Oliva @ 大埔 ( JUN-2008 )

尋晚仲係唔想開火   加上里奧大人又同我差唔多時間番到屋企   最恐怖係佢 6 點 打嚟話好肚餓   嚇到我心都離埋   因為我驚煮唔切飯餓親佢嘛   就係咁   所以就順理成章唔煮飯囉   唔關我事㗎 ~

想食壽司但又唔想去元綠   覺得佢成日靜靜雞 5 毫 5 毫咁加好鬼祟呀   三文魚加到 $12.5 喇   不過唔記得之前幾錢喎   板長又靚又新鮮都係 $9 碟咋   突然覺得元綠好貴咁   所以呢排唔食佢住   遲啲順番條氣先食 ~

就係咁   所以去 Oliva 嘅餐廳試下   見環境好似唔錯咁   又無咩人   好似幾清靜咁   咪入去試囉   要慳錢   以食兩個 Set Dinner (有麵包+湯+主菜+甜品+飲品)   燒煙豬柳配意式燒烤汁 + 香煎沙孟魚柳配菜絲蜆肉汁   初初睇好似好細碟咁   原來份量唔少   有 5 塊豬柳同埋 3 大塊魚㗎   不過啲汁就絕對唔掂囉   嗰燒汁食到想反胃   所以最後都食唔哂啲食物   之後再嚟芒果布甸   我覺得好好味   .所以食哂   埋單 $152 OK 啦   不過唔會有下次   因為覺得唔好食呀 ~

好飽好飽   所以番屋企即刻搵嘢做   就係熨衫   而里奧大人就抖一陣去做機喇 ~

~~~~

今朝好好天   仲有太陽添   心情都靚好多呀 ~

好想食飯   所以走去食糯米雞 + 咖啡 ($13)   今次好好彩   唔係太濕立立   因為我鍾意食乾爭爭嘅糯米飯 ~

番到菇場有嘢做   好充實呀   真係連 Blog 都唔得閒寫呀 ~

晏晝都仲係好好天   所以就同里奧大人去遠啲嘅茶餐廳食   食中式牛柳飯套餐 + 炸兩 ($43)   勁好味呀 ~

牛丸墨丸河 + 牛腩水餃麵 + 腐乳通菜 ( JUN-2008 )

尋晚個肚赤赤痛咗成日   以為自己肥   褲頭緊得滯   但唔扣鈕個肚都一樣赤赤痛   都唔知搞咩鬼   搞到尋日勁唔舒服   就算 MSN 同巡 Blog 都無心機   公司又涷到雪房咁   頭都痛埋   成日淨係好想可以即刻番屋企休息啫 ~

放工先嚟落大雨   仲更加無 Mood   令到個人仲更加唔舒服 ~

番到屋企即刻沖涼休息   發現有微燒同少少頭暈   里奧大人又 OT 未番   真係覺得自己好鬼可憐呀 ~

里奧大人 9 點幾先番到屋企   咁夜無咩胃口食飯   所以買麵   無咩好選擇   所以又番兜牛丸墨丸河 + 牛腩水餃麵 + 腐乳通菜   呢排食得太多街嘢   真係食到口都 "Where" 埋呀 ~

呢兩日都係落車先嚟落雨   好煩呀 ~

~~~~

今朝唔知想食咩   所以食炸菜肉絲芝士腸出前一丁 + 奶茶 ($19)   飽到爆褲頭呀 ~

番到菇場悶到眼琼琼   所以迫於無奈都要 Draft 網誌 ~

晏晝想食乾爭爭嘅嘢   所以食叉燒包 + 菠蘿包 ($9)   飲埋杯黑糖   真係飽到震呀 ~

里奧大人今日上廣州見客   如果我唔駛番工就好啦   可以陪佢上   佢有佢做   我有我行 ~

鐵蛋撈麵 ( JUL-2008 )

