團年飯 @ 家姐屋企 ( 4-FEB-2024 )

赤米 - 雖然細細隻   但好鮮甜呀

蒸斑 - 姐夫話唔記得係咩斑 ?!   見新鮮就即買   今晚真係食哂成條魚咁滯呀   里奧大人同姐夫夾咗好少   家姐好似無夾添呀   可能我頭先講話要食哂條魚   佢哋唔敢夾呀   哈哈

西芹炒魷魚 - 家姐喺馬莎買嘅西芹   真係好好食喎   好清甜同埋無渣   真係貴都值得   我都好耐無食呢啲魷魚   蘸蝦醬真係好好味呀

   

白切雞 - 蒸咗半隻先   咁樣真係份量啱啱好   咁有兩隻雞腳嘛   家姐叫我食   我唔食啦   佢自己食   之後仲剩 1 隻   佢又叫我食   我話唔食呀   佢好奇怪點解我唔食   我話尋晚食咗好多鵝掌翼喇   所以唔食咁多雞腳囉

西洋菜湯 - 本身姐夫話煲北芪當參湯可以補氣   但我話想飲西洋菜多啲   今次我都無話要食咩餸   真係唔想佢哋特登去買   一陣買唔到   家姐會覺得對我唔住咁㗎   哈哈哈哈

 

波子提 & 車厘子 - 好耐無食咁大粒咁甜嘅波子提啦

呢盒車厘子要 $450   單買 1 磅要 $100   所以姐夫買一盒喇

特濃朱古力脆脆蛋糕 ($158) - 咁我買埋牛油卷   9 折之後折實 $157.5   我之前睇到個蛋糕係 $238 嘛   心諗 9 折之後平咁多又好喎   之後里奧大人話 $238 係大個呀   哈哈   因為當時得 1 個朱古力蛋糕   咪以為呢個係 $238 囉

家姐話無火機   我話上次妳教用爐頭點蠟燭家嘛   咁快唔記得   但其實講講都有一年   哈哈

工人就最鍾意食朱古力片   所以全部比哂佢食

咁一齊食蛋糕嘛   我話我一定買細個嘅   因為食完飯好飽再食蛋糕   真係每人食少少已經好夠   同埋想一日食哂去咁囉   家姐話姐夫都鍾意食朱古力蛋糕   但真係今晚先知   有時留朱古力蛋糕比姐夫   家姐都無咁講嘅   之後我話咁就好啦   里奧大人同姐夫加埋工人都鍾意食朱古力蛋糕   咁佢哋第時可以幫手食大份啲   哈哈

( 4-FEB-2024  SUN )

今朝同里奧大人食早餐   食完都去里奧大人公司幫手喇 ~

搞掂又同阿妹傾偈   之後再同細細聲傾偈   真開心   哈哈 ~

10 點幾要走喇   因為要番教會事奉呢 ~

今日嘅証道   真係令我覺得我要好好反思   感恩我依家都做緊   就係 "愛仇敵"   講員都話當中係勁掙扎   唯有一少步做起嚟修補開係   始終需要時間放低怨恨   所以求神比力量   讓我哋可以活出愛 ~

同埋真係唔好諗住改變一個人嘅思想   而係要改變自己   因為無人可以完全改變到一個人呢 ~

崇拜完就再有事奉   差唔多 1 點 45 分先搞掂   咁我買埋午餐都即番屋企喇 ~

原味麥炸雞同芬達係2024 親子會生日禮遇   里奧大人就一定食黃金脆薯牛堡套餐

食完就開機洗衫   搞掂哂就可以抖下 ~

4 點幾出發去家姐屋企   但我哋去商場行陣先~

見到仁御堂就入去買嘢   之後里奧大人話要去麥當勞食雪糕 ~

食完又行去 Big C 買零食   最後去 A1 買埋蛋糕就走喇 ~

6 點 40 分就到家姐屋企   Berry 聞完我再樸我   之後見到里奧大人就好驚呀   全程呢係梳化底 ~

影完佢   真係企身見頭暈   哈哈

對眼成日昅實里奧大人

咁嘅狀態   起碼 20 分鐘   點都唔肯出嚟

我叫呢啲做狗揮春   哈哈

家姐都係鍾意八哥㗎喇   哈哈

Max Ocean 炸雞皮三合一派對裝 ($59.9) - 好想食   但 3 包太多   所以買比家姐   佢話做咩買比佢   我話做節唔想兩手空空   佢話我都痴痴哋線   哈哈   之後我話其實我想食   但太多包   佢叫我依家開嚟食或者拎包番屋企   我話唔好啦   送比妳嘛   妳下次食嘅時候   留半包比我就可以   哈哈哈哈

