雜錦壽司 (外賣) + 炸魚皮 ( 4-SEP-2022 )

將雞肉加泡菜炒埋一碟   我覺得減肥餐咁食法都唔錯   哈哈

( 4-SEP-2022  SUN )

尋晚瞓得勁差   可能有事奉   個人比較緊張啲咁呢 ~

今朝 9 點 45 分都起咗身   咁都整早餐喇 ~

呢個星期每月一到成日食凍冰冰嘅奶醬多   我依家驚咗食包   但又唔知食咩好   唉 ~

食完都抖陣   今朝完全無力做大清潔   真係第一次咁 ~

沖完涼就出發番教會   去到教會都有啲虛脫   真係有啲暈暈哋   直頭要搽薄荷膏添呀 ~

完成所有事奉都接近 1 點 40 分   我買埋午餐同晚餐都即番屋企喇 ~

里奧大人差唔多 2 點半先番到屋企   咁等埋佢沖完涼先食   反正我未餓 ~

招牌河真係好抵食呀   只係 $30   我今次叫少河   其實份量都多

食完就執下冰格   因為家姐比咗好多急凍嘢比我呀   最搞笑家姐話本身諗住佢自己上嚟幫我擺好   我話連我都擺唔掂呀   真係要係咁塞先塞得哂呀 ~

本來我話要每樣一個   但家姐話一盒好平   所以買一盒比我呀

榴槤鮮生個名好熟   原來係家姐之前用拎個環保袋裝嘢比我   哈哈

仲有榴槤 Pancake & 榴槤糯米糍

加埋兩個應節嘅水晶梨

食完就睇陣 Youtube   里奧大人 4 點幾都瞓晏覺   之後我都瞓咗一陣   不過 5 點幾都醒咗了 ~

差唔多 6 點都預備晚餐   其實都只係開焗爐   哈哈 ~

是日懶餐 - 雜錦壽司 + 炸魚皮

雜錦壽司 - 我買咗 20 件壽司   之後行行下先醒起仲有燒春雞同意粉未食   激死我   之得唔買咁多啦   唉 ~

炸魚皮 - 真係好好味   所以家姐都唔理我煮唔煮飯   都照買比我呢 ~

食完就開機洗衫   沖埋涼就休息 ~

我同里奧大人講話今日居然無做任何家務呀   真係好在屋企乾淨   不過我估聽日身體完全有力   我都要做下小清潔咁呢 ~

今晚真係攰喇   所以 10 點 45 分都自己瞓覺先喇 ~

金菇肥牛卷拚吉列炸蝦便當 + 豚肉雜菜湯鍋 (外賣) ( 3-SEP-2022 )

老闆以為係里奧大人轉口味食炸嘢    哈哈

里奧大人居然食湯飯

( 3-SEP-2022  SAT )

好感恩今朝 9 點唔夠都起身   個肚唔痛喇   不過個人都仲係有啲攰 ~

我之前好期待食芝士夾包   因為放假先有機會食   但我今朝真係勁唔想食   哈哈

里奧大人 9 點半起身   咁我整埋早餐比佢   之後都即沖涼喇 ~

整比里奧大人食   佢話唔鍾意又鹹又甜喎   寧願就咁食個麥包

搞掂哂就等家姐接我   Berry 又熱烈歡迎我啦   勁驚佢大力拍我個肚 ~

開咗冷氣真係勁舒服   依家連家姐都覺得熱呀   今年真係熱得好犀利   因為家姐同里奧大人都好少成日話熱   依家佢哋係唔開冷氣唔得咁呀 ~

依家真係一個月見一次家姐咁   所以有好多開心嘢都要等到今日講   我話當面講會更加開心   哈哈 ~

我個肚無啦啦又扯住咁喎   雖然好輕微   但一陣有嘢做    所以都係食粒 Panadol 先   之後個人有啲攰   家姐又話有啲眼瞓   佢話佢屋企係咪有嘢呀 ?!   我話黐線咩   屋企舒服咪成日想瞓囉   我話妳試下去水姑屋企   睇妳會唔會有想瞓嘅感覺 ?!   之後佢叫我唔駛再講   佢依家好精神   哈哈哈哈 ~

佢依家成日唔坐梳化   所以都以為影得呢幾張咋

好 "Pair" 咁挨落我隻腳度

咁家姐又叫下 Berry 陪新媽咪啦   衰女成日喺梳化底   之後家姐抱起佢啦   佢喺家姐手上跳落嚟   嚇到我同家姐呆咗呀   因為都好高下嘛   所以我比佢整損咗隻手啦 ~

工人抱 Berry   家姐行埋去呢   Berry 就手 "Fing Fing" 咁要家姐抱   之後工人再抱呢   佢咬工人呀   真係一隻神經狗   哈哈哈哈 ~

無啦啦又瞓地

想瞓覺

家姐叫 Berry   佢就極度唔願意咁望下妳啦

又繼續想瞓

之後又無啦啦望下妳咁喎

好煩呀 ?!   哈哈哈哈

Berry 依家 34 磅   咁就好喇   但其實都唔算係肥

 

