雜豆肉丸出前一丁 ( 7-SEP-2017 )

( 7-SEP-2017  THU )

嘩   尋晚係咁發夢   仲要係有問有答嗰隻   所以成晚好似無瞓過咁   今朝起身勁攰囉 ~

早餐食芝蛋治   好耐無食   覺得好味但好飽   哈哈 ~



菇場仍然忙   8 卦成日問我做緊咩   我話大把嘢做   之後佢話: 妳真係堅忙喎   個個唔信我忙嘅 ~

今日有 Lunch Box   好有新鮮感   哈哈 ~



點解仲係咁忙㗎   難得 3D   我想 Hea 過呀 ~

放工喇   都做唔哂噃   留番聽日做 lu   反正西瓜唔喺度   無佢簽名都比唔到客啦   呵呵 ~

去超市行陣   又突然好掛住媽咪   不過我唔會比自己喊   要堅強呢 ~

買完嘢   番到屋企都 6 點半   要即煮嘢喇 ~

是日懶餐 - 雜豆肉丸出前一丁 

雜豆肉丸出前一丁 - 唔知食咩   又唔想出街食   咁就食麵啦   快靚正 ~

抖陣就徑步   依家話咁快就徑咗半個鐘   不過我覺得夠咯   始終放工都攰   真係好想快啲番屋企休息呢 ~

拖埋地就沖涼   不過今次好懶   只係用清水拖地就算   嘻嘻 ~

終於休息喇   又上 Youtube 睇嘢   里奧大人 9 點幾番到嚟   一番到嚟就食雪條   真係睇見都凍 ~

今晚 11 點都瞓喇   希望唔好再成日發夢啦   哈哈 ~ 

辣肉腸炒米粉 + 菜心苗 ( 6-SEP-2017 )

( 6-SEP-2017  WED )

最衰尋晚 10 點飲咗半包橙汁   所以 3 點幾要起身去廁所 ~

今朝又落雨啦   好在唔係好大咋 ~

早餐食蛋牛治   其實唔想食蛋   但唔想食火腿 ~



咁我今朝飲奶茶嘛   之後落單阿姐 A 問我係咪有時飲咖啡   有時飲奶茶㗎 ?!   我話係呀   佢個樣好委屈咁話頭先另外阿姐 B 話佢落錯單   我應該飲咖啡先啱   咁之後到阿姐 B 拎完杯奶茶比我   就笑笑口問我係咪有時飲咖啡   有時飲奶茶呀 ?!   我話係   好搞笑呀佢哋   不過我覺得佢哋好有 Heart   會記住客人飲啲咩呢 ~

我多數早過 8 卦嘅   咁我一轉卡位   佢就知 8 卦會嚟   即刻比多杯水   所以我幾鍾意嚟呢間食早餐㗎 ~

菇場忙到爆炸   今日應該全日忙 ~

Lunch Time 唔餓   所以諗住買薑同蒜仔   但見啲薑起哂芽   所以唔買啦   咁買蒜仔   佢寫住蒜仔芹菜 $7   我拎一扎蒜仔   原來要 $7   我以為蒜仔同芹菜總共係 $7 咋   咁我話唔要喇   勁驚佢鬧我呀 ~

行多陣就去 7 仔買 Lunch   好耐無食   覺得好好味呀   哈哈 ~

菇場仍然忙啦   想抖下都唔得 ~

放工即走喇   番到屋企即浸菜   呢排手掌嘅虎口位好痛   唔知係咪打機打得多呢   但呢排已經無打機啦   但都一樣痛   同埋對手無咩力咁   頭先切蔥粒   切咗陣都已經好痛   所以都係用較剪剪一粒粒   隻手就無咁痛啦 ~   

搞掂哂都已經 6 點半   又要煮嘢喇 ~

是日晚餐 - 辣肉腸炒米粉 + 菜心苗  

辣肉腸炒米粉 - 呢個米粉好有心機整㗎   加咗芹菜 蔥粒同蒜粒   諗住自己好餓   可以食到 2 個米粉   點知食咗 1/3 已經好飽   咁唯有留番做 Lunch Box 啦   冰姑話成日見我食辣肉腸   應該好味道   唉   真係有苦自己知   哈哈哈哈   仲有 2 條留番整薄餅   其實已經過咗期 1 星期   但呢啲醃制嘢   過咗期都應該唔怕嘅   哈哈 ~

