韓式辣汁焗雞膇 + 蕃茄芝士腸意粉 + 金銀粟米 ( 10-APR-2025 )

( 10-APR-2025  THU )

尋晚去完廁所   之後好難先瞓得番呀   里奧大人話尋晚都瞓得唔好   因為好熱   睇嚟要開冷氣了 ~

今朝一定要飲提神咖啡   所以出去食喇 ~

食完諗住去里奧大人公司坐   但個天好似想落雨咁   咁啱又有車差唔多到   我都係番公司好啲 ~

菇場 3D   要好好享受下喇 ~

女廁無水   咁阿蟲問肥仔豪男廁有無水 ?!   溫總話都應該無啦   肥仔豪話唔知   因為佢無沖廁   話係自動沖廟嘅   之後成班女人話有無搞錯呀   唔怪得經過男廁咁臭崩崩   又話唔怪得成日話男人係臭男人啦   真係笑死呀   所以呢度男仔唔好出聲最好   唔係講一句比人頂 50 句㗎   哈哈 ~

Lunch Time 蒸完飯出去行下   行咗 35 分鐘就番菇場開餐喇 ~

諗住 Hea 過   但忙咗 1 個鐘仲要煩嘢   做完有啲虛脫 ~

放工即走   番到屋企即預備晚餐喇 ~

里奧大人見到雪櫃有 100 Plus   佢話想飲   我話飲囉   我啱啱先喺公司拎番嚟   佢話公司咁好有 100 Plus 嘅 ?!   真係笑死我呀   我話公司梗係無啦   係我上次喉嚨痛買㗎   不過擺咗幾個月都無飲就拎番屋企囉 ~

是日晚餐 - 韓式辣汁焗雞膇 + 蕃茄芝士腸意粉 + 金銀粟米 

韓式辣汁焗雞膇 - 屋企一定有韓式辣汁   因為諗唔到煮咩就會出動佢㗎喇 ~

蕃茄芝士腸意粉 - 因為要清埋包蕃茄意粉醬   所以又煮意粉喇 ~

金銀粟米 - 今次啲粟米好細粒   但好甜都好好食 ~

我多數一食完飯就去洗碗   今晚我諗住坐一陣先洗啦   里奧大人又主動去洗碗   咁就好喇   唔駛我叫嘛   哈哈 ~

抖多陣就一齊去做運動   仍然都係做 20 分鐘機   呢排放工之後比較攰   但就想郁下咁囉 ~

沖埋涼抖陣又食紅豆年糕糖水   終於食哂啲紅豆蓉   應該唔好咁快再見㗎喇   哈哈 ~

睇下 Youtube   今晚睇半個鐘頭講哂劇情嘅頻道   里奧大人話睇呢啲都會知道套劇好唔好睇㗎   因為我有時睇劇   都係因為睇咗呢啲頻道先睇呢 ~

睇完再睇下福寶   今晚又係 10 點 45 分先瞓覺 ~