買完嘢就好餓   可能緊張買唔到呀   因為次次都係咁   所以買完即飛去買牛腩河番菇場喇 ~

西瓜話聞到好酸嘅味   佢又見我個碗係橙色咁   以為我食酸辣米線   我話我加咗醋同辣油咋

仍然唔忙就 Skype 啦   唔係成日篤手機對眼會好攰 ~

放工即走   番到屋企都即預備   但都要搞成個鐘先食得 ~

是日晚餐 - 芝士焗金沙排骨 + 偽元綠冷辣辣麵 + 鹽味沙律汁青瓜

芝士焗金沙排骨 - 想食咗包芝士   所以整金沙骨喇 ~ 

偽元綠冷辣辣麵 - 突然好想食呀   不過就只係青瓜做材料   懶到一個點   哈哈哈哈 ~

鹽味沙律汁青瓜 - 呢支沙律汁就到期   拿拿聲食埋去   但估唔到又幾好味   我覺得撈海蜇食就更加正 ~

真係完全唔記得喺邊度買添   唔通係 DONKI ?!

洗埋碗就小清潔屋企   搞掂就即沖涼 lu ~

今晚同里奧大人一路食芝麻糊一路睇 "超級無敵獎門人"   估唔到又幾好笑   哈哈 ~

再睇多陣 Youtube   我 11 點左右都自己瞓先喇 ~  

蟹鉗 + 黑椒鴨胸 + 小旺菜 + 黑蒜豚肉味拉麵 ( 2-MAR-2023 )

( 2-MAR-2023  THU )

感恩一覺瞓天光呀   鬧鐘未響都醒 lu ~

早餐食甜餐包 + 麥包   以前成日話家姐食包好悶啦   估唔到自己都有呢一日   哈哈哈哈 ~

菇場唔忙呀   又搵下嘢做咁啦 ~

瞓到我都想瞓呀

瞓咗一個鐘都仲係咁   哈哈哈哈 

Lunch Time 出去行大運   之後就買鯪魚球米番菇場食喇 ~

唔忙就 Skype 啦   但其實打 Keyboard 都幾嘈下   呵呵 ~

放工即走   諗住今晚焗嘢好快食得   但原來唔係囉   哈哈哈哈 ~

是日懶餐 - 蟹鉗 + 黑椒鴨胸 + 小旺菜 + 黑蒜豚肉味拉麵

蟹鉗 - 焗咗好耐都咁嘅顏色嘅   唔知以為係喺冰格拎出嚟未解凍   哈哈哈哈 ~

黑椒鴨胸 - 完全食唔出黑椒味   只係食到有黑椒喺面嘅感覺 ~

小旺菜 - 呢幾次買嘅都好甜呀   價錢唔貴   最緊要煮又方便呀 ~

黑蒜豚肉味拉麵 - 上次執柜先醒起買咗好多   仲要 5月到期   所以要拿拿聲食喇喂 ~

洗完碗就開機洗衫   之後沖涼休息喇 ~

今晚食芝麻糊   雖然未到期   但記得就要食㗎喇 ~

同里奧大人睇 "Island "   估唔到都幾緊張   不過呢套劇都一定要睇   因為有車銀優   哈哈 ~

再睇埋 "沖遊泰國"   又 11 點瞓先瞓 ~

椰菜豚菜炒手打烏冬 + 椰菜 ( 1-MAR-2023 )

( 1-MAR-2023  WED )

今朝早咗起身   咁都起身整早餐喇 ~

早餐食甜餐包 + 麥包   都唔記得幾時開始搽醬占   明明只係方包先搽家嘛   哈哈 ~

菇場忙呀   好快就到 Lunch Time 呢 ~

幾快又到 3 月

出去行咗半個鐘就買炒麵番菇場食   呢排天氣乾燥   但又感覺有啲潮濕咁   定追劇太用神所以好攰呢 ~

忙到 2 點幾就安心等放工   咁樣仲攰   哈哈哈哈 ~

放工即走   買埋麵包就番屋企   成日以為今日係星期二   差啲買多咗麵包呢 ~

是日晚餐 - 椰菜豚菜炒手打烏冬 + 椰菜

椰菜豚菜炒手打烏冬 - 今次整得好味   真係唔會次次都係咁   哈哈哈哈 ~

 

椰菜 - 依家椰菜都甜   最正係可以留得耐嘛 ~

洗完碗就抖下   之後去做運動   里奧大人無啦啦包雲吞   所以叫佢快啲飲 Hot Lemon 同沖熱水涼 ~

今晚做半個鐘頭機   希望 3 月開始的起心肝做番運動啦   哈哈 ~

開機洗衫就即沖涼   之後同里奧大人睇 "模範出租車2"   今集都幾搞笑   所以時間過得好快   哈哈哈哈 ~

雪咗兩晚嘅木瓜   好似食冰木瓜咁

之後睇 "沖遊泰國"   但里奧大人 10 點 45 分都瞓覺   我就繼續睇啦   差唔多 11 點左右就瞓喇 ~