菜心苗 - 1 斤分 3 餐食   今晚終於清哂喇   極度開心囉   食咗 3 晚喇 ~

抖陣就出去徑步   又徑半個鐘   番到屋企都 8 點   沖埋涼就熨衫   搞掂哂就休息 lu ~

我部手機成日無啦啦自動轉 Ring Tone   所以唔知自己電話響   咁今晚睇電視   講緊個男仔同女仔示愛   之後佢個樣好尷尬話: "唔好意思   咁啱有電話響"   仲以為係佢電話響   點知原來係我電話響   係咪咁配合劇情呀   哈哈 ~

上 Youtube 睇嘢   睇到 11 點半呀   今晚夜瞓咗添 ~

蠔油冬菇燜鴨掌 ( 5-SEP-2017 )

( 5-SEP-2017  TUE )

今朝勁喇   居然記得浸冬菇   其實尋晚想浸定   但浸得 6 隻浸成晚   又好似早得滯   哈哈 ~   

早餐食芝腿治   今日都會忙   所以都係食飽啲 ~



諗住睇下報紙   點知家姐 Whatsapp 我話佢同 CC 傾偈   估唔到咁都會撞到   呵呵   之後又傾咗一陣   8 卦又來了   即係無得睇報紙   哈哈 ~   

菇場忙到呢   一樣接一樣咁做做做   好攰呀   難得今星期大粒唔喺度   點知又咁忙 ~ 

同 8 卦出去食酸辣米線   點知勁多學生等緊位   即轉場去食星洲炒米   又係好多人等位   咁行遠啲食海南雞   點知 Closed   係咪咁邪呀   好日唔同佢出去食   之後去食重慶酸辣米線囉   本來都有 8 個學生等位   我哋都諗住走   點知話有位   咁即入去食喇 ~





食完行一田   着住水靴行街真係好鬼熱呢 ~

菇場仍然忙到爆炸   希望忙埋聽日啦 ~

放工即走   番到屋企即預備晚餐喇 ~

是日懶餐 - 蠔油冬菇燜鴨掌 

蠔油冬菇燜鴨掌 - 第一次整   我覺得好味呀   好在試味咋   初初好鹹   諗住落糖啦   但諗諗下加水咪得囉   加埋尋晚 3 嚿豆卜   爽哂味勁正呀   冰姑叫我生菜墊底  但我得菜心苗咋   好在比佢提一提醒   咁我就菜心苗墊底   又可以洗少隻碟   呢下最開心   哈哈   今餐食得好滿足呀   但真係好鬼飽   因為食咗一碗飯 ~

飽到唔想郁   哈哈   所以抖陣先洗碗   之後即去徑步   今日食咗麵包紅薯粉同飯   唔徑唔得囉   感恩今晚無落雨呢 ~

徑半個鐘就番屋企沖涼   之後休息喇   又睇下 Youtube   11 點 15 分都瞓喇 ~ 

豆卜鯪魚肉湯飯 + 菜心苗 ( 4-SEP-2017 )

( 4-SEP-2017  MON )

今朝又落雨   但覺得涼咗好多呀   因為今朝沖熱水涼沖咗好耐   哈哈 ~

早餐食餐蛋治   又要等埋 8 卦   變咗我又遲到添 ~



菇場勁忙啦   真係多嘢做到唔知做咩好   樣樣都 Urgent ~

Lunch 食營養餐   但今朝好忙   所以好快餓咁   要食多少少先夠飽 ~



仍然忙到爆炸   但做唔哂囉   放工都未做完   咁留番聽日做 lu ~

放工即走   又落雨   好在唔駛買餸呢 ~

上到巴士仲有位坐   發咯   咁我一坐低   有個女人問我係咪好大雨 ?!   我話唔係好大雨   但佢笑笑口咁指住我把遮   話啲水係咁流喎   嗰下我都笑咗   但頭先啲雨係密   唔算大雨囉   哈哈 ~

番到屋企即浸中藥同浸菜   搞掂哂就抖陣   6 點半就煲中藥同煮飯呢 ~   

是日懶餐 - 豆卜鯪魚肉湯飯 + 菜心苗 

豆卜鯪魚肉湯飯 - 突然間好想食豆卜   所以尋日買咗 8 兩豆腐卜   $9 得 7 粒   我係買三角型嗰啲   佢話厚身啲喎   咁又係喎   如果四方型豆卜   煮得耐啲會好快爛哂咁呢 ~       

菜心苗 - 好耐無食菜   係時候要食番啲 ~

食完飯 7 點幾   咁我再煲番啲中藥先   8 點幾再飲   之得唔駛咁早煲啦   哈哈   諗住自己食飯食得好快   但唔醒起食湯飯要用多啲時間 ~

今晚無得徑步   咁就抹櫃同拖地啦   出咗一身汗呀   爽 ~

沖埋涼就抖陣   之後飲中藥   睇多陣電視   11 點幾都瞓 lu ~   

炒豚肉 + 勝瓜鯪魚肉湯 ( 3-SEP-2017 )

