梅菜炒肉碎配刈包 + 蕃茄薯仔排骨湯 ( 6-APR-2024 )

~

我鍾意食刈包   因為甜甜哋   不過今晚好懶   將啲刈包就咁放埋一堆就咁蒸   所以個皮有啲黐住   又拻到好肉酸   哈哈

( 6-APR-2024  SAT )

尋晚瞓到半夜又熱醒   我估真係食完薯片嘅關係呢 ~

瞓到 7 點 10 分就醒醒哋   不過點都會瞓到 7 點 25 分先起身   呵呵 ~

今朝同里奧大人出去食早餐   但估唔到呢間餐廳嘅早餐份量係咁巨   我覺得 3 個人食都夠哂飽呀 ~

我鍾意食一粒粒嘅餐肉

星期六真係無咩人番工   今朝包車添呀   幾咁威呀 ~

菇場忙咗陣就 Hea 過喇   我啲同事成日話坐地鐵 巴士就會戴口罩   因為太多人   但我今朝反而巴士唔駛戴口罩   但番到菇場就要戴   因為菇場人數多過坐巴士人數呀    哈哈 ~   

阿花無啦啦話我塊臉好青   又話我個樣好攰咁   但我話我夠瞓喎 ~

放工齊齊彈起身走人   每個人都最期待呢一刻呢 ~

我買埋餸先食午餐   諗住買三文魚骨滾湯   但又未有貨   所以 4 點要再嚟買 ~

番到屋企放低嘢   但里奧大人仲未放工   咁我都抖下先 ~

里奧大人差唔多 2 點 20 分先放工   咁去飯堂食啦   唔想行咁遠呀 ~

番到屋企抖到 4 點就去買三文魚骨   點知仲未到貨   咁即轉買新鮮排骨喇   我唔想周圍行呀 ~

買完即番屋企滾湯喇   下次都係無得買三文魚骨就算   好過咁樣行來行去   到頭來都無無囉 ~

滾完湯又抖下   不過 6 點左右都要預備晚餐 lu ~

是日晚餐 - 梅菜炒肉碎配刈包 + 蕃茄薯仔排骨湯

梅菜炒肉碎配刈包 - 唔想整炒飯   所以買刈包   咁樣配梅菜肉碎都幾夾㗎 ~

蕃茄薯仔排骨湯 - 7 個肉茄 + 3 個細薯仔都夠味   下次加埋南瓜仲甜呢 ~

洗埋碗就沖涼   今晚唔做運動喇   今日行咗成日有啲攰 ~

同里奧大人睇 1 集 "美好世界"   開始越嚟越緊張了 ~

睇多陣 Youtube   差唔多 11 點先瞓 ~

梅菜炒肉碎 + 炒大白菜 ( 5-APR-2024 )

( 5-APR-2024  FRI )

感恩一覺瞓天光呀   同埋起身都精神呢 ~

整埋早餐再煲薑茶   沖埋涼換埋衫   原來都已經 7 點 50 分   不過依家都唔會比自己咁急趕   咁樣會令到自己一早就咁緊張   唔係咁想囉   哈哈 ~

早餐仍然食菠蘿包   個皮焗到脆卜卜真係好正 ~

菇場忙咗陣   之後抖下又做自己嘢 lu ~

里奧大人問我個菠蘿包係搽咩嘢 ?!   我話你可以自己搽牛油   佢話唔好搞咁多嘢   我話你咁問以為你覺得就咁食菠蘿包好齋囉 ~

Lunch Time 出去行陣再去食牛筋米   食完再行一田買嘢   差唔多 12 點 50 分先番到菇場 ~

煙韌冷麵 ($23.9)   希望真係煙韌啦   哈哈

唔忙就做下自己嘢啦   里奧大人 Whatsapp 話想食杯麵   我話無哂啦   之後佢話有福麵   可以焗嚟食   再加幾條豬肉乾 ~

咁唔駛開爐又係方便嘅   我好肯定第時無 Lunch Box 嘅話   佢一定會焗福麵食囉 ~

放工即走   番到屋企即預備晚餐喇 ~

是日晚餐 - 梅菜炒肉碎 + 炒大白菜

梅菜炒肉碎 - 家姐之前買咗甜梅菜比我   所以係時候要煮喇   炒肉碎就最簡單   本來想加隻指天椒   不過里奧大人熱氣   咁就唔加喇 ~

炒大白菜 - 用香辣蒜蓉醬真係好味好多   希望里奧大人之後會好鍾意食菜啦   哈哈 ~

洗埋碗就沖涼   呢幾晚都攰   所以無做運動   好似好懶咁 ~

8 點鬆啲就同里奧大人睇埋 "四屍四時四十四"   今次飛住嚟睇啦   仲諗住結局係出人意表添 ~

睇 Youtube 又打下機   但里奧大人就要熨 2 機衫   佢尋晚明明話今日熨   但居然唔記得   我話做家務都唔記得   就係因為我成日做哂囉 ~

今晚 10 點 45 分都瞓覺   咁就好啦   感覺回復正常時間瞓覺 ~

西貢越南真味 @ 佐敦 ( 4-APR-2024 )

