煎紅腸 + 燒汁焗雞下肶 ( 30-APR-2025 )

( 30-APR-2025  WED )

感恩一覺瞓天光呀   諗住望下幾點   之後都鬧鐘響 lu ~

今朝里奧大人去買早餐   食腿蛋治 + 餐蛋包   之前覺得 Share 食腿蛋治唔係咁夠飽   但今朝未食完份腿蛋治都覺得好飽   可能依家天氣熱   加上我唔駛去買   無咩點郁無咁餓   哈哈 ~

菇場唔忙呀   可以抖下 ~

Lunch Time 蒸完飯就出去行陣   之後買菜同蘋果   買完都番菇場開餐喇 ~

阿齋見到我番嚟   奇怪覺得咁早番 ?!   我話 12 點 20 分喇   佢話佢晏咗開飯   所以覺得我早番   哈哈   咁之後再傾陣偈先開餐呢 ~

唔忙又做自己嘢   溫總同阿怪喺度嘈   兩個做嘢方法又唔同   咁無共識就比較麻煩   我同佢哋兩個都有接觸   兩個做嘢又唔係咁掂   只係簡單複雜化 ~

咁喺廁所見到船頭入嚟   佢即刻笑話溫總同阿怪強強相遇呀   話溫總講嘢一嚿嚿   阿怪又硬崩崩唔聽人講   所以睇下幾時先搞掂單嘢 ~

放工即走   里奧大人 7 點先番到屋企   好在今晚煮辛辣麵咋 ~

是日晚餐 - 煎紅腸 + 燒汁焗雞下肶

煎紅腸 - 諗住煎半條   但喺冰格拎出嚟好鬼硬   我又只得生果刀   所以最後都係整哂成條算喇   焗到一半先可以切開   之後再煎   里奧大人話煎會好食好多呢 ~

燒汁焗雞下肶 - 之前醃咗   所以點都要食 lu ~

洗埋碗就沖涼   同里奧大人一齊睇 "軍檢察官多佰曼" ~

睇到第 9 集咋   但都已經 11 點   我好攰要瞓覺喇 ~

蠔油燜薯仔雞下肶 + 泰式聖羅勒辣椒醬燜茄子金菇 ( 29-APR-2025 )

( 29-APR-2025  WED )

感恩瞓得都唔錯   因為起身嗰下都精神呢 ~

早餐食煙肉芝士迷你酥 + 金不文芝士迷你酥 + 千層吐司   感覺好豐富咁   哈哈 ~

菇場 3D   所以特別靜 ~

Lunch Time 蒸完飯就出去 Mikiki 買龍眼肉   之後再行陣   差唔多 12 點 15 分先番去菇場開飯呢 ~

估唔到忙到 4 點幾   實在太好喇   咁先似番工嘛   哈哈 ~

阿花去完韓國   話送啲無聊嘢比我呀   我都估係車銀優用過嘅嘢啦   哈哈

放工即走   番到屋企都即預備晚餐 lu ~

是日晚餐 - 蠔油燜薯仔雞下肶 + 泰式聖羅勒辣椒醬燜茄子金菇

蠔油燜薯仔雞下肶 - 尋晚燜定   今晚就咁蒸熱就搞掂   以前覺得燜餸好難   依家覺得燜餸好簡單同埋好方便呢 ~

泰式聖羅勒辣椒醬燜茄子金菇 - 呢個餸又係簡單方便   帶飯又可以   始終我鍾意食完菜先食肉呢 ~

洗埋碗就沖涼休息   里奧大人熨衫   之後一齊睇 "軍檢察官多佰曼" ~

睇到第 7 集咋   因為已經 10 點 45 分   我好眼瞓要瞓覺喇 ~

奧爾良雞膇 + 蒜蓉炒椰菜 ( 28-APR-2025 )

( 28-APR-2025  MON )

尋晚瞓得都唔錯   感恩感恩 ~

早餐食千層吐司   味道都唔錯呀   下次會再買嚟食   同埋可以分兩餐食   咁即係諗少一日食咩早餐就最好啦   哈哈 ~

千層吐司 ($24)   有 2 個工人姐姐見家姐夾出嚟   好驚訝又笑笑口話好大個呀   好搞笑

菇場忙咗 1 個鐘   搞掂又可以做自己嘢喇 ~

Lunch Time 去萬寧買嘢   買滿 $188 有 88 折   咁我買 $79 (買一送一) + $33 (買一送一)   但自己計咗 2 個價錢   咁一定過 $188 啦   但比錢嘅時候發覺只係 $112   我奇怪點解唔過 $188 ?!   職員話買一送一即係 $79 兩件呀   咁我話買 $79 就算喇   因為我無嘢買到一百蚊呀   真係勁樣衰囉 ~

