oliva

尋晚仲係唔想開火...加上里奧大人又同我差唔多時間番到屋企...最恐怖係佢 6 點 打黎話好肚餓...嚇到我心都離埋...因為我驚煮唔切飯餓親佢嘛...就係咁...所以就順理成章唔煮飯囉...唔關我事架

想食壽司...但又唔想食元綠...覺得佢成日靜靜雞 5 毫 5 毫咁加好鬼祟呀...三文魚加到 $12.5 喇...不過唔記得之前幾錢喎...人地 "板長" 又靚又新鮮都係 $9 碟咋...突然覺得元綠好貴咁...所以呢排唔食佢住...遲 d 順番條氣先食 

就係咁...所以去一間叫做 oliva 嘅餐廳試下...見環境好似唔錯咁...又無咩人...好似幾清靜咁...咪入去試囉

要慳錢..所以食兩個 set dinner (有麵包...湯...主菜...甜品...飲品)..燒煙豬柳配意式燒烤汁 + 香煎沙孟魚柳配菜絲蜆肉汁...初初睇好似好細碟咁...原來份量唔小...有 5 塊豬柳同埋 3 大塊魚架...不過 d 汁就絕對唔掂囉....果 d 燒汁食到想反胃...所以最後都食唔哂 d 食物...之後再黎甜品芒果布甸...我覺得好好味....所以食哂...埋單 $152...ok 啦...不過唔會有下次... 因為覺得唔好食呀

好飽好飽...所以番屋企即刻搵嘢做...就係熨衫...而里奧大人就抖一陣去做機喇

 
   

             

今朝好好天...仲有太陽添...心情都靚好多呀 

好想食飯...所以走去食糯米雞 + 咖啡 ($13)...今次好好彩...唔係太濕立立...因為我鍾意食乾爭爭嘅糯米飯

番到菇場有嘢做...好充實呀...真係連 blog 都唔得閒寫呀

晏晝都仲係好好天...所以就同里奧大人去遠 d 嘅茶餐廳食...食中式牛柳飯套餐 + 炸兩 ($43)...勁好味呀