重慶汁雞翼炒麵 + 叉燒粒炒飯 + 泡菜叉燒炒麵 ( 7-AUG-2023 )

尋晚食剩嘅黑椒牛仔骨   今晚再焗熱食

仍都係尋晚食剩嘅生炒骨   真係食到驚   下次唔再買呀   哈哈

( 7-AUG-2023  MON )

尋晚瞓得麻麻哋   今朝鬧鐵響   真係好有衝動想較 8 點先起身   咁可以買早餐番菇場食   但最後都係起身   因為可以食完早餐就靈修一下 ~

早餐食芝士多穀英國方包   就咁焗芝士係簡單好多呢 ~

菇場忙咗陣就 Hea 過   星期一唔多想郁   哈哈 ~

咁諗住出去   阿齋同我講話佢尋晚腳踭痛   痛到行唔到咁滯   佢話即刻諗起我   因為我上次痛到真係行幾步要停呀   不過佢話今日無咁痛   我話可能都係筋膜炎   所以我話淘個按摩球比佢   得閒碌下都好㗎   我都係咁呢 ~

傾完就出去啦   又落毛毛雨   所以近近地買手打牛丸米算喇 ~

仍然唔忙   開開心心等放工 ~

番到屋企都即預備晚餐   6 點 45 分可以開餐   我覺得算係快㗎喇   但就要邊食邊睇培靈會呢 ~

是日晚餐 - 重慶汁雞翼炒麵 + 叉燒粒炒飯 + 泡菜叉燒炒麵

重慶汁雞翼炒麵 - 今日諗下雪櫃有咩儲備   突然醒起星期五嘅重慶汁雞翼呀   好在無壞咋   所以用嚟炒麵   咁都好好食㗎 ~

叉燒粒炒飯 - 里奧大人嘅晚餐   佢成碗食哂呀   仲無話份量多添呀 ~

泡菜叉燒炒麵 - 呢個係里奧大人聽日嘅午餐   真係我自己午餐食咩都係即時諗咋 ~      

8 點鬆啲要出去影護照相   可以加錢要 File   咁就好喇 ~

番到屋企都沖涼   之後休息休息 ~

睇陣 Youtube   今晚 10 點半有睡意喇   難得難得 ~

菠蘿生炒骨 & 黑椒牛仔骨 (外賣) + 昆明生菜 ( 6-AUG-2023 )

焗幾件叉燒比里奧大人食   話哂叫做新鮮買嘛   哈哈

( 6-AUG-2023  SUN )

尋晚瞓得唔好   最衰夜晚飲咗罐芋頭珍珠奶茶 ~

同里奧大人一齊食早餐   之後去佢公司幫手   好在阿妹喺度   傾下偈無咁攰   哈哈 ~

番一半學都要走喇   因為今朝有事奉 ~

我剪到前面啲頭髮好短   Ivy 問我做咩剪到咁短   我話懶囉   起碼三個月唔駛剪   之後另一姊妹問我係咁自己剪 ?!?!   我話咁叻就好啦 ~

感恩今日 1 點半完成所有事奉   咁我買埋午餐同晚餐都番屋企喇 ~

沖埋涼再開機洗衫   里奧大人 2 點半先放工   好在我買咗午餐比佢   佢一番到屋企就可以即刻食呢 ~

我就唔太餓   所以食 Fakes + 乳酪   食嗰一刻覺得自己好似喺公司食 Lunch 咁   哈哈

里奧大人沖埋涼就瞓晏覺   原來都 4 點   咁我睇 Youtube 啦   不過我 5 點都開始瞓咗   瞓到 5 點 45 分   里奧大人就瞓到 6 點   希望大家今晚都可以瞓到啦   咁晏先起身 ~

6 點前都預備晚餐   但估唔到接近 6 點 45 分先食得 ~

其實份量都好多   下次都係買一盒兩餸算喇   

買咗半斤蜜汁叉燒   咁聽晚可以叉燒炒飯

是日晚餐 - 菠蘿生炒骨 & 黑椒牛仔骨 (外賣) + 昆明生菜

菠蘿生炒骨 & 黑椒牛仔骨 (外賣) - Ivy 話佢成日都係買呢兩款餸   所以我試下生炒骨   味道真係唔錯   同埋無咩肥豬肉 ~

昆明生菜 - 終於清哂   唔係又結哂冰 ~

食完都唔洗碗住喇   睇埋培靈會先洗 ~

9 點鬆啲完畢   洗埋碗就再沖涼 ~

今晚真係 11 點半先有啲眼瞓呀   不過點都要瞓㗎喇   聽日要番工呢 ~

雜錦壽司 (外賣) ( 5-AUG-2023 )

( 5-AUG-2023  SAT )

今朝 9 點幾都起咗身   咁沖埋涼就去食早餐喇 ~

食完就抖陣  差唔多 11 點就出發去大酒店 ~

今日係爺爺嘅安息禮拜   其實佢係姑奶個老爺   不過我哋個個都叫佢做爺爺   我非常感激爺爺㗎   因為十幾年前我甲狀腺食完一年半藥   一停就翻發   咁再食啦   又係一停就翻發   咁又要再食   但我只食咗 3 年藥   因為食藥嘅時候   個身體都唔係咁舒服   所以嗰時覺得好煩   唔食藥又唔得   但一世食藥又辛苦 ~

有次我住院做個小手術   我唔記得乜事   只記得醫生話我甲狀腺高   叫我做手術   我問醫番好嘅機會係幾好多 ?!   佢答我 50/50   我話咁做嚟做咩 ?!   佢即黑我面   咁事實如果 50/50   我做咩要做手術呀 ?!

