蠔油燜冬菇雞膇 + 掛爐燒鴨 (外賣) + 菜心苗 ( 26-JAN-2023 )

里奧大人中午食剩嘅豉椒涼瓜牛肉

( 26-JAN-2023  THU )

尋晚去完廁所   好難先瞓得番呀   不過預咗假期後番工係咁呢 ~

早餐食車打芝士米方包   太少芝士粒   感覺同食方包無咩分別   哈哈 ~

PAPER STONE 車扛芝士米方包 (厚切 4 片) ($28)

一番到菇場即刻大清潔   真係唔明點解啲同事可以唔抹   雖然無開窗   但都好多塵家嘛 ~

送比阿花同船頭   佢哋好鍾意呀

12 點左右就影大合照同切燒豬   食完就再去飲茶   勁開心呀 ~

我話食年糕   船頭話食年糕 ?!   佢哋話估我唔到呀   因為多數估我會食蘿蔔糕   哈哈 ~

食到一半   大家齊齊影相   

食完就番菇場派利是   之後放工喇   本身話放 1 點   但飲完茶都已經 2 點   呵呵 ~

番到屋企放低個袋就去睇醫生   我應該生眼挑針   但就係初初起咁   所以只係搽藥膏就可以   之後到個胃   反而睇咗好耐   因為我唔係胃酸倒流   背脊又無痛   似胃炎   我之前夜晚係空肚食消炎藥同抗生素   之後先開始痛   所以開一星期藥比我   如果再痛先覆診   足足睇咗半個鐘   醫生真係好細心呀 ~

睇完就去買麵包買餸   番屋企放低啲餸就去做機   不過都只係做 20 分鐘   頭先行嚟行去好攰呀 ~

番到屋企即開機洗衫再預備晚餐   里奧大人 5 點幾放工   咁叫佢沖涼先喇   因為起碼 6 點半先食得 ~

是日懶餐 - 蠔油燜冬菇雞膇 + 掛爐燒鴨 (外賣) + 菜心苗

蠔油燜冬菇雞膇 - 尋日燜定   今晚蒸熱就搞掂 ~

掛爐燒鴨 (外賣) - 難得早放就去買啦   又可以做兩餐真係唔錯㗎   哈哈 ~

菜心苗 - 今次啲菜心苗好甜呀   不過都係貴囉   唔知新年之後會唔會買啲呢 ~

洗埋碗就沖涼   之後就一路食紅豆吉士批同扭扭薯條   一路睇 "Blind" 大結局   今次無爛尾實在太好了 ~

我最驚係支白色藥水   但唔飲又唔得 

睇多陣 Youtube   今晚 11 點唔夠都瞓覺先喇 ~

蜜糖焗雜丸 + 菜心苗 ( 25-JAN-2023 )

 ( 25-JAN-2023  WED )

今朝瞓到 10 點自然醒   咁起身整早餐喇   今朝食芝蛋治烘底   但只係白鑊烘一烘麵包呢 ~

CANTEVOLE 買的   4 片只係 $12 咋   同埋都幾軟熟

食完就小清潔廚房   其實都只係抹嘢   哈哈 ~

開機洗衫就沖涼   抖陣就同里奧大人一齊靈修 ~

差唔多 1 點半就去麥記買午餐   本來今日唔出街   之後里奧大人又話聽日要食麥記   咁我話一齊食啦   所以就一齊出去買午餐呢 ~

又係食剩 2 件紅豆吉士批同 1 盒扭扭薯條

一路食一路睇 "Blind"   真係好少咁追劇   因為真係好鬼緊張   好想快啲睇哂呀 ~

里奧大人話想食牛肉乾   咁焗熱比佢食啦

難得假期   所以 5 點左右就燜餸   咁聽晚蒸熱就食得   差唔多 6 點搞掂就即煮晚餐喇 ~   

是日懶餐 - 蜜糖焗雜丸 + 菜心苗

蜜糖焗雜丸 - 終於清哂啲丸   不過食唔哂   又要留番聽晚食 ~

菜心苗 - 今晚食哂最好   好驚再唔食就變冰呢 ~

洗埋碗抖到 8 點左右就同里奧大人做機   其實諗住 5 點做   但睇劇睇到忘記咗   哈哈 ~

睇 "Blind" 睇到 11 點   里奧大人想話睇埋大結局   不過我話聽日番工唔睇喇 ~

蒸蘿蔔糕 + 菜心苗 ( 24-JAN-2023 年初三 )

