佳餚坊 @ 紅磡 ( 24-DEC-2021 )

椒鹽豬扒飯 ($48) - 好惹味   勁鍾意呀

蜜桃咕嚕肉 ($68) - 呢期好鍾意食咕嚕肉   呢個都好味

( 24-DEC-2021  FRI )

尋晚去 2 次廁所   之後里奧大人鬧鐘響   但佢係番晏晝囉   我尋晚已經叫佢燜鬧鐘   真係比佢激死 ~

個天灰灰暗暗又落毛毛雨    不過唔係凍   係濕濕立立感覺   超市唔舒服呀 ~

早餐食奶醬多   勁呀   仍然食佢   哈哈 ~

菇場都唔忙喇   估唔到今日仲可以收 4 點半   實在太感恩大開心喇 ~

今日唔想出街   又無咩胃口   所以食 Flakes + 乳酪就算 ~

4 點半準時走人   即刻去接里奧大人放工 ~

感恩好快有車   但去到仲要等佢一陣   哈哈 ~

勁餓呀   所以 5 點半都要食晚餐呢 ~

食完就去九龍灣行陣   之後同媚媚一齊番聖誕節崇拜   好耐無見佢啦   所以好開心呀 ~

今晚弟兄姊妹見到里奧大人   都捉住佢傾偈   佢哋又係太耐無見   哈哈 ~

9 點鬆啲就崇拜完畢各自歸家   媚媚都要番屋企喇   因為聽朝佢要早起身預備 Party 食物 ~

番到屋企都即沖涼   睇多陣 Youtube   今晚 11 點幾都瞓喇   聽朝要開工呢 ~

麻辣花生炒雞粒 + 燒汁洋蔥炒牛肉 + 豆苗 ( 23-DEC-2021 )

( 23-DEC-2021  THU )

今朝感覺無咁凍   但就超級潮濕啦   最怕咁樣   啲衫唔乾個人又攰   哈哈 ~

早餐食奶醬多   尋日食完芝腿治勁飽   睇嚟又要奶醬多週了 ~

菇場忙呀   最鍾意咁充實過日子   哈哈 ~

Lunch Time 出去行個大圈   喺條街見到阿怪   佢都見到我   之後佢停咗 3 秒就過對面馬路   真係奇奇怪怪   明明喺呢條街睇緊食店嘅餐廳   對面係一間食店都無嘛 ~

行到已經 12 點 10 分   所以買牛雜麵   因為想快啲番菇場 ~

忙咗陣就 Hea 過   可以準時放工 ~

里奧大人打嚟話起碼 7 點先放工   咁我去徑步先 lu ~

番到屋企就熨 2 機衫   等埋里奧大人打嚟先預備晚餐   今晚 8 點先食得   算好夜喇   哈哈 ~

是日晚餐 - 麻辣花生炒雞粒 + 燒汁洋蔥炒牛肉 + 豆苗

麻辣花生炒雞粒 - 之前特登買 2 包黃飛鴻麻辣花生   咁用嚟炒雞丁都好味㗎   最緊要方便 ~

燒汁洋蔥炒牛肉 - 用一個洋蔥加牛角燒汁炒兩炒就搞掂   懶人首選 ~   

豆苗 - 大前日買㗎   再唔食就要掉呢 ~

洗埋碗就開機洗衫   之後沖涼休息 ~

聽陣歌又 11 點   係時間瞓喇 ~

薄餅 + 炸雞 + 肉醬意粉 ( 22-DEC-2021 )

( 22-DEC-2021  WED )

呢排真係瞓得麻麻哋   半夜熱醒咁   可能真係體內太熱喇 ~

早餐食芝腿治烘底   唔餓真係千奇唔好叫   食到 9 點都未食完   哈哈 ~

菇場忙呀   好快又 Lunch Time ~

行咗一大個圈   之後買一打蛋撻比茶記啲人食   老闆見到話妳做咩啫 ?!   我話大家開心下囉   哈哈 ~

今日唔係咁餓   差唔多 12 點 45 分先開餐 ~

仍然忙   實在太好 ~

放工即走   今晚雖然就咁焗熱晚餐   但都要時間   我又細焗爐   同埋唔想用光波爐   所以要排住隊焗熱   都要 6 點半先可以開餐呢 ~

連食兩餐炸雞同 Pizza 真係好夠   今晚都食唔到個肉醬意粉   又要聽晚再食 ~

洗埋碗抖陣就一齊去徑步   咁食法真係點攰都要去徑步啦 ~

開機洗衫就沖涼   食埋個橙就休息 lu ~

今晚睇陣 Youtube   差唔多 11 點都瞓   天氣濕濕立立   個人好攰咁 ~

經典甜辣脆雞 & CHUBBY'S PIZZA (外賣) ( 21-DEC-2021 )

