臘腸拚臘肉 + 鮑魚生菜 ( 27-DEC-2023 )

( 27-DEC-2023  WED )

感恩一覺瞓天光呀   瞓到 9 點半先起身   梳洗完就去食早餐喇 ~

見到杯咖啡嘅顏色就覺得好好飲咁   家姐都話杯咖啡睇落唔錯喎

吉列魚柳牛角酥早餐 (吉列魚柳+碎蛋沙律+茄汁焗豆+牛角酥) ($46) - 魚柳都好大塊   同埋新鮮炸起   所以好正呀

碎蛋沙律份量都好多   我食剩少少呀   因為真係好飽食唔落了

雞扒炒滑蛋早餐 (香煎雞扒+炒滑蛋+茄汁焗豆+多士) ($37) - 雞扒都好厚身   我都唔敢同里奧大人講呀   一陣佢會話睇見都好飽   哈哈

里奧大人戴眼鏡有啲唔舒服同嘔心嘅感覺   上網睇話慣戴澌進鏡會有咁情況   希望佢快啲適應到啦   所以我雖然請咗假   但都話唔駛成日要出街㗎 ~

食完番屋企抖陣   沖埋涼就諗住抖啦   但里奧大人話可以出尖沙咀行下   感恩感恩 ~

呢間國際攝影 Since 1936   但唔知仲係咪到呢 ?!

今次真係要去 Harbour City 喇   因為要去 Venchi 食免費 Galeto 呀 ~

好開心有嘢睇呀   哈哈

Iron Man

勁鍾意呢啲核突樣   哈哈

唔記得咩名

小鹿斑比 (Bambi)

里奧大人一見到   就話我最鍾意嘅死侍 (Dead Pool)

見到紫色   里奧大人就影比家姐   之後話呢個係閃電俠

唔記得呢隻狗叫咩名   只記得冰姑叫佢做鹹濕狗   因為以前 MSN 公仔個樣笑得好鹹濕

胡廸同巴斯光年

肥仔版   哈哈

我都幾鍾意三眼   不過里奧大人話好核突

曾經好鍾意嘅 Chip & Dale

樹人呀   好記得里奧大人只話 Bady 版先得意   因為手腳都係短唧唧   得意好多呢 

行呀行   我覺得今日算係幾多人   好在商場冷氣夠咋 ~

因為要去 Venchi   里奧大人就睇 Map 搵地址   咁啱我見到 Information Centre 就即去問職員   佢哋肯定熟哂所以店舖位置嘛   好在問佢咋   唔係我會行咗出去   哈哈 ~

行緊去嘅時候   我有啲印象係經過過嘅   因為係有好多杯雪糕做裝飾   去到嘅時候   真係呢間 Venchi 呀 ~

咁基本上里奧大人都只係揀朱古力味道   所以佢會叫我揀   排我之前嘅女人買咗 3 杯 Gelato    買咗二百幾   食呢啲都要咁價錢   我覺得真係好貴呀   哈哈 ~

榛子雲石巧克力 (CREMINO) & 布龍泰開心果 (GREEN PISTACH FROM RONTE) - 榛子味勁似金莎朱古力   真係甜到震   所以覺得開心果味好淡   哈哈   呢個要 $59   真係唔係家姐比 Coupon   我係唔會食囉   因為唔太鍾意啲口感

