秀珍菇炒牛板腱 + 菜心苗 + 自家制麵包 ( 7-JAN-2022 )

( 7-JAN-2022  FRI )

感恩一覺瞓天光   可能天氣涼涼哋   瞓得好舒服   哈哈 ~

早餐食麥芝蛋包   好耐無食   覺得勁好味 ~

菇場忙呀   其實我真係鍾意忙多過 Hea   感覺似番工多啲嘛 ~

Lunch Time 出去買菜   再周圍行陣就番菇場喇 ~

今日食 Flakes + 乳酪   我話乳酪就過期   阿齋話成日都聽妳話啲嘢就過期   買番嚟嘅時候又唔食   哈哈   開始越來越了解我咁喎 ~

仍然忙   好快放工 ~

今晚里奧大人 6 點幾番到屋企   但我仲未煮完   咁今晚佢 9 點開會   都唔可以去徑步   所以叫佢沖涼先呢 ~

是日晚餐 - 秀珍菇炒牛板腱 + 菜心苗 + 自家制麵包

秀珍菇炒牛板腱 - 尋晚特登剩番半包迷你秀珍菇架   今晚只用牛角燒汁   唔想又好似同尋晚一樣色呀   哈哈 ~

菜心苗 - 呢份菜只係 $3.3 咋   份量唔太多就好喇   因為仲有節瓜呢 ~

自家制麵包 - 今晚食唔落呀   又要留番了   明明新鮮都變隔夜   嘻嘻 ~

洗埋碗就做家務   依家諗住逢星期五都唔徑步   做下屋企嘢   咁我星期日可以盡情休息 ~

我叫里奧大人睇住開間開會   之後話改到 10 點開會   都好夜下噃 ~

今晚抹屋同埋執個廚櫃   成日想執又的唔起心肝   今晚終於搞掂   勁開心呀 ~

8 點做到 9 點半   要停喇   哈哈 ~

開機洗衫就沖埋涼   之後真係要休息 lu ~

里奧大人 10 點開會   差唔多 11 點先開完   仲要整其他嘢   所以我 11 點半都瞓覺先喇 ~

秀珍菇洋蔥豬扒 + 節瓜粉絲白魚蛋 ( 6-JAN-2022 )

( 6-JAN-2022  THU )

今朝醒一醒   之後鬧鐘響   即係我一覺瞓天光   實在太感恩呢 ~

呢排朝早唔徑步住   等疫情緩和少少先去徑步   我想瞓夠抵抗力好啲   同埋我最衰係成日朝早着太少衫   上次已經差啲攝親   真係好驚囉 ~

早餐食奶醬多   連續 4 餐真係好勁呀   其實係悶悶哋   但咁樣先可以食得落午餐 ~

菇場忙呀  但個胃有啲痛   又係連續飲兩日檸檬茶就會咁 ~

我叉緊手機電   家姐打嚟話喺 MUJI   問我要唔要醬油餅 ?!   我話唔要   又問要唔要朱古力 ?!   我話千奇唔好買比我   咩都唔要   臨收線又問要唔要柚子糖 ?!   救命呀   都話咩都唔要咯   最搞笑佢話比我講到佢都唔想買   我話係吖嘛   之前喺一田買嘅零食都有排食   唔想食咁多呀 ~

之後又打嚟問要唔要蘿蔔糕同芋頭糕   呢樣我就要喇   哈哈 ~

Lunch Time 出去買豆卜同迷你秀珍菇   之後再買埋墨魚丸米就番菇場喇 ~

係咪咁邪呀   我再差手機電   家姐又打嚟話喺八珍買唔買芋蝦 ?!   我話唔要   佢話買大包 Share   又問食唔食鹹蛋散 ?!   我堅決話唔要呀   上年一個人食   食咗好耐   雖然好味   但好熱氣   唔想食咁多呀 ~

仍然勁忙   好快放工   爽呀 ~

放工即走   里奧大人 6 點幾先放工   所以我要去買米   估唔到差唔多食哂一包米   以前真係每年都倒米架   因為好多穀牛呢～

番到屋企即煮飯啦   今晚樣樣都要切粒比較要啲時間   哈哈 ~

是日晚餐 - 秀珍菇洋蔥豬扒 + 節瓜粉絲白魚蛋

秀珍菇洋蔥豬扒 - 里奧大人整完牙   我驚佢食嘢痛   所以將所有嘢切粒   佢今晚食得好快   即係鍾意食呢個餸   哈哈 ~

節瓜粉絲白魚蛋 - 唔想蒜蓉蒸節瓜   同埋如果蔬菜有啲汁   里奧大人會食多啲    所以整蠔油燜節瓜   佢仲話飯盒可以帶啲節瓜添呀 ~

洗埋碗就抖一陣   8 點就同里奧大人去徑步 ~

夜晚好似涼咗好多咁   真係好在有着風褸咋 ~

沖完涼就睇 Youtube   11 點唔夠都瞓 lu ~

韭菜鍋貼餐 & 麵線套餐 (外賣) ( 5-JAN-2022 )