番到菇場已經 12 點半喇   飯壺個制都熄埋   其實前前後後蒸咗 40 分鐘㗎喇   我成日都係咁   因為買嘢行耐咗呀 ~

唔忙又整下 Email Filing   因為要集中精神做   所以就得閒先做啲喇 ~

放工即走   番到屋企即預備晚餐 lu ~

是日晚餐 - 奧爾良雞膇 + 蒜蓉炒椰菜

奧爾良雞膇 - 之前買咗包新奧爾良烤雞醃料   咁里奧大人啱啱好番   我都唔落咁多去醃喇   但都好味道㗎 ~

蒜蓉炒椰菜 - 用蒜蓉炒真係好食啲嘅   同埋我買咗好多蒜頭   真係要食下   唔係會好快爛㗎 ~

洗埋碗就燜餸   搞掂就開機洗衫   里奧大人就熨衫 ~

喺日本買㗎   只係 258 Yen (HK$14)

甜甜哋幾好味   同埋好脆呀   咁嘅價錢咁嘅質素真係好 OK 呀

今晚一齊睇 "臥底旅行團 4.0" 同 "中年好聲音 3"   已經無睇廣告   但都睇到 11 點 15 分先瞓呀 ~

蜜桃生炒骨套餐 + 魚香茄子雞粒煲套餐 (外賣) ( 27-APR-2025 )

蜜桃生炒骨套餐 ($68) / 魚香茄子雞粒煲套餐 ($78)

魚香茄子雞粒係一盒滿哂   個量咁多算係抵食㗎喇

( 27-APR-2025  SUN )

今朝同里奧大人一齊起身   我搞掂哂就即出門口喇 ~

又係去飲茶呀   同埋我次次都係會買罐咖啡飲嘅   所以食咩都唔係最重要   最緊要大家啱食就得呢   但其實姐夫食嘢好清   我同家姐就重口味呢 ~

家姐公司包廂睇謝霆鋒演唱會   後尾佢約咗兩個熟嘅同事一齊去睇   仲話啲嘢幾好食   又話睇到好投入   咁又開心喎   因為初初諗住得一個人去會好悶嘛   哈哈 ~

同姐夫傾開大陸旅行嘢   我話依家跟團真係好抵   遲啲都想跟番啲旅行團   唔駛自己安排行程就最好呢 ~

黑椒蒸牛仔骨 - 家姐要我補血   所以點都要叫牛   哈哈

安蝦鹹水角 - 唔錯喎   食落唔油

鹹魚蒸肉餅飯 - 家姐佢哋食㗎   我朝早唔係咁想食飯

南乳花生豬手 - 切到細細粒就最好

四寶蒸滑雞扎 - 好耐無食   所以覺得好食   哈哈

味菜蒸大腸 - 好味呀   最緊要無陣 "壓" 味

食到 9 點幾要走喇   買埋麵包就番屋企呢 ~

一開門   Berry 女係咁發出好衰怨嘅 "umm umm" 聲   唔知以為比人捉咗   哈哈 ~

坐定定等我摸

影新嘢   哈哈哈哈

肥到成個波咁

想落雨呀   所以佢成日會望窗口    同埋會好驚

我叫家姐睇 "來自地獄的法官"   我話朴信惠做得唔錯呀   之後佢話佢做過 "繼承者們" 㗎   我話我無睇過   但記得 "繼承者們" 呢套劇名   因為家姐嗰時成日話要睇   佢以前睇好多韓劇   有幾套都係佢介紹睇㗎 ~

慘慘眼

上床即瞓

之後瞓喺地下陪住我哋呀   乖女

家姐出去沖中藥   Berry 就即出廳仲跳上梳化瞓覺   但家姐一入房   佢又即入房   成日跟出跟入真係好乖呀 ~

大媽比家姐嘅零食   家姐話唔要但係都要比   大媽真係每次見面都要比啲嘢比家姐   之後就成日問好唔好食 ?!   有時唔好食又唔好意思講   呢樣我最明白啦   哈哈

一出廳就跳上梳化   之後灘軟哂個身想瞓覺   我成個人挨埋去都由得我呀   佢真係好眼瞓咁喎   哈哈 

一上床就打喊露

打完喊露

家姐話有個鄰居話 Berry 對眼好大   咁我同糟糟都覺喎   但家姐話唔覺囉   可能 B 仔佢哋都係眼大大呢   哈哈

又瞓

之後又係坐喺地下陪我哋

瞓咗 20 分鐘

我哋睇咗 3 集   如果再睇多集就好晏先走得   所以唔睇喇   家姐話今日要快啲整嘢   好想今日睇哂呀   哈哈 ~

12 點幾就同埋 Berry 一齊行街   同佢行街要一個行到好前講拜拜拜拜   Berry 就會上前行   一係就喺一個地方原地搭步咁行成半個鐘   唔知以為佢哋咁快又行多咗轉呀   哈哈 ~

次次我上車   Berry 真係唔會望住架巴士   真係好奇怪 ~

去樓上買西梅   咁我話買麥當勞做午餐   之後里奧大人話未走得   所以買去佢公司食喇 ~

諗住 2 點半唔會見到里奧大人啲同事   所以都無搽唇膏同梳下個頭   點知一買完就見到阿妹   傾咗幾句就走啦   之後又見到鴛鴦同阿強   真係邪爆   哈哈 ~

