皇后餃子 @ 官塘 ( 7-JUN-2021 )

鮮肉韭菜餃 6 隻 ($20) - 好味呀   可能我鍾意蘸啲餃子醋   哈哈

咖哩牛根腩飯 ($45) - 我覺得啲咖哩唔辣

菜心 (跟餐 +$5)

( 7-JUN-2021  MON )

感恩今朝 6 點 55 分自然醒   又無落雨   所以即出去徑步喇 ~

一落街就有風   好似秋天咁呀 ~

雖然涼涼哋   但一做伸展就會出汗   所以好鍾意做伸展呢 ~

沖埋涼就番工   時間啱啱好 ~

早餐食奶醬多   今朝掛住同同事傾偈   完全唔記得影相先食添 ~

菇場忙咗陣就 Hea   呢排嘅星期一真係無咩 Mood 做嘢 ~

Lunch Time 出去行陣   之後買牛雜米番菇場食   依家越嚟越唔好食嘅 ~

2 點幾勁眼瞓   真係次次食完牛雜米一定眼瞓   下次真係唔好再食喇 ~

里奧大人 5 點幾放工   可以同我一班車番屋企   所以我都唔煮飯 lu ~

食完行陣就番屋企   抖半個鐘都出去徑步喇 ~

沖埋涼就休息   睇 Youtube 睇到 10 點半都瞓覺   今晚比里奧大人講咗句說話激親   但估唔到我瞓覺前又無咩嘢喎   唔通年紀大真係無咩火 ?!   不過我就覺得人哋把口鍾意話咩就咩   都唔鬼得閒理佢   總知自己所講嘅嘢要自己負責任就得㗎喇   唔會影響到我呢 ~

焗雞扒 + 辣菜脯白菜仔 ( 6-JUN-2021 )

( 6-JUN-2021  SUN )

本身校咗 9 點 45 分起身   但瞓到 7 點 50 分都自然醒   咁出去徑步喇 ~

里奧大人成日叫我唔好咁早起身   係都要我瞓㗎   不過我話我自然醒就代表夠瞓呢 ~

徑半個鐘就番屋企大清潔   今次再大清潔廚房同拖地   搞掂哂就沖涼   都已經 10 點 ~

抖多陣就出去食早餐   之後即番教會喇 ~

今日教會有新安排   咁我好認真聽嘛   牧師笑住話我個樣當堂好嚴謹   我話一做嘢就咁   因為我好驚唔記得   哈哈 ~

雖然好忙   但好多人都會問候里奧大人   又話疫情穩定再出嚟食飯   其實有啲真係年幾無見面㗎喇   希望之後可以回復短宣啦   可以為神作工又可以同弟兄姊妹分享   真係好開心呢 ~

事奉完都接近 2 點   里奧大人要等多陣先放工   咁我行下商場先喇 ~   

又買咗 2 件 One Piece   折咗 $350 就抵喇   買完即收到里奧大人話差唔多到  我都要走人喇 ~

諗住同里奧大人食雲南米線   不過無位   同埋地方好迫都唔會等囉   所以轉場去南記 ~

我今個月又無哂數據   所以要同里奧大人一齊去健康工房換 3 支雪梨茶   之後再行陣就走 lu ~

番到屋企都 4 點   沖埋涼就休息   唔去徑步喇   咁今朝行咗 4,000 步   喺教會行咗 7,000 步   所以次次番教會   真係可以行好多路   哈哈 ~

我就聽歌啦   里奧大人就瞓覺   今日大家都好攰呀 ~

6 點半左右就整蘋果菠蘿沙律   之後就即預備晚餐喇   所以要 7 點 15 分先可以開餐 ~

是日懶餐 - 焗雞扒 + 辣菜脯白菜仔

焗雞扒 - 一塊雞扒份量唔多  所以煮一個出前一丁 Share 食   咁樣就變得啱啱好喇 ~

辣菜脯白菜仔 - 之前買咗白菜仔   又係時候清埋去呢 ~

洗埋碗就開機洗衫   之後再沖多次涼就休息喇 ~

今晚仍然睇 ASTRO   最鍾意睇關於佢哋幕後嘅嘢   有時又會聽佢哋啲舊歌   之後又睇下其他片   所以睇到 11 點半先瞓呀 ~

北菇雞飯 + 雞扎 (外賣) ( 5-JUN-2021 )

( 5-JUN-2021  SAT )

今朝 7 點 10 分自然醒   又無落雨   所以即去徑步喇 ~

比原定遲咗 15 分鐘   不過我都仍然照徑 20 分鐘   因為我點都會有時間食早餐呢 ~

番到菇場無耐就見到阿花   即同佢傾偈呀   佢尋晚有睇車銀優 Live   所以同佢傾車銀優   傾咗 15 分鐘先食   突然變咗好趕   哈哈哈哈 ~

我成日叫佢支持 ASTRO   我好多時都 Send 佢哋啲片比佢睇   佢都覺得好好笑   所以佢好鍾意我 Send 啲片 ~

菇場唔忙啦   放工可以即走 ~

里奧大人今日番 3 點   所以陪我食 Lunch 呀   其實佢尋晚話陪我食 Lunch   但我話約咗家姐   叫佢自己食   之後我又覺得自己好衰咁   因為佢好開心同我講   但好失望咁答我   咁我隔咗陣就話我遲啲去家姐度啦   我同你食 Lunch 吖   我問佢係咪好想同我食呀 ?!   佢話梗係啦 ~

