龍城冰室 @ 九龍灣 ( 8-MAY-2026 )

2 人餐 ($158) - ML 食咗下午茶仲好飽   所以叫兩個 2 人餐喇   我哋全部要羅宋湯   估唔到好味道   仲要好多雜菜同牛腩呀

菠蘿咕嚕肉 ($73) - 呢個係我叫嘅   因為好想食甜酸嘢

蝦醬通菜炒牛肉鮮魷 - 我食到一半   我話係咪叫咗 5 個餸 ?!   因為我記得 ML 話食蒸魚嘛   之後睇單原來無落到蒸魚   但職員落單嘅時候叫我講號碼   佢再覆述嘅都係同我一樣   咁即係佢按錯號碼啦   咁我哋又無再睇單   好在呢個都好味道咋   哈哈

西蘭花炒龍躉球 ($88) - 呢個係 LW 叫嘅   我哋覺得好味道呀

鹹魚蒸肉餅 - 無諗過肉餅會咁鹹

( 8-MAY-2026  FRI )

好多時 6 點 55 分就會醒醒哋   不過都係等到鬧鐘響先起身 ~

今朝同里奧大人出去食早餐   佢話依家唔駛講都知道星期三四五會出去食   哈哈 ~

菇場忙呀   但忙到 11 點就搞掂 ~

船頭今朝着長袖   因為驚今晚會涼   但佢同阿齋都係怕熱嘅   我話今朝好熱喎   佢話佢怕熱但都無我熱得咁犀利   話我今朝熱到臉到紅埋好誇張   不過可能我今日着 Legging 同埋長襪比較熱   平時着 One Piece 無咁熱㗎 ~

船頭話呢罐 Ramirez 沙甸魚醬 ($16.2) 好味   所以我叫佢幫我買罐喇

Lunch Time 蒸完飯就去一田睇下嘢   今日開始係春日購物賞   不過都幾多人   所以我行一個圈就算   聽日放工先去買 ~

阿齋去咗一田買嘢   又請咗啲零食比我同船頭

忙下停下   好快放工 ~

今晚約咗阿 Jack 6 點半去龍城食晚飯   咁我同里奧大人就喺淘大行下先   經過奇趣天氣又去睇下   感恩想買嘅都做特價呀   所以即買 ~

我覺得隻隻都得意   但我只會買 1 盒

好在真係睇下電話   因為 ML 問我哋係咪約咗阿 Jack 食飯 ?!   我話係呀   佢問如果佢同 LW 嚟埋方便嗎 ?!   我話絕對歡迎啦 ~

6 點 40 分齊哂人就叫嘢食   之後就開始傾偈喇 ~

阿 Jack 話同阿妹去旺角間酒樓食飯   呢間酒樓啲嘢食呢   ML 即刻問係咪唔好食 ?!   阿 Jack 話呢間酒樓啲食物唔錯呀   我哋笑咗出聲   我話以為係唔好食呀   你啲語氣講到唔好食咁   哈哈 ~

食下傾下好快 7 點 45 分喇   係時間要去開組喇 ~

ML 同里奧大人去比錢嘛   我同阿 Jack 喺門口等   佢突然話依家自己生活仲喺好唔慣   我話當然啦   我都好掛住 Ivy   之後一路行一路傾嘅時候   佢都忍唔住流眼淚   但我只能力搭住佢膊頭安慰佢呢 ~

之後阿 Jack 同人哋打招呼   原來係阿後兩公婆   我覺得阿後見到阿 Jack 好開心呀   可能都係想見但唔敢約   始終以前係兩對一齊食飯嘛 ~

今晚係玩遊戲嘅   每個遊戲唔係就咁玩完就算㗎   係要玩完之後分享遊戲嘅體驗   咁真係好唔錯呀 ~

差唔多 10 點散會   但今晚趕唔到班車   所以去德福行陣喇 ~

番到屋企都 10 點 45 分   真係要快啲沖涼喇   哈哈 ~

Fuggler Key Ring S4 Gaptooth Mcgoo (特價 $54.40 原價 $68) - 無哂藍色嗰隻   但其實我最初係想買呢隻顏色嘅   我好鍾意 "咪" 佢啲牙仔   真係好治癒㗎

蠟筆小新動物恰恰恰系列 (特價 $39 原價 $69) - 兔仔都得意呀

睇多陣 Youtube   今晚 11 點 40 分先瞓覺 ~