韭菜豬肉水餃 + 腐竹糖水 ( 6-DEC-2009 )

( 6-DEC-2009  SUN )

今朝瞓到 10 點 45 分呀   番唔到教會   所以同里奧大人即刻換衫去食早餐 ~

食完就去買餸   簡樸生活我鍾意呀   呵呵   之後我就抹廚房 拖地 抹櫃 洗衫   里奧大人就自己番教會   雖然里奧大人都有幫手做家務   仍都會求其拖下地   但覺得佢拖完都唔多乾淨咁   所以多數叫佢唔好做   費事自己仲激氣呀 ~

清潔咗兩個幾鐘頭   屋企感覺煥然一新啦   里奧大人好無手尾㗎   成日拎哂啲書出嚟又唔擺番入去喎   叫佢擺呢   又話睇緊唔擺   但我擺咗入去佢又唔知喎   所以我好怕佢單獨喺屋企   因為我會強烈感覺到我會有排執囉 ~

上次里奧大人同朋友 3 點幾去飲茶   居然有位又平喎   佢知我都想去   所以今次就飲茶喇 ~

番到屋企 Hea 下   睇埋 DVD 就煮飯 lu   太耐無煮   所以都係比多啲時間自己 Ready   無謂搞到咁急嘛 ~

是日晚餐 - 韭菜豬肉水餃 + 腐竹糖水

韭菜豬肉水餃 - 材料係 $20 梅頭 + 2 扎韭菜   我買水餃皮時  話要 50 塊左右   阿婆話 1 斤差唔多   點知番到屋企有成 100 塊呀   之得睇清楚先買啦 ~

腐竹糖水 - 晏晝見有時間   所以就煲啦   皮膚好乾呀   真係要補補先得喇 ~

君滬餃子大王 @ 大埔 ( 5-DEC-2009 )

( 5-DEC-2009  SAT )

星期六超開心   車程又順   又可以慢慢食早餐   爽呀 ~

今日真係好爽呀   估唔到老闆佢哋無番   發達喇 ~ 

諗住今日番屋企休息   點知診所話媽咪報告出咗可以拎走   到覆診時比主診醫生睇就得   感謝神   媽咪個肺真係無事呀   為免媽咪心掛掛   所以都係同里奧大人拎報告喇   咁就 Make Sure 話比媽咪知真係無事啦 ~

同里奧大人拎完報告就行去尖沙咀食米線   依家呢間米線店走國際化定啦   問佢拎隻杯都要講英文   搞笑囉   不過都啱嘅   因為咁啱見到有個印度人食米線   問人拎 Fork 呀   如果唔識聽都幾搞笑 ~

等食期間   里奧大人無啦啦拎走張 Menu 放喺衫袋   我問佢拎嚟做乜   佢話得閒拎出嚟睇下喎   唔好嚇我啦   睇 Menu ?!   同我無嘢講 ?!   哈哈 ~

食完行陣   見到有車仔買鹹酸濕零食呀   見到有甘草欖   即刻買嚟食   希望食完個喉嚨會舒服啲   不過依家貴咗啦   之前每款都係 $5/包   依家要 $10 喇   好貴呢 ~

諗住睇戲   點知又未上晝   但超級口渴呀   所以去海港城嘅麥當勞坐下   食埋個兒童餐   好耐無食薯條   覺得份外好味呀   仲有小丸子送喎   我以前好鍾意小丸子㗎   食兒童餐又幾着數喎 ~

原來商場做緊 "珍藏玻璃樽" 展覽   所以又影下相   之後就拎報告比媽咪喇 ~

喺媽咪屋企坐咗個幾鐘就走 lu   同里奧大人又未餓喎   去到屋企附近食少少嘢算喇 ~

呢排病到無哂心機   估唔到今日無啦啦會出街   里奧大人又肯同我一齊頻頻樸樸喎   所以真係好開心呢 ~

住家飯 @ 媽咪屋企 ( 4-DEC-2009 )