春卷撈檬 ($53) - 天氣熱就最鍾意食撈檬   酸酸哋好開胃㗎

生牛肉牛腩湯檬 ($58) - 里奧大人話牛肉同牛腩都好滑

椰汁冰 ($22) - 我飲啖湯嘅時候   唔小心掂到粒指天椒   之後咳到我死死下   里奧大人即叫杯椰汁冰比我解辣

( 4-APR-2024  THU )

尋晚 4 點幾去廁所   之後都好快瞓得番   感恩瞓得都唔錯   瞓到 9 點半起身   起身嗰陣有一下頭痛   即係已經代表瞓夠   如果再瞓就肯定頭痛呢   哈哈 ~

里奧大人就仲未起身   咁我都睇住電視等佢醒啦 ~

等到 10 點半有啲餓   所以自己食早餐先喇   又可以順便焗埋薑茶 ~

早餐食菠蘿包   好在真係喺屋企食包   咁唔駛趕住出去食早餐嘛   等里奧大人瞓到幾點都得   因為佢知道要出去食   一定唔會瞓到咁晏㗎 ~

食完就熨 2 機衫   原來都已經 11 點 40 分   里奧大人啱啱起身   咁再焗麵包佢食啦 ~

里奧大人就食菠蘿油   等佢開心下啦   其實佢食咩都無所謂   哈哈 ~

睇下 Youtube 又已經 2 點   咁出去食午餐喇   食完再周圍行陣 ~

虎皮煎釀尖椒 ($23) - 我本身都諗住叫   估唔到里奧大人都話要叫嚟食

蜆蚧鯪魚球 ($25) - 又係里奧大人話叫㗎   不過我都好鍾意食呢   哈哈

水晶鮮蝦餃 ($32) - 好似細粒咗

臘味糯米飯 ($26) - 呢個好味呀   好香但唔油膩   糯米飯口感又唔腍

香菇蟹子燒賣 ($30) - 諗唔到食咩呀   所以又食燒賣啦

里奧大人話不如出佐敦行下吖   我話依家出去都無問題呀   里奧大人一路笑一路話拎住煎堆又無拎背囊   點依家出呀 ?!   我其實意思係番到屋企食埋煎埋就可以出去   唔駛話夜啲先出去咁呀   哈哈 ~

番到屋企抖陣   再睇下電視   話咁快就 5 點   係時候出去佐敦 lu ~ 

里奧大人鍾意細細個嘅煎堆   我就無咩所謂   最緊要個餡係煙韌就得㗎喇

出到去又未餓   所以行下廟街同永安先去食晚餐 ~

估唔到今日無咁焗熱   可能有啲風呀   行得都好舒服 ~

@ 廟街夜繽紛

如果去台灣   我一定食香腸   喺香港就唔會 lu

牛雜就最受歡迎

燒烤

印度小食都幾吸引

滷味

@ 廟街

以前去旅行   我都有買呢啲 I love 乜乜 嘅 Tee 㗎   但就好卡通化   唔會就咁英文字咁簡單囉

雪櫃磁石貼   花樽型嘅一定唔會買   哈哈

同里奧大人研究緊百寶堂點樣油上去   哈哈

到此一遊

行完就去睇下有咩好食   咁諗住食間日本嘢   但已經執咗笠   所以食越南嘢喇 ~

食完晚餐就去買洗頭水同 Jel   之後都搭車番屋企 lu ~

我覺得夜晚嘅夜繽紛   係有氣氛好多

番到屋企即開機洗衫   搞掂就沖涼 ~

抖陣就食藍莓   我同里奧大人講話呢期突然非常鍾意食藍莓   佢話聽日再去買   我話唔駛啦   尋晚都已經幫佢清哂貨咁滯   再買就唔係呢個價錢㗎喇   呵呵 ~

今晚睇 "四屍四時四十四"   其實仲有半個鐘就睇哂   不過已經 10 點半   我要瞓覺喇 ~

薑蓉雞粒炒飯 + 芥蘭苗 ( 3-APR-2024 )

( 3-APR-2024  WED )

今朝鬧鐘未響都醒醒哋   雖然都應該天光   但仍然照瞓啦   瞓到鬧鐘響   感恩起身都精神呀   同尋日差好遠呢 ~

早餐食咖啡味瑞士卷   太耐無食   覺得好甜呀 ~

呢碟係 4 件瑞士卷   里奧大人以為我整哂 5 件呀   但其實應該整 3 件就夠

菇場忙呀   開心開心 ~

Lunch Time 出去行陣   船頭問我有無請假去旅行 ?!   我話無呀   唔知點解依家真係唔想去旅行咁呀   又要Plan 行程番嚟又要 Un-pack 嘢好辛苦   之後佢都話係呀   話買嘅時候好爽    但諗到番屋企要拆嘢就好痛苦   哈哈 ~

