齋素鮮菇水餃出前一丁 + 炸魚皮 (外賣) ( 5-FEB-2018 )

( 5-FEB-2018  MON )

仍然咁凍   熱嘅時候好恨凍   但凍到咁又唔係咁想   同埋問題係無太陽先慘   灰灰暗暗真係唔好囉   無心機加無精神咁 ~

早餐食丁米   唔想食蛋   所以腸仔加紅腸   成隻食肉獸咁   哈哈 ~

8 卦落嘅辣椒油份量   佢覺得自己好勁㗎喇   哈哈

菇場勁忙   未坐低隻臭虫已經埋嚟話啲嘢好急   雖然佢講唔好意思   但我都黑面話哦   因為我真係好憎佢   自私自利   想我做得快但佢唔合作   我唔會同佢趕囉 ~

做佢啲嘢就已經做咗 2 個鐘   我先可以做自己嘅 Report   諗住整其他嘢   點知又有長命 Report   今日都會好充實㗎喇 ~

做做下嘢   會計部同事又嘈交   高妹去 A 銀行拎錢   怪問佢去唔去 B 銀行   佢話唔去   怪就話點解次次都唔去 B 銀行 ?!   咁我相信因為之前佢哋嘈過一次交   所以高唔想幫怪去銀行囉   之後高妹話因為要拎錢番公司   安全理由所以唔去 B 銀行幫怪入票   怪問高妹拎幾錢 ?!   佢話萬幾蚊   怪即話萬幾蚊唔係好多啫 ?!   但高妹仍然話安全理由   所以唔去 B 銀行 ~

老實講   萬幾蚊真係唔多啦   十幾萬就話驚啫   同埋我覺得咁妳去咗 B 銀行入票   再去拎錢咪得囉   咁樣好明顯妳真係玩針對   不過佢哋阿頭就同怪講   張票唔急就聽日入啦   無計啦   怪個人真係好怪   所以無咩人會幫佢 ~   

Lunch Time 唔餓   咁就行一田啦   買埋炸魚皮   之後再買麵包番菇場食 ~

仍然努力工作   不過仍然準時放工   呵呵~

番到屋企抖陣就拖地   無計   越坐越凍   點都要郁下 ~

7 點又開始餓餓哋   好在記得尋晚食剩半碗白飯   即蒸埋去食啦   加磚腐乳   人間極品   哈哈   真係覺得自己已經係阿婆 lu ~

里奧大哥 8 點半先放工   咁煮麵佢食啦   反正啲麵就到期 ~

是日懶餐 - 齋素鮮菇水餃出前一丁

齋素鮮菇水餃出前一丁 - 呢隻水餃唔會再食   因為一咬落口就一大陣菇味   係無落調味料嘅菇味囉   真係幾難頂   所以一次煮哂 16 隻   永不再見   哈哈 ~

洗埋碗沖埋涼已經 10 點   真係夜囉   咁又攰喎   所以都唔熨衫住喇 ~

今晚真係攰呀   11 點唔夠就瞓 lu ~

香煎蝦餅 + 蠔油油麥菜 + 芫茜皮蛋魚片湯 ( 4-FEB-2018 )

( 4-FEB-2018  SUN )

今朝有事奉   所以 9 點半要起身喇   食埋早餐就精精神神番教會 ~

星期日早餐係 Full Set   所以一定有蛋   但我就係唔想食蛋囉   哈哈

好味呀   多士好脆   同埋甜甜哋





今次我做另一個事奉崗位   甩甩漏漏添   唉 ~  

崇拜完畢就行陣商場   之後我去街市買餸   里奧大人就番屋企 ~

佢 2 點半瞓到 3 點   天氣凍   真係好快肚餓   所以要去食下午茶喇 ~

食飽完就即番屋企   我就即煲雪梨水   佢就做公司嘢 ~

抖多陣都 6 點   係時候煮嘢喇 ~

是日晚餐 - 香煎蝦餅 + 蠔油油麥菜 + 芫茜皮蛋魚片湯

香煎蝦餅 - 己經落多啲油   諗住唔黐底   係就係唔黐底   但燶鬼哂呢   因為我開咗大火呀   煎幾塊蝦餅   搞到成個廚房都係煙   真係慘 ~

蠔油油麥菜 - 唔知點解   真係好唔想食菜咁   但又好鍾意食雜豆粟米呢啲喎 ~

芫茜皮蛋魚片湯 - 尋晚麻辣完   今晚要下下火啦   哈哈 ~

洗埋碗就同里奧大人出去搵暖包   因為姑奶話佢附近間日本城無哂貨   咁其實應該好多都無哂貨㗎喇   但去睇囉   果然真係無哂貨   我同里奧大人講囉   成日係咁叫凍有鬼用咩   郁下咪無咁凍囉   不過姑奶話無用喎   里奧大人都話佢唔郁咪無用囉   嘥氣   我話佢只係識死叫爛叫話凍   咁點解點都唔郁呢 ?!   有手有腳都唔郁   咁真係無人幫到妳 ~