今晚真係勁有驚喜

經典甜辣脆雞 - 我食食下就問里奧大人   點解你識買有骨嘅 ?!?!   佢話睇我 Blog 呀   唔係真係唔知邊間買喎   答案好搞笑   哈哈

波霸奶茶 - 里奧大人話我鍾意飲   所以買比我   佢做咩今日買齊哂我鍾意嘅嘢呀   哈哈   確實非常之感動感動

花生糯米糍 - 里奧大人話冬至無湯丸食   特登今朝去買個糯米糍代替喎   雖然個皮唔係好煙韌   但就好多餡   啲花生仲係脆卜卜   勁好味

食剩 4 件

手撕一件雞比里奧大人做餸   哈哈

里奧大人帶半盒做 Lunch Box

( 21-DEC-2021  TUE )

呢三晚真係不斷咁發夢   尋晚仲勁   我係司琴   但要一路食麥提莎先可以彈到琴   呢下勁怪   哈哈哈哈 ~

今朝凍咗好多   我都要着長袖有帽 One Piece 加 Leggings 再加件長褸   尋日出去真係凍到驚咗   今日一定要長袖呢 ~

早餐食奶醬多   飲完檸茶又胃痛   但我晏晝會飲咖啡   無可能兩餐都飲嘛   嗚嗚 ~

菇場都忙   但勁有 Holiday Mood 唔想做住   哈哈 ~

估唔到今日放 4 點半   不嬲放開 4 點家嘛   不過算啦   好過無得放早 ~

今日菇場請食冬至午餐   實在太開心~

我食肉眼扒

4 點 20 分西瓜話有嘢宣佈   最搞笑第一句話係咪覺得奇怪點解今日放 4 點半唔係 4 點呢 ?!   咁即係個個同事都有同樣問題   哈哈 ~

之後宣佈話今年有 Special Bonus 同加人工   之後仲話新嘅人工係由今年7月開始   今個月會 Date Back   真係超級勁感恩   因為無諗過會加人工同 Bonus 㗎   今日真係個個都開開心心咁放工呢   哈哈 ~

番到屋企都可以抖下   因為里奧大人話今晚叫外賣 Pizza ~

里奧大人今日放 4 點   但差唔多 5 點幾   佢都無打比我   以為佢仲喺公司   之後佢話差唔多番到屋企 ~

一開門見到佢拎一盒嘢同杯珍珠奶茶   我以為佢買 Cheese Cake 比我食   原來係炸雞   真係超級驚喜呀 ~

我問做咩買炸雞呀 ?!   一陣 Pizza 餐都有炸雞喎   佢話今日做節想我開心   知我好鍾意食呢間炸雞所以去買 ~

當下真係超級感動   佢好少會主動買嘢比我食㗎   但如果佢知我鍾意食就會記住   下次同我食咁㗎咋 ~

6 點左右就 Pizza 到喇   我同里奧大人講話之得唔叫 Pizza 啦   因為真係覺得太多   佢話唔緊要啦   聽晚再食囉   難得今日放早要休息下嘛 ~

食完抖到 7 點幾都一齊去徑步   感恩無落雨咋   今晚咁 Heavy   真係要郁下囉 ~   

沖埋涼就睇陣電視   之後就溫書 lu ~

今晚 11 點都瞓   好似好攰咁 ~

白蘿蔔炒臘腸 + 煎雞扎肉 ( 20-DEC-2021 )

( 20-DEC-2021  MON )

又係半夜去咗 2 次廁所   仲要係咁發夢   但感恩係起身都精神呢 ~

天氣涼咗好多   天色又灰灰暗暗   可能今個星期都係咁 ~

早餐食奶醬多   今朝其實早咗落車   但好鬼凍呀   所以唔行咁遠買早餐 lu ~

菇場忙呀   時間過得好快   最鍾意星期一時間過得快呢   哈哈 ~

家姐打嚟話本身想同我食飯   不過佢突然要去買嘢   所以唔過嚟   最搞笑佢講咗幾次話記得食熱嘢 ~

條街超級勁凍呀   我今日仲着短袖 One Piece 加薄外套   所以要急步行去買橙   之後買埋鯪魚球米就番菇場喇 ~

仍然忙呀   不過放工都即走呢 ~

番到屋企都即刻預備晚餐   我估里奧大人都開始餓㗎喇 ~

是日晚餐 - 白蘿蔔炒臘腸 + 煎雞扎肉

白蘿蔔炒臘腸 - 尋晚食剩條白蘿蔔   又唔想就咁灼熟   所以即加兩條臘腸   再用蠔油生抽調味   估唔到好好味喎   最緊要夠簡單   又可以清下啲臘腸   哈哈 ~

