麻辣手撕雞 (外賣) ( 7-JUN-2024 )

( 7-JUN-2024  FRI )

感恩尋晚一覺瞓天光   我應該仲係熟睡狀態   因為里奧大人話佢尋晚去咗 2 次廁所   我完全感覺唔到有人郁呀 ~

今朝同里奧大人出去食早餐   本來諗住今朝食麵包   但尋晚見到啲麵包唔靚   所以無買囉 ~

里奧大人找錢之後就將啲錢比埋我   話比我食午餐   之後我話第時都比一百蚊人哋找啦   佢笑住話我好好呀   仲諗住話每次都比五百蚊人找添 ~

去到里奧大人公司坐陣   吸夠冷氣就搭車番工喇 ~

家姐間唔中就會問我食咩早餐 ?!   咁我 Send 相比佢啦   之後佢無啦啦講 "崩漏咁大鑊   妳今朝放病假 ?!"   我再睇番啲相   原來我 Send 埋張收據比佢睇   哈哈   因為我頭先揀完相無睇就即 Send   真係好在 Send 比佢咋 ~

菇場唔忙   又 Skype 啦 ~

諗住做 Email Filing   點知家姐打嚟話幫我喺 HKTV Mall 買嘢   揀好咗時間又傾下偈   傾咗 20 分鐘呀   所以啲時間好快過咁  哈哈 ~   

Lunch Time 出去行陣先   搭 Lift 嘅時候   船頭樣衰衰咁笑住同我講話 "比妳講中咗"   之後話尋晚試咗個橙   真係一個好食一個唔好食呀   因為尋晚佢試第一次買嗰個係唔好食呀   咁我尋晚先同佢講話如果一個好食一個唔好食會點 ?!   點知真係中   哈哈 ~

買完小青瓜又周圍行下   今日好想行街呀   行到 12 點 20 分先番菇場   今日食 Flakes + 乳酪   阿齋話見我張枱有支乳酪   都估到我食脆脆   因為我多數會拎支乳酪出嚟灘一灘先呢 ~

忙咗一陣又 Skype   之後阿後話下午茶嚟咗   我以為咁快 4 點幾   但原來只係 3 點半咋   今日又會咁快嘅 ~

今次到阿 B 請食下午茶    因為春茗仲咗 2 獎同特別獎   加埋嘅銀碼就等如大獎㗎 ~

咁我入去 Show Room 拎下午茶   船頭叫我唔好摸個肚啦   摸到好似大肚婆咁   我話阿伯真係讓位我坐㗎   佢問我係咪打算一世係咁   哈哈哈哈   之後佢話佢仲 Hurt   有次搭巴士   有個工人姐姐抱住個 B 都讓位比佢坐呀   可能嗰時佢好多白頭髮   以為佢係阿婆   哈哈 ~

其實都仲未餓   不過唔食又唔得   始終西瓜喺度   無理由食成個鐘嘛   始終開工時間   同埋見其他同事好快食哂   妳仲更加唔咁慢慢食囉

食完就 Skype   又整下呢樣嗰樣   所以好快就放工 lu ~

買埋手撕雞就番屋企   咁我切緊青瓜絲嘅時候   里奧大人番嚟見到就話做咩整呢啲呀   就咁食雞就得啦   唔駛搞咁多嘢   我話要食啲蔬菜嘛 ~

今晚我都只係食餸   里奧大人就焗福麵 ~

食完抖陣就開機洗衫   之後沖涼休息 lu ~

睇完 "繼承者" 再睇 Youtube   啱啱手機叉完電   一睇就睇到嬸嬸喺群組話我哋知姑姐走咗   我同家姐都以為自己睇錯   因為表哥無同我哋講   之後家姐再問另一倨表嫂   原來大表哥去咗旅行   聽日番香港再通知大家 ~

我同里奧大人講啦   佢話之前都叫我探姑姐   不過我成日推   依家想探都無得探   唉 ~

今晚睇福寶都覺得唔開心添   但 11 點都要瞓喇   聽日要番工 ~

韭菜水餃餐 + 招牌鍋貼餐 (外賣) ( 6-JUN-2024 )

( 6-JUN-2024  THU )