尋日放工突然好肚餓   番到屋企附近嘅 7 仔   即刻買碗撈麵番屋企慢慢嘆呀   但見到碗麵咁齋   所以加兩隻喺台灣買嘅鐵蛋   咁樣好似飽啲   但啲鐵蛋真係好鐵下   唔用力真係咬到天光都未咬完呀   食飽又坐好似好頹咁   所以就熨衫當做運動喇 ~

里奧大人成 9 點幾先番到屋   所以我又要陪里奧大人食晚餐   佢食牛腩水餃麵 + 腐乳通菜    我當然只係食少少啦   因為我之前已經食咗撈麵嘛 ~

之前飲哂汽水   里奧大人話好喇   唔好飲咁多無益嘢   我就話點都要買啲   如果有朋友黎都可以招呼下人吖嘛   里奧大人話到時先算啦   點知尋晚里奧大人問雪櫃有咩嘢飲 ?!   我話無   里奧大人即刻苦笑話: 都係要買啲汽水看門口先得   都話啦   好似食薯片咁   無汽水邊度夠過癮㗎   叫我食完飲水我情願唔食喇 ~

~~~~

今朝食糯米雞 + 咖啡 ($13)   上次見人哋食係細細隻㗎   點解今次會係咁大嘅 ?!   食唔哂喎 ~

番到菇埸又係好悶呀   晏晝又再撈   今次係 7 仔嘅常餐 C 香蒜撈麵 + 4 粒燒賣 + 碗仔翅 + 熱古古力 ($18)   真係超級抵   個煮麵姐姐仲話常餐 C 係好勁嘅人先食得到喎   妳估碗麵同碗翅好大碗咩   當堂搞到我尷尷尬尬   講真   如果飲埋杯熱古古力就真係勁   所以就咁拎包粉就算喇 ~

每日一噏

人老了   突然好想睇番細個睇嘅卡通片嚟回憶一下!!好似星仔走天涯 + 黃金戰士 + 千年女王 + 電子神童 + 銀河鐵路 999 + 忍者小靈精 + 淘氣小雪兒 + 我係小忌廉 + 叮噹 + 我愛莎莎 + 足球小將 + IQ 博士咁   仲有好想食番筷子糖 + 可樂孖條 + 眼鏡朱古力 + 可樂汽水糖 +印水紙香口膠呢   好老餅呀 ~

叉燒燒鴨飯 (外賣) ( JUN-2008 )

尋日瞓到 4 點幾先起身   所以里奧大人又係自己買車仔麵番屋企食   而我就求其食個腸仔包頂住個肚先 ~

一路睇電視一路中下中下   又中到 7 點   里奧大人就去大家樂買叉燒燒鴨飯番屋企食   而我就求其食幾啖算喇 ~

尋晚做賑災籌款節目   所以無得睇獎門人   個人都仲係好眼瞓   所以 9 點半就瞓覺 lu ~

~~~~

今朝又係毛毛雨   好悶啦 ~

無咩胃口   求其食奶油多 + 奶茶 ($13) 就番菇場   又係吽菇 ~

晏晝同里奧大人 Share 食方魚肉碎蠔仔粥 + 熱柚子蜜 ($34)   無啦啦又落雨   所以食完即刻番公司喇 ~

Cafe Polanka @ 大埔 ( JUN-2008 )

尋日無咩點做嘢   淨係食完又瞓   瞓完又食咁 ~

星期六好多人會出街食飯   所以同里奧大人 6 點 45 分就出發搵食喇 ~

里奧大人好想食扒   所以去 Cafe Polanka 喇   Share 食海南雞飯  + 肉眼扒餐 (蒜蓉汁)   埋單($112)   第一次喺呢間 Cafe 食扒   唔熱嘅   同埋啲扒好腍   超難食呀   之得去大家樂好過呀   話哂都係鐵板上嘛 ~

番到屋企里奧大人又忙做功課   真係好想快啲到下年   因為里奧大人應該讀哂整個 MBA 課程   咁就可以好好享受每一個 Weekend 喇 ~

個人唔係咁舒服係咁瞓係咁瞓   所以無番教會   而里奧大人就自己買麥記番屋企食   之後就做機   再做功課喇 ~

元綠壽司 + 跑步機 ( MAY-2008 )