呢晚里奧大人又成晚話凍   咁佢話沖涼嘛   之後一路除外套一路話一陣要食馬仔   我話沖就沖啦   食咩唔駛同我講   一陣沖完出嚟食啦   講咗沖涼十分鐘都未沖   我趕住洗衫呀   再講我就沖先   唔鬼理佢   哈哈 ~

佢話唔知做咩   個人好寒咁   我話唔知係咪飲雪梨水呢 ?!   但係熱飲喎   又唔係凍   點會咁㗎 ?! 

里奧大人 11 點都瞓   我就 11 點 20 分瞓 ~

麻辣雞煲 @ 阿 Mi 屋企 ( 3-FEB-2018 )

阿 Mi 煮嘅麻辣雞煲 



好似個花盤   哈哈



撈埋一齊勁好味   睇見又好想食呢



佢哋今晚飲白酒   不過我仍然都係飲忌廉

紫淮山 / 金菇 - 里奧大人食緊淮山嘅時候   就同我哋講話依家先食到麻辣味   我同阿 Mmi 碌大眼對望   唔係呀嘛   依家先食到   唔知以為佢食得咁勁   阿 Mi 都變咗孖潤腸啦   哈哈   因為里奧大人唔食配菜   咁啲花椒多數黐埋落啲配菜度   所以佢 Feel 唔到囉

我見到個罩呢   仲諗要隔啲咩呢   之後先知用來裝住啲蜆   因為呢煲嘢我係無夾過嘢食呀   係阿 Mi 係咁夾係咁夾比我食呢   唔怪得咁飽啦   因為無郁過   哈哈  



脆肉鯇 - 今次啲色好靚呀



蜆 - 我唔記得拎出來呀   又係比阿喂捉到   佢叫阿 Mi 炒咗呢個助手啦   哈哈   不過如果佢唔講   我真係唔記得拎   哈哈   我好記得有 5 樣嘢   我同阿 Mi 每人拎 2 樣嘢出來   之後掛住影相   完全唔記得有嘢未拎   呢隻蜆都好 Juicy 呀   

蝦滑 - 阿 Mi 話喺另一間買   但都 OK 喎



水魷 - 今次我話一定要食呀   呢度有 2 隻   真係好鍾食呢啲水魷   但人多食就好   始終係比較難消化呢



炸魚皮 - 佢必會出現的   哈哈



( 3-FEB-2018  SAT )

真係超級好瞓呀   瞓到 11 點 20 分先醒 ~

咁我刷牙沖涼先嘛   諗住叫里奧大人拿拿聲去 Line 谷講早晨   估唔到原來佢一起身就喺 Line 谷講咗早晨 ~

搞掂哂就即出門口   但原來里奧大人以為會食埋早餐先出發   因為佢知道阿 Mi 佢哋早起身   以為佢哋已經食早餐   再等埋我哋先食嘢   我話佢哋未食呀   所以約埋一齊食午餐呢   大約 1 點喺飯堂見 ~

行行下見到大樹下好多白色一點點   其實想問好耐㗎喇   咁我問里奧大人係咪木棉花之類跌咗落嚟 ?!  佢好大反應又超勁高音話白鴿屎呀   成個 8 婆咁   哈哈 ~

坐小巴嘅時候   問里奧大人想要咩湯底   佢話要食辣雞煲   仲要中辣   因為天氣凍喎 ~

阿 mi 喂已經到咗飯堂   所以一坐低就要叫嘢食喇   阿喂唔餓得   呵呵 ~

香茅燒豬扒飯 - 我鍾意個汁   阿 Mi 話豬扒好 "鞋"   我唔覺   因為我煮得仲鞋  哈哈

蝦醬豬頸肉炒河 - 阿 Mi 話食㗎   所以一定要叫   好難得佢話想食自己想食嘅嘢呀   呵呵

鴨肉湯河 - 我成日都覺得好似拎個鋅盤來咁   勁大碗   同埋加埋飲品只係 $40 咋   超級抵     



無骨海南雞飯 - 里奧大人想食   但見阿喂叫咗   所以佢就唔叫   我話阿喂自己食得哂㗎   仲可以食埋其他嘢添   呵呵



阿喂好快咁比錢   我話唔理   今晚一次過計數 ~

其實阿 Mi 一月已經講緊生日飯   不過我真係要等里奧大人得閒先   佢呢排星期六日都要做公司嘢嘛   不過我 Off   佢都話想行山   但阿 Mi 話天氣太凍   星期五再約行程 ~