仲未食呀   希望唔好咁快壞啦

  ( 24-JAN-2023  TUE )

尋晚係咁發夢   有個夢係家姐懶得行樓梯   居然由 2 樓跳落 1 樓再跳地下   真係臨瞓前睇緊張嘅劇   瞓覺係差啲   所以想快啲睇哂   哈哈 ~ 

今朝 9 點半都起身   早餐食蒸蘿蔔糕   今年有 4 底蘿蔔糕呀   真係連續幾日都要食囉 ~

食完就睇 Youtube   之後沖涼洗頭   差唔多 12 點半就去 AEON 喇 ~

想食小籠包   不過無位   所以里奧大人話去食 Pepper Lunch   感恩有卡位坐添呀 ~ 

里奧大人幫我影相   話要影到煙霧離漫嘅感覺   即係好似鬼   哈哈哈哈

食完去 AEON 行陣   買利是封同幾個 File 就番屋企喇 ~

呢期鍾意小新同大叔   所以要買

利是封有 8 折  

之後又即刻睇 "Blind"   一睇就睇 3 集   睇到 5 點幾就要預備晚餐 ~

依家到里奧大人要一路睇劇一路食嘢   好在頭先買咗原味麻糬   因為唔熱氣   哈哈

是日懶餐 - 蒸蘿蔔糕 + 菜心苗

蒸蘿蔔糕 - 真係唔想煎糕   我覺得抹廚房耐過煎   哈哈 ~

菜心苗 - 點都要食條菜   反正淥菜都好簡單 ~

洗完碗就沖埋涼   之後食芝麻糊 ~

又睇 "Blind" 喇   今晚都係睇到 11 點幾先瞓 ~

新年盆菜 @ 姑奶屋企 ( 23-JAN-2023 年初二 )

我本身無諗住食嘛   所以無影相   但後尾話留低食先再影   所以面嗰層都比人夾哂了   嘻嘻

我最鍾意食鴨掌

同里奧大人 Share 食

姑奶話鮑魚入味   所以即刻叫兒甥仔夾比我   真係好感動   但其實佢好多時都會叫兒甥仔夾嘢比我食   搞到我好似好高輩份咁   哈哈

掛住同兒甥仔傾偈   所以索哂啲糖水

 ( 23-JAN-2023  MON )

今朝同里奧大人瞓到 11 點 20 分先起身呀   實在太誇張   因為真係好少瞓到咁晏囉 ~

拿拿聲梳洗就焗熱麵包喇   早餐食四味芝士圓法包 ($23)   喺 AEON 嘅 CANTEVOLE 買㗎   都好味道 ~

估唔到有芝士醬   我鍾意呀

食完就休息下   睇陣 Youtube 又到 2 點半   咁要食 Lunch 喇   因為晏啲要出去   唔可以太遲食呢 ~ 

家姐喺八珍買嘅蘿蔔糕

里奧大人喺公司拎嘅鴻福堂蘿蔔糕

佢哋要快高長大呀   哈哈

差唔多 3 點先食 Lunch   食完抖陣就沖涼 ~

4 點左右就出發去大埔   巴士開得慢加上要等小巴   差唔多 6 點先去到姑奶屋企 ~

見到姑奶就傾下近況   都傾咗半個鐘   好在佢哋未食得住   哈哈 ~

之後我就去玩兒甥仔女啲細路喇   其中一個只係 4 個月人仔   真係要即抱上手   佢一望住我就笑呀   真係冧死人   一係想喊想喊個樣就最搞笑   所以我抱咗佢好耐呀   哈哈 ~

我成日話兒甥仔真係大個哂   我依家企佢哋中間係凹落去   之後我話真係老喇   佢話妳邊度老呀   係我哋高大咗啫   哈哈哈哈   呢個兒甥仔係特別乖   但細個就最惡   所以人真係會變   哈哈 ~

本身諗住唔食飯   但實在太耐無見想傾偈   所以都係食埋飯呢 ~

又係諗住 8 點走   點知食埋湯丸   差唔多 9 點先走呀   明明諗住最早走   點知係最遲走   哈哈 ~

今晚同姑奶們同兒甥們傾咗好耐偈   真係好開心 ~

我覺得真係要更加愛佢哋   呢個感覺今晚係好強烈   因為我真係感覺到佢哋係好關心我同里奧大人   原來佢哋知道好多嘢   只不過無成日見面   好多時掛住我哋但傾唔到偈 ~