尋晚半夜去完廁所   之後腳痛呀   可能尋晚拎住晚餐行番屋企比較耐   加上又着咗 Boot   所以對腳就好攰囉 ~

今朝同里奧大人出去食早餐   食完就去佢公司坐陣先番工 ~

菇場唔忙   可以開開心心 Skype   真係唔似番緊工咁 ~

咁啱睇到公司合照啲相   每年影嘅時候都笑得好開心  因為我知道有啲同事係做得唔開心   所以影相係唔笑   個樣仲要嬲爆爆咁   感恩我番工真係開心嘅   賺錢不在話下   又唔會同社會脫節   又可以識到好多嘢   雖然上網都知   但都係得人哋講   咁講乜都得啦   同埋我始終都覺得人同人互動先係最緊要   有時同同事傾下傾下   又傾到其他嘢   呢樣就最好啦   會突然間識多一樣嘢咁 ~

Lunch Time 出去行陣再食水餃米   今日好想食水餃 ~

食完就行 Mikiki   有兩爺孫經過間 Boutique   孫女想入去睇   但爺爺就拉住佢話呢度啲衫好大件   唔好入去睇   孫女話我想要大件呀   我覺得呢句好搞笑   佢爺爺話想要大件就要飲多啲奶增高呀   爺爺全程都好溫柔   孫女又無話扯住爺爺入去 Boutique 入面睇   都好乖女呢 ~

行到 12 點 45 分都番菇場喇   原來落緊毛毛雨   好在有帶遮 ~

菇場忙咗半個鐘又可以 Hea   雖然番工係好輕鬆咁   但其實我都係鍾意忙嘅   呵呵 ~

放工即走   見船頭買咗 6 個橙   佢話食過好食好多汁就買   依家要 $12 一個喇   我好記得嗰時用消費劵係 $8 一個囉 ~

佢話尋日買咗兩個試下   因為唔好食都唔駛咁心痛嘛   咁我話如果一個好食一個唔好食咁點 ?!   佢話無諗過呢個問題   哈哈哈哈 ~

里奧大人今晚去剪髮   咁今晚唔煮喇   我又係好想食餃子   好在里奧大人肯陪我呢 ~

食完就要去搞啲嘢   搞掂就開機洗衫   之後沖涼休息   里奧大人就熨 2 機衫 ~

"繼承者" 劇情真係越嚟越悶   里奧大人直頭估到埋啲劇情   不過我話想聽廣東話   所以先睇囉   難得唔駛睇自幕嘛   哈哈 ~

10 點 27 分即瞓   其實我 10 點 15 分已經想瞓   不過驚太早咁咋 ~ 

苦瓜釀豬肉拚黑椒牛仔骨飯 + 生炒骨拚西檸雞飯 (外賣) ( 5-JUN-2024 )

苦瓜釀豬肉拚黑椒牛仔骨都好味   其實兩盒飯食兩餐真係唔錯   因為份量都好多

生炒骨真係超級好食   番到屋企啲生炒骨仍然脆卜卜

( 5-JUN-2024  WED )

尋晚去完廁所   都叫做幾快瞓得番   今朝都係鬧鐘未響就醒   不過都係等鬧鐘響先起身   呢排身體弱雞咗   所以想比自己瞓多啲 ~

早餐仍然食芝士圈   里奧大人話烘熱就好味道   我覺得最緊要大家鍾意食就真呢 ~

食完就靈修 15 分鐘   之後就番工喇 ~

菇場唔忙就 Skype 啦   呢排雖然瞓得唔錯   但個人都係比較攰咁 ~

Lunch Time 出去行陣再食牛筋河   食完再行陣   行到 12 點 35 分都番菇場 ~

仍然唔忙   又係 Skype 到放工 ~

今晚睇中醫   我講咗 3 月開始嚟經   醫師碌大對眼話 3 月 ?!   係咪 5 月呀 ?!   我都忍唔住笑咗出嚟   哈哈 ~

都預咗貧血   同埋佢話我心跳大快   叫我唔好咁緊張   不過當下要調理咗身體先   之後再調理其他方面 ~

睇完就去買晚餐同埋糖水   但落大雨要慢慢行囉   今日全日無落雨仲以為唔落添   哈哈 ~

番到屋企都已經 7 點   里奧大人話今次咁晏   我話買埋糖水嘛   所以晏咗啲囉 ~

食完抖陣就開機洗衫   之後沖涼   咁抖多陣就食糖水喇 ~

粉粿綜合凍 ($33) - 里奧大人話我食咗幾次都話好食   所以真係好好食喎   哈哈

地瓜綜合凍 ($33) - 里奧大人話上次講咗話地瓜唔係咁好味   我話完全無印象佢講過   哈哈   不過我都承認呢排都無咩記性   上次佢話唔食早餐   我又係唔記得

