香辣蒜蓉焗帆立貝 ( 7-SEP-2024 )

( 7-SEP-2024  SAT )

尋晚瞓得都 OK   今朝 7 點 25 分醒醒哋   咁里奧大人又未起身   所以我之後都係繼續瞓 ~

瞓到 9 點 45 分都醒喇   沖埋涼就去食早餐 ~

里奧大人無啦啦比哂頭先找嘅錢比我   但佢有帶銀包家嘛   咁我話唔要啦   佢係都要比   仲話佢好少用錢   可能我成日話我整早餐午餐   等如佢慳咗錢   哈哈 ~

中醫又未開診   所以番去屋企抖陣先 ~

今次里奧大人都睇埋   醫師話佢脈搏都跳得快   個人好緊張   醫師叫佢沖涼沖耐啲   可以 Relax 下   我話無計啦   呢排有大 Project 要搞 ~

我就睇咳   醫師話我氣管敏感   所以今次啲藥係主要係針對咳呢 ~

睇完就去黃埔行下   去 DAISO 買嘢   又喺 Cantevole 買咗麵包   之後就再繼續行 ~

諗住買衫   里奧大人話又係買嗰啲款   其實買同唔買無咩分別   咁其實又係嘅   我有時話我着新衫   佢即刻話妳唔講真係唔覺   呵呵 ~

我話想買 2025 年月曆   感恩比我見到呀   之後問家姐要唔要   佢又無覆   咁我都去比錢喇 ~

之後去睇其他嘢   家姐又話好鍾意   咁我哋又行番去買啦   順便買埋比佢同事   大家都開心   哈哈 ~

買完都差唔多 1 點   所以食埋 Lunch 喇 ~

黑醋味啉豬軟骨 ($82) - 味道麻麻哋   同埋幾多肥膏   我以為地瓜米粉係炒米粉呀   點知原來係湯米粉   不過湯底都幾好味

鹽酥雞扒肉燥飯 ($82) - 新鮮熱辣係好食嘅

好佩服佢哋嘅刀功   可以切到咁薄   佢將雞扒切條   每條嘅前半部係得粉漿咁咋

蜂蜜柚子茶 (凍) / 黑糖珍珠奶茶 (凍 +$8)

食完再去睇鞋   因為想買番去菇場着呀   感恩買到啱心水嘅   同埋又做特價只係 $219   不過無貨要等通知呢 ~

最後行埋 DONKI   里奧大人話有個女仔一路行一路唱 DONKI 歌   話同我一樣咁鍾意首歌   哈哈 ~

我呢期好鍾意水怪   不過又唔係好想買

我都好鍾意小白

買埋菜就走喇   里奧大人拎高袋菜   再話拎住袋菜番公司 ?!   我都忍唔住笑呀   如果真係拎番公司   我一定會用環保袋裝住啦 ~

番屋企就抖下先   里奧大人補眠咗 20 分鐘呀   我話如果攰就唔好陪我行街嘛   我寧願佢休息好過   不過佢實話唔攰   因為佢成日覺得無咩時間陪我   同埋真係好難得我星期六唔駛番工就真   哈哈 ~

芝士條 ($14.5) / 朱古力捧捧 ($18)

水怪係 $49.90   SHO-CHAN 就 $59.90   我之前都買過水怪   所以想轉   問里奧大人買咩好 ?!   佢話鍾意 SHO-CHAN   咁我就買啦   其實都幾鍾意佢嘅   哈哈   最感恩原來係有折添呀   折咗只係 $43.90 咋

家姐同事鍾意 Hello Kitty   咁頭先我求其搵係唔見   到第 2 次里奧大人去搵就搵到   所以即買啦   呢個都有折   最搞笑里奧大人居然記得家姐同事叫肥妹   以為係買比佢   我話係買比第個呀

