米線陣 @ 官塘 ( 7-MAY-2020 )

滋味二人餐 ($128)

酥炸雲吞 - 熱辣辣最正   哈哈

紅油青瓜雲耳 - 今次得個鹹字

川辣口水雞 - 同雲耳個汁一樣味嘅   諗住麻麻辣辣先叫來食嘛

滷水雞翼 + 滷水牛展米線 (麻辣蕃茄湯底)

滷水金錢肚 + 香酥豬頸肉米線 (麻辣蕃茄湯底)

青檸薏米 / 紅豆冰

( 7-MAY-2020  THU )

呢兩朝沖完涼都覺得好熱   應該夏天來臨了 ~

今朝同多士一齊坐   佢比個圖我睇   睇下出來係咩數字   就知有無老花   我話 1824 係老花呀   佢好安慰我咁話 1824 唔係呀   話再睇多次啦    我再睇清楚係 1624   佢好開心話 16 唔係老花呀   之後我話人哋寫明 1824 / 1624 都係老花呀   哈哈哈哈 ~

早餐仍然食芝腿治烘底   好味道 ~

菇場忙呀   好快 Lunch Time ~

今日食 Flakes + 朱古力奶   食完真係唔眼瞓喎 ~

仍然忙呀   好在 4 點做哂做長命 Report   可以抖下 ~

放工即走   去 APM 拎鞋   但里奧大人 6 點先放工   咁我自己行陣先   去咗 759 買零食同飲品   之後再去 MUJI 買點心麵   買完就收到里奧大人電話話差唔多落車   咁我都去米線陣喇 ~

里奧大人話幫佢叫埋   我話等埋佢嚟到先   之後我幫埋佢揀食啲咩啦   佢話其實同頭先幫佢叫有咩分別   哈哈哈哈 ~

食完就去拎鞋   之後番屋企喇 ~

沖埋涼就休息   今晚 8 點 15 分開始睇 "慶餘年"   勁開心 ~

今晚 10 點左右已經開始眼瞓   但想繼續睇   不過頂到 10 點半都自己瞓先喇 ~

咖哩茄汁沙甸魚 ( 6-MAY-2020 )

( 6-MAY-2020  WED )

今朝一覺瞓到 7 點 15 分   起身勁精神呀   感謝主 ~

之前兩日真係勁唔舒服   我真係驚㗎   因為無啦啦咁嘛 ~

7 點 40 分出門口   所以買埋生果先食早餐   唔想放工特登去買 ~

買咗 3 磅幾豬腰芒 + 2 磅龍眼 + 5 個鴨梨 + 4 條大蕉   原來一齊放埋落環保袋都幾重   但費事拎幾袋生果番工啦   好鬼肉酸   哈哈 ~

一路行都覺得好熱   咁摸下額頭   原來係成頭汗   我唔摸真係唔知㗎 ~

早餐食芝腿治烘底   阿姐見到我抹汗   都話覺得我好熱   因為我真係好少咁樣抹汗   哈哈 ~

菇場忙呀   好在夠精神   哈哈 ~

Lunch 去買炒麵+粉果   之前話過唔再幫襯   但真係唔想食濕湯粉   所以又買番佢了 ~

真係奇怪   呢排係食完 Lunch 就眼瞓   但未食之前係精神㗎喎   搵日食 Flakes 或者麥皮   如果食完唔眼瞓   咁即係我食嘅 Lunch 係好重味精了 ~

放工即走   同里奧大人差唔多時間番到屋企   我叫佢沖涼先啦   一陣食完可以休息一下先開會 ~

是日晚餐 - 咖哩茄汁沙甸魚

咖哩茄汁沙甸魚 - 跟肥媽學㗎   都好方便   因為屋企有五香粉 咖哩粉同辣椒粉   之前又買咗茄汁沙甸魚   星期六又特登買咗薯仔   所以點都要整呢個餸呢   估唔到又幾好味   有機會再整 ~

洗埋碗就開機洗衫   之後沖涼休息 ~

里奧大人同事煮嘅芋頭西米露   超級勁好味呀   里奧大人話我扮嘢   我話真係超級好味呀   我平時好怕食西米露   因為一 Pat Pat 咁   但呢碗完全無呢啲感覺

里奧大人 8 點開會   一開開到 9 點 45 分 ~

佢 10 點半左右都瞓   我就 11 點鬆啲先瞓 ~ 

麻辣手撕雞 + 客家釀涼瓜 (外賣) ( 5-MAY-2020 )

( 5-MAY-2020  TUE )

今朝起身又係有啲攰   但尋晚已經 10 點半瞓喇喎 ~

早餐食奶醬多   無咩胃口 ~

番到菇場一坐低   就見到有包 Tissue 喺枱面   以為尋晚放工跌咗出來   有人幫我放番喺枱   但擺到咁樣 (即係唔係求其放埋一邊)   我就覺得唔似我跌咗囉   之後再望其他同事嘅枱   每人都有包 Tissue   咁應該係西瓜比我哋啦 ~

