花枝丸魷魚粒拚雜菜 + 皮蛋酸薑 ( 7-JAN-2023 )

( 7-JAN-2023  SAT )

尋晚瞓到 2 點幾起身去廁所   之後好難先瞓得番呀   今朝 7 點 10 分都醒咗   咁起身整早餐 lu ~

早餐食芝士夾甜餐包   真係唔想食多士呀 ~

成日都烘燶麵包

菇場忙呀居然   又係星期六忙   哈哈   感恩都精神   我成日覺得瞓幾個鐘   真係好似啲阿婆嘅生活模式咁樣   我唔係咁想住呀   哈哈 ~

放工即走   感恩好快有車去家姐屋企呢 ~

一開門   Berry 又撲我   係要我摸下佢先唔撲   但因為我次次要洗咗手先摸佢   所以佢會撲好耐   好得意呢 ~ 

成日舔手仔

佢本身瞓緊覺   我嚟咗所以嘈住佢   哈哈哈哈

真係瞓喎

差唔多 2 點左右先食午餐   工人煮嘅煎蛋米粉   食完唔駛洗真係勁嘆呀   哈哈 ~

家姐好搞笑   好多時買咗啲咩都會同我講   佢今朝去買黃糖   我話一早叫妳買啦   佢話依家唔買唔得喇   我話點解呀 ?!?!   佢話有次落糖變咗落鹽呀   所以依家睇到顏色就知係鹽定糖囉   真係搞笑   不過唔好話佢   我都要喺個調味架貼住"鹽"同"糖"   因為煮起飯嚟又急   真係好易落錯呢 ~

抖陣就飲西洋菜湯   上次姐夫話煲湯定咩   我話咁下次煲比我飲   估唔到佢記得   佢今朝叫家姐 Whatsapp 我   問我飲唔飲湯呀 ?!   真心好感動   因為無諗過佢記住   但佢唔知我依家係第 4 星期六 Off   以為係月頭呀   所以好感恩今日都見到佢哋呢 ~

   

成半個鐘都係咁   係咪咁攰呀 ?!

不過咁都好   任摸唔嬲

之後又碌大對眼

食完又同家姐傾下偈啦   雖然 Whatsapp 都成日傾   但見到面係開心好多   會多嘢講好多囉 ~

工人都成日陪 Berry 玩㗎   有時一路睇手機一路摸住佢   又一齊瞓梳化   真係羨慕呀   哈哈

郁都唔郁

下半身完全無郁過   哈哈哈哈

幾乖呀

瞓啦

叫下佢又醒醒哋   我覺得自己勁衰呀   哈哈

其實根本佢都唔會理我

睇到佢咁樣   睇到我都想瞓埋   哈哈哈哈

點摸都得   咁就乖喇 

3 點幾同家姐一齊出門走啦   工人抱住 Berry   之後話新媽咪同舊媽咪一齊走喇   笑死   佢都好叻呀   知道有新就有舊   哈哈 ~

講開話我唔敢睇抽血   家姐話媽咪嗰時撞親腳   醫生幫佢吸啲血係吸唔到   因為已經凝結咗   所以我要陪媽咪做植皮手術囉   但我見到塊皮係點樣反而唔驚喎   因為醫生都有問我驚唔驚 ?!   我話唔驚囉   塊皮係克力架 Size 咁   之後家姐話我好好   陪媽咪做手術又覆診   所以唔好成日話對媽咪唔好喇   咁我話有時間實陪   始終做手術嘛   同埋我都唔放心   喺度心掛掛擔心佢   咁不如陪佢好過 ~

家姐尋日去針灸   話醫師同佢講單搞鬼嘢   話有個人去針灸   佢朋友又跟住嚟話想睇下點針   點知佢朋友見到醫師落針   佢話嚇到頭暈呀   醫師咪話囉   又要睇又要驚   反而仲嚇親個醫師   咁我都以為佢朋友唔驚先去睇呀   哈哈 ~