抖到 3 點幾就出發去里奧大人公司   我要幫佢執一陣嘢   不過半個鍾就搞掂   之後到我番屋企執自己間屋喇   哈哈 ~

沖埋涼就即刻執衣櫃同零食櫃   咁又執咗 2 個半鐘   搞掂就開機洗衫 ~

睇下 Youtube 又打下機   又睇陣電視   今晚可以 8 點先預備晚餐 ~

里奧大人 9 點先番到屋   好在我話我煮咋   我可以喺屋企舒舒服服等佢   唔駛又特登出去食晚餐呢 ~

是日晚餐 - 香辣蒜蓉焗帆立貝

香辣蒜蓉焗帆立貝 - 終於清哂啲帆立貝   今次就咁焗就算   估唔到仲好食   哈哈 ~

食完就即洗碗   之後沖涼休息 ~

里奧大人話阿妹問我聽日去唔去佢公司 ?!   我以為想我幫手   原來佢話想同我傾下偈   不過我都好似好耐無跟里奧大人星期日番工咁   唔怪得佢咁問啦 ~

睇下電視   今晚無咩睡意   所以差唔多 11 點半先瞓 ~

燒汁焗雞翼 + 部隊鍋拉麵 + 菜心苗 ( 6-SEP-2024 )

超甜粟無咩味   下次都係去番買開嗰檔算喇

( 6-SEP-2024  FRI )

今朝瞓到 9 點 45 分自然醒   里奧大人就話想瞓多陣   咁當然無問題啦   我都要去整早餐   不過佢 10 分鐘之後都起身 lu ~

早餐仍然食牛油吐司   今次搽埋花生醬   我覺得搽唔搽都好味呀 ~

好似 9 點幾宣佈 12 點 40 分改發 3 號風球   咁我 2 點 40 分之前番到菇場就可以了 ~

沖埋涼就睇下電視   12 點 40 分開餐   食完就番工 lu ~

里奧大人話鍾意飲南瓜湯   但唔鍾意食南瓜做嘅餸   其實我記得佢唔鍾意食   仲諗住時間耐咗會口味變添   哈哈

感恩去到巴士站即刻有車   同埋我都預咗有咩車都上㗎喇 ~

見有時間   去埋 360 買嘢先   所以  1 點 45 分都番到菇場 lu ~

松尾雜錦朱古力精選盒 ($40/2 盒) / 迷你雷神氐多啤梨朱古力 ($30/2 包) 

諗住唔忙   估唔到 4 點幾先忙   好在好快搞掂咋   之後忙下停下又放工 lu ~

放工即走   里奧大人話 7 點幾先放工   咁我可以唔駛咁急煮晚餐喇 ~ 

鴻福堂買嘅川貝雪梨海底椰 ($30/支)   希望可以止到咳啦

是日晚餐 - 燒汁焗雞翼 + 部隊鍋拉麵 + 菜心苗

燒汁焗雞翼 - 今次覺得好好味喎   唔知係咪肚餓關係   哈哈 ~

部隊鍋拉麵 - 喺韓印紅買咗 2 包部隊鍋湯包   但話咁快就差唔多到期   所以今晚要煮 1 包先啦   湯底味道都唔錯   下星期都要再煮   唔想又擺到過期呀 ~

菜心苗 - 終於清哂   不過之後都會仍然買菜心苗食嘅 ~  

洗埋碗就開機洗衫   之後沖涼休息 ~

睇下 Youtube 又打下機    今晚 11 點先瞓 ~

南瓜蒸排骨 + 菜心苗 ( 5-SEP-2024 )

( 5-SEP-2024  THU )

尋晚又係咳醒   所以瞓得唔係咁好   今朝鬧鐘響   我仲以為自己校錯鬧鐘   今朝係星期六唔駛番呀 ~

早餐食千層吐司   里奧大人話就咁食 ?!   我話係呀   甜租哋好味呀   但佢話要搽花生醬   仲話搽咗好味好多喎 ~

菇場唔忙   但 4 點-7 點會改發 8 號風球   呢隻 "摩羯" 都幾犀利喎 ~

里奧大人送呢個蠟筆小新護腕墊比我   真係好有驚喜呀   我之前又買咗個卡片套   我同里奧大人講話啲同事以為我好鍾意粉紅色   哈哈

Lunch Time 出去行陣   所以阿齋幫我蒸飯   之後再出去行陣   番到菇場 12 點 15 分即食飯   但原來未熱   阿齋都話無咁快熱   但我話 15 分鐘啦起碼   佢話無蒸咁耐   可能佢 12 點左右先幫我蒸呢~