但用零食引佢   佢又食喎   最搞笑佢明明擔緊入口   里奧大人一叫 Berry   佢嚇到成條零食都跌咗   真係駛唔駛咁驚佢呀 ~

咁我拍片比家姐睇   Berry 對眼係咁望住里奧大人方向

之後里奧大人坐喺佢左面   所以隻眼成日向左邊望

佢真係又要食又要驚

仍然一路食一路望住里奧大人方向   哈哈

食完呢   個頭就逐漸伸番入梳化底

里奧大人用零食引佢   引咗好耐先敢出嚟食呀

衰得佢   哈哈

家姐 7 點鬆啲番到嚟   番到嚟即刻話同肥妹之前上網買防敏感耳環   我話頭先姐夫比個鐵盒比我   我仲以為比我放藥   哈哈 ~

家姐買比咗 10 隻唔同款嘅   話摩天輪好靚   所以比我   其實我話唔想轉   但佢係都要我戴   我唔要又覺得我唔鍾意  佢會唔開心   我話鍾意   佢又會繼續買   所以真係唔知比咩反應佢好   哈哈 ~

呢個黐線妹   家姐番嚟先肯跳上梳化咋

梳化啲皮比佢抓爛哂   不過家姐都由得佢㗎喇   寧願買過新都唔會唔比佢抓   哈哈

今晚成日抓塊臉

縮埋對手仔   因為家姐扮同佢剪手甲呀   家姐一拎起佢隻手就係咁縮   里奧大人問平時點剪 ?!   家姐話佢負責剪   姐夫就捉實 Berry 個口   真係好在 Berry 驚姐夫咋   但如果姐夫摸佢   佢會企定定比姐夫摸完先走   咁又好乖女喎

7 點半開飯   今晚大家都一路食一路傾   勁開心呀 ~

我就要慢慢食   咁可以由頭食到尾喇 ~

食食下飯   佢又企喺我同里奧大人中間

仲飛機耳   咁頭先做咩唔出嚟呀

食完飯飲完湯隨即食生果   之後再食生日蛋糕   我把口真係無停過   哈哈 ~

9 點鬆啲都走喇   里奧大人幫手拎嘢   佢話做咩咁重嘅 ?!   因為有 2 包增城片糖同 1 底大嘅蘿蔔糕   所以家姐頭先放落袋   都講咗幾次話好在里奧大人喺度   哈哈   佢都話重   我拎完肯定腰痛添呀 ~

番到屋企沖埋涼   就同里奧大人一齊睇 "臥底旅行團" ~

今年我只係要 1 底大嘅蘿蔔糕就算喇   家姐又比咗車厘子比我   糟糟媽話榮華豬腳薑醋好味   所以我同姐夫每人 1 包   之後話紅豆沙好似幾好味   所以又買比包我   無啦啦又比包齋燒鵝比我   原來佢買咗 1 磅   依家要 $90/磅喇   其實我呢個月都想買齋雞粒   但間零食店成日都仲剩幾包   咁即係水尾啦   因為我間唔中見係一大盒咁新鮮整出嚟㗎   好在真係仍然堅持唔買住咋   哈哈   

特選杞子 ($35) / 菠蘿乾 ($30) / 南棗 ($25)

BITEE 脆脆條 香脆&冬蔭 ($12/2) /Lotus 雞膇脆餅 ($8.9)

睇多陣 Youtube   今晚 11 點幾先瞓呀 ~

團年飯 @ 姑奶屋企 (大埔) ( 3-FEB-2024 )

呢個盤菜無咩味道   咁姑奶話有樽貴州辣椒醬   係佢老公同事自家制㗎   味道真係勁香辣   我當堂有番食慾喇   哈哈

滷水鵝好味呀   係兒甥仔老婆嘅爸爸整呢

( 3-FEB-2024  SAT )

感恩一覺瞓天光   本來醒醒哋   但感覺似係 6 點咁   所以又繼續瞓下   瞓到 7 點鬧鐘響就起身做運動喇 ~

今朝同里奧大人出去食早餐   佢話去妳最鍾意間餐廳食早餐   佢次次都唔會講餐廳名   只係會講妳鍾意嘅咩咩咩咁   哈哈 ~

我覺得隻碟好靚   同埋塊雞扒真係要放上碟切件先食到   好難一啖啖咬開去呀

菇場唔忙啦   個個等放工 ~

放工同里奧大人一齊食 Lunch   食完就番屋企抖下 ~

里奧大人又開機洗 4 件外套   咁就已經夠哂一機   所以冬天好似成日咁洗衫咁   哈哈 ~

4 點半左右出發去大埔食團年飯   但里奧大人話同我去大埔行下先 ~

6 點半先去到姑奶屋企   7 點左右開餐喇   食完又傾下偈 ~

姑奶話我瘦咗   我話係呀   里奧大人仲好開心話我因為依家朝早做運動   哈哈 ~

里奧大人都講話有時瞓得唔好   因為有啲工作壓力   但佢姐夫未接觸過呢啲 Case   所以唔係咁太理解里奧大人點解咁煩   咁我當然知發生咩事啦 ~

但另一個姐夫就明喇   因為唔係講就會令你明白   係要親身感受到先可以叫做真正明白囉 ~

我都成日同里奧大人講話明白佢處境   唔係因為我身為妳老婆會明白佢咁   而係因為我公司都有咁嘅問題存在呢 ~

8 點半走人喇   里奧大人去埋 Unilqo 買件白色線衫就搭車番屋企 lu ~

我叫里奧大人唔好上嚟住   睇下係咪真係 Count 咗人數先   真係十級無聊   哈哈

番到屋企即沖涼   睇陣 Youtube   今晚 11 點幾先瞓 ~

沙茶肉碎炒菠菜苗 ( 2-FEB-2024 )