食完就一齊去街市買材料   次次阿 Mi 都會問我哋食咩 ?!   我哋答無所謂   其實=無答   哈哈哈哈 ~

不過食咩都真係無所謂   最緊要就佢哋方便   唔好要特登去買咁   始終我覺得煩到人就唔好囉 ~

里奧大人話買嘢飲   所以佢哋去買魚   我哋去買嘢飲   咁我話買生日蛋糕   但唔合心水   咁算啦 ~

咁之後要買咩呢   唔記得添   但就會經過千色店   咁就買蛋糕喇   呵呵 ~

知道阿 Mi 喂午晚餐點都唔收錢㗎喇   所以買蛋糕嘅時候   我即拎卡比里奧大人行去比錢   點知佢哋想跑去比   不過比我捉住   一口氣捉住兩個人   勁攰   當堂熱哂   哈哈哈哈 ~

衰奧最開心係呢一刻   因為我比錢   叫佢再行多兩個街口買嘢都肯行呀 ~

之後阿 Mi 叫我拎蛋糕   我話唔想變咗一 Pat 嘢番屋企   佢就話我同阿喂係一樣喎   拎嘢 Fing 來 Fing 去   不過我見過阿 Mi 兩手拎嘢   個人都挺得好直來行   對手真係唔係點 Fing 㗎喎 ~   

阿喂同里奧大人去拎雜誌   我就同阿 Mi 番到屋企   原來已經 4 點   時間過得勁快 ~

里奧大人要整部電腦   阿喂就去買啤酒   我同阿 Mi 坐喺梳化傾密偈   好似好耐無試過咁喇   因為次次番到嚟都要入廚房整嘢   男人就睇電視   我哋唔可以坐梳化   呵呵 ~

我成日睇一套戲可以睇好多次   好似 Minions 咁   真係可能睇咗 30 次   但次次睇都會笑㗎喎   所以里奧大人真係睇笑片睇到喊   哈哈哈哈 ~

聽過可以一首歌聽半個鐘   所以真係好感激里奧大人陪我睇   哈哈   但估唔到阿喂又係咁   真係似得好交關 ~

5 點半預備喇   喺廚房聽到里奧大人睇 Youtube 笑到卡卡聲   依家佢都唔怕醜 lu   同埋都夠膽好大動作企喺棵植物面前   大大動作咁講嘢   次次我要叫佢小心啲   整跌人哋啲嘢真係唔好啦 ~

呢張係扮整嘢嘅   但其實真實情況都係一樣   我只係企喺阿 Mi 左右睇佢整嘢   哈哈   



呢張阿 Mi 真係整緊嘢   但我都只係望住   哈哈哈哈



我出去放低手機之後   見到啲雞落咗鑊   我一嘢炒起咗   之後阿 Mi 話唔好炒呀   嚇死我   堅越幫越忙   



邊煮雞   邊整配料   所以成日覺得唔好意思要阿 Mi 整就係咁啦

擺哂 Post 影呢個包裝   笑死我呀

就咁個汁已經香噴噴   真係即刻好餓   我同阿 Mi 講話呢個汁   我可以食十碗飯   佢碌大對眼   哈哈   咁好味嘛   堅可以食起碼兩大碗飯   如果無餸嘅話   呵呵

估唔到一路煮嘢   一路都好凍   我又係凍都唔着外套   所以阿 Mi 話人有人凍   衫有衫凍   勁似里奧大人囉囉嗦嗦咁   哈哈哈哈 ~

又忍唔住開廚櫃睇下有啲咩   真係覺得自己超級多手   哈哈   次次一見到佢啲櫃桶咁少嘢又咁整齊   就好想即刻番屋企執嘢 ~

搞掂哂就開餐   咁快同我預祝食生日飯   真係超級勁開心呀 ~

6 點半開餐   食哂啲雞都已經 7 點半   呢個時候又開始灼海鮮喇 ~

食完都唔知幾點   洗埋碗就抖下   之後又一齊睇下 Youtube   笑死我   阿 Mi 講哂阿喂睇 Youtube 嘅次序   佢又係睇好多次   真係同我一樣   我又可以一樣嘢睇好多好多次㗎   哈哈哈哈 ~   

話咁快就 9 點半   阿 Mi 話切蛋糕喇   呵呵呵呵 ~

自己提字   當然要寫好嘢啦   哈哈   



開心開心   我食埋塊朱古力添呀



第 3 餐了



口感好實在   所以好飽肚   哈哈   



食完又洗埋碟   之後又傾下偈   阿 Mi 又叫我試食爆谷   個口真係永遠好難停到   哈哈 ~

我超級鍾意食焦糖爆谷   呢個好味道   但就好甜   唔怪得佢話 食 2 粒就夠啦   我勁啲   可以食到 3 粒



10 點 50 分 Call 車走喇   咁要計數喇   但阿喂點都唔肯收午餐錢   阿 Mi 又唔收晚餐錢   真係太客氣啦   記得我生日   我已經超級勁開心㗎喇   多謝哂佢哋呀 ~