做咩嘢喎   成日咁望我嘅

我未咁快走㗎喎   呵呵呵呵 

佢今日做咩咁眼瞓㗎

佢其實 "中" 緊眼瞓   我錄影咗佢中中下嘅樣   好得意呀   哈哈   

好似我喺公司想瞓覺嘅眼神   哈哈哈哈

影到我都想瞓埋一份   哈哈哈哈

幾難得先肯正面望我呀  

頂唔住喇

咁睇又好精靈咁噃

啡色眼珠好靚

呢個眼神   表達出佢攰過我番工   哈哈哈哈

佢今日真係好攰

今日幾乎張張相都眼 "Dup Dup"   拎零食都唔係咁想食添呀   最希望係想我快啲走   哈哈哈哈

家姐買咗好多嘢比我   又一袋去兩袋返   哈哈   所以佢車我番屋企放低   我再搭車去里奧大人公司 ~

豉椒味菜班腩飯   最搞笑係家姐同阿妹都話肯定里奧大人叫嚟食   但其實係我話食   我無咩胃口   想食啲味菜呀

食完飯就幫手做一陣嘢   差唔多 2 點半就要同林謝謝去做中秋節探訪 ~

感恩探訪過程順利又開心   差唔多 3 點半就再去里奧大人公司   又要同阿妹一齊去整嘢   不過 4 點幾都要走喇   因為要陪里奧大人去整牙呢 ~

里奧大人整完都接近 5 點半   諗住可以放工   但最後要番公司做嘢   咁我都一齊幫手啦 ~

唔好講笑   差唔多 6 點左右   個人開始有啲攰   我直頭要坐下   衰奧話我成個霸氣姐咁   笑到叻叻同阿妹流眼淚呀   哈哈 ~

做呀做   真係做到差唔多 8 點   我都開始餓喇   所以同里奧大人去買嘢食 ~

食完都番屋企 lu   今日行咗萬幾步呀   怪不得我覺得對腳無哂力咁啦   但都好感恩   雖然每月一到   但體力上都應付到呢 ~

沖埋涼都休息喇   睇多陣電視   11 點幾都瞓喇 ~

麥蘆卡蜜糖烤雞餐 (外賣) ( 2-SEP-2022 )

我哋只食咗粟米   雞翼+雞膇同少少雞肉   肉醬意粉完全無食過   之得我唔叫呢個餐啦

我叫里奧大人唧啲茄汁比我   佢唧到咁樣   我話唔知以為係你食剩囉

( 2-SEP-2022  FRI )

感恩瞓得唔錯   可以瞓到 8 點先起身 ~

次次每月一到   我一番工個肚係咁扯住痛   里奧大人話應該係緊張   始終唔舒服真係只想瞓   哈哈 ~

真係唔想中午食烏冬   所以買埋菠蘿叉燒包先去買早餐 ~

仍然食奶醬多   但完全無胃口   留番一陣食 ~

菇場唔忙   真係可以好好休息 ~

Lunch Time 都無出去呀   只係想喺菇場休息   順便慢慢食埋件奶醬多 ~

菇場又忙咗陣   差唔多 4 點再食埋個叉燒包   我依家好驚食包了 ~

放工即走   買完麵包再去買晚餐   之後里奧大人就幫手等   我就番屋企沖涼先喇 ~

食完都休息   今晚同里奧大人一齊睇 "痞子殿下" 大結局 ~

唉   個肚又勁扯住痛   所以 10 點半都瞓覺喇 ~

韭菜水餃餐 + 招牌水餃鍋貼餐 (外賣) ( 1-SEP-2022 )

呢碗紫菜花枝丸湯係熱辣辣㗎   所以飲完勁舒服   同埋花枝丸都好味呀   唔係食麵粉咁呢

( 1-SEP-2022  THU )

尋晚瞓到半夜又痛醒   之後沖個熱水涼又好啲   雖然唔係大痛   但持續咁樣扯住扯住   都搞到我好唔舒服   呢個時候就好想聽日唔駛番工喇   哈哈哈哈 ~

瞓到 8 點先起身   其實都攰   不過點都要起身番工啦   沖個熱水涼好啲   但出到門口就好鬼熱 ~

早餐食芝腿治烘底   但食咗兩啖咋   應該留番今晚先食   咖啡又係飲得兩啖   一陣 Lunch Time 先再飲   唔知點解今朝完全無胃口呀 ~

菇場忙咗陣呀   之後全程抖   哈哈 ~

9 月有假放就最開心

Lunch Time 都無出去   仍然係食烏冬   肥仔豪問我厭唔厭 ?!   我話厭啦   不過又唔知食咩好   咪食烏冬囉 ~

1 點無啦啦勁眼瞓    坐喺度都瞓着咗   應該瞓咗 15 分鐘都有 ~

放工即走   去完超市買哈蜜瓜就去買外賣   里奧大人都差唔多到了   可以幫我拎晚餐呢 ~

開埋機洗衫就沖涼   之後先開餐 ~

8 點幾睇 "痞子殿下"   睇完又睇下 youtube ~

唉   個肚扯住痛呀   好似有隻異型喺肚入面要爆出來咁呀   辛苦到我死死下   反而唔似每月一到嘅痛囉 ~

今晚 10 點 15 分都要瞓覺   知道瞓得唔好   我寧願早啲瞓呢 ~