韭菜鍋貼餐 & 麵線套餐 (招牌鍋貼 & 大腸麵線)

( 5-JAN-2022  WED )

感恩一覺瞓天光   起身都好精神呢   所以又出去徑步喇 ~

早餐食奶醬多   里奧大人都話我勁呀   可以食咁多餐奶醬多   哈哈 ~

菇場忙呀   要清理番啲 File ~

Lunch Time 直接出去買酸辣米線   因為我要幫阿齋買埋   今朝問佢有無帶飯   佢已經知我係食酸辣米線   11 點幾佢話最衰係我呀   搞到佢都想食呀   哈哈   所以我幫佢買埋啦 ~

今次小辣都辣

仍然唔忙呀   所以繼續清 File ~

放工即走   里奧大人今晚要杜牙根   所以我去診所等佢呀 ~

不過落車就去買咗啲零食   因為唔想咁早上診所   嘻嘻 ~

行到 6 點幾都走   里奧大人 6 點 45 分就搞掂 ~

今次都係行去巴士站   差唔多到嘅時候   我哋以為行錯路   但原來行去巴士站嘅方向係比上次近咗   所以里奧大人再次話唔信我帶嘅路係 Short Cut   哈哈哈哈 ~

我去買晚餐   叫里奧大人沖涼先   我都係沖完涼先食   感覺舒服好多呢 ~

同埋里奧大人打咗麻醉針   所以唔可以食熱嘢   因為口腔完全無感覺   辣親就大件事了   所以我沖完涼   其實晚餐都已經唔熱了   哈哈 ~

食完就開機洗衫   之後我睇 Youtube ~

里奧大人 9 點開會   差唔多 10 點幾先開完 ~

咁即刻睇埋 "Tunnel" 大結局   我哋覺得全套戲都唔係咁合邏輯   哈哈 ~

11 點左右都瞓 lu   今晚比較攰   應該好快瞓得着 ~

洋蔥豬扒 + 鮑魚豆苗 ( 4-JAN-2022 )

( 4-JAN-2022  TUE )

今朝 6 點 50 分起身去徑步   實在太耐無去徑步   起身嗰下真係勁有難度   哈哈 ~

早餐食奶醬多   我驚會眼瞓   所以又飲咖啡   聽朝要飲番檸檬茶了 ~

菇場忙呀   仍然做長命 Report ~

Lunch Time 出去買葉橙同牛奶蕉   之後再買埋鯪魚球米就番菇場喇 ~

3 點幾搞掂哂長命 Report   終於可以抖下喇 ~

放工即走   番到屋企都即刻煮飯喇   因為里奧大人已經番到屋企 ~

是日晚餐 - 洋蔥豬扒 + 鮑魚豆苗

洋蔥豬扒 - 依家整豬扒豚肉都係焗完再落鑊加汁炒兩炒就算   實在唔想做大清潔   反正煮出嚟嘅味道都係一樣   哈哈 ~ 

鮑魚豆苗- 里奧大人同事送嘅罐頭鮑魚   咁今晚用嚟煮豆苗最好   我鍾意啲鮑魚汁   之後襯特價又入下貨先 ~     

依家基本上會洗咁啲嘢先   咁食完飯洗碗嘅時候   感覺唔駛洗咁多嘢   哈哈 ~

抖到 8 點就同里奧大人去徑步   沖埋涼就食生果 ~

我鍾意食拻開嘅嘢   不過一定要里奧大人拻   我次次拻完橙   手指甲床一定會裂開   所以好鬼驚

家姐之前喺其奧買嘅腰果杏仁脆糖   係時候要開嚟食喇

今晚仍然睇 "Tunnel"   今晚睇到 10 點 45 分都瞓覺   雖然仲有半個鐘就做完   但都唔睇喇   寧願瞓覺   哈哈   里奧大人就繼續睇呢 ~

蕃茄蜆肉長通粉 + 焗蒜蓉包 + 粟米蛋花湯 ( 3-JAN-2022 )

( 3-JAN-2022  MON )