感恩同家姐都好快有車   我就去探姑奶   順便比利是佢新年買嘢食呢   同佢傾咗半個鐘都走人喇   因為我想快啲去奇華拎蘿蔔糕呢 ~

頭先家姐喺屋企   係咁話好激氣好激氣   真係講咗 6 次都有   原來係話唔記得幫我拎蘿蔔糕   要我自己去拎喎   我話我自己拎仲好啦   反正我要探姑奶   又唔係直接番屋企嘛 ~

番到屋企就抹地同做小清潔   依家間唔中做小清潔   咁唔駛做大清潔   咁樣舒服好多   哈哈哈哈 ~

里奧大人仍然自我隔離   咁我今晚淥嘢食就搞掂   所以 6 點半可以開餐 ~

是日懶餐 - 花枝丸魷魚粒拚雜菜 + 皮蛋酸薑

花枝丸魷魚粒拚雜菜 - 清廚餘大行動   本來想煮烏冬   但見到菜心苗同椰菜都好多   所以就咁食菜算喇 ~

皮蛋酸薑 - 想清埋隻皮蛋   好在無壞咋 ~

洗埋碗就休息   睇 Youtube 睇到 9 點半都瞓咗    一醒已經 10 點 10 分   但之後又繼續睇 Youtube   睇到 11 點半都瞓 lu ~

黑椒牛扒 + 菜心苗 ( 6-JAN-2023 )

( 6-JAN-2023  FRI )

感恩尋晚瞓得唔錯   所以 7 點 20 分起身喇 ~

早餐食奶醬多   依家唔係咁慣食多士呀   覺得乾得滯   我已經唔係大火咯 ~

菇場超級忙喇   實在太好了 ~

Lunch Time 出去百佳買舒適達牙膏   好感恩終於等到送贈品啦   因為上次買比里奧大人用   佢話好用   我話等送贈品先再買   哈哈 ~   

買 4 支舒適達牙膏 ($179.6) 就送咁多嘢   其實萬寧有時都係送咁多嘢   不過我唔等喇

拎住 1 條廁紙同 1 盒紙巾都唔買外賣喇   唯有番到菇場先食烏冬   坐低先發覺已經 12 點 35 分   真係好在無再周圍行咋 ~

菇場仍然忙啦   8 卦又成日問我個 I.T.人走咗未 ?!   我話唔見就應該走咗囉   佢話我答得好玄   即係答咗等如無答   哈哈哈哈 ~

放工即走   再去超市買多 4 支牙膏   因為想用埋張 $15 Coupon   之後買埋飯比里奧大人食   因為想佢食清啲呀   搞掂哂就抹地   之後煮嘢食   不過沖埋涼先開餐呢 ~

是日晚餐 - 黑椒牛扒 + 菜心苗

黑椒牛扒 - 今次塊牛扒都算大塊   呢排要補血   不過食埋今晚都唔食住喇   唔想食太多   因為好驚太燥熱 ~

菜心苗 - 仲剩番幾條   以前就會夾硬食埋   但依家唔會啦   唔想食嘢食到咁辛苦呀 ~

洗完碗就休息   依家又食人參果   想食多啲水份嘅生果呀 ~

今晚睇 Youtube   睇到 11 點先瞓 ~

黑椒牛柳炒拉麵 ( 5-JAN-2023 )

( 5-JAN-2023  THU )

一覺瞓到 6 點半好似醒醒哋   但真係太早喇   所以繼續瞓到 7 點 10 分   咁都早啲起身 lu ~

早餐食醬占多士   太耐無食多士   要多啲時間慢慢咬   哈哈 ~

菇場忙呀   樣樣要好專注咁做   真係做到眼濛濛呢 ~

Lunch Time 出去 7 仔買朱古力   感恩買到 2 包   可以了咗心事   之後去買腸粉番菇場慢慢食喇 ~

我已經打平拎住   但啲豉油都瀉哂   好在個袋無穿窿咋   哈哈

仍然忙呀   所以好快放工 ~

放工幫家姐再買朱古力啦   咁中午已經買咗 2 包嘛   我話同佢每人 1 包   佢仲話啱喇   因為唔知好唔好食嘛 ~

之後打嚟話佢喺屋企附近又唔見有   咁我就知佢想買啦   所以即幫佢買囉   中午去買嗰間已經無哂貨   我要番轉頭去菇場附近買   喺條街度行嚟行去   好在見唔到同事咋   哈哈 ~