( 4-DEC-2009  FRI )

今朝有胃口喇   所以食米粉   呢個係餐嚟㗎   但驚太多食唔哂   所以要少米粉同走包   咁就啱啱好喇 ~

又係忙   真係好攰   好在呢排唔駛煮飯   如果唔係真係好辛苦呀 ~

今日里奧大人見完工就陪媽咪照肺部 X-Ray   不過照完就可以走   如果無事就唔會打嚟   有事就會即寫紙去醫院咁囉   之前打去又話即刻知結果嘅 ~

晏晝買嘢番菇場食   其實都無乜心機食   因為唔知媽咪報告係點呀 ~

等真係最辛苦嘅一件事   好在里奧大人打嚟話無事   安樂哂 ~

夜晚番媽咪屋企睇下佢先   因為佢之前比醫生嚇到好驚   呢晚姑奶帶埋 2 個月大嘅貓貓一齊探媽咪   好熱鬧呀 ~

( 1-DEC-2009 ) + ( 2-DEC-2009 ) + ( 3-DEC-2009 )

( 1-DEC-2009  TUE )

今朝攰到一隻嘢咁   又每月一到  求其食件奶油多算喇 ~  

今次又唔係話太痛   感恩   唔知關唔關之前飲益母草同八珍湯關係呢 ~  

晏晝無胃口   只係想瞓覺   帶住口罩瞓覺都幾辛苦 ~ 

本來想番屋企唔探媽咪    但估唔到里奧大人話要探媽咪   仲買埋報紙同麵包比媽咪   真係好感動呢 ~

今晚家姐會遲啲到   好在我同里奧大人都可以陪下媽咪   佢水腫退哂   感恩呀   但係個肺有啲陰影   唔知乜嚟   實在擔心呢    但醫生提議出去照 X-Ray   因為醫院要排到 21 號先照   不過醫生又無話幾時出院   又無比資料我哋   都唔知想點 ~

陪到媽咪 6 點 45 分就走喇   實在唔多舒服   加埋又傷風咳   都係早啲走   一陣傳染埋比媽咪仲煩 ~

 
今次豪呀   同里奧大人 Call 的番屋企   唔駛行又可以好快番到屋企休息   爽呀 ~

 

我無胃口啦   超勁想反胃   所以叫里奧大人自己買嘢番屋企食算喇   我就沖涼瞓覺 ~  

( 2-DEC-2009  WED )

頂唔順呀   其實唔係好痛好痛   但個人真係好攰好攰   都係請假休息    瞓到 6 點先醒   再去睇醫生   咁就一日 lu   不過瞓夠真係舒服好多   但都無胃口   只想勁飲嘢 ~

媽咪今日出院   所以我個心都安樂哂   但肺部有陰影   所以要出去照 X-Ray   照咗有事就即入院   無事就等覆診   無哂心機 ~

求神保守憐憫醫治媽咪   讓媽咪可以每日都健健康康咁生活   撇除一齊嘅憂慮   奉主名求   阿門 ~  

( 3-DEC-2009  THU )

今朝番工啦   個人有啲攰   不過應該無問題嘅 ~ 

早餐食咗 1/4 咋   真係無胃口   唔知係咪 2 日無食嘢   一食嘢就超頂胃呀 ~

番到菇場我伏喺枱   咁啱阿 head 見到   以為我好辛苦   其實咁啱我伏喺枱度祈禱   佢話我無嘢做就乜嘢啦   佢意思係休息   因為當時有同事喺度   所以唔方便叫我休息   好感恩我有位咁好咁好嘅阿 Head 呀 ~

家姐拎漏咗媽咪封信   Book 唔到醫生   所以我晏晝要同媽咪飲茶   順便拎埋封信   估唔到婆婆同工人都喺度   不過我都無胃口   更加無心情影相   實在太攰啦 ~