睇多陣 Youtube   今晚 10 點 27 分都瞓 lu ~

燒汁焗雞膇 + 蠔皇溏心一口鮑扒芥蘭苗 ( 4-JUN-2024 )

( 4-JUN-2024  TUE )

尋晚去完廁所   之後都好快瞓得番   今朝又係鬧鐘未響都醒醒哋   不過就繼續瞓到鬧鐘響咁呢 ~

早餐食芝士圈   但我剪開到一件件   估唔到有芝士餡   咁樣好味好多啦 ~

里奧大人要我今日開始食目清素   咁又好呀   我呢排對眼都好濛   其實以前都會焗菊花杞子   但飲完有啲暈   所以都唔好搞住喇 ~

食完又可以靈修 15 分鐘   唔錯唔錯 ~

朱朱呢張相係喺我屋企影㗎   嗰時佢要喺我屋企住幾日   所以我又係咁幫佢影相   嗰時用菲林片㗎   但我又好捨得   幾乎每個月影 1 至 2 筒菲林   其實菲林曬出嚟嘅相真係靚好多

菇場唔忙   可以做自己嘢   咁就唔會洽眼瞓   哈哈 ~

Lunch Time 出去行陣再食水餃上海麵   食完就去買菜   之後行陣就番菇場喇 ~

唔忙又做下自己嘢   所以好快就放工 ~

放工即走   番到屋企即預備晚餐   焗緊雞膇又淥緊菜   之後先醒起要煲飯   好在我煲好少飯   所以好快就熟   唔駛等咁耐 ~

是日晚餐 - 燒汁焗雞膇 + 蠔皇溏心一口鮑扒芥蘭苗

燒汁焗雞膇 - 今次落鑊再整多少少汁   咁樣好味啲㗎 ~

蠔皇溏心一口鮑扒芥蘭苗 - 鮑魚汁都幾好味   最緊要唔鹹嘛   我習慣加熱啲汁   里奧大人話其實唔駛   不過我仲係接受唔到咁食囉   等如煮五香肉丁麵   我一定要蒸熱咗五香肉丁   接唔唔到成罐倒落麵上面呢 ~

食完抖陣就洗碗   之後沖涼休息喇 ~

睇完 "繼承者" 再睇福寶   今晚都係 10 點半瞓覺 ~

炸子雞 & 荷葉飯 ( 3-JUN-2024 )

( 3-JUN-2024  MON )

雖然尋晚夜瞓   但感恩一覺瞓天光呀 ~

早餐食甜餐包搽醬占   好耐無咁食法了 ~

菇場忙呀   咁就好喇   時間過得快好多呢 ~

Lunch Time 好大雨呀   所以食杯麵算喇 ~

依家轉食呢個牌子嘅杯麵同即食麵   因為啲麵質比較爽身

肥仔豪話好辣   我話一啲都唔辣囉

阿齋見我無出去就問我食咩 ?!   我叫佢估   佢估脆脆   我話錯   之後佢話杯麵   仲話我有咩可以食呀   哈哈 ~

頭先肥仔豪又問我係咪食杯麵 ?!   我話係呀   因為我今日着對鞋   一濕咗就好難乾   佢話平時滴到水都難乾啦   今日落大雨都更加難乾 ~

仍然唔忙  可以 Skype 到放工 ~

番到屋企即預備晚餐   今晚只係焗熱荷葉飯同炸子雞就搞掂   好在尋晚好多嘢食剩   每家人分啲   我就只係要荷葉飯同炸子雞就算   咁今晚就唔駛諗煮咩   呵呵 ~

