爭鮮迴轉壽司 @ 九龍灣 ( 7-jan-2011 )

( 7-jan-2011 fri )

Happy friday 喇    今個星期過得好快咁呀 ~ 
好攰呀   又凍   又無咩胃口  又想食甜嘢   所以又去麥當勞食熱香餅喇   之後坐的士番菇場    真係好唔想行呀 ~

番到菇場都忙呀   因為尋日 d 嘢無做到   今日一定要做番   唔係比人殺呀 ~
本來想出去買嘢食   但又好鬼凍   唔想出呀   食杯麵算喇   我同事一見到我就問係咪食出前一丁   杯麵真係好大陣味   所以次次都要好快手咁食呢 ~

個人仲係無乜力咁   行路似龜速   慢到呢   我一路行  d 人就會好好奇咁望一望我   因為我實在行得太慢   d 人可能以為我病得好嚴重呀 ~
今晚真係好凍   想去麥當勞買杯熱朱古力暖暖身   但原來都要 $16   我覺得好貴啊   所以我情願去 Happy Lemon 買杯杏仁花生朱古力 + 珍珠   都係 $16   不過呢   我唔會再去呢間 Happy Lemon 買珍珠奶茶以外嘅飲品   因為實在太難飲喇   上次杯特濃朱古力   仲淡過茶餐廳嘅華田   今次仲慘   飲到我好想反胃呀 ~
里奧大人今晚 7 點半先放工   餓到我呢   屋企又越坐越凍   但越凍又越唔想郁喎   又凍又餓真係好慘呀 ~

今晚好想食壽司   所以又去爭鮮   依家多咗好多款壽司   不過我都係來來去去食果 d 呢 ~

食到好飽   去商場行一陣   點知里奧大人無啦啦話暈一暈   嚇到我呢   話即刻番屋企喇   佢番到屋企就精神喎   仲 on line 打機   我之後就係咁問佢仲有無暈   佢話無暈   係比我煩到暈呀   嘩哈 ~