忙下停下呀   但我好攰   哈哈 ~

Lunch Time 出去買雞骨草比里奧大人   再行陣就買魚片頭米番菇場食 ~

食完個 Lunch 仲攰   做咩鬼呀   我估係味精太重 ~

好在忙咋   但無啦啦暈一暈   好在放 5 點   可以早啲番屋企休息 ~

放工即走   番到屋企真係要灘喺梳化 ~

呢兩日好唔舒服   個肚又谷谷地   加上菇場冷氣超級凍   所以更辛苦 ~

次次里奧大人喺屋企   就會問我去到邊   開定冷氣等我   但呢兩日我話唔好開住等我   我仲凍緊呀 @@

抖到 6 點又好啲喎   可能個身終於完全解凍   哈哈   所以即去買外賣喇 ~

番到屋企即沖涼   諗住開餐   點知里奧大人又話沖涼   我話頭先應該去沖嘛   真係呢 ~

食完飯就洗衫   之後即睇 "慶餘年" ~

今晚 10 點半都瞓喇   里奧大人以為我睇埋肥媽先瞓   所以佢知我好攰   同埋都錄咗嘛   留番聽晚睇都得呢 ~

滑蛋粟米魚塊 + 叉燒 & 燒鴨 (外賣) ( 4-MAY-2020 )

( 4-MAY-2020  MON )

連放 4 日假   真係有啲惰性   今朝唔係咁想起身   哈哈 ~

買埋麵包就去食早餐   今朝食芝蛋治烘底   食完超級飽 ~

喉嚨仍然有啲痛   諗住買雞骨草又無喎 ~

菇場忙呀   今個星期放 5 點   睇嚟好快回復正常了 ~

做做下嘢   覺得抖氣有啲薄荷味   但我無滴薄河油喺口罩喎   之後先記得自己食緊薄荷喉糖   真係黐咗線   有時見到啲同事帶口罩   心諗係咪唔舒服 ?!   但其實依家個個都戴緊口罩啦   真係焗到個人有啲傻傻哋   哈哈 ~

Lunch 食菠蘿叉燒包   食完都休息下   個人好攰咁  ~

西瓜每人派個口罩套   喺今次疲情當中   真係覺得公司對每個員工都好好   又派口罩又放早   我唔知其他公司係咪咁   但我識嘅朋友就無咁囉   所以我真係好感恩 ~

仍然忙呀   望個鐘已經 4 點幾   抖多陣就放工喇 ~

放工即走   番到屋企都係抖   本來想瞓下   但同里奧大人傾下偈   都精神番 lu ~

6 點左右出發去買晚餐   之後番屋企沖埋涼先食飯   勁爽 ~

食完都只係 7 點幾   可以早啲睇 "慶餘年"   平時 9 點先開始睇   所以睇睇下都以為已經 9 點幾   哈哈 ~

今晚 10 點半都瞓呀   個人勁攰 ~

薑蔥生蠔 + 脆肉瓜炒豬肉丸 ( 3-MAY-2020 )

( 3-MAY-2020  SUN )

今朝里奧大人番工   我瞓到 9 點 40 分都起身喇 ~

山崎金文粒芝士包 ($19/5個)   比 3 個里奧大人做早餐

食埋早餐就抹嘢   抹咗成個鐘   抹完成身汗   即沖涼呀 ~

勁攰呀   所以都係抖下 ~

差唔多 2 點幾就出發   同里奧大人去南記食 Lunch ~

本身諗住去姑奶屋企拎嘢   但里奧大人話手臂痛   所以唔去喇   之後食完又覺得 OK   又話可以去喇   勁搞嘢 ~

食完就去姑奶屋企   搞掂哂都 4 點幾   即番屋企喇 ~

里奧大人沖埋涼就瞓陣   我自己 5 點幾都瞓着   好在瞓到 6 點起身 ~

抖多陣就預備晚餐   7 點幾開飯最好   因為唔係咁餓   哈哈 ~

是日晚餐 - 薑蔥生蠔 + 脆肉瓜炒豬肉丸

薑蔥生蠔 - 上星期日買咗 3 扎蔥   放喺雪櫃   好在無爛咋   所以今晚點都要清咗去   唯一用得最多蔥就係呢個餸   同埋我想清埋啲生蠔   今晚整呢個餸就最理想喇   哈哈 ~

脆肉瓜炒豬肉丸 - 唔想齋食脆肉瓜咁悶   所以將豬肉丸切粒   再加燒汁一齊炒   里奧大人居然食咗半碟呀   仲話好味道   真係估佢唔到呢   原來鍾意食細路仔餸 ~

大清潔廚房就沖涼  食埋腰果露就休息 ~

仍然睇 "慶餘年"   真係好好睇呀   又緊張又感人又好笑 ~

睇睇下電視   突然喉嚨痛呀   即同里奧大人講啦   佢話可能腰果露太燥呀 ~

今晚 11 點幾都要瞓喇   聽日要番工呢 ~

生炒排骨 + 蒜蓉蒸脆肉瓜 ( 2-MAY-2020 )