$36/2包真係好抵   之前最平係$22/包   有時更平就會$20/包   所以我都介紹比阿齋同阿花囉   佢哋都話好食   又係一見有特價就買   哈哈

買完即搭車喇   今晚要去黃埔搞啲嘢呢 ~

夜媽媽真係好難認路   好在知道係婆婆附近   咁我唔駛搵得咁辛苦   哈哈 ~

番到屋企都 7 點幾   拿拿聲抹地再沖涼就即煮嘢食   差唔多 8 點先開餐 ~

是日晚餐 - 黑椒牛柳炒拉麵

黑椒牛柳炒拉麵 - 我都鍾意食炒拉麵㗎   加埋椰菜一齊炒仲更加好味道 ~

抖陣先洗碗   今晚滕嚟滕去有啲攰   哈哈 ~

真係好鍾意食蕃鬼荔枝   但要食大 Size 嘅   咁先啖啖肉呢

睇下 Youtube   今晚 10 點半都瞓覺喇 ~

滷水豬手 (外賣) + 菜心苗 + 芫茜皮蛋魚片湯 ( 4-JAN-2023 )

買咗 1 條鯇魚肉   但次次都好多油   唔知係咪魚油呢 ?!   

( 4-JAN-2023  WED )

感恩一覺瞓天光呀   可能天氣凍凍地好瞓啲 ~

早餐食芝士夾甜餐包   係時候停一停甜餐包喇   哈哈 ~

菇場忙呀   真係做到 11 點 45 分先走呀 ~

不過今日屋企有嘢要搞   所以下午請半日假呢 ~

放工可以他他條條去買餸   之後再去銀行整嘢   其實搞掂都已經 2 點   要即番屋企喇 ~

好想食油雞飯呀   依家如果唔駛番工   都想中午食飯   咁唔怕飯氣攻心嘛   哈哈 ~

3 點 45 分師傅嚟 Check 嘢   不過就好快搞掂   我就開始煮嘢喇 ~   

煮定好哂   咁里奧大人可以自己搞掂   呵呵 ~

BBQ 雞中翼 + 菜心

 

香草蕃茄醬意粉

因為屋企密實盒唔夠裝呀   所以用呢啲三文治膠盒   可以裝滿兩盒真係好

之後再去買木瓜同人參果   番到屋企就開機洗衫   再沖埋涼先食飯   差唔多 7 點半先開餐 ~

是日晚餐 - 滷水豬手 (外賣) + 菜心苗 + 芫茜皮蛋魚片湯

滷水豬手 (外賣) - 呢份只係 $22 咋   最正係無腳腳趾   所以即買呀 ~ 

菜心苗 - 又食菜心苗   但其實我仲有半個椰菜未食   放咗喺雪櫃   完全唔記得佢存在添 ~

芫茜皮蛋魚片湯 - 下火湯   係時候要飲下呢 ~

洗埋碗就休息休息   之後再食個蕃鬼荔枝   真係好好味   食埋聽晚就要停一停 lu ~

今晚睇陣 Youtube   10 點半都瞓覺喇 ~

雜丸粉絲福花 ( 3-JAN-2023 )

( 3-JAN-2023  TUE )