食完抖陣就洗碗   開埋機洗衫就沖涼喇   里奧大人就熨衫 ~

依家都有睇 "繼承者"   但劇情真係唔多掂   所以多數一路打機一路睇   哈哈 ~

呢份生果餐   如果用正價買就真係唔捨得咁食   以前啲生果真係好平㗎   就算係榴槤都好平   唔知點解依家啲生果要咁貴

睇多陣 Youtube   今晚 10 點 45 分都先瞓覺呀 ~

百樂金宴 @ 黃大仙 ( 2-JUN-2024 )

我哋 9 個人坐 1 圍枱   所以里奧大人話我點食乳豬都得   哈哈

炸蝦丸同沙律都好味呀

第一次覺得食翅係咁正   因為我個人好凍   食完熱嘢真係暖好多呢

壽包好味呀

( 2-JUN-2024  SUN )

雖然一覺瞓天光   不過起身有啲攰   但想同里奧大人食早餐   所以都起身喇 ~

原來里奧大人尋晚幫家姐整相整到 12 點呀   真係辛苦佢喇 ~

食完早餐就去佢公司   我同勁哥傾旅行嘢   傾咗成個鐘呀   唔係望下個鐘   仲可以繼續傾添呀 ~

我坐到 10 點幾都走喇   因為要番自己教會事奉呢 ~

今日事奉完都只係 1 點半   算係早㗎喇   不過里奧大人要開會   所以起碼 2 點半先走得   咁我番屋企等佢 lu ~

睇 Youtube 睇到 3 點   之後瞓咗 15 分鐘   起身嗰下覺得好肚餓呀   好在里奧大人咁啱打嚟話可以走得咋 ~

真係搞嘢囉   我好想食燒鴨瀨   不過無哂瀨粉   好在我都鍾意食米粉

我食完就番屋企   里奧大人就要番公司繼續做嘢   差唔多 5 點先番到屋企 ~

沖涼瞓覺   其實我都好攰   所以睇睇下 Youtube 都瞓着咗   不過都係瞓 15 分鐘左右 ~

里奧大人 6 點 10 分起身   換埋衫再整下其他嘢都要出發喇 ~

搭地鐵其實方便   車程都好快   但上上落落再轉線   呢下先用最多時間呢 ~

里奧大人阿叔擺壽宴   7 點 50 分先開席   之前仲話早去早開席   真係好在無 6 點半去到啫   唔係等個幾鐘   同埋係等佢打完牌先開席   咁就最唔好囉   人齊就應該要開席啦 ~

酒樓好凍呀   我真係好少講話凍   同埋侍應話已經熄咗 2 部冷氣   但我哋都覺得凍 ~

食下傾下   見主家席同其他人都無意欲想走   但已經 9 點 50 分啦   所以我哋一家人話走先喇 ~

搭地鐵番屋企   之後即沖涼喇   我好怕咁夜先沖涼洗頭   因為我會比較難入睡 ~

姑奶靜靜雞同我講話我今年生日利是係大封啲   問我有無睇到啲餡 ?!   我話無睇喎   同埋我好似無收過喎   但佢都記得我同佢講多謝   之後我問番話里奧大人   原來佢真係唔記得比番我呀   所以封利是比佢搞到梅菜咁

今晚 11 點半先瞓   里奧大人就繼續幫家姐 Delete 相   真係感激佢幫忙呀 ~

沙爹王 XO 醬炒牛筋丸 ( 1-JUN-2024 )

( 1-JUN-2024  SAT )

尋晚里奧大人 11 點 45 分先番到屋企   咁啱我去廁所   佢仲諗住我都好晏番屋企添呀 ~

不過瞓到半夜勁想嘔呀   可能食咗太多醃蘿蔔   個胃唔係咁舒服   不過最後我都繼續瞓   感恩瞓得都唔錯   不過起身係有啲攰呢 ~

我刷牙嘅時候   里奧大人話今日唔駛番   我話早講嘛   咁我今朝可以瞓到 8 點   同埋尋日買定麵包   今朝唔駛出去食囉 ~

咁本身諗住喺屋企附近食   但見個天好似想落雨咁   都係喺菇場附近食早餐算喇 ~

蕃茄湯無味   丹麥酥又無牛油香   我同船頭講話呢間唔好食   原來佢之前都食過一次   佢都話唔好食

菇場忙呀   做到 11 點先搞掂 ~

幾快又到 6 月喇

我下次應該會買淺色 Background 嘅日曆   哈哈

放工即走   我同里奧大人未餓   所以唔想食午餐住 ~

番到屋企抖下先   但其實都仲未餓   不過我一陣有事奉   咁點都要食啲嘢囉 ~

里奧大人同番我講   話之前同我講咗今朝早係補假   之後我諗諗下又真係有咁講過   不過佢都話下次唔同我食早餐   都會再同我講多次   我話最好咁啦   依家無咩記性呀 ~