尋日里奧大人無啦啦又要北上睇廠   所以又係同我差唔多時間番到屋企   有見及此   都係唔好浪費時間煮飯   出去食好過喇   唔知點解   一到某段時間就會心思思想食壽司   所以又去元祿喇 ~

今次食好少嘢咋   食三文魚手卷 + 鰻魚手卷 + 吉列炸蝦卷 + 蠔情卷 + 素魚翅海哲壽司 + 燒雞 Pizza  ($102) 搞掂 ~

同里奧大人特登唔食咁飽   因為想番屋企食 "大記" 紅豆糕呀 ~

上次行 Jusco 第一次見啲紅豆糕有咁多同咁大粒紅豆   所以買嚟試下   真係大大粒紅豆呀   真材實料   最緊要係唔太甜   係咁易食 1/4 件已經好飽肚喇   食完抖陣就同里奧大人一齊做機喇 ~

諗住第日係 Off 會夜啲瞓   點知 11 點已經瞓咗覺 lu ~

~~~~

今朝同里奧大人 9 點幾醒咗喇   去太興食早餐   食人氣火腿通粉餐 + 花生醬厚多士   慢慢食超 Relax 呀 ~

番到屋企見里奧大人開咗部電腦又唔用   咪唔好嘥遊下 Blog 咁囉   其實好唔想遊㗎   因為驚星期一番到公司無嘢做嘛 ~

晏晝同里奧大人去茶記食 Tea   食魚皮餃魚片頭湯濛 + 豉油王炒麵 + 奶醬多 ($52)   食完去家品店買嘢就番屋企 lu   今日唔方便做機   要喺屋企休息   所以得里奧大人勁 Happy 一個人去做機喇 ~

節瓜粒粒粒粒粒湯飯 + 跑步機 ( MAY-2008 )

里奧大人正式開始忙 lu   所以放工後我會有大把時間去買嘢預備晚飯同做機   但相對要 9 點幾先可以食晚飯囉   對於我嚟講覺得好夜食呀   但又唔想一個人食先   其一要分開煮兩次   其二係里奧大人應該好期待每晚番屋企同我一齊食晚飯嘛 ~

尋晚就咁去超市買豬肉 ($11) 就得喇   非常方便   之後就番屋企換衫做機喇 ~

里奧大人 8 點半先放工   所以可以睇下電視   慢慢預備   仲可以順便拖埋地 ~

是日懶餐 : 節瓜粒粒粒粒粒湯飯

節瓜粒粒粒粒粒湯飯...將五粒 (節瓜 + 東菇 + 瑤柱 + 雲腿 + 瘦肉) 切粒備用   我驚啲湯飯無味   所以留埋東菇水同瑤柱水備用   等到里奧大人番屋企前 25 分鐘就要 Ready 煲水喇   將所有材料加東菇水瑤柱水一齊大火煲   再加少少雞粉調味就搞掂㗎喇   一鍋有瓜有肉有飯極到方便   最緊要係今次整得好好食呀 ~

食埋飯洗埋碗沖埋涼已經 10 點幾   但同自己講過要有恆心敷 Mask   所以敷埋 Mask 睇一陣電視就瞓喇   啲食物都未消化就瞓   想唔肥都幾難呀 ~

~~~

今朝又係早咗番公司   我覺得係因為早一晚諗定着咩衫   咁可以唔駛嘥咁多時間襯衫嘛 ~

早餐食芝蛋治烘底 + 咖啡 ($15)   我真係第一次咁他條食早餐   慢慢食仲可以慢慢嘆報紙添呀   食完份早餐都係啱啱 9 點咋 ~

阿 Head 唔舒服無番   所以勁他條   加上今日 Friday   仲更加 Happy ~

晏晝里奧大人同同事出街食   所以我就去 7 仔買咗蒜香撈麵 + 10 粒魚肉燒賣 ($15.5)   點解唔飽嘅 ~

真係好開心呀   因為聽日 Off 呀 ~