脆爆雞膇包套餐 ($39)

塊雞腿好脆   醬汁又好味   真係有驚喜呀   哈哈

我 3 點幾都走喇   想番到屋企執下嘢呀   里奧大人就繼續喺公司做嘢 ~

家姐又比嘢我喇   佢唔鍾意食呢啲零食   我試咗芥辣味魷魚絲都好味道呀

美國健腸西梅乾 (忽然驚喜價 $29) - 呢個價錢算平呀   下次見到會再買嚟食

里奧大人同事嘅手信   又係日本   依家仍然好多人去日本   不過去日本又係方便嘅

  

搞掂就睇 Youtube 啦   但今日都好攰呀   所以 4 點 15 分瞓到 5 點 10 分呀   里奧大人啱啱番到屋企 ~

我話唔知煮咩好   里奧大人話出去食   之後我話買外賣啦   咁佢話可以瞓陣先   瞓咗 20 分鐘都醒 lu ~

里奧大人 6 點半去買晚餐   咁我都沖涼先 ~

食完抖陣   再等埋里奧大人沖涼   之後一齊睇 "軍檢察官多佰曼"   睇到第 6 集開頭少少咋   因為已經 10 點 50 分   我要瞓覺先喇 ~

銘興山西刀削麵 @ 紅磡 ( 26-APR-2025 )

麻辣冷拌牛展刀削麵

我話少麵   但都覺得好多   里奧大人話下次叫一半麵就可以   之後佢都會叫一半麵   但再話咁樣加埋即係一個麵   不如叫一碗麵 + 個小食仲好   哈哈

麻辣豬扒刀削麵 (酸辣湯底)

里奧大人都係少麵

呢碟就一定食得哂

( 26-APR-2025  SAT )

尋晚瞓得麻麻哋   不過里奧大人鬧鐘響咗   我又瞓唔到咁   所以同佢一齊食早餐喇 ~

食完上去佢公司坐陣   9 點幾就出發去拎回鄉卡喇   本來里奧大人一心諗住晏晝陪我去拎   順便行下街   不過我話 megaBOX 唔係好多嘢行   我自己早啲去   拎完行下好過   咁晏晝一齊喺屋企休息或者睇劇好過 ~

排隊連拎卡   過程真係 3 分鐘左右就搞掂   無諗過快成咁呀 ~

搞掂就行 AEON 超市   之後去 IKEA 睇下嘢食就走喇 ~

TV 碎腰果仁 $17.9/罐 & 法國甜心 Candine 蘋果 $19.9/包

坐 Shuttle Bus 去德福   行咗 Market Place 同馬莎   行完就睇九巴 Apps   感恩 10 分鐘後有巴士呢 ~

番到屋企附近都 12 點 15 分   所以去樓上試食呀   等下等下   原來等咗半個鐘   估唔到又唔攰喎 ~

香草忌廉汁野生三文魚扒 + 美國健腸西梅乾 + 手工鑽石沙布列 (伯爵茶) + 泰國蜂蜜老薑茶 - 我其實只係想試粒西梅   因為唔想買 1 包呀   如果唔好食就慘嘛   感恩原來有 2 粒   我覺得好味   拎 1 粒比里奧大人食   佢都話好味   咁聽日可以買喇

番到屋企已經 1 點   咁擺好啲嘢就抖下 ~

$100/2 個咋   原價係 $89.9/個   我本身無行去特價區嘅   之後見有時間就睇下啦   估唔到有筍嘢   因為我想買呢啲大嘅 Lock Lock 盒好耐呢

之後就整午餐   里奧大人 2 點先放工   番到屋企啱啱可以開餐 ~

尋晚食剩嘅咖哩雞絲意粉

食完就做小清潔   又執下啲櫃桶   每次買完嘢就要咁做   順便又睇下有啲咩就嚟到期要食先   哈哈 ~

又執咗成個鐘呀   之後見間房咁靜   原來里奧大人瞓晏覺   好在今日無叫佢一齊拎回鄉卡咋   佢成日想陪我行下街   不過我話真係唔駛囉   寧願佢休息好過 ~

里奧大人 5 幾起咗身   之後佢熨衫   熨完就出發去食晚餐 lu ~

食完就周圍行陣   經過冒險樂園   我話好想玩呀   見 $100 有 100 個 Token 都抵玩   但原來係會員先咁   唔係會員就 $2 一個 Token   咁我之前係會員   不過都應該過咗期 9 年㗎喇   咁續証同新入會費都係 $30   我話再諗諗先   如果 $10 就好啦   我即換呀 ~

太耐無玩呢啲 Game 喇   我同里奧大人講話點解會左右手一齊玩嘅 ?!   我記得係用一隻手玩咋喎   里奧大人話係兩個人玩嘛   咁咪兩個囉   哈哈

買完糖水就番屋企   開埋機洗衫就沖涼休息喇 ~

今晚我想食一碗呀

咁先睇到芋頭同粉粿

又係睇 "軍檢察官多佰曼"   但睇到第 4 集咋   因為已經 11 點   我要瞓覺喇 ~