黑椒扎肉銀絲米粉 + 唐生菜 + 蕃茄薯仔魚湯 ( 8-JAN-2011 )

( 8-JAN-2011  SAT )

呢朝超餓呀   所以食個通粉再加杯熱檸茶   超滿足呀 ~

番到菇場好忙呀   差唔多放工先做完   好充實呀 ~

里奧大人呢日要番工   所以尋晚約好今日去飲茶   我要買洗衣球   里奧大人就去攞位先   我差唔多 1 點 35 分去到酒樓   今次有策略咁叫點心   叫咗兩樣飽飽哋肚嘅點心食住先   之後再等到 2 點鐘下午茶時間就叫啲大點嘅點心   因為下午茶時間嘅大中小點都係 $9.8 咋   所以叫大點就抵啲喇 ~

蔥花炸兩 - 里奧大人餓呀  所以叫咗碟飽飽地肚嘅炸兩食住先囉  都 OK 好食
蒸蘿蔔糕 - 好耐無食   覺得都幾好味
榨菜牛肉腸 - 第一次食   啲榨菜幾爽口   唔錯
鹹水角 - 新鮮滾熱辣   正呀

鴛鴦臘腸卷 - 啲潤腸好肥呀   唔掂   同埋里奧大人唔食呀   我一個人食哂   飽到反眼
古法馬拉糕 - 我太飽   所以食唔落   不過里奧大人話唔好食   好硬喎  
一口椒鹽茄子 - 又話一口   但粒粒大到呢   我最唔鍾意就係咁   唔用心去整   最後都食剩一半   實在太飽喇   

冰鎮鵝掌翼 - 我為咗呢碟先嚟飲茶咋   超好味   每食一啖都點一下酸醋   當堂無咁滯呀   不過好多翼尖囉   有啲搵笨   下次唔食 lu

食到好飽好飽好飽呀   本來我想抖多日唔煮飯   但真係好飽   所以都係行去街市買餸當做下運動   真係唔郁唔掂呀 ~

是日懶餐 - 黑椒扎肉銀絲米粉 + 唐生菜 + 蕃茄仔魚湯

黑椒扎肉銀絲米粉 - 懶呀   同埋好飽   食唔落飯   所以煮米粉 ~ 

唐生菜 - 懶呀   炒都唔炒 lu   加片薑就咁灼熟就算喇 ~

蕃茄薯仔魚湯 - 好想飲呢個湯   雖然今次買咗 3 個大蕃茄   但唔係咁甜囉   又可能我加多咗水都未定呀 ~ 

爭鮮迴轉壽司 @ 九龍灣 ( 7-JAN-2011 )

( 7-JAN-2011  FRI )

Happy Friday 喇   今個星期過得好快咁呀 ~

 
好攰呀   又凍又無咩胃口   又想食甜嘢   所以又去麥當勞食熱香餅喇   之後坐的士番菇場    真係好唔想行呀 ~

番到菇場都忙呀   因為尋日啲嘢無做到   今日一定要做番   唔係比人殺呀 ~

本來想出去買嘢食   但又好鬼凍   唔想出呀   食杯麵算喇   我同事一見到我就問係咪食出前一丁   杯麵真係好大陣味   所以次次都要好快手咁食呢 ~

個人仲係無乜力咁   行路似龜速   慢到呢   我一路行啲人就會好好奇咁望一望我   因為我實在行得太慢   啲人可能以為我病得好嚴重呀 ~

今晚真係好凍   想去麥當勞買杯熱朱古力暖暖身   但原來都要 $16   我覺得好貴   所以我情願去 Happy Lemon 買杯杏仁花生朱古力 + 珍珠   都係 $16   不過呢   我唔會再去呢間 Happy Lemon 買珍珠奶茶以外嘅飲品   因為實在太難飲喇   上次杯特濃朱古力   仲淡過茶餐廳嘅華田   今次仲慘   飲到我好想反胃呀 ~

里奧大人今晚 7 點半先放工   餓到我呢   屋企又越坐越凍   但越凍又越唔想郁喎   又凍又餓真係好慘呀 ~

今晚好想食壽司   所以又去爭鮮   依家多咗好多款壽司   不過我都係來來去去食嗰啲呢 ~

食到好飽   去商場行一陣   點知里奧大人無啦啦話暈一暈   嚇到我呢   話即刻番屋企喇   佢番到屋企就精神喎   仲 On Line 打機   我之後就係咁問佢仲有無暈   佢話無暈   係比我煩到暈呀   哈哈 ~

敍苑粉麵茶餐廳 @ 九龍灣 ( 6-JAN-2011 )

臘味盅頭飯 / 窩蛋牛肉煲仔飯


( 6-JAN-2011  THU )

要番工喇   不過都係不在狀態中   做下瞓下咁囉 ~

終於到 Lunch Time   正正經經咁瞓咗一個鐘頭   精神好多呢 ~

等呀等   終於等到放工   去里奧大人公司附近茶餐廳食啲嘢   等埋佢放工就一齊去大酒店   向大眼妹嘅嫲嫲鞠躬   坐咗陣就走喇 ~ 

呢兩日無咩食嘢   所以口淡淡   只想食濃味嘢   之前都成日去呢間茶餐廳 Lunch   都幾好食嘅   咁啱又有煲仔飯   叫里奧大人試下   我就食盅頭飯   因為唔想咁飽呀 ~ 

大快活 @ 九龍灣 ( 4-JAN-2011 ) + ( 5-JAN-2011 )

沙薑雞飯
臘腸銀魚肉餅煲仔飯

( 4-JAN-2011  TUE )