之後我去覆診   我講番呢個 Case 比醫生聽   佢好激動問番我邊個醫生咁講 ?!   男定女 ?!   叫咩名 ?!   我話只記得係男醫生咋   佢都話咁樣叫我做手術係好離譜呀 ~

我唔記得點解會同爺爺講話有甲狀腺   只係知道佢好快帶我同里奧大人去深圳睇軍醫   好記得當日係星期六   爺爺同嫲嫲喺麥當勞等我哋呢 ~

之後里奧大人就每星期六陪我上深圳睇醫師   如是者睇咗 9 個月   甲狀腺完全好番哂   接近 20 年喇   就係咁我就好相信中醫喇 ~

咁我有次見到爺爺   佢幫兒生女耳穴減肥   我叫佢又幫我整呀   之後仲特登送套耳穴模具比我   真係好感動呀   因為佢會記得我   我只係佢新抱個弟婦咋 ~

其實爺爺幾年前身體開始差   對上一次同里奧大人探佢都係 2021 年嘅事了   當時佢都精神㗎 ~

爺爺嘅離別真係令我好傷感   我睇見証集嘅時候   佢對主嘅渴慕同信心   我真係真係要向爺爺要學習呀 ~

今日安息禮拜完畢就直去火葬場   之後去大埔食纓紅宴 ~

食完都差唔多 4 點   咁我同里奧大人就喺大埔行下 ~

買咗 12 對船襪   因為 $100 好抵   之後再去買 2024 年月曆   真係好感恩比我見到   咁可以買埋比家姐同佢同事喇 ~

我見到車銀優張 Poster   咁要即影比阿花啦   佢以為我去買鞋   哈哈

最後買埋麵包都搭車番屋企喇   原來已經 6 點   怪唔得都開始攰攰地啦 ~

今晚一定唔駛煮飯啦   但又想食少少嘢   所以我話去爭鮮買壽司喇 ~

我夾緊嘅時候   問里奧大人識唔識得幫我我擺好啲吖 ?!   我唔係咁擺呀   里奧大人好爽快話我識呀   我真係碌大對眼望住佢   因為佢好少夾壽司嘛   之後佢話格硬夾埋就得㗎喇   上次見個職員係咁嘅   我真係大笑咗出嚟   等我以為佢真係識添   哈哈 ~

番到屋企即沖涼   之後食埋壽司就睇培靈會 ~

睇陣 Youtube 又聽下歌   差唔多 11 點幾都瞓 lu ~

過橋米線 & 重慶汁雞翼 & 珍寶韭菜豬肉餃 (外賣) ( 4-AUG-2023 )

過橋米線 - 仍都係重慶三小辣湯底

重慶汁雞翼 - 完全無食過添

珍寶韭菜豬肉餃 - 好想食餃子   所以買 5 隻   本來想買煎嘅   但要等 5 分鐘就唔等 lu   今晚比較趕時間呢

( 4-AUG-2023  FRI )

今朝發咗好多夢   但之後就瞓得好林   咁到鬧鐘響時   我係唔想起身呀 ~

早餐食麥方包   其實係奶醬多士   都幾好味㗎 ~

菇場唔忙   咁都好   想抖下 ~

Lunch Time 出去買皮蛋艇仔粥   再去埋 DASIO 買茶包就番菇場喇 ~

唔忙就做自己嘢   望住電腦其實都好攰   但唔望又做唔到喎 ~

放工即走   買埋晚餐就番屋企喇 ~

食完就出去買嘢   里奧大人就網上上堂 ~

番到屋企沖埋涼就即睇培靈會   但就無睇敬拜部份 ~

睇完就再睇陣 Youtube   今晚 11 點幾先瞓 ~

蟹籽丸蝦子撈麵 ( 3-AUG-2023 )

( 3-AUG-2023  THU )

