大阪王將 @ 九龍灣 ( 7-OCT-2016 ) + ( 8-OCT-2016 )

豚肉生薑燒定食 - 個汁好鹹   有機會真係好想自己整下呢個飯呢  

粟米牛油味噌叉燒拉麵

( 7-OCT-2016  FRI )

瞓得唔錯   感恩感恩   希望可以快啲唔駛開冷氣啦   哈哈 ~

無咩胃口   所以食奶醬多 ~

菇場 Server 尋日中毒   依家都未整番好   都唔知幾時先搞得掂添 ~

唉   Hold 住哂啲嘢   一陣搞掂番又超級忙   最驚咁樣 ~

好想食熱嘢   所以去買車仔麵   榨菜好好味呀   爽爽哋又唔鹹   份量又多   好似食極唔完咁   次次食車仔麵都好飽 ~

仍然 Hea 過啦   個肚谷谷咁   真係每月一到喇   感恩又唔肚痛   不過就好攰囉 ~

放工即睇醫生   拎定病假紙   睇完番屋企熨衫   之後就抖下 lu ~

里奧大人 7 點幾先放工   咁我話去大阪王將食嘢   突然間好想食飯 ~

食完就番屋企沖涼   睇多陣電視   11 點唔夠都瞓喇 ~

( 8-OCT-2016  SAT )

尋晚半夜都肚痛呀   又嘔喎   但次次嘔完又好似舒服啲   個胃無咁頂住咁 ~

8 點 45 分打去菇場請病假   之後就瞓喇   瞓到 5 點半呀   精神好多   不過無胃口 ~

本來今日約咗加拿大叔叔一齊去拜爸爸   之後食晚飯   最衰每月一啦   唔係可以去到   嗚嗚嗚嗚 ~

睇下電視   之後沖個熱水涼   里奧大人又煮丁丁   其實煮麵都好   唔駛滕上滕落   哈哈 ~

今晚都係 11 點都瞓喇   總知瞓到就瞓 lu ~

老少平安 + 菜心 + 芫茜皮蛋魚片湯 ( 6-OCT-2016 )

( 6-OCT-2016  THU )

依家啲天氣   涼涼哋都幾舒服   如果日日係咁就好 lu ~

早餐食魚柳餐   個奶油豬就可以用嚟 Lunch 送麥皮   雖然甜咗啲   不過算啦   好過格硬食嘛 ~

菇場忙呀   仲諗住 Hea 過添 ~

Lunch 食麥皮 + 奶油豬   完全係病人餐咁   哈哈 ~

忙到 4 點左右就搞掂   終於可以抖下 ~

放工去街市買餸   買完番屋企嘅時候   突然間成個天黑哂   仲好大風又大粒雨   好似打到嚟咁   好在啲雨唔密   咁就唔駛開遮嘛 ~

番到屋企浸完菜就開機洗衫   之後都唔熨衫喇   好攰咁 ~

里奧大人 7 點 15 分放工   咁我都預備煮嘢 lu ~   

是日懶餐 - 老少平安 + 菜心 + 芫茜皮蛋魚片湯  

老少平安 - 無啦啦好想食   不過食剩一半   無諗過份量咁多囉 ~

菜心 - $7/斤好抵   所以買嚟食   好在都幾甜   哈哈 ~

芫茜皮蛋魚片湯 - 里奧大人話熱氣   咁就滾呢個湯   比佢下下火呢 ~

搞掂哂就即沖涼   睇下電視   里奧大人 10 點就入房瞓添呀 ~   

我就睇埋先瞓   但今晚都好早瞓囉   10 點半就瞓喇 ~          

銀咖哩 @ 九龍灣 ( 5-OCT-2016 )

呢個富士山份量   4 個人食就差唔多

已經叫少飯   但我哋覺得完全無少到囉   最後都食唔哂啲飯   唉 

( 5-OCT-2016  WED )

無咩胃口   咁食熱狗啦   千島醬酸酸咪咪夠醒胃   以前我整沙律係用千島醬㗎   之後都係覺得用沙律醬夾啲咁 ~

菇場忙下停下   唔錯啦   不過忙都好   即係有生意嘛   哈哈 ~

心情唔好呀   所以 Lunch 又食酸辣米線   不過今次真係受心情影響   唔覺得好味呀 ~ 

又忙到放工   不過里奧大人 3 點喺葵興見客   5 點都已經番到屋企 lu   所以我放工都即走   一齊去旅行社問資料呢   問完再去食嘢   之後就番屋企喇 ~