煎雞扎肉 - 原來我之前拎錯咗條雞扎肉   仲以為冬蔭味道   好在只係拎錯呢條咋 ~

洗完碗就開機洗衫   今晚落大雨呀   所以唔徑步喇 ~

沖埋涼就食木瓜   真係唔多人接受到陣味   我啲同事話煲湯可以   直接食就唔想喎   呵呵 ~

呢兩晚聽歌   用里奧大人送比我嘅貴 HEADPHONE   但好奇怪成日係手機出聲   我其實勁驚   因為我真係好少用佢聽歌嘛   之後同里奧大人講啦   原來佢換咗條線   話想試下係咪真係壞   咁我再話校唔到大細聲嘅   佢話用 I-PHONE 先得㗎   我話咁就好喇   因為我成日以為壞咗呀   哈哈 ~

今晚點都要 11 點 15 分先瞓   因為要等 Thekking  K-POP 偶像個人牌名結果    好開心 Binnie 贏咗第1位   我終於可以抖下   哈哈 ~

聽歌聽到 11 點半先瞓   但其實又唔係好眼瞓   不過就唔想太夜瞓咁囉 ~

菜肉餃拚雲吞 & 炸魚皮 (外賣) ( 19-DEC-2021 )

( 19-DEC-2021  SUN )

今朝9 點半起身   之後徑步   買埋麵包就番屋企 lu ~

食完就拖地   沖埋涼抖陣就出發喇 ~

去里奧大人公司幫一陣手   之後就番崇拜 ~

因為要等里奧大人放工   咁同阿妹 & B San 傾下偈啦 ~

同里奧大人差唔多 1 點左右食 Lunch   之後佢要去開會   我就買完餸先番屋企 ~

今日搭車唔駛錢   不過都唔會有地方想去   因為肯定超級勁多人 ~

番到屋企都要沖涼   今日都好熱咁 ~

原來都 3 點半   所以抖陣都要溫書喇 ~

里奧大人 5 點幾開完會   感恩今晚咁早呢 ~

今晚都要 6 點半開餐   因為唔係話太餓 ~

是日懶餐 - 菜肉餃拚雲吞 & 炸魚皮 (外賣)

菜肉餃拚雲吞 - 今日用 1 條大嘅白蘿蔔同粟米做湯底   食到一半已經好脹胃   下次真係用細條嘅白蘿蔔算喇   嗚嗚 ~

炸魚皮 - 明知食唔哂都要買呀   因為實在太想食   所以又係一連幾晚都要食   哈哈 ~

洗埋碗就去徑步   呢排腳板底痛   一係膝頭哥痛   但真係好想徑步囉   所以有時都唔會同里奧大人講   唔係佢一定唔比我去啦 ~

沖埋涼就睇 Youtube 喇   里奧大人 11 點瞓   我就 11 點幾先瞓   想聽多一陣歌呀 ~

素春卷拚腐皮卷 & 素餃子拚齋滷味 (外賣) ( 18-DEC-2021 )

( 18-DEC-2021  SAT )

尋晚係咁發夢   臨起身前都仲發緊   所以好似無瞓過呀   哈哈 ~

我喺夢境係走嚟走去   唔知係咪咁   今朝好餓呀 ~

早餐食丁米餐   辣辣哋好味呀 ~

菇場唔忙啦   但無啦啦勁眼瞓   初初以為尋晚瞓得唔好   但諗諗下頭先食早餐都好精神   可能我飲咗啲味精湯呀   因為係突然間勁眼瞓咁囉 ~

好在同阿花 Whatsapp 傾偈   又睇下靚相   無咁眼瞓   哈哈 ~

咁我去影印   船頭話原來我有番工   最搞笑佢哋要做 Chop  佢同阿花講話星期一先問我做唔做 Chop   但船頭係坐喺阿花隔離咋喎   咁都睇唔到我 ?!

今朝溫總又以為我今日 Off   因為佢早番過我   做咩今日個個都睇我唔到咁嘅   哈哈 ~

放工去一田買齋   之後去埋譚仔買外賣就番屋企喇 ~

食完就執衫   又捐咗一袋衫   實在太爽   希望下年唔好再買衫啦 ~

執完就熨衫   之後里奧大人就熨佢啲衫   因為我唔鍾意熨裇衫西褲 ~

做埋小清潔就休息   聽日可以主力溫書了 ~

今晚 6 點半左右都可以開餐   我都好耐無星期六喺屋企煮嘢喇   哈哈 ~

是日懶餐 - 素春卷拚腐皮卷 & 素餃子拚齋滷味

素春卷拚腐皮卷 - 我唔係咁鍾意食有芋頭嘅春卷   唔知點解 ~

素餃子拚齋滷味 - 素餃子真係勁好味   可能多餡   口感勁正 ~

洗埋碗就同里奧大人徑步   依家佢好積極徑步啦   哈哈 ~ 

沖完涼都休息   難得唔駛番學喺屋企 ~

今晚睇 Youtube 睇到 11 點幾先瞓   不過聽日可以晏啲起身就無所謂呢 ~