( 2-MAY-2020  SAT )

今朝里奧大人番工   佢出門口就到我起身喇 ~

沖埋涼就出門口   買埋早餐就等家姐嚟接我 ~

Berry 見到我   又係撲我同埋怪叫 ~

今日禁食祈禱完畢   我可以食紅肉了

食完早餐又傾下偈   又打下機   時間勁快過 ~

古古怪怪

超級樣衰   哈哈

無啦啦又咬我隻手

點望都唔似女仔   但其實狗女狗仔都係一樣樣   哈哈哈哈

點解咁樣衰㗎   哈哈

開始眼瞓

佢含住粒零食   所以一路行一路滴口水   家姐隻手預備抹口水了

家姐買 5 公升嘅油   所以叫我比個樽比佢   但我話好難唧哂啲油出來   所以個樽係仲有油   之後工人見到個樽就好輕易咁開蓋倒起啲油   我問佢點樣可以開到嘅  ?!?!   佢就再教我   原來個蓋係要壓一壓   怪不我我成日覺得好難倒啲油出來啦   原來個蓋根本未開哂   哈哈哈哈

12 點跟家姐朋友車出新都城   家姐陪我行咗陣   一齊買咗條睡裙   之後里奧大人打嚟話放工   咁我都搭小巴去 Megabox 喇   估唔到 10 幾分鐘就出到去   勁快 ~

里奧大人又係啱啱落車   所以一齊行去食嘢喇 ~

馬來蜜汁炭燒厚切豬扒撈檬粉 ($72) - 豬扒好鞋   咬到牙都軟   哈哈

香葉辣椒豬肉碎配白飯 ($74) - 上次里奧大人已經想食㗎喇   但我叫佢食炒飯   所以今次佢都想食呢個餐   但味道唔掂喎   得個鹹字

食完去超市買嘢   比錢先知道原來我張 One Piece 係無 95 折   咁就勁驚啦   濾水器個 Sales 話我呢張有 95 折嘛   咁即去問 Road Show 職員   佢話真係無 95 折   所以我即申請另一張啦   咁即係之前個職員呃我話有 95 折喎   離譜 ~

買完就搭車番屋企   我就去街市買尖椒黃椒 ~

抖陣就預備晚餐   今晚要多啲時間整晚餐呢 ~

是日晚餐 - 生炒排骨 + 蒜蓉蒸脆肉瓜

生炒排骨 - 四十蚊排骨分 2 餐   確實唔夠   哈哈   所以配菜要多啲   不過其實我真係鍾意食配菜多過排骨   我炸咗好似 14 嚿排骨   但我食咗 4 件咋   里奧大人都鍾意食呢個餸   但我唔會成日整啦   好熱氣㗎 ~

蒜蓉蒸脆肉瓜 - 炸排骨要時間   所以呢個一定係懶餸   雖然我都鍾意煮   但都係偏向懶嗰邊   哈哈 ~

洗埋碗就開機洗衫   之後沖涼喇 ~

睇下電視   今晚 11 點幾都瞓 lu ~

帶子蒸玉子豆腐 + 豉汁臘腸蒸排骨 ( 1-MAY-2020 )

今餐勁有阿婆 Feel 呀   我突然想食蔥花   所以又整   其實加埋指天椒仲好味   不過唔食咁刺激喇

( 1-MAY-2020  FRI )

呢幾晚同里奧大人都瞓得唔好   我哋懷疑係飲咗杯黑茶呀 ~

我 3 點 18 分起身去廁所   之後 6 點 25 分醒醒哋   但瞓到 6 點 58 分又要去廁   最後瞓到 9 點都起身   難得放假都咁早起身   哈哈 ~

食完早餐就去買餸買生果   之後番屋企都只係 10 點半   勁早 ~

熨 3 機衫   但熨咗個半鐘已經好攰   叫里奧大人熨佢自己嘅褲 ~

里奧大人 1 點瞓到 2 點   佢起身我都整嘢食喇 ~

尋晚食剩   今日再食   唔好浪費

食完又睇下 Youtube   到我 5 點瞓到 6 點   哈哈 ~

抖多陣就預備晚餐   今晚非常簡單 ~

是日懶餐 - 帶子蒸玉子豆腐 + 豉汁臘腸蒸排骨  

帶子蒸玉子豆腐 - 無諗過玉子豆腐要 $4   不過佢話大陸造嘅就只係 $2   第一次煮呢個餸   真係超級勁簡單   感覺又清清哋咁   唔錯唔錯 ~

豉汁臘腸蒸排骨 - 我覺得呢個係冬天餸   但排骨太少   要加條臘腸充撐場面 ~

洗埋碗就開機洗衫   之後沖埋涼就休息睇電視 ~

聽朝里奧大人要番工   佢 11 點瞓喇   我就 11 點幾先瞓 ~