加上尋晚見到里奧大人咁愛我家姐   我都要學里奧大人咁愛佢啲家姐   呢個感覺   我知道係神要我改變   我都願意改變   由始至於我都覺憎人係好痛苦   所以今晚真係減省咗好多呀   感謝神 ~

兒生女整嘅鯉魚年糕   仲有蘿蔔糕   我話屋企已經好多蘿蔔糕   但佢係都要比我   咁我推唔到啦

番到屋企都 10 點   所以開埋機洗衫就即沖涼再食糖水 ~

頭先無咩食嘢咁   所以想食綠豆沙呀   哈哈

食食下糖水嘅時候   有個 Whatsapp 語音同我講恭喜發財 身體健康 青春常駐   我以為係啲傳銷公司   之後望真啲個頭相   原來係家姐前工人   真係無諗過佢記得我呀   同埋佢廣東話真係無退步過   呢下先勁   哈哈 ~

今晚仍然睇 "Blind"   不過都只係睇 1 集   因為唔想太夜瞓喇   睇完都 11 點幾嘛 ~

特大元貝刺身壽司 + 赤蝦三文魚子壽司 + 握壽司特上什錦拚盤 + 芥辣八爪魚 (外賣) ( 22-JAN-2023 年初一 )

開餐

 

特大元貝刺身壽司 (25% 折扣後 $62.10) - 家姐同里奧大人鍾意食

赤蝦三文魚子壽司 ($29.80 原價 $39.80 ) - 我見咁抵真係忍唔住買呀   同埋家姐可以陪我食囉

握壽司特上什錦拚盤 ($99.90) - 里奧大人食熟嘅   其他就我同家姐呢

芥辣八爪魚 ($44.90 原價 $48) - 份量都多㗎   所以下次都會買   初初諗住壽司飯可能好大件   咁加芥辣八爪魚咪當壽司咁食囉   佢哋都話我咁都諗到   哈哈

家姐比嘅蛋散 & 開心果

飯後甜品 - Chateraise 買嘅豆餡大福 ($12) & 艾蒿大福 ($12)

個皮都煙韌   同埋好多紅豆餡   呢個價錢算抵食咯

( 22-JAN-2023  SUN )

尋晚半夜個胃痛到呢   痛醒再瞓又痛醒   我覺得好似無瞓過咁呀   所以今朝都唔同里奧大人一齊番工喇 ~

9 點起身食早餐   抖陣就沖涼洗頭 ~

早餐食朱古力瑞士卷   其實無咩胃口   但唔食又唔得喎 ~

    

里奧大人 10 點先打嚟叫我起身   奇怪點解咁遲打比我嘅 ?!   原來佢想我瞓晏啲   佢真係成日要我瞓覺㗎   好搞笑 ~

不過我都出發番教會喇   今朝崇拜 12 點左右完畢   咁我都番屋企抖抖先 ~

接近 1 點就落 Order   之後就即刻去接家姐喇   時間啱啱好 ~

家姐第一時間係比生日利是比我   但其實仲有個幾月喎   今次又係超級重手   不過我話到佢生日又係比番佢   根本係比來比去   哈哈

家姐又比芋蝦同蛋散比我   其實我本身話唔要   但係都比我

我同家姐今年真係好忍到手   只係買 1 盒大嘅蘿蔔糕   佢就買 1 盒多多鳥結糖仲要係 2 款味道   仲分埋一半比我   始終真係買完食唔到又過期   一係格硬食到見到都唔想再食咁   所以咩都買少少最好囉

手指牛油果 $68/磅   我買半磅比家姐試下先

花街真係兒時回憶   有一排係無出過   所以之後一出都會買嚟食呢   今次我每樣拎 1 粒   其他比哂家姐   佢可以同工人 Share 食最好   因為我一個人食肯定食唔哂

多咗 2 種新款嘅   但印象中好似唔止咁少款   但 $48 咁多粒真係好抵   哈哈

買比家姐食   佢又話唔要

里奧大人 1 點 45 分就番到屋企   可以開餐喇 ~

我咃食二人大批套餐 ($238) 再加雞翼

至尊大批 - 真係好耐好耐無食   仍然咁好味   但其實我哋鍾意食薄批   但無得轉囉

威尼斯迷你批 - 食剩少少   聽日再做下午茶

拿破崙蘑菇腸片焗飯 - 無食呀   留番比里奧大人今晚食   嘻嘻

套餐加配 酸甜甜雞翼 ($34/8隻) - 估唔到好味喎   雞翼 Size 都算大隻添呀

食完抖陣就搭車去婆婆屋企拜年   今年都係得大舅父一家   大食同剪髮表妹   估唔到阿姨都嚟埋   最搞笑我哋傾開有年係一齊食晚飯   我話唔係上年   因為妳都唔喺度   阿姨話 "choi"   哈哈哈哈 ~