 

( 2-FEB-2024  FRI )

感恩一覺瞓天光呀   6 點 58 分醒咗   所以去做運動 lu ~

早餐食窩夫   唔想零零丁丁剩番一個   同埋驚唔記得食   咁焗埋去嚟食啦 ~

食完就靈修 20 分鐘   之後番工喇 ~

菇場唔太忙   可以抖下 ~

Lunch Time 出去行陣再買豬軟骨酸辣米線番菇場食   因為今日禁食祈禱完畢呢 ~

味精重呀   食完又係勁眼瞓   所以係咁飲水   真係幾難先頂到 2 點呀   之後就精神喇 ~   

唔忙又做自己嘢啦   真係做自己嘢忙過做公司嘢 ~

阿爽話見到呢個月曆就即刻諗起我   所以就拎比我喇   不過我已經有月曆   所以我比里奧大人用   佢勁鍾意呀

放工即走   番到屋企都即預備晚餐喇 ~

是日晚餐 - 沙茶肉碎炒菠菜苗

沙茶肉碎炒菠菜苗 - 咁樣炒埋一碟都唔錯喎   好似新菜式咁   哈哈   不過一湯匙沙茶醬唔係咁夠味呢 ~

洗埋碗就開機洗衫   之後沖涼喇 ~

同里奧大人一路食蕃薯糖水一路睇 "深圳地圖"   依家深圳啲食店真係又靚又平   所以我話等我做齊哂資料搜集   就要同里奧大人去深圳玩呀 ~

睇多陣 Youtube   今晚 10 點 15 分都瞓覺喇 ~

聚興樓 @ 紅磡 ( 1-FEB-2024 )

清蒸海上鮮 - 今次條魚唔係咁掂

生炒上肉排 - 呢個仍然好味道

我好鍾意食蒜蓉炒菜心

例湯

( 1-FEB-2024  THU )

尋晚完全瞓得唔好呀   熱又唔係   凍又唔係   反正瞓得唔好   如果 6 點 45 分起身就做運動   不過最後都 7 點 15 分醒咗   咁起身整早餐啦   順便整薑茶比里奧大人番公司飲 ~

早餐食丹麥條   呢期都鍾意食   但如果無咁多提子乾就更好 ~

我食緊嘅時候   問里奧大人食半條夠唔夠飽 ?!   佢話有時半條夠飽   有時唔夠   我話你答咗等如無答喎   之後佢都喺度笑   就係佢咁答   我話下次都係每人食 1 條算喇   哈哈 ~

天氣勁潮濕   最怕呢啲天氣   啲嘢抹完又變番立痴痴咁   唉 ~

菇場忙呀   實在太好 ~

幾快又到 2 月

唔用都影下   哈哈

Lunch Time 想買酸辣米線番菇場食   因為個人好攰   加上天氣勁潮濕又辛苦   不過又唔係咁餓咁   所以最後都係去食鯪魚球米   食完行陣先番菇場 ~

阿齋又話我今日又空手而回 ?!   定買咗未拎出嚟呀 ?!   佢真係好搞笑   之後我話無咩心機買嘢呀   啲潮濕天氣好難頂   佢話今朝想着短袖   又話雖然今日 20 度   但都好似冰冰涼涼咁   所以都係着番長袖   我話我都着抓毛衫啦   今日未至於要着短袖囉   我同佢都超勁怕熱   但都着長袖   即係今日唔係太熱   哈哈 ~

我鍾意將啲零食放入盒   食起上嚟好方便

我頭先倒朱古力入盒嘅時候   都感覺到跌咗一粒落地下   但望地下又唔見有   之後要拎嘢   再望下先見到粒朱古力跌到咁入   離遠睇勁似巨強呀   哈哈

忙咗陣就搞掂   再整下呢樣嗰樣   好快就放工 ~

今日好攰呀   所以同里奧大人出去食 ~

食完就番屋企   里奧大人話教佢整蕃薯糖水   原來佢想食   我問點解無啦啦想食 ?!   佢話見到有幾個蕃薯   其實佢唔講   我都唔記得仲有蕃薯   哈哈 ~

開機洗衫之後沖涼   里奧大人熨衫   搞掂哂就食蕃薯糖水喇 ~

今次用兩嚿薑   所以好夠薑味

睇埋 "深圳地圖" 同埋 Youtube   今晚 10 點 20 分都瞓覺喇 ~