凍奶茶 / 凍檸茶 

粟米粒

酸辣鳳爪 (+$12) - 夠酸辣呀   份量仲好多   所以我食咗 2 隻   其他留比家姐

泰式海鮮濕炒河 ($70) - 今次河粉份量少咗好多呀

辣椒肉碎飯 ($60) - 里奧大人最鍾意食呢個飯

食完再抖陣   之後餐廳越來越多人   所以我哋都走 lu ~

里奧大人番工   我就去家姐屋企   感恩好快有車   差唔多 2 點幾就到喇 ~

家姐話佢凍就會瞓梳化底

同家姐傾偈   好快又 4 點   佢要出去整嘢   咁我就睇 Youtube 等佢啦 ~

Berry 喺梳化瞓   由 4 點瞓到 5 點   之後起身食晚餐   又再瞓到 6 點   家姐唔喺屋企   佢真係好好瞓㗎   但家姐一喺屋企   佢唔瞓㗎 ~

衰眼   哈哈

真係瞓

無啦啦又開眼   不過動作就無變過

以前佢細細隻   我真係抱住佢瞓㗎   就算我攰都會抱住   哈哈 

佢對眼突然好精神咁

諗緊咩呀 ?!

之後打平瞓

熟睡狀態

搞到我都想瞓   哈哈

起身食晚餐

食完又上梳化瞓   我喺 Berry 隻大脾仔上面瞓覺   但居然放屁呀   好在唔係太臭咋   哈哈

咁樣瞓好得意   好似好細隻咁

我睇 ASTRO 啲片   咁我喺度笑啦   好在無嘈親 Berry   之後聽到工人都笑到咔咔聲   果然識貨呀下   哈哈哈哈 ~

家姐 7 點唔夠番到屋企   我話今晚唔駛煮飯   咁我等埋佢哋食飯先番屋企呢 ~

家姐一入屋   佢又開始精神哂

煎腐皮卷   不過我慣咗焗   因為無咁多油

7 點 45 分走人   番到屋企即大清潔廁所   之後開機洗衫   沖埋涼就等里奧大人放工 ~

因為里奧大人 8 點幾先放工   所以我一早話唔煮   唔想搞到咁夜仲喺度做咁呀 ~

9 點開餐   真係算夜㗎喇 ~

睇多陣 ASTRO   再睇埋新聞   今晚 11 點半先瞓覺 ~ 

豆豉鯪魚油麥菜 ( 4-JUN-2021 )

( 4-JUN-2021  FRI )

今朝個天灰灰暗暗   所以無出去徑步 ~

未出門口都唔覺熱   但一落車行兩行   真係啲汗係咁流   因為條街好焗呀   快啲落雨啦   咁樣無咁焗呀 ~

早餐食腿蛋治   食完好鬼飽呀   哈哈 ~  

阿虫一見到我就話流哂汗好熱   我話我都一樣啦   企定定等 Lift 仲流得多汗呀 ~

菇場唔忙   可以 Hea 過 ~

Lunch Time 出去銀行   搞掂再去超市買豆豉鯪魚同油麥菜就番菇場喇 ~

今日 Lunch 唔想食熱嘢   所以食 Flakes + 朱古力奶   哈哈 ~

仍然唔忙   放工準時走 ~

里奧大人 6 點放工   番到屋企沖埋涼   就可以即刻開飯 ~

是日晚餐 - 豆豉鯪魚油麥菜

豆豉鯪魚油麥菜 - 今日豆豉鯪特價 $67.9/3罐   咁即買 2 Pack    所以今晚整呢個餸喇   哈哈 ~

洗埋碗再抖陣   同里奧大人 8 點左右出去徑步   今晚可以徑半個鐘喇 ~

開埋機洗衫就沖涼   之後即睇 ASTRO   依家睇佢哋啲綜藝節目   我覺得好過追劇   起碼可以笑下   哈哈 ~

今晚 11 點半瞓   又夜咗了 ~

茄汁洋蔥雞絲炒意粉 + 豬腳薑 + 白菜仔 ( 3-JUN-2021 )

( 3-JUN-2021  THU )