差唔多 12 點 35 分先開餐   好在可以食到 1 點咋   因為蒸完好熱根本唔可以即刻食呀   哈哈 ~

唔忙就準時 4 點走喇   估唔到無咩人搭車   不過家姐話同事話地鐵好多人呀 ~

難得咁早番到屋企   抖陣就做陣小清潔   里奧大人 5 點番到嚟   我都預備晚餐 lu ~   

是日晚餐 - 南瓜蒸排骨 + 菜心苗

南瓜蒸排骨 - 用咗 3 個細嘅栗子南瓜   真係批到我死死下   點知上次去公司附近菜店   原來有大隻嘅栗子南瓜   我用黃豆醬醃排骨   估唔到又幾好味   我成日驚好鹹呀 ~   

菜心苗 - 蘸辣椒蔥花無咁悶   但啲指天椒好鬼辣   以前會食埋落肚   依家唔會 lu ~

洗埋碗就開機洗公仔   咁等里奧大人拎番公司擺   佢仲擺咗好多細細嘅 Figure   佢啲同事話話有種好治癒嘅感覺   終於覺得無買錯公仔喇   哈哈 ~

搞掂就即沖涼   之後食埋豆沙燒餅就熨衫   里奧大人就負責熨褲喇 ~

風球會維持到聽日 12 點   咁肯定放半日風假   所以今晚睇 Youtube 睇到 11 點 10 分先瞓覺呢 ~

燒汁薯仔燜雞下肶 + 菜心苗 + 炸魚皮 (外賣) ( 4-SEP-2024 )

( 4-SEP-2024  WED )

尋晚瞓得勁差呀   應該係尋飲咗杯百香果綠茶啦   今朝鬧鐘響咗都要懶床一陣先起身 ~

里奧大人又唔係咁舒服   佢都晏啲先番工   不過我都叫佢快啲請兩日假休息   因為佢好似呢排無休息過咁囉 ~

今朝都會出去食早餐   因為我一定要飲杯醒神咖啡呀 ~

菇場唔忙   可以做自己嘢 ~

依家戴咗口罩雖然都係咳   但唔戴就咳得更犀利   所以呢兩個月都會戴番口罩呢 ~

阿齋話我終於唔帶飯喇   我話唔係唔帶   而係無得帶啫   同埋我會堅持帶飯囉   如果有煮嘅話   我唔明點解佢同阿爽會覺得我只會帶一兩日之後唔帶咁囉 ~

Lunch Time 出去食牛筋米   食完就買菜同炸魚皮   之後再去嚐麥手作買千層吐司   見 $25 就試下   最後買埋雞骨草比里奧大人就番菇場喇 ~

忙下又停下   家姐打嚟話有月餅比我   之後我話下星期六去佢屋企   佢吓咗一聲之後再哦一聲   我話做咩好唔想我嚟咁嘅 ?!   佢話因為下星期係 14 號   奇怪做咩會咁早嚟   我話我以為係 21 號呀   哈哈哈哈   等我仲同里奧大人講話今星期六下午要探訪唔得閒   依家成日記錯哂日子添 ~

放工即走   番到屋企就預備晚餐喇   里奧大人話 6 點幾先放工   咁我可以唔駛咁趕 ~

是日晚餐 - 燒汁薯仔燜雞下肶 + 菜心苗 + 炸魚皮 (外賣) 

燒汁薯仔燜雞下肶 - 第一次咁樣煮   估唔到又幾好味喎   因為我只係得 3 隻雞下肶   所以加幾墨丸再切片   咁樣好似豐富啲咁   哈哈 ~

菜心苗 - 點都要食啲菜   但其實仲剩好多薯仔喺個鍋度   所以煮少少菜就算喇 ~

炸魚皮 (外賣) - 好想食呀   不過買錯大包   所以又食 3 日 lu ~

洗埋碗就沖涼休息   里奧大人 9 點幾就瞓喇   佢真係好攰呢 ~

我就繼續睇 Youtube   不過我 10 點 25 分都瞓覺 lu ~

招牌鍋貼套餐 + 招牌鍋貼 & 麵線套餐 (外賣) ( 3-SEP-2024 )

( 2-SEP-2024  TUE )