午餐同晚餐實在太飽   所以決定今晚點都要徑步   點知番屋企嘅時候落好大粒雨   但就似過雲雨囉   希望快啲落哂去啦 ~

8 點終於無雨   見個地下又唔濕   所以拿拿聲出發喇   徑到差唔多 9 點先番屋企   爽呀 ~    

里奧大人話驚中途會落雨   所以堅持帶把縮骨遮   咁我同佢示意   我番屋企沖涼先   之後行行下   我 Feel 到有嘢隊埋嚟   嚇鬼死我啦   以為邊個隊條大根比我呀   原來係里奧大人   頭先講話走嘅時候幫佢拎遮   佢又話唔駛   一時一樣麻鬼煩

沖埋涼就休息喇   睇多陣電視   11 點都瞓 lu ~

雙丸印尼撈麵 ( 4-OCT-2016 )

( 4-OCT-2016  TUE )

尋晚瞓得都 OK 啦   不過半夜起咗身去廁所   唔係就瞓得更加好喇 ~

早餐食腿治   如果可以半份就好   第一平啲   第二唔駛咁飽   哈哈 ~

菇場仍然忙到甩碌   真係好驚對數字   如果狀態唔好   真係會越 Check 越錯㗎   好在今日都狀態都 OK   哈哈 ~

Lunch Time 出去食粥   有個大陸女人勁自私   將袋魚放喺枱   咁唔緊要   因為我係坐佢隔隔離   但我隔離係無人坐嘅   之後條友係咁話碗生滾粥好熱好熱   奇奇怪怪   食得粥都預咗碗粥係熱㗎啦   之後佢同阿姐話要拎走   佢一拎起個膠碗就係咁 "鄧" 係咁吹   頂佢   向住我嗰邊吹呀   我忍唔住 "摺" 佢同啤住佢   咁佢倒粥入碗啦   阿姐嚟抹枱順便就幫佢將碗粥入膠袋   但原來個蓋係蓋唔實   阿姐一拎起碗粥就倒瀉咗啲出嚟   之後阿姐話: 妳都未蓋實嘅   要蓋實啲嘛   依家淥到我呀   我好想笑出來   整瀉人哋啲嘢   對唔住都無聲   仲好話人整到你   真係咩人都有 ~

食完行陣就番菇場喇   好攰呀 ~

忙到 5 點終於忙哂喇   清哂所有嘢   真係鬆一口氣呢 ~

放工即走   今晚里奧大人同惠州嘅表哥表姐食飯   不過我好攰   都係唔去食喇   自己靜靜哋好過 ~

佢哋問我要唔要雞 ?!   我唔要啦   佢哋星期一到香港   咁隻雞咪已經 3 日 ?!   期間放喺邊㗎 ?!   雪凍之後拎出嚟   比我哋之後又室溫幾個鐘   之後又放番入雪櫃   食嘅時候隻雞已經擺咗 4 日   聽見都驚 ~

番到屋企抖陣   之後拖地再熨衫   搞掂哂都已經 7 點   沖埋涼先煮麵食 ~

乾乾淨淨咁食麵真係好鬼爽   所以今晚一定唔會食湯麵   唔係就唔可以沖涼之後食咯 ~

睇下旅遊書   9 點半即睇 "律政強人"   里奧大人好似 10 點幾番到屋企 ~

今晚又係 11 點唔夠就瞓 lu   我估因為天氣涼涼哋   所以好鬼想瞓覺呢 ~

豉汁蒸黃立鯧 + 冬菇淡菜節瓜湯 ( 3-OCT-2016 )

( 3-OCT-2016  MON )

呢幾晚徑步   真係覺得好瞓啲咁喎   感恩感恩 ~

今朝里奧大人 9 點喺公司見客   所以佢早 15 分鐘起身   嘆埋個早餐先番工   我就 7 點 40 分起身   其實我一個人就好快搞掂   但今朝勁 Hea   居然差唔多 8 點先出門口   哈哈 ~

食早餐嘆報紙   之後 8 卦又嚟埋   雖然佢成日食麵餐   但其實 10 分鐘唔駛佢都食完飲完   基本上好少會遲到 ~

菇場超勁忙呀   今日又星期一   所以有啲攰 ~

Lunch Time 去買 BB 衫比加拿大堂妹   咁星期六就可以比叔叔比佢喇   買完都已經 1 點   咁即買嘢食番菇場喇 ~

一件 BB 裙仔要 $270   我覺得好鬼貴啦   好在有折咋   我冬天褸都係 3 百唔駛   仲可以着十年添   家姐仲叫我買多幾件添   因為佢估係 $80 一件囉

一蚊買個盒   當堂靚好多   哈哈

仍然忙呀忙   有啲虛脫嘅感覺 ~

放工去街市買餸   之後即番屋企 lu ~

預備好晚餐就抖陣   里奧大人 7 點放工   今晚蒸魚同淥米粉   所以叫里奧大人去到九龍塘打比我   咁我就唔駛下下計住時間喇   呵呵 ~

是日懶餐 - 豉汁蒸黃立鯧 + 冬菇淡菜節瓜湯  

豉汁蒸黃立鯧 - 想整好耐喇   所以今晚一定要整   呢條魚 $30   比我想像中平   因為我諗住起碼要 $50   蒜蓉豆豉陳皮生抽撈埋一堆   個汁好味呀   其實我懶開鑊炒   唔係仲更加香呢   里奧大人同冰姑一見到條魚   就第一句問 : 妳唔驚咩 ?!   哈哈   其實我見個魚頭咁細個都 OK 嘅   大魚頭就真係一世唔會整囉   今晚我都有食條魚   所以應該唔驚佢呢   哈哈 ~