呢朝食腿蛋包   好耐無食過喇   不過如果再熱啲就更加好味啦 ~ 

番到菇場無停過手   做完又有   做完又有咁   好攰呀 ~ 

晏晝呢   食杯麵   仲有 2 個就清哂所有杯麵   好開心呀 ~

呢晚每月一到   所以都係睇醫生   攞定病假紙   如果真係痛   都可以無後顧之憂咁瞓   唔駛又要特登凍冰冰出去睇醫生嘛 ~

感恩感恩   估唔到又有胃口喎   仲好想食飯添   所以近近哋去大快活算喇   食完就快快趣番屋企沖涼休息喇 ~ 

( 5-JAN-2011  WED )

今朝都係請病假喇   個肚都係痛   但就唔係好勁痛果隻   不過就好攰   希望啲中藥有效啦 ~

大家樂 @ 九龍灣 + 紫蕃薯糖水 ( 3-JAN-2011 )

 

( 3-JAN-2011  MON )

新嘅一年   第一日番工   好攰呀 ~

  
第一日番工   比自己早餐食飽啲   豐足嘅開始 ~

番到菇場好忙呀   好在精力充沛   又夠專心   好快就搞掂哂呢 ~ 

晏晝有 Lunch Box 呀   尋晚特登唔食咁多   咁今日食就好似食新嘢咁呢 ~

呢排個人好攰咁   同埋我唔夠瞓   皮膚好易敏感   啲手指位成日爆   我又成日忍唔住 "R"   所以次次都會損哂   洗菜煮飯真係好辛苦囉 ~

依家我次次都會同里奧大人講話隻手損哂   煮飯一濕水就痛到叫救命   所以佢依家應該已經入哂腦   我一話隻手敏感   佢就會好自然話唔好煮   出街食㗎喇 ~

今晚我都諗好煮啲簡單嘢   點知里奧大人話出去食   唔好煮   咁我依家都會應承啦   唔想咁快做黃面婆呀 ~  

之前收到奧比斯嘅大家樂 $5 Coupon   食滿 $25 就可以用一張   我咪話去大家樂囉   點知原來係 1 月 12 日先開始   不過唔緊要   因為我都好想打邊爐呀 ~

黑椒雞柳炒扁意粉 + 蒜泥油麥菜 ( 2-JAN-2011 )

( 2-JAN-2011  SUN )

今朝同里奧大人瞓到 10 點 15 分就要起身食早餐喇   因為要番教會呀 ~

崇拜完畢就番屋企坐陣   點知家姐打嚟話一齊食下午茶   再去萬寧買嘢   因為今次萬寧嘅價錢仲抵過藥房   同埋用匯豐信用卡有唔知幾多嘅積分   所以家姐就叫埋我一齊買嘢喇   又順便幫埋媽咪買   依家有着數就多數買三份   我買零食又同佢哋 Share   真係唔知係慳咗錢定洗多咗錢呢 ~

送埋家姐去停車場   我就去超市買菜   再番屋企努力執屋   執完屋再努力煮飯   難得有 Mood 呀 ~

是日晚餐 - 黑椒雞柳炒扁意粉 + 蒜泥油麥菜

黑椒雞柳炒扁意粉 - 諗住整意粉   點知拆開咗先知原來係扁意粉   不過唔理咁多喇   加啲生抽老抽係咁炒呀炒   又幾好味噃   我覺得係新菜式呀 ~

蒜泥油麥菜 - 好想食蒜泥   但又搵唔到小青瓜   所以整油麥菜喇   一樣咁 Good 呀 ~

本來想出去做運動   但里奧大人好攰咁   咁我都唔去做喇   因為我都幾攰   屋企又有 9 萬幾樣嘢未做喎   咁我清埋哂屋企嘢先   之後就可以安安樂樂   無後顧之憂咁去做運動啦 ~

大食會 @ 姑奶屋企會所 (大埔) ( 1-JAN-2011 )

薄批 / 厚批 / 壽司 / 手卷 (外賣) / 客家燜冬菇髮菜蠔豉 / 冬菇燜排骨 / 南乳齋 / 豉油雞 (外賣) / 西炒飯 (外賣) / 鹹魚雞粒炒飯 (外賣) / 滷水雞翼 / 蘋果沙律 / 西米芋頭糖水

( 1-JAN-2011  SAT )

話咁快就 2011 年喇   新嘅一年   樣樣都更美好呢 ~

同里奧大人瞓到 10 點半就醒喇   落街嘆份早餐   之後番屋企 Hea 陣就出發睇中醫 lu ~

呢個中醫係朋友介紹   所以我又去睇下   我個脈搏好弱   佢要好大力按住先打到脈   佢話我血氣好唔夠呀   唔怪之我成日咁攰啦   同埋又易心口痛   頭暈   皮膚敏感   樣樣都跟血氣唔夠有關係呢 ~

之後佢話中藥其實唔駛日日都要食   佢開咗兩劑中藥   經期後再開兩劑   我覺得佢都幾老實   得就得   唔得就唔得   唔會 "Dum" 症   因為我次次睇中醫   好多都會話食佢哋啲藥就會好   同埋話要食多幾個月先見效咁囉 ~ 

睇完就番屋企喇   坐陣又要去食 Tea   因為我趕住焗 Brownies 呀 ~

今次比較趕   跟住食譜都整錯啊   明明只用 110g 牛油   但我用咗 200g   個朱古漿變得好稀   我都唔再花時間將個食食譜加加減減喇   求其加番啲麵粉算喇   感恩   焗出嚟都正正常常咋 ~

拎完中藥就坐車入大埔食飯喇   今次其實係補番做冬嘅   但今次就每家人整一樣食物   再外賣其他嘢食   我本來諗住 1 月 1 日開始減肥   唔食咁多嘢   但見樣樣都好味咁   終於又飽到反肚喇 ~