鎮江骨 + 菜心苗 ( 23-JUL-2023 )

( 23-JUL-2023  SUN )

今朝同里奧大人食早餐   之後去佢公司幫手 ~

唔知係咪頭先熱得滯   所以去到主日學個課室   覺得超級勁凍   等我今朝仲特登拎番條絲巾出嚟添   唉 ~

之後崇拜   我直頭凍到打冷震   好在里奧大人拎件褸比我   我先叫做暖啲咋 ~

崇拜完畢就去買餸   我要行去最曬嘅地方解凍   咁見到皇太后   又傾咗幾分鐘   佢去旅行啦   仲叫埋我一齊去   不過我都請唔到假囉 ~

我同佢講話去黃山有高山症呀   連續幾日胃脹同無乜氣   全程頭 "dup dup" 咁行咋   之後佢話如果我咁樣   佢會扶住我一路行   哈哈   要個老人家扶住行   真係講出嚟都覺得肉酸   哈哈 ~

不過我真係好鍾意皇太后   因為思想好正面   上次同佢一齊做探訪   我真係喺當中學習咗好多嘢呢 ~ 

買完餸就即番屋企沖涼   所以叫里奧大人買午餐番屋企食呢 ~

我最主要係食酸辣無骨鳳爪   我同里奧大人講話如果個餐無鳳爪就唔駛買個餐呀

食剩盒薑黃飯同一半餸   咁今晚再焗熱食

依家飲嘢最緊要酸   哈哈哈哈

呢度 $30   我估應該有 30 粒

里奧大人瞓晏覺   我就煲冬瓜祛濕水   諗住會眼瞓   估唔到又好精神   咁睇 Youtube 聽歌啦 ~

上次煲冬瓜祛濕水係有啲苦   唔通今次買咗 3 斤灰皮冬瓜會好味啲 ?!

祛濕料 ($28/包) + 3 斤灰皮冬瓜 ($14)

反正唔眼瞓   所以 5 點左右又開始燜冬菇   咁唔駛食完飯先燜喇 ~

抖到 7 點先煮飯   半個鐘就搞掂   如果唔係聽日要番工   其實我想 8 點先開餐添呀 ~

是日晚餐 - 鎮江骨 + 菜心苗

鎮江骨 - 好想食酸甜餸   醒起雪櫃有支鎮江骨汁   咁拿拿聲用埋去喇   其實星期五燜好㗎喇   所以今晚食係非常入味呢 ~

菜心苗 - 終於食哂喇   下次要轉食其他菜喇 ~ 

洗埋碗就開機洗衫   之後沖涼休息 lu ~

同里奧大人睇 "思家大戰"   之後再睇下 Youtube   今晚都係 10 點半瞓覺 ~

魚柳包 & 脆辣雞腿包套餐 (外賣) ( 22-JUL-2023 )

( 22-JUL-2023  SAT )

今朝 7 點半都起身   但未夠鐘搭車   所以陪里奧大人食早餐喇   不過里奧大人未食完早餐   我都要去搭車 lu ~

我飲奶茶咖啡一定一定要少奶   唔係會飲完好唔舒服咁㗎   里奧大人自己飲就無乜所謂喇

同家姐一齊食早餐   今朝叫做好胃口喇   可能因為已經 9 點   哈哈 ~

金不換雪菜肉絲米粉 + 火腿煎蛋配牛油麵包 (凍飲 $44)

冬蔭香茅豬扒拚扎肉米粉 ($41)

食完同家姐去買蛋糕   再去睇 Berry 零食   依家買狗仔零食   好似夾糖形式咁幾得意 ~

美國鴨肝粒同三文魚粒幾正咁   大部份都係 $1/g   我以前食過朱朱嘅煙肉條零食   聞落鹹鹹香香   但食落係完全無味嘅 

經過唔知邊間舖頭   家姐話依家唔係 "lu" 嘅相喇   我話妳好勁呀   韓星我真係唔太識   家姐話我玩嘢啦   德魯納酒店嗰個女主角呀   我話人哋係叫 "I.U." 囉   佢之後話係咩係咩   不過佢以前真係睇好多韓劇   我好多都係問佢好唔好睇先睇咋   佢話悶就一定唔睇呢   哈哈 ~

番到屋企   Berry 又大大力撲埋嚟   雖然我都大隻   但都比佢推得郁㗎 ~

又幫 Berry 影下相先

芝士粒勁香芝士味

呢款零食比較硬   所以要佢自己食

望下家姐

串串共咁   哈哈

食到成張梳化都係口水

好難得影到佢臉短短   我覺得咁先得意嘛

同家姐傾陣偈   之後佢話想瞓陣   我話瞓啦   佢呢兩個星期做哂所有家務好攰呢   我又可以順便睇下食譜 ~

工人買比家姐嘅手信   家姐話右邊嗰包係超級辣

家姐瞓咗半個鐘就醒   咁我同埋 Berry 一齊入佢房睇下電視   呵呵 ~

工人話家姐一出門口   Berry 隔一陣就會自己跳上床瞓

我對腳托住佢下巴

仍然係眼瞓眼

所以繼續瞓   睇睇下佢前腳都幾似鴨掌   哈哈

因為睇緊飲食節目   所以我問家姐   我鍾意食燒味嘅第 1 位係咩 ?!   佢話叉燒之後燒鵝 燒肉等等等等   我話比 Tips 比佢啦   係細細隻嘅   佢即話乳鴿   我話唔係囉   咁我再話應該係有大有細嘅   之後佢反白眼話知喇   乳豬   哈哈哈哈 ~

里奧大人又係估唔到係乳豬   但乳豬都係燒味吖   唔係咩 ?!?!