尋晚瞓得都 OK   最緊要起身精神就得㗎喇 ~

早餐食甜餐包   雖然未到悶   但又唔想食   不過又諗唔到食咩好 ~

菇場唔忙呀   又做自己嘢 ~

Lunch Time 出去買洗衣珠   之後行陣再買魚皮餃河番菇場食 ~

唔忙又同阿花 Whatsapp   一係就同 8 卦 Skype   所以我打字好快   其實都因為成日 Skype   哈哈 ~

放工去買麵包   之後都番屋企 lu ~

今晚里奧大人出隊   約咗隊員一齊去食晚飯   所以今晚我就自己食喇 ~

估唔到里奧大人番咗屋企溫習   不過佢都好快要出去   始終早到好過遲到嘛 ~

唔餓就煮個炒飯比里奧大人先   咁佢聽日就有得帶飯喇   炒飯嘅時候   我感覺好似係阿媽咁   照顧咗個仔先   哈哈 ~

尋晚食剩手撕雞同白飯   咁樣做炒飯最好   無咁悶嘛

是日懶餐 - 蟹籽丸蝦子撈麵

蟹籽丸蝦子撈麵 - 呢款蝦子麵比較硬食   里奧大人唔太鍾意食   咁我就食埋去啦   加棵菜同幾粒丸就搞掂   食撈麵最好係唔會食到成身汗   呵呵 ~

食完拿拿聲洗碗   之後睇直播培靈會 ~

9 點左右完畢   我都開機洗衫同沖涼喇 ~

里奧大人 9 點幾番到屋企   佢又買咗綠豆沙同芝麻糊   不過我刷咗牙唔食 lu   叫佢自己食半碗先 ~

又係睇陣 Youtube   今晚 10 點 50 先有睡意呢 ~

海蜇手撕雞 (外賣) + 昆明生菜 ( 2-AUG-2023 )

 

( 2-AUG-2023  WED )

感恩一覺瞓天光呀   真係好耐無試過呢 ~

早餐食牛油排包同甜餐包   里奧大人鍾意食排包   話好 Soft   但其實之前真係仲正   好香牛油味㗎   依家真係唔覺囉 ~

菇場唔忙   咁做自己嘢啦 ~

Lunch Time 去韓印紅同萬寧買嘢   番到菇場已經 12 點半   要拿拿聲食 Lunch 喇 ~

之前家姐比嘅鹹蛋黃撈麵   估唔到好味喎   有鹹蛋味又辣辣地

菇場 3D   個個唔係上網就睇手機   所以靜到爆 ~

家姐番公司   Berry 就會好自然入房瞓   佢咁瞓真係霸咗半張床㗎

放工買埋餸就番屋企   今晚要快啲煮好   因為想準時聽培靈會呀 ~

是日懶餐 - 海蜇手撕雞 (外賣) + 昆明生菜

海蜇手撕雞 (外賣) - 本來想買燒鴨 + 口水雞   但無口水雞   咁諗住買滷水豬腳   但好多都係腳趾   好恐怖啦   所以最後買一盒海蜇手撕雞算喇 ~

昆明生菜 - 我諗住買 1 斤 ($10)   之後有個阿太叫我買 2 斤啦   2 斤都係 $12   咁我即買 2 斤啦   因為我睇個牌嘅時候   只係睇咗 1 斤價錢 ~

食完即洗碗   之後就同里奧大人一齊睇網上直播培靈會   今晚 9 點 10 分先完畢呀   感恩可以睇網上直播   咁樣時間就好用好多呢 ~

沖埋涼再睇陣 Youtube   差唔多 10 點 45 分都瞓覺喇 ~

堅信號上海生煎皇 @ 九龍灣 ( 1-AUG-2023 )

堅信號生煎包 (兩個) (+$14) - 都有爆汁   所以食起上嚟要小心啲咬

粒粒都脹卜卜

上海排骨菜飯 ($48 & +$3 凍豆漿) - 菜飯好味呀   最緊要係啲飯唔係腍劈劈

上海粗炒 ($46 & +$3 凍豆漿) - 味道同上海姥姥差唔多   但呢個價錢就好抵食   同埋份量都唔少   剩咗 1/3 比里奧大人聽日帶飯

( 1-AUG-2023  TUE )

尋晚瞓得都 OK   可能飲咗北芪當參   同埋呢排真係嚴重唔夠氣   所以就更加要飲呢 ~

早餐食牛油排包   都係搽醬占   我覺得排包細塊咗好多呀   因此之前我放入焗爐係唔夠位放   依家放咗仲有空間剩   唉   自從疫情同有咗消費劵之後   真係樣樣貴咗又細咗囉 ~

菇場忙呀   好在記得打去診所   因為上星期做咗子宮抹片同 HPV 高風險低風險嘅檢查呀   感恩報告無事   感謝主 ~

8 月新開始

Lunch Time 出去行下   今日好似無咁熱   可能慢慢行關係 ~

今日食 Flakes + 乳酪   之前特登買呢個膠碗用嚟食 Flakes   始終覺成日用紙材唔係咁環保   雖然我唔係環保份子   但做得幾多得幾多啦 ~

唔忙就做自己嘢啦   咁啲時間就快過喇～

放工約咗里奧大人去堅信號食晚餐   我哋 5 點 50 分到   職員話下午茶至到 6 點呀   實在太好了 ~

食完行陣就番培靈會   今晚 8 點 45 分証道完畢都走喇 ~

番到屋企都即沖涼   好少平日出街   依家有啲唔慣   哈哈哈哈 ~

睡姿好搞笑

睇陣電視同 Youtube   今晚 10 點 45 分都瞓覺 lu ~