感冒未清又咳真無超辛苦   頭暈暈同超反胃   第一次咁超反胃呀   所以又要打的番屋企囉   肉赤到爆呀 ~

呢晚又無乜胃口   叫里奧大人自己買水餃麵同菜番屋企食   咁我就食佢少少菜啦   好過無嘢落肚嘛 ~

新之食 @ 官塘 ( 30-NOV-2009 )

( 30- NOV-2009  MON )

休息咗一日   算係好啲啦   但仲有咳同少少傷風   如果今日係假期就好啦   唔駛請假又可以休息 ~

無乜胃口食嘢   但唔食又驚餓喎   所以慢慢食   唔係食到反胃就慘喇 ~

點解咁㗎   仲係忙嘅   唔病唔忙喎   仲諗住 Hea 下咁過家嘛 ~

晏晝食燒賣 + 腸粉     本來唔想加辣醬   但唔加又唔好食喎   點知食完個喉嚨痕到呢   係咁咳咳咳   撞鬼 ~

放工即走 lu   要去醫院探媽咪   原來媽咪係肺積水   所以氣速同腳腫   里奧大人去到即同媽咪按 腳   即刻消腫好多   感恩   無幾耐家姐又嚟埋   好在可以幾個人一齊探咋   最怕要輪住嚟探   我覺得時間會唔夠囉   希望媽咪快啲出院啦   咁就唔駛咁擔心呀 ~

7 點 45 分走 lu   一齊去官塘食嘢   食完各自番屋企休息 lu ~

三色椒洋蔥燒汁豬扒 ( 29-NOV-2009 )

( 29-NOV-2009  SUN )

諗住瞓到 11 點   點知 9 點幾已經醒咗瞓唔番   同埋鼻塞瞓覺真係好辛苦   不過里奧大人仲慘    話我瞓覺啲鼻鼾聲好似象叫咁喎   大聲到佢要塞耳仔先瞓得着呢 ~

本來去太興食早餐   但要等 11 張枱   咪搞啦   我唔舒服想快啲食完番屋企休息呢 ~

番到屋企食藥   個幾鐘頭後就見藥力   但瞓咗一個鐘就醒   唔再瞓 lu   睇下報紙好過 ~

 
兩點幾食 Tea   但其實無乜胃口    不過里奧大人都係時候食嘢㗎喇   無理由要佢餓家嘛 ~ 

食完去街市買餸買生果   假期多數就係咁過㗎喇 ~    

是日晚餐 - 三色椒洋蔥燒汁豬扒

三色椒洋蔥燒汁豬扒 - 三色椒同洋蔥切絲   豬扒切條   再加啲燒汁去煮   估唔到幾好味噃 ~

節瓜鹹蛋江瑤柱瘦肉粒湯飯 ( 28-NOV-2009 )

( 28-NOV-2009  SAT )

星期六多數瞓多廿分鐘先起身   因為知道車程比例暢順呢 ~

早餐多數食飽啲   因為番到屋企要 2 點呢 ~

星期六半日休息   諗住好好瞓一覺   點知家姐話入嚟一齊去 Jusco 掃貨  咁好啦   同埋里奧大人一齊去大家樂食 Tea 就去 Jusco 掃貨喇   本來里奧大人齊去㗎   行唔夠 10 分鐘樣都變埋   睇得出唔多願   所以叫佢自己番屋企先   唔好阻頭阻勢影響我哋買嘢嘅 Mood 呢 ~

星期六多數喺屋企煮飯   其實感冒仲未好番想   里奧大人話不如出街食   但我諗唔到食乜   又唔想出街食   所以簡簡單單煮個湯飯算喇   點都有益過出街食呢 ~

是日懶餐 - 節瓜鹹蛋江瑤柱瘦肉粒湯飯

節瓜鹹蛋江瑤柱瘦肉粒湯飯 - 星期六煮嘢都有心機啲   突然想食湯飯   但今次買 2 個細節瓜要十二蚊呀   其實真係幾貴  不過想食無辦法呢 ~