差唔多 1 點 15 分走喇   家姐要去做針灸   所以同佢一齊搭地鐵喇 ~

同里奧大人去食午餐   食完就番屋企休息一下 ~

我都鍾意食呢啲花生

跟餐係檸檬茶   我就轉慾望酸梅 (+$8)      

好在張枱夠闊   唔係擺兩碟主菜都無位了

  

川式口水雞 (中辣) ($66) - 今次多咗辣椒粉   定我上次無留意呢 ?!

攤開啲雞件   都唔少㗎

酸菜魚 (小辣少油)  ($68) - 我覺得少油係好食好多   好怕每食一啖就要抹咀咁呢   

家姐買比我嘅菠蘿乾同杭州胎菊

4 點幾出發去浸會探兒甥仔個大仔   依家甲型流感好勁呀   小朋友抵抗力又弱   所以真係要好小心呢 ~

感恩見到大仔都精精神神   咁啱佢同婆婆嘅晚餐到咗   所以我叫佢快啲食   始終醫院多菌嘛 ~

同里奧大人姐夫傾偈   原來姑奶都中咗流感   咁佢叫我哋一齊食飯   我以為得我哋 3 個   之後佢話同埋姑奶   我話唔去啦   我呢排身體咁弱雞   之後里奧大人都話唔去呀   佢知我呢排都周身唔舒服   一陣病埋仲慘囉 ~

差唔多 6 點幾   同埋姐夫一齊走 lu ~

去超市買盒美國車厘子   因為想補血   之後見到生果舖都有車厘子   $60/2 磅   所以買 1 磅試下先   如果甜先再買   最後去埋麥當勞買晚餐就番屋企喇 ~

粉紅色天空好靚呀

沖埋涼就開機洗衫   之後先食晚餐 ~

生果舖買嘅車厘子好甜呀   希望聽日仲有貨啦

睇下電視同 Youtube   今晚 10 點半前都瞓覺   出咗成日街都幾攰   哈哈 ~

滷水豬手肉燥飯 & 鹽酥雞粒肉燥飯 & 紅白仙草 3 號 (外賣) ( 21-JUL-2023 )

紅白仙草 3 號 ($36) - 份量都多   但味道一般

( 21-JUL-2023  FRI )

尋晚去咗 2 次廁所   但感恩都好快瞓得番 ~

今朝自己食早餐   因為里奧大人今日放假   本來佢話陪我食   不過最後都話好攰唔食喇 ~

好想食吉列魚柳   所以去大家樂食早餐   好難得人唔多   咁就堂食啦   但一個人堂食真係好唔慣   不過就唔想買番菇場食   我唔想食完要執嘢呀   哈哈 ~

菇場忙下停下   時間都好快過 ~

Lunch Time 出去行陣   依家菇場冷氣好勁   所以有時唔想出去   都要出去解凍 ~

行到 12 點 15 分就番菇場喇   今日食 Flakes + 豆奶 ~

唔忙就做自己嘢啦   輕輕鬆鬆等放工 ~

今晚里奧大人買外賣番屋企   我以為佢今晚要上堂   點知佢話原來唔駛   咁之得沖埋涼先開餐啦 ~

食完抖陣就沖涼   之後食甜品 ~

工廠同事屋企種龍眼   今年大豐收   所以拎咗兩大袋比我哋食   我呢度只係一部份咋

里奧大人食完飯都即刻要做功課   我就睇電視喇 ~

今晚都係 10 點半瞓覺   真係好似校咗瞓覺模式咁   哈哈 ~  

燒汁焗雞扒 + 菜心苗 ( 20-JUL-2023 )

尋晚食剩嘅孜然炒雞柳   今晚反而多咗汁嘅   我再加 1 隻指天椒炒   估唔到仲好味過尋晚   哈哈   用嚟配丁麵都好味道呀

里奧大人同事煲咗薏米湯   我都好似好耐無飲湯喇   所以好開心有湯飲呢   哈哈

( 20-JUL-2023  THU )

尋晚 12 點幾去完廁所   之後再一覺瞓到 7 點 10 分   雖然唔係一覺瞓天光   但都算做瞓得好了   感恩感恩 ~

早餐食咖啡瑞士卷   開始食到有啲厭添 ~

菇場忙呀   眨下眼又到 11 點 45 分 ~

Lunch Time 出去行陣   再買腸粉就番菇場喇 ~

我落勁多甜醬辣醬   所以食腸粉係勁肥   哈哈   

仍然忙呀   好在 4 點左右搞掂哂 ~

放工即走   番到屋企都預備晚餐   呢排慢版煮飯   好多時接近 7 點先開餐呢 ~

是日晚餐 - 燒汁焗雞扒 + 菜心苗

燒汁焗雞扒 - 本身諗住整手撕雞蘸參芭醬   但最後都係切粒方便啲   食到咁上下   里奧大人話咩唔係食手撕雞咩   我無諗過佢會記得我講過整手撕雞呀   之後我話切粒咪一樣   仲易入口   哈哈 ~

菜心苗 - 仲未食完   居然 2 斤可以食足 4 餐   真係好抵食呀 ~    

洗完碗就開機洗衫   之後休息喇 ~

睇電視再睇 Youtube   呢排真係差唔多 10 點 10 分就眼瞓   但我點都會 10 點半瞓覺   始終 10 點 10 分真係太早咁呢 ~