冬菇淡菜節瓜湯 - 唔想食菜   咁就整個瓜粒湯啦 ~

搞掂哂就沖涼   今晚大家都好攰   所以唔徑步 lu ~

個雪櫃間唔中會漏水出嚟   但其實對門係關實㗎喎   但關門嘅時候又好似有嘢頂住咁   里奧大人終於忍唔住   開個冰格出嚟睇   點知有一大嚿冰呀   之後我用熱水布抹下佢   里奧大人就用螺絲批批佢   所以好快搞掂   依家關門好暢順喇   呵呵 ~

今晚 11 點唔夠就瞓喇   其實都幾鍾意咁早瞓   可能前排瞓得勁唔好   依家要補番哂瞓唔好嘅時間   哈哈 ~  

譚仔雲南米線 @ 牛頭角 ( 2-OCT-2016 )

今次要另加酸菜   我真係覺得自己依家好食得酸   哈哈 

( 2-OCT-2016  SUN )

9 點唔夠都醒咗   即沖涼落樓食早餐喇 ~

抖多陣就番主日學   今日番崇拜   因為有事奉 ~

崇拜完畢就去衛訊買 LG G5 比家姐   之後諗住去埋旅行社睇自由行資料   點知 Off   咁去 Piago 食嘢算 lu ~

食完行陣   之後要即番屋企喇   因為無啦啦勁眼瞓   瞓到差唔多 4 點   都瞓咗差唔多 1 個鐘   真係好少可   哈哈 ~

好攰呀   今晚都係唔煮喇   6 點幾出去食米線 ~   

8 點出去徑步   徑半個鐘就番屋企沖涼   睇埋電視   11 點唔夠都瞓喇 ~

呢排涼涼地   好似好快眼瞓咁 ~

Outback Steakhouse @ 銅鑼灣 ( 1-OCT-2016 )

香脆薯條混芝士 ($48) - 食到最尾 1/3 真係唔想再食   好鬼飽囉   好在最後慢慢食都食得哂  

香辣味雞膇 ($48) - 唔好味嘅   我記錯以為係之前嘅炸雞膇   嗰隻就好好味喇      

( 1-OCT-2016  SAT )

今朝 10 點左右起身   里奧大人原來好早起咗身   但見我瞓得林都無叫醒我   之後打比佢   佢話喺茶餐廳   問我嚟唔嚟   佢話大姑奶都預埋我位   咁去啦   即刷牙落樓 ~

食完番屋企抖陣   12 點半出門口 ~

感恩等咗一陣就有 619 呢   因為次次假期都要等好耐㗎 ~      

行咗陣 Sogo   差唔多 2 點幾去南記食嘢 lu ~

食完再行希慎同誠品   睇中咗 Master Dynamic 嘅 Headphone   但要成 $3,100   所以唔買住   之後再試埋 B&O   我覺得 Master Dynamic 正好多囉   包住哂對耳仔聽歌   感覺好似喺間房到聽歌咁㗎   勁正 ~

影完呢張   真係 Feel 到自己腳仔軟   哈哈    

買咗本旅遊書   之後就落超市睇嘢喇 ~ 

我話好似幾好飲咁   里奧大人話買啦   $33/3 支應該算平喇啩      

其實唔太餓   但又唔想番九龍灣先食   所以里奧大人話去 Outback 食 Appetizer   咁都好喎 ~

5 點 45 分到 Outback   嗚嗚   無咗個 Appetizer 呀   同埋好多食物嘅價錢好似平咗   我以為係 Tea Set Menu   咁問問 Waiter 啦   佢話唔係 Tea Set Menu   個拼盤只係 Mon-Fri 先有   之後聽到後面枱嘅人都話 Menu 唔同咗   無咗個拚盤   搞笑 ~

7 點唔夠都走喇   依家限時個半鐘   衰囉   雖然個半鐘頭之內都會食完   但唔鍾意限時限刻   好唔自在   因為真係會成日睇住時間嚟食囉 ~

里奧大人話不如行多次 Sogo   睇下有無嘢啱   咁我話好吖   反正咁飽   行下都好 ~

行完就坐 671 番九龍灣   之後去睇手機   諗住買部 G5 比家姐做生日禮物   但見好多人   所以聽日先買 lu ~

番到屋企即沖涼   之後休息喇   睇多陣電視   11 點幾都瞓喇又 ~