尋晚半夜去廁所   之後都唔係咁快瞓得番呀   始終第日番工起身有壓力   次次都係咁囉   放假嗰兩晚就會一覺瞓天光 ~

早餐食麻糬   因為唔想食麵包住呀   哈哈哈哈 ~

新一年新開始   番到菇場即大清潔自己個位呀   咩都拎出嚟抹   差唔多 15 分鐘先搞掂 ~

今期好鍾意呢隻嘢   但我唔知佢叫咩名   哈哈

2023 年   新一年好開始

勁忙呀   所以好快就 11 點 45 分 ~

唔係太餓   所以行半個鐘先買牛腩米番菇場呢 ~

以為月頭 Off   仲諗住可以見到 Berry 添

仍然忙呀   仲要做長命 Report   今次 2 個鐘就搞掂   算好快㗎喇 ~

放工即走   買埋脆脆同朱古力比家姐   因為一陣同佢交收呀 ~

我問家姐要唔要 ?!   佢話要少少   我話好細盒咋   之後佢話以為新年禮盒咁大盒   怪不得佢話要少少啦   哈哈

差唔多 6 點鬆啲就搭車   上車見到家姐就即叫佢比票我呀   之後坐多個巴士站就落車番屋企喇 ~

番到屋企都整呢樣整嗰樣   之後再沖埋涼   差唔多 7 點半先開餐   里奧大人 3 餐就自己搞掂呢 ~

是日懶餐 - 雜丸粉絲福花

雜丸粉絲福花 - 呢個係迷你版火鍋   哈哈哈哈   最緊要係清哂啲福花   所以加埋粉絲同雜丸一齊淥就最好   唔駛又要分開淥呢 ~

洗埋碗就抖下   之後食蕃鬼荔枝   咁就飽哂喇   哈哈 ~

突然想食馬仔   所以叫家姐換比我   哈哈

睇下電視又睇下 Youtube   今晚 11 點都瞓覺喇 ~

福花泡菜拉麵 ( 2-JAN-2023 )

( 2-JAN-2023  MON )

感恩又一覺瞓天光   今朝 8 點半都起身 lu ~

早餐食芝士夾甜餐包   好味道呀   哈哈 ~

完早餐就開機洗衫   之後沖埋涼就的起心肝整理保險文件   終於整哂喇   開心開心 ~

1 點半食午餐   食完就抖下 ~

芝士夾芝麻餐包 + 紅豆沙

3 點幾出去買餸   再炒定烏冬比里奧大人做晚餐   搞掂哂都 5 點幾 lu ~

沖埋涼就煮晚餐   今晚 6 點可以開餐喇 ~

是日懶餐 - 福花泡菜拉麵

福花泡菜拉麵 - 今晚食埋福花   所以就咁當餸算喇   齋齋地都唔錯 ~ 

食完抖陣先洗碗   之後沖埋涼休息 lu ~

8 點幾先食蕃鬼荔枝同橙   咁樣真係飽過食一碗飯呀   哈哈 ~

家姐喺鯉魚門買嘅琥珀合桃都好好味

睇電視又睇 Youtube 到 10 點半就瞓覺   聽日要精精神神番工喇 ~

椒鹽豬扒粒炒福花 + 紅豆沙年糕 ( 1-JAN-2023 )

焗出嚟有十字嘅日本年糕

( 1-JAN-2023  SUN )

感恩一覺瞓天光   所以 8 點都起身 lu ~

早餐都係食芝士夾甜餐包   因為懶出去買早餐呀 ~

食完就開機洗衫再熨 2 機衫   之後又再執衣櫃   搞掂哂就煲紅豆水喇 ~

1 點食午餐喇   因為好餓   可能頭先勞動呀   哈哈 ~

花生醬甜餐包 + 蘋果夾芝士 + 紅豆水

沖埋涼就休息一陣   差唔多 2 點就開始睇聖經   睇到 4 點就瞓一陣   估唔到都瞓咗半個鐘 ~

唔好浪費咗啲紅豆   咁整紅豆沙啦 ~

呢幾粒日本年糕   焗到好似長洲大魚蛋   哈哈

要用筷子壓扁先唔浮面

里奧大人仲自我隔離   所以我整其他嘢佢食   佢要食清啲呢 ~

沖埋涼先整晚餐   不過都差唔多 7 點先食得 ~

是日晚餐 - 椒鹽豬扒粒炒福花 + 紅豆沙年糕

椒鹽豬扒粒炒福花 - 將 3 件椒鹽豬扒切粒再焗熱   之後淥福花   最後兜兩兜就搞掂 ~

紅豆沙年糕 - 當甜品啦   食一碗真係夠哂飽   哈哈   我好鍾意食呢啲日本年糕   煙煙韌韌好鬼正呢 ~

食完抖下再洗碗   之後休息喇 ~

今晚睇 Youtube 睇到 11 點半先瞓覺   好在都有睡意咋   始終我 4 點瞓咗陣晏覺嘛 ~