行一陣再食鯪魚球河   之後行誠品同一田    最後行埋 DAISO 就番菇場   一出商場好似打風咁   又落埋毛毛雨   雖然有帶遮   但都唔想開囉 ~

仍然忙呀   今晚 5 點 35 分先走呢 ~

買埋麵包再買藍莓都番屋企預備晚餐   里奧大人 6 點幾番到屋企都要等陣先可以開餐呀 ~

是日晚餐 - 薑蓉雞粒炒飯 + 芥蘭苗

薑蓉雞粒炒飯 - 將尋晚啲手撕雞剪開一粒粒   再加 3 隻雞蛋   連埋啲薑蓉一齊炒   成個飯都好夠味了 ~

芥蘭苗 - 食埋呢餐   之後又要轉下其他菜喇 ~

洗埋碗就同里奧大人一齊去買 4 盒藍莓   因為頭先試咗幾粒藍莓都甜呀 ~

開機洗衫就沖涼   之後食埋生果就要休息休息了 ~

睇下電視又打下機   今晚 10 點 45 分都瞓喇 ~

海蜇手撕雞 (外賣) + 菜心苗拚菠菜苗 ( 2-APR-2024 )

尋晚食剩嘅支竹排骨   今晚繼續食埋去

( 2-APR-2024  TUE )

感恩一覺瞓天光   但起身嗰下唔係話好精神呀   所以一放長假瞓得太耐呢   到第朝番工起身真係好攰咁㗎 ~

今朝同里奧大人出去食早餐   好在真係出去食咋   我都無咩心機整   哈哈 ~

菇場忙呀   咁都好㗎   雖然攰   但時間過得好快 ~

4 月好開始

真係好鍾意 Apeach 月曆

阿花又送應援比我   真開心   盒糖就係要換海報先買   我見佢張枱已經有一大罐 Ricola 㗎喇   不過佢都鍾意食   但食唔到咁多啦   所以又益埋我同阿齋   呵呵

Lunch Time 又唔餓   但有啲攰   不過要買菜   所以點都要出去   行咗半個鐘就買粉果+炒麵番菇場食喇 ~

我發覺好多時食完呢間啲炒米粉 炒麵同腸粉   之後就會好反胃咁

唔忙就做自己嘢   但仍然好鬼攰   差唔多 2 點都忍唔住飲咗幾啖杯紅茶   飲完真係精神好多喎   之後早啲飲啦   哈哈 ~

咁諗住抖下   8 卦又嚟 Whatsapp   傾咗個幾鐘   對眼好攰呀   好在就放工咋 ~

放工去買手撕雞   之後都番屋企 lu ~

咁我預備晚餐嘅時候   里奧大人番到屋企   我話瑞士卷呢 ?!   之後佢又出去買番   好在比我睇到佢兩手空空番嚟   唔係以為佢買完放咗喺雪櫃囉 ~

是日晚餐 - 海蜇手撕雞 (外賣) + 菜心苗拚菠菜苗

海蜇手撕雞 (外賣) - 懶呀   咁又可以比里奧大人帶飯   所以買呢個餸喇 ~

菜心苗拚菠菜苗 - 之前食剩菠菜苗   咁再加半盒菜心苗   份量啱啱好 ~

洗埋碗就出去麥當勞食雪糕   因為親子會送嘅   我襯記得就即刻去食喇   有效記只係一星期咋 ~

里奧大人鍾意食 OREO 麥旋風   所以好感恩有免費雪糕食呀

食完都番屋企喇   我同里奧大人講話今日好攰   唔去做運動喇 lu ~

咁開埋機洗衫就沖涼   睇陣 Youtube   今晚 10 點 25 分都瞓覺喇 ~

蠔油燜支竹排骨 + 金銀蛋菠菜苗 ( 1-APR-2024 )

( 1-APR-2024  MON )

瞓到 6 點幾去廁所   之後一瞓就瞓到 10 點 20 分先起身 ~

食完早餐都番屋企喇   今日假期最後一日   多數喺屋企休息呢 ~

番到屋企抖陣就沖涼   差唔多 1 點幾就同里奧大人睇集 "美好世界"   都係睇 2 集㗎咋   我覺得追劇真係好攰   唔會一次睇太多集 ~

2 點半都要食午餐喇   一路食一路睇   好在無血腥場面   哈哈 ~

同里奧大人 Share 食燒賣同雞膇   份量啱啱好

里奧大人 4 點就瞓晏覺   我就唔喇   費事今晚瞓唔到   所以睇 Youtube 算喇 ~

今晚 7 點先開餐   仲諗住翻熱同淥菜會好快搞掂添 ~

是日晚餐 - 蠔油燜支竹排骨 + 金銀蛋菠菜苗

蠔油燜支竹排骨 - 今次都好味道   不過其實整呢個餸都好鬼簡單囉   好難唔好味   哈哈 ~

金銀蛋菠菜苗 - 買咗鹹蛋皮蛋   咁又整下呢個餸啦   難得放假有時間 ~

洗埋碗就抖陣   差唔多 8 點就同里奧大人去做機喇   今晚都係做 20 分鐘   因為我有啲攰 ~

沖埋涼就再食生果   之後同里奧大人睇 "美好世界" ~

睇完 2 集都已經 11 點   係時候要瞓喇   聽日要番工呢 ~