( 3-SEP-2017  SUN )

今朝 9 點 45 分起身   沖埋涼就食早餐   之後番崇拜 lu ~



崇拜完畢就去街市買餸   里奧大人去姑奶屋企放低嘢 ~

我鍾意買定啲儲備放喺冰箱   但阿 mi 話最多放一星期   我初初以為佢好似我咁   起碼放一兩個月添   哈哈   聽完佢咁講   我依家都唔會買咁多   同埋試過有啲丸類擺咗半年   真係無哂味咁   哈哈 ~

番到屋企抖陣就煲中藥   煲咗 75 分鐘   煲完都有啲眼瞓添 ~

咁醫師話飲中藥前後一個鐘都唔可以食嘢   咁 4 點幾飲就最好啦 ~   

里奧大人 5 點幾番到嚟   我都瞓咗 15 分鐘   今朝杯咖啡唔得呀   太多奶囉   所以今日完全唔精神咁呀 ~

5 點半滾定湯   6 點幾就開始煮嘢 ~   

是日晚餐 - 炒豚肉 + 勝瓜鯪魚肉湯 

炒豚肉 - 個汁係參考人哋煮嘅 "豬排肉蓋飯"   不過我無落清酒   同埋我唔係用豬扒   仍都無蛋   勁呀呢   抄到 9 唔搭 8   哈哈 ~

勝瓜鯪魚肉湯 - 原來勝瓜煲 45 分鐘係會變黃   咁下次唔煲咁耐 lu   同埋估唔到勝瓜咁貴喎   要 $16/斤   呢度 2 條啱啱 $16   仲唔係好大條咋喎   批哂啲皮   輕到不得可了   哈哈 ~

洗埋碗就沖涼   今晚好攰   同埋啱啱落完雨   所以唔徑步喇 ~

睇多陣電視   11 點唔夠都自己瞓先 lu ~

翠河餐廳 @ 官塘 ( 2-SEP-2017 )

( 2-SEP-2017  SAT )

感恩今朝無落雨咋   又可以同家姐食早餐呢   開心開心 ~





咁家姐工人尋晚炸咗蝦片   佢已經話揸車嚟拎比我   我話唔駛咁大陣仗呀嘛   哈哈   同埋今朝都食早餐   今朝比都得啦 ~

我都估到佢又整蝦片比我㗎喇   之前我話鍾意食嘅豆餅   佢又話買比我   不過我唔要喇   唔想食咁多零食囉   所以好怕同佢講鍾意食嘅嘢   怕佢特登買比我食呢 ~

又係 8 點 45 分走人   今朝我無遲到喎   呵呵 ~

係咪邪到咁呀   又係星期六大把嘢做   仲要做長命 Report   不過今日真係唔想做住   想主力 Resize 相   因為難得 8 卦同後面同事唔喺度 ~

放工約咗里奧大人喺太子地鐵站等   我 Book 咗 2 點睇中醫   咁食埋 Lunch 先去睇 lu ~

鎮江豬手 + 孜然雞翼麻辣米線



我見幾枱都食鎮江豬手   咁我都叫啦   最鍾意食深色嘢   但其實又勁驚比腳趾我喎   感恩無腳趾咋   呢個好味呀   初初醒唔起咩味道   依家醒起   係似豬腳薑啲味呀 



鮮牛肉 + 魚片頭酸辣湯米線 - 里奧大人話唔夠辣   



原來里奧大人知我個瘤好大   所以想我睇中醫 ~

呢個中醫係佢家姐嘅同事介紹嘅   不過我覺得呢個中醫   好唔願意接受人哋唔認同佢所講嘅嘢囉 ~

初初講病症都無問題㗎喎   佢話我個人勁濕   因為以前飲得太多凍嘢   強調係後生飲凍嘢飲到依家喎 ~

咁我又問佢可唔可以飲北芪當參   佢話唔可以   咁我話我飲咗真係個人舒服啲   同埋瞓得好咗   我唔記得佢講啲咩   總知講到係我自己覺得瞓得好啲咁囉   但我話之前睇兩個中醫話我唔夠氣   叫我飲㗎   嘩   我講完呢句佢即黑臉   之後話個個人講嘅嘢唔同   其實我唔係串佢㗎喎   因為我想佢知我飲緊北芪當參   我驚原來係唔可以飲之嘛   點知咁多嘢喎 ~      

之後佢問我夜晚食咩   我話菜同肉   好少食飯   佢串串哋話邊個教我 ?!   我都開始有啲火   我話無人教   只係一個人食得唔多   同埋嗰排食飯頂住咁   所以唔敢食飯囉 ~