今朝徑步   又早咗一班車   所以 8 點 15 分已經番到菇場   我覺得呢個時間最好   可以慢慢洗杯再慢慢嘆早餐 ~

早餐食芝腿治烘底   好好味呀 ~

菇場仍然忙   時間過得勁快 ~   

Lunch Time 出去幫里奧大人公司拎嘢   之後先再買魚皮餃米番菇場   條街勁熱   真係唔想再行 ~

忙下停下又放工   番到屋企要即預備晚餐   因為里奧大人已經放工 ~

是日晚餐 - 茄汁洋蔥雞絲炒意粉 + 豬腳薑 + 白菜仔

茄汁洋蔥雞絲炒意粉 - 呢排無咩煮意   醃完雞扒就煮意粉咁囉 ~

豬腳薑 - 之前喺鴻福堂買咗 2 包   依家先想食   哈哈 ~

白菜仔 - 買 1 斤但今晚食半斤   以前可以食好多菜   依家真係唔得   份量太多咁呢 ~

洗埋碗就抖陣   之後同里奧大人出去徑步   今晚都徑半個鐘   勁爽   因為唔係太熱 ~

開機洗衫就沖涼喇   最期待呢一刻   哈哈 ~

今晚都係睇 ASTRO   我要追番佢哋咁多年嘅片呀   不過多數睇佢哋上綜藝節目嘅片   因為真係好好笑 ~

諗住 11 點瞓覺   估唔到里奧大人又繼續睇   咁陪佢睇啦   差唔多 11 點 15 分先瞓 ~

香炸雞膇 + 紅油青瓜 + 紫菜包飯 ( 2-JUN-2021 )

( 2-JUN-2021  TUE )

里奧大人鬧鐘 7 點 15 分響咗   我見無落雨都即刷牙喇   換埋衫就去徑步 ~

雖然遲咗   但都要徑步 20 分鐘   反正我都係搭番原本班車   難得無雨真係好想郁下 ~

無落雨但塞車   8 點 35 分番到菇場   算遲喇   哈哈 ~

菇場勁忙呀   做完長命 Report 再做煩嘢 ~

今朝徑步   番工真係唔眼瞓喎   加上又忙   所以好快到 11 點 45 分 ~

行陣再買粉果炒麵   其實好想食湯麵   不過真係有啲熱   所以下次先食   哈哈 ~

仍然忙呀   話咁快放工 ~

我坐倒頭位   隔離行對面嘅婆婆做手勢   叫我拉低扶手柄落嚟   仲做埋向前衝嘅動作   佢見我拉完手柄先睇手機   真係好感動呀   真係人生第一次坐巴士遇到啲咁情況呢 ~

番到屋企都即預備晚餐喇   因為里奧大人已經放工啦 ~

6 點 45 分開餐   真係算早喇   不過今晚真係超級簡單呢 ~

是日懶餐 - 香炸雞膇 + 紅油青瓜 + 紫菜包飯

香炸雞膇 - CP 品牌真係好正   雞膇完全係泰國嘅味道   上次 AEON 做特價只係 $50/3包   所以即買   當方便餸都好丫 ~

紅油青瓜 - 擺咗 2 星期   只係雪壞咗 1 條   算係好㗎喇   所以今晚點都食埋佢 lu ~

紫菜包飯 - 其實想清埋包壽司紫菜   咁求其剪碎放飯面就算喇   因為無時間等佢凍再包到靚靚咁呢 ~

洗埋碗就抖陣   今晚只係焗嘢   所以煮嘢嘅時候同埋洗碗都無出汗   真係勁爽   哈哈 ~

8 點就同里奧大人出去徑步   里奧大人話徑 20 分鐘   我話咁快 ?!   佢話飲完啤酒   當散步算喇   咁又係   平時佢都會跑下   今晚真係純粹漫步人生路   哈哈 ~

沖埋涼就睇 ASTRO   今星期都唔睇劇喇   抖下先 ~

11 點左右瞓   因為聽朝應該唔會落雨   又要開始徑步喇 ~

焗三文魚骨 + 腐乳唐生菜 ( 1-JUN-2021 )

蠟筆小新杯好得意

( 1-JUN-2021  TUE )

今朝落雨無得徑步   咁瞓到 7 點半   喺屋企做下伸展算喇 ~

早咗一班車   點知勁塞車   真係好彩早一班車咋   因為 8 點半先番到菇場 ~

菇場勁忙   居然有啲唔慣   希望之後都咁忙啦   唔想 Hea 懶個身同心   哈哈 ~

眨下眼又 6 月喇

Lunch Time 出去行陣   突然好想食濕濕地嘅嘢呀   所以買牛筋丸米喇 ~

超級忙呀   真係放工都做唔完   長命 Report 只做到一半咋   咁留番聽朝早做呢 ~

放工即走喇   估唔到里奧大人 6 點已經番到屋企   叫佢沖涼等食喇 ~

是日懶餐 - 焗三文魚骨 + 腐乳唐生菜

焗三文魚骨 - 星期六喺 AEON 超市買架   今晚一定一定要食呢   用咖哩粉醃咗 2 晚   夠哂入味啦   不過我仍然會蘸辣根醬   加埋酸瓜好鬼正架 ~

腐乳唐生菜 - 仍都係星期六買   今餐樣樣都係星期六買   哈哈 ~

洗埋碗就開機洗衫   出面落緊雨   所以無得徑步   咁沖涼休息 lu ~

里奧大人無啦啦問仲有無嗰啲嘢 ?!   我以為問每月一   原來係問仲有無 "見到" 嗰啲嘢 ?!   嚇死人咩   無啦啦咁問   我話無囉   你唔係見到呀嘛 ?!?!   佢話唔係   哈哈 ~

終於睇埋最後 1 集 "會讀心術的那小子"   所以今晚 11 點半瞓呀 ~