番到屋企即沖涼   再睇多陣電視都瞓 lu   其實都已經 12 點幾   呵呵 ~

齋素鮮菇水餃冬蔭功米粉 + 油麥菜 ( 2-FEB-2018 )

( 2-FEB-2018  FRI )

尋晚瞓瞓下熱醒   之後凍醒   原來里奧大人都係咁 ~

早餐食蛋牛治   今朝 8 卦終於食墨丸河   其實大家都食到悶   不過又唔想轉場   唯有佢轉食早餐款   哈 ~



菇場唔太忙   個人有啲攰   唔願郁 ~

8 卦同我講話西瓜每個星期日晏晝都番公司做嘢   真係黐線   無朋友就喺屋企休息下好過啦   有次仲零晨 2 點出 Email   係咪咁緊要呀 ?!   所以 8 卦跟佢咪慘囉   7 點半放工覺得早添㗎   真係人都顛 ~

咁我哋喺 Pantry 洗杯   如果整濕咗   我哋會抹番乾淨   但好多人都唔會   之後又講起西瓜   8 卦話西瓜連男廁鋅盤上面擺嘢嘅位置都會抹   8 卦話佢遲早拎埋女廁條 Key 抹女廁   哈哈   咁又講得啱   佢真係得女廁無得比佢抹   哈哈哈哈 ~

初初我覺得佢好忙   咁正路吖   一人之下嘛   但之後我發覺好多唔係佢要做嘅嘢都做埋   唔怪得搞到自己咁忙啦   無意思 ~

Lunch Time 出去買酸辣米線   條街又唔係好凍咁喎 ~

唔知以為我已經食完   哈哈哈哈

要起勢撩   仲要堆埋一邊先有咁效果咋

仍然 Hea 過   但食得飽待滯   有啲眼瞓   哈哈 ~

放工即走喇   番到屋企都係抖下   一見凍就去拖地   當做埋運動都唔錯 ~

等呀等   等到里奧大人終於放工   但已經 9 點啦   真係要買定啲餅乾零食比佢   咁唔駛餓到黐咗線 ~

食完洗埋嘢都 10 點   無可能咁早瞓   咁睇下 youtube   差唔多 12 點半先瞓呀 ~      

豉汁蒸鯧魚 + 節瓜紅衫魚湯 + 扒芝士肉鬆三文治 ( 1-FEB-2018 )

( 1-FEB-2018  THU )

話咁快就到 2 月   咁 2 月得 28 日   所以更加快過   最搞笑有次問 8 卦貨期   佢話寫 2 月 30 日啦   之後即刻話 2 月無 30 日喎   其實佢唔講   我都無為意呢 ~

早餐食芝腿治   其實想食米粉餐   但又唔想成日食   好怕食大咗個胃呀 ~



菇場唔忙   咁就好喇 ~

真係好鍾意呢個日曆



Lunch Time 出去食牛丸河   之後又周圍行   但其實好鬼凍   所以最後都係行商場 ~

大粒又出哂去   所以又可以 Hea 到放工喇   爽 ~ 

放工番屋企   滾好湯就拖地抹嘢   話咁快又 8 點   里奧大人都放工了 ~

今晚滾湯 蒸魚 淥菜 淥麵   但得兩個爐頭   所以要爭取時間呀 ~

是日晚餐 - 豉汁蒸鯧魚 + 節瓜紅衫魚湯 + 扒芝士肉鬆三文治

豉汁蒸鯧魚 - 喺大成街市買   只係 $18 一條咋   原來細細條仲好   唔駛成日食到好飽咁 ~

節瓜紅衫魚湯 - 第一次煲到奶白色嘅湯   勁開心勁滿足   哈哈 ~

扒芝士肉鬆三文治 - 前晚剩咗 2 塊方包   牛油又已經到期   所以整呢個三文治   里奧大人勁鍾意食   話係今年食過最好味嘅三文治   過得嗰一個月   就用今年形容   之後佢問做咩整呢個三文治   我話啲人買咗牛油過期咪要整囉   之後佢突然醒哂話佢都無買到牛油   咁我話又好似係喎   哈哈   怪錯佢添 ~

洗埋碗就沖涼   一沖熱水涼就最舒服   但臨沖完果下又好鬼掙扎   勁唔想出嚟   哈哈 ~

今晚勁咯   10 點 45 分就瞓覺喇 ~