食完好凍呀   所以又再繼續行下 ~

我鍾意超能特工隊嘅阿 Jack   不過呢個好大隻就無咁得意

行完玩具反斗城都仲未餓   咁行去佐敦喇 ~

TRANSFORMERS   第 1 輯係最好睇

唔買都要影下   哈哈

今日天色一般

原來呢度仲有擺設   影埋呢張就走人 lu

諗住去到佐敦會想食嘢   但又無嘢啱食   我話搭車番屋企算喇 ~

番到屋企都 4 點幾   咁食少少嘢就可以   寧願今晚早少少食飯呢 ~

里奧大人食丹麥條   我食太陽餅再加杯黃金百香果

今晚晚餐勁簡單   所以 7 點已經可以開飯喇 ~

是日懶餐 - 臘腸拚臘肉 + 鮑魚生菜

臘腸拚臘肉 - 唔係太餓   所以蒸少少臘味算喇 ~

鮑魚生菜 - 係家姐之前比嘅阿一鮑魚罐頭   最搞笑係家姐同里奧大人問我做咩食鮑魚 ?!   我話懶呀   煮罐頭鮑魚就最方便 ~

洗埋碗就沖涼   之後休息休息 ~

今日行咗好多路呀   所以唔做運動   咁就有多啲時間熨衫喇   呵呵 ~

睇下電視又打下機   今晚都係 11 點先瞓 ~

脆皮蜜糖腸 + 麻辣湯包辛辣麵 + 青紅蘿蔔豬骨湯 ( 26-DEC-2023 )

 

( 26-DEC-2023  TUE )

感恩一覺瞓天光呀   今朝 9 點半起身   靈修一個鐘左右   里奧大人都起身 lu   咁就一齊去食早餐啦 ~

我食芝士吞拿魚治烘底

里奧大人食蛋牛治

麵包都好厚身

里奧大人頭先比錢   之後話想比埋張十蚊紙比我   不過我行得咁快就唔比喇   咁我話要攞番佢一百蚊呀賤格   佢笑哂話有幾賤格呀 ?!   我話 Hurt 咗我啦總之 ~

食完都番屋企喇   沖埋涼就抖下先   之後就熨衫   依家冬天衫比較厚   所以一機唔會洗到好多件衫   我可以好快熨完   里奧大人本身話幫手熨   我話熨完喇   佢話無諗過熨得咁快   哈哈 ~

抖到 2 點半先去食午餐   今日同里奧大人去飲茶 ~

峰巢芋角盒 ($26) - 第一碟上枱   又係新鮮炸起   我都要灘一灘凍先食呢

春風得意腸 ($33) - 里奧大人必食   咁的確係好味嘅

水晶鮮蝦餃 ($30) - 呢個都好食

姬松茸湯鮮竹卷 ($24) - 里奧大人唔係咁鍾意菇類食物   我又 ok 喎

山竹牛肉球 ($22) - 都幾滑   其實食點心   我來來去去都係食嗰口啲   哈哈

食完去買菜   之後再行陣先番屋企 ~

抖咗陣諗住做運動   點知有得拎眼鏡   咁又好喎   因為我順便要去拎嘢 ~

拎完嘢就去拎眼鏡   里奧大人話唔好煮   但我話唔肚餓   真係食唔落呀   所以去埋馬莎買薄荷糖都搭車番屋企喇 ~

番到屋企都 7 點幾   煮得嚟都 8 點先食得   所以叫里奧大人沖涼先 ~

是日懶餐 - 脆皮蜜糖腸 + 麻辣湯包辛辣麵 + 青紅蘿蔔豬骨湯

脆皮蜜糖腸 - 有腸仔做儲備都唔錯   放入焗爐就搞掂 ~

麻辣湯包辛辣麵 - 麻辣湯包都辣辣地   下次會再買嚟食 ~

青紅蘿蔔豬骨湯 - 終於飲哂喇   又要隔一排先煲 lu ~

洗埋碗就開機洗衫   之後沖涼休息喇 ~

今晚同里奧大人睇 "飯氣攻心"   估唔到好睇喎   之前 8 卦叫我睇   我仲話一定唔睇添 ~

睇完都 11 點幾喇   刷埋牙都即刻瞓覺喇 ~

麥當勞 @ 紅磡 ( 25-DEC-2023 )

芝士安格斯套餐   買超值套餐送 OREO 麥旋風 ($15.50)   呢個真係好有驚喜   哈哈   其實我揀最貴嘅   其他兩款好似係麥樂雞同蘋果批   不過我都唔敢食咁多熱氣嘢喇   夜晚熱醒好慘呢   

里奧大人食食下話其實呢個係芝士漢堡   我話個包唔同囉   係貴啲㗎   所以唔好成日以為食麥記係平   依家無叱支歌仔唱㗎喇

( 25-DEC-2023  MON )