尋晚瞓得唔好呀   半夜係咁咳   諗起之前試過百日咳   我係要含住粒喉糖瞓覺   咁先舒服啲可以瞓到咋 ~

早餐仍然食芝士吐司   原來真係有好多芝士㗎   所以食 2 塊真係超級飽呢 ~ 

今朝要拎啲嘢去里奧大人公司   我行得超慢呀   所以里奧大人知我真係唔夠氣   哈哈 ~

頂爺一聽我把聲   就話把聲好 "盟"   話好番哂要啲時間   我話個個都咁講呀 ~

家姐 Whatsapp 張早餐相比我睇   我話妳唔係一三五番公司咩 ?!   佢話係   其實佢比得早餐相我睇就梗係喺屋企啦   同埋其實我係想話一二三囉   我依家成日都講錯哂時間咁呀   哈哈 ~   

菇場唔忙呀   但間唔中都係咁咳   好似扯蝦咁   肥仔豪話我起碼要個幾月先好番哂   我話知啦   個個都咁同我講呀 ~

阿齋又問我有無帶飯 ?!   阿爽又咁問   仲話以為我籮柚痕帶一日咋喎   我話 Sorry 唔係囉   呵呵 ~

Lunch Time 都無出去行   但差唔多 12 點幾先食個 Lunch   雖然有飯但都唔會 11 點 45 分食囉   實在太早喇   哈哈 ~

蒸完放喺自己個位   真係好方便   同埋唔會有味道出嚟   呢樣最緊要呀

唔忙就做自己嘢   所以覺得好快放工 ~

買埋晚餐就番屋企   行行下覺得隻手無嘢拎咁輕鬆咁   之後先發覺原來無拎到個手袋呀   嚇到我即刻跑番去食店呀   感恩個袋仲喺度呀   感謝主 ~

食完就同里奧大人去搞啲嘢   我突然間同里奧大人講話點解大餅番工 ?!   佢話點解唔番 ?!   我話星期一嘛   佢話今日星期二啦   中午仲一齊去食中秋午餐添   妳唔記得喇 ?!   我話係喎   今朝同家姐傾偈又講錯日子   呢排真係好唔掂   哈哈 ~

番到屋企即開機洗衫   之後沖涼休息喇 ~

$45 減到 $29   仲要係下年先到期   所以忍唔住買   其實我之前喺一田已經買咗包米餅㗎喇   所以問家姐工人食唔食   食就比佢   家姐話我其實買嚟做咩   哈哈   

睇下 Youtube   今晚 11 點先瞓 ~ 

辣菜脯炒青豆角 + 潤腸粉絲蒸排骨 ( 2-SEP-2024 )

( 2-SEP-2024  MON )

感恩一覺瞓天光呀   希望之後都係咁啦 ~

早餐食芝士吐司   尋日家姐買比我㗎   麵包好 Soft 同埋都算多芝士 ~

里奧大人要番公司做嘢   咁我都一齊番去   我就可以靈修 25 分鐘喇 ~

阿妹話以為個獎係啲咩跳水或者跑步獎   不過其實都係唔會擺出嚟啦   我見佢咩都要睇   我先特登拎出嚟比佢睇   哈哈

菇場忙呀   好在 11 點鬆啲就搞掂 ~

幾咁快又到 9 月   依家要開始睇定 2025 年日曆㗎喇

我應該會買淺色日曆多啲 

去 Pantry 斟水   小說話我把聲好 "盟"   BG 即話睇中醫啦   佢好搞笑   成日叫我睇中醫 ~

Lunch Time 出去買豆豉同辣菜脯   但買完都即番菇場喇   因為條街非常焗熱呀 ~

今日開始帶飯   之前水姑買咗個蒸爐比我   所以里奧大人好想我帶飯   我話唔帶啦   費事比人話   估唔到阿齋前排開始都係帶蒸爐   咁我都跟喇   最緊要佢係做第一個呀   哈哈 ~