之後同舅母傾偈   佢隻狗仔之前生 Cancer   但表妹話點都要醫佢   醫咗接近 10 萬呀   不過錢真係唔係最重要   最重要係想佢救得番   但狗仔治療嘅過程就真係相當痛苦 ~

所以到最後一隻狗仔有病嘅時候   每次接佢番屋企   都見佢係好辛苦   舅母就祈禱要是舒服咁走   佢都要捨得呢 ~

因為舅母養咗 4 隻狗仔   佢話 10 年無去旅行呀   真係好偉大   佢同舅父好多時都每人拖兩隻出街   之後狗仔年紀大   先無成日出去行   依家 4 隻都走哂   佢次次講都好傷心   呢樣我都好明白   等如朱朱走嘅時候   始終同佢一齊住過   所以嗰種心痛   真係無人會明白 ~

4 點左右舅母都要走喇   舅父話下次一定要去飲茶   但因為疫情真係無同婆婆初一飲茶   舅母又叫我得閒飲茶   我話好呀   佢笑住話唔好只係講好   係要去呀   哈哈 ~

我哋同剪髮大食阿姨都一齊 4 點幾走人   我同里奧大人去 AEON 買晚餐   家姐整完嘢又再嚟我屋企食晚餐   勁開心呀 ~

今年年初一覺得特別開心   可能年紀大   再加上疫情   覺得見到親人真係好開心   哈哈   同埋雖然一年見一次   但真係唔會有生疏感覺   真係咩都講一大餐咁 ~

買完番到屋企都 6 點幾   里奧大人就沖涼   我抖陣就要去陣接家姐喇 ~

剪髮表妹送比我同家姐嘅新年禮物 

我同家姐就每人一半唔同味道

差唔多 7 點半就開餐   又係一路食一路傾   所以喺屋企食最舒服   笑得大聲都唔會影響人   哈哈 ~

我成日話家姐工人都靚女   笑得又甜   眼睫毛又長又攣   呢樣我勁羨慕   所以我成日望佢對眼㗎 ~

里奧大人仲話見過家姐工人添   但我哋話都無去家姐屋企點會見到 ?!   之後里奧大人話有次家姐揸車嚟交收   工人抱埋 Berry   真係唔講唔記得添   哈哈 ~

原來工人個舊僱主好衰㗎   成日扣佢糧   之後仲無比番佢   又無買早餐比佢食   有時仲要佢拎 6 包大狗糧再拎埋其他嘢   真心覺得工人好慘 ~

所以依家成日有早餐食   佢都好開心   仲要係抹茶紅豆包同朱古力奶   所以佢喺家姐度做   已經肥咗 20 磅   家姐話工人會同媽咪視像通話   佢媽咪話佢塊臉做咩圓咗咁多   好搞笑   工人上次話減肥添   同我講話已經瘦咗 2 磅   之後佢自己都狂笑啦   瘦得 2 磅但之後無瘦過呢 ~

家姐講起媽咪   話媽咪回魂嗰晚   行咗 3 步再企喺我同家姐中間   咁我話媽咪唔通望埋我 ?!   之後我就忍唔住喊   里奧大人話家姐衰呀   無啦啦講呢個話題   哈哈 ~

食完就到里奧大人幫家姐按腳   佢對家姐真係超級好   係咁幫家姐按摩隻腳   又按膊頭   家姐膝頭哥腫咗   佢又係咁幫佢按鬆去   最搞笑佢將家姐隻腳放喺佢大腿   又大力喎   家姐痛到碌大對眼   再同里奧大人講話下次講聲先好抬起   哈哈哈哈 ~

家姐差唔多 9 點幾就走喇   咁我送佢搭車   佢行到半路就好開心話隻腳唔痛呀   但唔知係食咗止痛藥定係里奧大人按鬆咗   所以我叫佢下次唔好食止痛藥等里奧大人按   如果真係唔痛   就叫里奧大人教工人按   好過食止痛藥呢 ~

炸蒜照燒雞扒便當 - 我買比家姐工人嘅晚餐   佢話好食呀   因為佢鍾意食甜蛋   咁就好喇

番到屋企都即沖涼喇   之後同里奧大人睇 "Blind"   睇到 12 點先瞓呀 ~