佢話我唔夠氣係因為無食飯   妳唔食   唔聽我講就算   都黐嘅   我無話唔聽你講   而係你唔聽我講話食飯頂住咋 ~

臨走前   里奧大人同佢講唔好意思   話我詞不達意   佢仲黐   我無講錯嘢囉   咁里奧大人再問佢   我要睇幾耐 ?!   佢話 3 個月   排哂啲濕毒先可以醫個瘤喎 ~

今次比 2 日藥   我都應該會睇佢一排先   始終中藥係要有一段時間呢 ~

睇完都接近 3 點   行去旺角幫姑奶買 Power Bank   之後就番屋企喇 ~

里奧大人去圖書館   我就番屋企抖下 ~

家姐比我嘅炸蝦片   我話咁大包有排食   家姐就話快啲食   驚佢腍   兩個講嘅完全係相反   哈哈

里奧大人無啦啦 5 點左右番到嚟   話唔係咁舒服   要番嚟瞓陣 ~

6 點幾出去食嘢   之後佢番屋企先   我去徑半個鐘頭步   難得無雨嘛 ~

番到屋企即沖涼   又睇下 Youtube   11 點幾先瞓呢 ~

蕃茄雜豆辣肉腸螺絲粉 ( 1-SEP-2017 )

咁樣睇   成 3 吋高㗎   所以其實份量都好多   好在好味   慢慢食囉唯有   哈哈

( 1-SEP-2017  FRI )

今朝真係嚇死寶寶了   臨醒之前發咗個惡夢   個夢係講里奧大人同事結婚   咁我哋去飲   之後去佢屋企坐啦   無啦啦小儀都嚟埋   佢真係好矮   但個樣係超級好恐怖   即係唔係平時見到嘅樣   佢對眼凹哂入去咁㗎   傾傾下偈   里奧大人話呢個單位之前有人自殺   我話唔好講呢啲   之後開始 Feel 到有嘢   我哋就話走喇   咁我第一個行先啦   真係鞋都未着好嗰隻   因為真係好驚好驚   咁啲人陸續咁走出門口啦   我見到個 Modem 同埋唔知咩向住我哋方向係咁閃   咁我即跑啦   再見到間屋有個着紅色衫嘅女人張開手呀   之後鬧鐘響   起身嘅時候   成身慶哂咁㗎驚到 ~

原來今日係 9 月 1 日   唔怪得頭先搭 Lift 嘅時候   聽到個爸爸話個仔今日番學啦   我都奇怪   點解 8 月 31 日番學   哈哈 ~

今朝食沙爹牛肉麵餐   果 Pat 沙爹牛肉好恐怖   啲芡一 Pat 嘢咁   之後 8 卦又係食沙牛米   佢都話唔會再嚟呢間食   真係好唔掂囉   之前唔係咁㗎 ~

菇場勁忙呀   不過都好   時間過得好快   同埋我都係鍾意有嘢做嘅感覺   同埋大粒喺度   比佢見到妳做嘢都好睇啲嘛   哈哈哈哈 ~

Lunch Time 去銀行入票   之後就番菇場食營養餐   好味道呀   哈哈 ~

仍然勁忙呀   忙到 4 點先搞掂   攰到爆炸 ~

放工即走   但落好大雨呀   成對鞋濕哂   好在真係番屋企   如果去街就慘啦   "up" 住哂對腳 ~

抖陣就煮嘢   今晚徑唔到步   所以要早食飯   早啲消化   呵呵   其實煮完都已經 7 點 lu ~   

是日懶餐 - 蕃茄雜豆辣肉腸螺絲粉

蕃茄雜豆辣肉腸螺絲粉 - 上上星期買咗好多蕃茄   剩番 3 個都要清埋去啦   個樣已經老過我喇   勁縐皮呢   咁加埋 2 條辣肉腸   今次真係好求其煮   估唔到好好食   我無煎啲辣肉腸架   咁煮蕃茄蓉嘅時候   加多啲水再煮熟啲腸咋   反正都撈埋一堆食   脆皮唔脆皮都唔重要呢   呢排唔係火腿就辣肉腸   救命   食到有啲驚   咁辣肉腸其實 31/8 到期   依家仲剩番 4 條   又整 Pizza 先   哈哈 ~

洗埋嘢就沖涼   之後都休息 lu ~

里奧大人差唔多 10 點番到嚟   叫佢快啲沖涼   因為 10 點半無水 ~

今晚我 11 點唔夠都瞓喇   其實好奇怪   我一覺瞓天光   但有時都覺攰咁   不過有時 11 點幾先眼瞓嘛   所以又早唔到瞓 ~