差唔多 2 點里奧大人就去買外賣   我話食一個餐就夠   因為仲要食埋家姐尋晚比嘅焦糖蛋撻呢 ~

最後食剩 1/3   咁留番今晚食 lu

今日有 LA 活動   我食完都要即走喇   因為石頭已經到咗   咁我早啲陪佢啦   又可以傾下偈 ~

原來今日係大人細路一齊玩大富翁   我細個就玩得多   所以今次玩呢   真係所有回憶番哂嚟呀 ~

我話要玩手銬版   因為我真係未見過呀   哈哈

我哋大人就想個個都經過自己物業   咁可以收租嘛   但細路經過要比租   佢就覺得好慘   我話好似呃細路咁   同埋我話我寧願坐監都唔比租   因為我一條街都無買唔到呀 ~

我反對 - 呢張卡非常好用㗎   我初初經過長洲比租只係 $60   但 LL 話梗係比貴租先用啦   所以我到薄扶林就用呢張卡   因為 $300 嘅租係最貴   呵呵

有屋同享 - 呢張卡就係當玩家買旅館   我可以免費從銀行獲得一間旅館   再放喺我物業上面

有大人水喉關照 - 我可以喺自己任何物業免費起間酒店

雖然我只買到尖沙咀   但我可以免費起 2 間酒店   佢哋個個好羨慕   哈哈

最搞笑係我哋輛住坐監   真係唔會隔咗一個人咁㗎喎   到我最後坐嘅時候   我叫石頭再擲骰   我以為真係要坐監   但其實係探監   哈哈 ~

今次最大得益係 WW 跟我一齊玩呀   第一次見佢嘅時候   佢自己畫畫   仲要特登唔比我睇   不過我又無唔開心   因為知道細路仔係咁嘛   里奧大人兒生仔都唔跟我啦   何況外人 ~

到第二次同佢玩遊戲   因為我同佢係同一 Team   所以熟咗   今日我又特登比佢幫我擲骰   感情更進一步   哈哈 ~

無諗過今日大家都玩得勁開心   我直頭嗌到喉嚨痛添呀 ~

完畢之後要同鴛鴦石頭夾時間   因為嚟緊有好多搴奉   但之後又可以抖一個月   咁都好呀 ~

番到屋企見里奧大人熨衫   仲以為佢唔記得添   不過佢熨衫真係直過我好多㗎 ~

同里奧大人講話頭先玩大富翁好開心   佢一路聽一路笑   話我哋大人先係玩得最開心   哈哈 ~

咁今日都好攰   抖多陣都已經 6 點幾   本身想出去食豬潤淮山麵   但我覺得食完又超級飽咁   加上本身又唔係咁餓   所以最後都係煮埋啲牛筋丸   里奧大人焗 MAMA 麵   我就食埋晏晝嘅炒飯就算喇 ~

CC 上次買比我嘅牛筋丸   都有 3 個月喇   所以要一次食哂去囉

是日懶餐 - 沙爹王 XO 醬炒牛筋丸

沙爹王 XO 醬炒牛筋丸 - 我淥熟哂啲丸再加 XO 醬撈勻   因為唔想洗多隻鑊 ~

洗埋碗就開機洗衫   里奧大人就去做機 ~

之前家姐比咗 2 包榮華嘅陳皮紅豆沙   咁今晚食埋去喇   反正我好想食啲熱嘢   哈哈 ~

紅豆沙唔太甜   同埋都幾香陳皮味噃

睇下 Youtube   今晚 11 點先瞓覺   但里奧大人要幫家姐搞埋 Google Drive 嘅相先瞓得   辛苦佢喇 ~