今朝一起身望個鐘   原來已經10 點 50 分喇   要拿拿聲起身去食早餐喇 ~

次次咁晏起身   里奧大人會好緊張我無得食早餐   我話食常餐咪得囉   再唔係買麵包都無問題   不過佢知我鍾意出去食早餐   因為比較 Relax 呢 ~

因為里奧大人要清假   所以我都放假陪下佢呢 ~

本身諗住行山   但我話都未必行到   始終我依家行得多會腰痛囉 ~

咁我想買衫   咁我話去荃灣吖   想行啲舊商場呢 ~

沖埋涼就即出發去荃灣   感恩小巴有位同好快開車   哈哈 ~

1 點左右落車   真係好耐無入荃灣喇   完全係無哂印象   只記得行條天橋有個舊商場   里奧大人問我商場叫咩名 ?!   我話好似有個荃字   總知係一個好舊式嘅商場囉 ~

終於見到荃昌中心   之後里奧大人就話有印象喇   因為同阿 mi 阿喂去食過酸辣米線呢 ~

基本上我同里奧大人睇衫   我係行得快過佢   想快啲望多幾間嘛   咁我行行下望後面   完全唔見里奧大人   因為就算我行得快   都唔會距離好遠嘛   之後我擰番轉頭向前   睇下里奧大人係咪行得快過我   突然有個男人同我講嘢   原來係阿喂呀   真係比佢嚇死   所以我好大力打咗佢手臂一下   真係勁驚嘛   唔見咗里奧大人仲比佢嚇一嚇添 ~

之後我見到阿 mi 同里奧大人出嚟啦   原來阿 mi 拉埋咗里奧大人   唔怪得直望唔見佢啦   唔明點解佢哋咁鍾意呢埋嚇我囉   兔兔見到我就打我   好好地打過招呼唔得嘅 ?!   哈哈哈哈 ~

因為本身唔知喺荃灣買唔買到衫   買唔到就轉場   所以都唔約阿 mi 食飯喇   咁啱佢哋今晚又有 X'mas Dinner   咁真係要再約啦 ~

難得見到又傾下啦   好在阿喂講咗新之城呢個名   頭先里奧大人猛咁話我以前成日會去嘅商場   我又話之前同阿 mi 食過上海嘢   又同過菜仔去 Burger King   但我唯獨係記唔到個商場名 ~

傾完就即去新之城   買咗 3 件長袖 Tee 比家姐   只係 $100 咋 ~

之後我買咗 2 件衛衣都只係 $120   仲要係我搵咗好耐嘅質地呀   感恩感恩 ~

咁繼續行   我同里奧大人都記得喺呢個商場嘅上層買過衫   所以就上去睇喇   估唔間店仲喺度   所以買咗 1 件兩件頭嘅衫 ($229) 同 1 條牛仔短袖直身裙 ($199)   今次叫里奧大人送比我   嘻嘻 ~

最後一擊就係再兜多個圈   估唔到又買到筍嘢   2 條長袖碎花裙只係 $140 咋   真係唔買唔得了 ~

買完都要去食嘢喇   因為已經接近 3 點了 ~

行到唔知邊個商場   見到越北就入去食喇   我正想叫嘢食嘅時候   職員話未夠鐘   原來 3 點先開始下午茶   我哋叫嘅時候係 2 點 59 分   我無諗過下午茶時間係 3 點呢 ~

招牌香茅豬扒撈檬 ($55) - 我覺得豬扒好鹹

越北生牛肉牛腩片湯檬粉 ($58) - 湯底唔夠熱

食完再行下   去完千色店再去麥記食雪糕抖下 ~

柯華田雪糕都有柯華田嘅味道   但個雪糕溶得好快啦   有啲恐怖

周圍行多陣都番屋企 lu   好在阿 mi 講咗搭車位置   所以我哋就知道邊度喇 ~

番到屋企真係要抖下先   又唔係太餓   所以里奧大人又話食麥當勞喇   但今次我話都好   一個餐 Share 食 ~

番到屋企即開機洗衫   之後沖涼喇 ~

同里奧大人睇 "反貪風暴 4"   估唔到都幾好睇 ~

睇完再睇陣 Youtube   差唔多 11 點 40 分先瞓覺 ~