老壇酸菜魚 + 菜心 ( 10-MAY-2026 )

尋日食剩嘅台式拚盤同今日食剩嘅炸雲吞

( 10-MAY-2026  SUN )

今朝同里奧大人一齊起身   之後我就去家姐屋企喇 ~

差唔多落車嘅時候   家姐 Whatsapp 話 Berry 可以番屋企   但我叫佢等埋我一齊行呀   因為我 5 分鐘後落車呢 ~

咁我等過馬路啦   見到對面係 Berry 女   之後見佢係紮哂馬咁望住我呢個方向   但家姐同 U 姐無講新媽咪嚟咗㗎   我見到 U 姐好大力扯住 Berry   好鬼驚佢衝出馬路   之後我過馬路啦   佢一見我就撲向我呀 ~

家姐話估唔到 Berry 企咁遠都見到我   反而佢就見唔到我   U 姐就話藍色衫嗰個係新媽咪太太呀 ~

行咗一陣就同佢哋番屋企   之後就同家姐去食早餐喇 ~

阿活脆邊煎雙蛋+黑椒牛扒 ($40.5) - 家姐一定係叫牛   成日話要我補血   我切牛扒嘅時候   家姐見到條筋就話啱哂我   佢同里奧大人都會咁講㗎

以前同媽咪 家姐去大家樂食早餐   我一定會幫佢哋搽牛油多士   因為我鍾意每個角落都有牛油嘛   所以每次一見到牛油多士就有滿滿嘅回憶呢

即炸原條脆魚柳配阿活脆邊煎雙蛋+英式多士 ($42) - 好大塊魚柳呀   好在唔腥

食完就去惠康買嘢   買完就番屋企 lu ~

益力多 ($35/3 排) - 家姐今晚去糟糟屋企食飯   所以買 3 排比糟糟工人姐姐   之後佢自己都買 3 排   蕎麥都汁就我要嘅

同家姐傾偈   佢問我睇哂 "逐玉" 未 ?!   之後又介紹我睇張淩赫啲戲   佢話睇 "寧安如夢" 先識張淩赫   咁我問仲有咩戲好睇 ?!   佢話張淩赫套套戲都好睇   笑死囉   好似阿花鍾意車銀優咁   又係話佢做咩戲都好睇 ~

家姐今日着件衫   如果睇佢上身係以為佢着吊帶褲   佢話我唔係第一個咁講   我覺得好多時都係咁   以前去媽咪屋企食飯   好記得有日佢全身衫褲鞋都係深紫色   有次就覺得佢啲頭髮長咗好多   佢就會話今日好多同事都咁講   平時我唔見佢呢   就無人咁講佢   所以真係好搞笑啦 ~

依家影佢啲角度有啲奇奇怪怪   哈哈

肥豬女

慘慘樣

攰樣

我走就出廳瞓

12 點半左右走人   家姐陪我去買午餐   因為要等 20 分鐘   咁周圍行下喇   之後去到都仲未得   原來都等咗半個鐘呀 ~

家姐要買午餐番屋企   所以我叫佢走先   我自己去搭車就得   排隊嘅時候有人撞到我個袋   因為我兩旁係好多位家嘛   之後一望原來係家姐   佢一嚟到我就有車   好在可以見到我咋   哈哈 ~

里奧大人 2 點番到屋企   可以即刻開

招牌正宗上海秶飯 + 酥炸雲吞 + 酸辣餃子麵 - 秶飯嘅油炸鬼仲好脆呀

家姐比咗 2 包 GOLD 辛辣麵同齋雞粒   仲有嘉多娜嘅原條吐司 + 2 盒酸菜魚   糟糟之前去韓國   比咗 3 包辛辣麵比家姐   家姐話比 2 包比我   我話 2 Pack 太多喇   之後家姐話係 2 包呀   因為我買手信唔會咁樣散裝比人嘛   家姐話佢又係咁   所以我咪以為係 2 Pack 囉

頭先一入大堂   管理員就拎住份禮物講母親節快樂   我話唔要喇   但佢係都要比我   哈哈

我食完就去樓上買嘢   里奧大人就沖涼瞓覺 ~

白朱古力士多啤梨 ($12) / 加拿大天然豬排骨 X 2 ($29/包)

急凍泰國天然豬梅頭肉 ($25) / 急凍泰國天然豬梅頭片 ($38)

番到屋企就大清潔雪櫃同執嘢   搞掂就去做機   今日都係做 25 分鐘就夠喇 ~

抖陣就燜餸   之後就熨 2 機衫   熨完都已經 5 點   里奧大人啱啱起身   話攰就等佢熨   我話啱啱熨完呀   熨得好靚   佢即刻笑   我自己都忍唔住笑   因為特登強調就唔方熨得靚啦   哈哈 ~

里奧大人 5 點半去做機   我就預備晚餐 lu ~

是日晚餐 - 老壇酸菜魚 + 菜心

老壇酸菜魚 - 冰格無咩位   所以即開盒酸菜魚喇 ~

菜心 - 雖然只係 $5   但都幾甜㗎 ~

洗埋碗就開機洗衫   之後就沖涼休息了 ~

同里奧大人一齊睇 "中年好聲音 4"   睇完再睇陣 Youtube   差唔多 11 點先瞓 ~