今朝我一開個櫃桶就見到蠟筆小新嘅餐具盒   最搞嘢係我都唔知自己幾時拎過出嚟囉

唔忙就 Skype   之後 4 點 40 分先嚟忙   好在 5 點 15 分搞掂咋 ~

放工即走   船頭話我今日有番啲氣講嘢   上星期真係覺得我係完全無氣呀 ~

里奧大人今晚 6 點 45 分先番到屋企呀   無諗過咁晏呢 ~

是日晚餐 - 辣菜脯炒青豆角 + 潤腸粉絲蒸排骨

辣菜脯炒青豆角 - 里奧大人一見碟餸就話正呀   之後食緊嘅時候   又話最鍾意食呢碟餸   咁就好喇   因為佢之前唔鍾意食青豆角㗎 ~

潤腸粉絲蒸排骨 - 清埋呢份排骨   咁就再加粉絲墊底   咁我聽日就可以帶飯喇 ~

洗埋碗就開機洗衫   沖埋涼就再食綠豆沙   不過食完有啲暈暈哋咁 ~

里奧大人幫手熨衫   咁我就可以休息下喇 ~

睇陣 Youtube   今晚 10 點 20 分都瞓 lu ~

潤腸蒸排骨 ( 1-SEP-2024 )

( 1-SEP-2024  SUN )

今朝同里奧大人一齊起身   食埋早餐就去佢公司幫手喇 ~

里奧大人拎咗我之前用嘅枱布番公司   咁我之前都已經洗乾淨哂   所以佢哋一拎出嚟話好香呀   可能我聞慣咗   唔覺得係咁香   因為家姐同阿花之前都成日話我啲衫好香㗎 ~

細細聲同阿妹好鍾意啲枱布   咁就好啦   細細聲睇我買嘅枱布   話我係鍾意 Colorful 同花花款式

衰妹成日遮住我個寶貝   哈哈

我真係覺得 Baby Yoda 好得意

之後里奧大人同埋勁哥阿妹講去觀禮同去飲   越講越好笑   傾咗差唔多 20 分鐘   之後我就再陪阿妹去食早餐   等佢食完就去做嘢喇 ~

Hippo 一見我咳   話我未好番   我話頭先勁哥話我無氣   佢叫我要飲清保涼   我問佢咪糖水 ?!   咁我可以買   佢話係湯呀   哈哈 ~

做完嘢就去番自己教會事奉   今日想早啲出發   因為無咩氣要慢慢行呢 ~

同同工講開環保   我講話咩區區綠吖嘛   之後佢忍唔住笑話係綠在區區   哈哈 ~

2 點搞掂   所以買埋午餐去里奧大人公司食喇 ~

本來想買冒菜   但都係忍下口先   咁唯有買兩餸飯啦

食剩呢盒   今晚再食

食完去買餸   里奧大人就繼續做嘢 ~

我番到屋企都 4 點   搞掂就睇 Youtube   里奧大人 5 點幾先放工 ~

$110 有 4 盒   豬牛雞任揀先好嘛   所以我買冰鮮龍崗雞   湖北蛋就 $25

我諗住買 1 條免治豬肉 ($19)   之後職員話 $34 有 2 條   咁當然買 2 條啦   匠辣肉腸就 $16   睇個樣好似幾好味咁   所以買嚟試下

6 點左右出發去地鐵站同家姐交收   家姐話慢慢啦   我話放心   我唔快得   哈哈 ~

焗咗榴槤蕃薯比家姐

呢兩日見親家姐都係比嘢我   真係出錢又出力   但依家我一話鍾意佢就點都去買   我就唔想囉

家姐喺喜多娜買嘅芝士吐司 ($26)

番到屋企即預備晚餐   今晚只係蒸嘢   所以好簡單   呵呵 ~

是日晚餐 - 潤腸蒸排骨

潤腸蒸排骨 - 夠哂懶呢   哈哈哈哈   本來蒸兩份排骨   但要食埋中午個兩餸飯   所以蒸 1 份算喇   話哂叫做一個餸嘛   同埋聽日又可以帶 Lunch Box ~

洗埋碗就開機洗衫   之後沖涼再食綠豆沙 ~

我唔知係咪食得西藥太多   個人好燥熱咁   所以即買 4 碗綠豆沙清熱

家姐同工人都話啲焗蕃薯好味呀   問我係咪搽蜜糖再焗 ?!   我話無咁講究啦   哈哈 ~

睇陣 Youtube   今晚 10 點 45 分先瞓覺 ~