翠河餐廳 @ 官塘 ( 19-DEC-2015 )

椒鹽鮮魷

粟子燜滑雞煲

( 19-DEC-2015  SAT )

我覺得之前飲咗 d 中藥   真係瞓得唔錯喎   定因為媽咪出咗院   我無咁擔心   所以瞓得好呢 ?!

今朝我同里奧大人 9 點半都自然醒咗   即刻刷牙洗臉落樓食早餐喇 ~ 

唉   難得今日 off   但里奧大人 CEO 今晚嫁女   佢一定要去啦   因為安排咗佢同大客坐   又話支支紅酒都係貴嘢喎   最貴果支係三千幾蚊   所以我叫佢今晚一定要飲番幾杯   咁先可以回本   哈哈 ~

今日都凍凍地   行山一流   可惜啦   最慘係又唔可以去得遠   無理由叫里奧大人着住西裝陪我 shopping 家嘛   咁我話喺屋企 hea 囉   反正屋企大把嘢未做   我無咩所謂 ~

之後佢話去舖頭   順便約埋姑奶同晴晴食嘢   咁都 ok 喎   咁啱佢地諗住去啟德遊輪碼頭嘅聯邦郵輪宴會中心飲茶   所以就一齊去 lu ~

搭的士去碼頭   之後就行去酒樓   一個了無人煙嘅地方   指示又不足   真係去一次已經好夠架喇 ~

晴晴又同我講話就黎出糧   可以分錢比我   因為我係妳半個女   所以要出糧比妳   我話妳月底先上大陸做嘢   點解會就快出糧 ?!   之後佢話依家已經番緊工啦   OMG   我今朝先同里奧大人講話晴晴番黎香港又未番工   咁應該日日喺屋企溫書架喇   原來佢已經番緊工   係我 get 錯咗佢意思   佢應該月頭已經番 summer job   但就唔駛上大陸   我就以為唔駛上大陸即係唔駛番工添 @@

之後佢話賺咗錢之後就買樓   我話買層比舅父舅母啦   同佢住相連單位都唔緊要架   佢即刻話相連單位有難度喎   因為佢知實會好貴   之後我話咁佢 A 室 我 F 室囉   佢話咁佢依家要買 3 層樓喇   要努力賺錢   嘩   估唔到佢真係會買比我   佢真係好錫我架   不過我唔駛成日話買嘢比我   我最想要嘅係佢開開心心生活   唔好比壓力比自己就得架喇   咁佢話呢 d 係目標啊   咁好啦   祝佢早日達成目標   我可以有樓收租   哈哈 ~

最鍾意食 d 魚仔   但得 4 條   好珍貴呢 

沙律明隻蝦盞

XO 醬炒腸粉

潮州蒸粉果 - 爆口都有嘅 @@

蜜汁叉燒包 - 又係爆哂口   我覺得賣相唔掂囉  

必食流沙奶皇包 X 2

光頭佬酸辣韓國粉絲 - 姑奶話好油呀   佢"北"咗大半 d 湯出黎   所以之後 d 粉絲乾埋一pat   叫人點食呢下 ?!?!    

皇牌拔絲咕嚕肉 - 我聽到姑奶叫人比小菜嘅餐牌   飲茶食小菜   有 d 暈   咁叫得小菜咁大碟   其實即係食唔到點心啦   咁不如夜晚黎食小菜好過啦   怪 ~~~~   

務農牛之舞 - 堅係晚餐食囉 @@ 

飲到 2 點幾就走喇   之後搭小巴去德福   再去晴晴屋企拎沐浴露同 cream   拎完就番舖頭拎嘢   咁晴晴要去 APM 買嘢   所以跟我地打的去九龍灣 ~

無啦啦又話上黎屋企坐   坐咗 40 分鐘就走   里奧大人之後瞓陣晏覺   我就睇雜誌   5 點半就出發去媽咪屋企喇 ~

去到媽咪屋企坐陣   之後就去食飯 lu ~

差唔多 7 點幾就番媽咪屋企   又睇下電視咁啦   我睇睇下都瞓着咗   哈哈 ~

9 點走人   又拎 1 袋香梨同西洋湯番屋企   好重呀 ~~~~

番到屋企就沖涼   之後執個書柜   執咗個幾鐘   做開有條路   里奧大人又未番   咁我就熨 1 機衫   差唔多 12 點   里奧大人就番黎喇   咁我都抖下喇   好鬼攰 ~

一番到黎問佢 d 紅酒係咪好好飲   佢同同事都話一般   仲話飲咗支法國女兒紅   係新娘出世嘅年份   不過最搞笑係新娘都話唔好飲   可能大家都唔飲慣酒呢   之後里奧大人連份禮物都無拎番黎   佢話醉醉地喎   即問佢飲咗幾多杯啦   佢話 1 杯幾   等我仲以為飲咗成支添   不過佢話佢地果枱得 9 個人   飲咗 5 支紅酒呀   因為個鬼佬好鍾意飲酒   佢自己就飲得開心囉  哈 ~

等埋里奧大人沖涼   差唔多 1 點先瞓呀   woo ~~~~