尋晚半夜熱醒   感恩好快瞓得番呢 ~

早餐仍然食奶醬多   又唔餓嘛   所以嚟緊都係食佢   哈哈 ~

菇場忙呀   所以好快就到 11 點 45 分 ~

Lunch Time 出去買菜   之後就買粉果炒麵番菇場慢慢食 ~

一食入口   係蒸熱嘅炒麵嘅   唔係咁鍾意

又要做長命 Report   希望聽日可以搞掂哂啦 ~

放工即走   番到屋企都要即煮晚餐喇 ~

7 點唔夠可以開餐   勁開心   因為想早啲食完去徑步呀 ~

是日晚餐 - 蕃茄蜆肉長通粉 + 焗蒜蓉包 + 粟米蛋花湯

蕃茄蜆肉長通粉 - 用現成蕃茄醬    再加乾蔥頭同蒜蓉炒蜆肉   咁樣好味好多   我覺得 ~

焗蒜蓉包 - 里奧大人話好味   我話上次焗得根本唔脆同唔好味   佢笑住話我今次心情好就問佢好唔好味啫 ?!   黐鬼線 ~

粟米蛋花湯 - 西餐唔會出現豆苗嘛   所以臨急臨忙開罐粟米湯   始終都想有啲蔬菜咁呢 ~ 

洗埋碗就抖下   8 點唔夠就可以同里奧大人去徑步喇 ~

番到屋企就開機洗衫   之後即沖涼 lu ~

又睇 "Tunnel"   今晚唔係咁眼瞓   所以睇到 11 點半先瞓 ~

泡菜炒飯 + 辣炒年糕 + 福花 ( 2-JAN-2022 )

( 2-JAN-2022  SUN )

里奧大人出門口   我瞓到 9 點半   不過都係瞓得唔係咁好 ~

徑步 20 分鐘   之後買早餐番屋企 lu ~

拖完地就食早餐    抖陣沖個涼就出門口喇 ~

今日有事奉   所以 1 點幾走得   咁可以順便買埋 Lunch 番屋企 ~

食埋抖陣就沖涼   今日好鬼熱呀 ~

做小清潔   之後差唔多 5 點開始勁眼瞓 ~

我瞓到接近 6 點   抖多陣都要預備晚餐 lu ~

是日晚餐 - 泡菜炒飯 + 辣炒年糕 + 福花

泡菜炒飯 - 之前食唔哂嘅白飯   今晚用嚟炒飯就啱啱好喇 ~

辣炒年糕 - 尋晚食剩嘅年糕   咁加泡菜同韓國辣椒醬炒啦   唔係唔知點食好   哈哈 ~

福花 - 我覺得福花好味過西蘭花   同埋無咁硬 ~

洗埋碗又抖下   8 點同里奧大人一齊去徑步   依家大家要努力做運動呀 ~

屈住手仔瞓   我覺得好得意   哈哈

開機洗衫就沖涼   食埋生果就睇 "Tunnel"   睇到 11 點半先瞓 ~

A 貨部隊鍋 + 福花拚豆苗 ( 1-JAN-2022 )

( 1-JAN-2022  SAT )

2022 年又到喇   新一年新開始   最緊要身體健康   煮飯好味道   努力學習   喺菇場唔好做錯嘢   哈哈哈哈哈哈 ~

今朝同里奧大人 10 點半先起身   其實自然醒都係瞓到咁上下時間 ~

等里奧大人去買早餐   好開心今日佢放假呀   好難得呢 ~

食完抖陣就大清潔廁所   之後沖涼喇 ~

里奧大人睇書   我就溫書   不過可以一路睇 ASTRO   哈哈 ~

差唔多 2 點半就食午餐   都食番之前食剩嘅嘢   其實咁都幾好㗎   唔會浪費又唔駛諗食咩   呵呵 ~

今晚 5 點幾都預備晚餐   新一年第一餐一定要整里奧大人鍾意食嘅嘢 ~

整個部隊鍋都要成個鐘   又要焗又要淥   所以要比多啲時間慢慢整 ~

7 點唔夠都開餐   里奧大人第一句話係 A 貨唔係多謝我   哈哈哈哈 ~

是日懶餐 - A 貨部隊鍋 + 福花拚豆苗

A 貨部隊鍋 - 今次材料係年糕 + 日本洋蔥 + 芝士腸 + 黑毛豬午餐肉   仲有尋晚食剩嘅雞   加兩個過期 3 日嘅辛辣麵   感覺特別濃郁   哈哈 ~

福花拚豆苗 - 之前買咗㗎喇   今晚點都要煮啦   里奧大人今晚食好多菜喎   唔駛我勞氣 ~

食完又抖下啦   之後同里奧大人去徑步   新一年要積極做運動   同埋唔好食咁多嘢   哈哈 ~

番到屋企就開機洗衫   沖埋涼就睇 "Tunnel"   差唔多 11 點鬆啲都要瞓 lu ~