臘潤腸蒸排骨 + 蒜蓉炒菜心 ( 5-MAR-2012 )

沙爹豬肉碟頭飯   前晚食剩嘅   唔好浪費   所以我食埋去囉

( 5-MAR-2012  MON )

又星期一喇   今日又係潮濕天氣   不過好在有啲陽光都好啲 ~

早餐又係食芝士豬柳漢堡包   杯拉茶超熱   再嘆埋份報紙   超爽呀 ~

晏晝有 Lunch Box   食完就出去行下   難得有 Mood 想行嘛 ~

放工去街市買餸買生果   之後番到屋企煲中藥   抖陣先煮飯喇 ~

是日懶餐 - 臘潤腸蒸排骨 + 蒜蓉炒菜心

臘潤腸蒸排骨 - 實在太攰   真係無 Mood 煮嘢   所以蒸排骨喇   最緊要簡單方便 ~

蒜蓉炒菜心 - 都係炒菜心好食啲   如果唔係都懶得炒呀 ~

里奧大人差唔多 9 點幾先番到屋企   今晚佢居然有胃口食哂啲餸同飯   我真係好開心呢   因為佢次次一番嚟見到啲餸就會第一句講咁多食唔哂   其實根本唔多   暖壺份量都唔多啦   同埋我只係裝咗暖壺份量一半之嘛   所以佢今晚無講好多   又食得哂   咁我幫佢洗碗都洗得開心啲啦 ~

北京韭菜餃子 + 韓式便當 + 愛爾蘭瘋薯 + 肉燥飯團 (外賣) @ 家姐屋企 ( 4-MAR-2012 )

北京韭菜餃子

肉燥飯團 (紫米 / 糙米 / 皇帝菜 / 肉鬆 / 肉燥) @ 西龍傳香飯團

蒜香煙肉芝士瘋薯 @ 愛爾蘭瘋薯

韓式便當 @ 韓賞味蕭邦監製

( 4-MAR-2012  SUN )

10 點 20 分起身   沖埋涼先出去食早餐   諗住番教會   點知食完早餐都番唔切 lu ~

番到屋企就 Hea 下   之後洗衫熨衫   好在有抽濕機   唔係呢個星期都唔洗得衫咯 ~

晏晝問里奧大人想出去 Relax 食 Tea 定喺屋企食番尋晚啲嘢   佢話想出街食喎   咁我唯有留番聽日做 Lunch Box 啦 ~

里奧大人今晚約咗朋友食飯   本來我都約咗媽咪同家姐去龍皇食飯   點知媽咪唔舒服   所以唔去 lu ~

家姐去媽咪屋企坐陣   之後問我想去邊   我話無咩地方想去   但唔想喺九龍灣食嘢囉   所以佢車埋我去新都城   我話星期日周圍都多人   買嘢食去佢屋企食仲好 ~

差唔多 9 點就走啦   家姐車我番屋企   估唔到里奧大人又差唔多到九龍灣   咁順便等埋我番屋企喇 ~ 

卡邦尼忌廉濃汁煙肉意粉 + 香草蒜蓉包 + 黑椒豬肉乾+ 馬來西亞沙爹豬肉 + 煙三文魚 + 南瓜粟米紅蘿蔔唐排湯 ( 3-MAR-2012 )

( 3-MAR-2012  SAT )

今朝瞓到 7 點 50 分   比平時瞓多 25 分鐘   但都好想繼續瞓囉 ~

一落車無耐又收到 8 卦電話約我食早餐   佢話試另一間   我實無問題   因為我都想轉下環境呢 ~

阿 Head Off   後面同事又無番   所以就可以 Full Screen 上網   發達啦 ~

1 點即走   去完街市就去超市幫菇場入貨   因為今日有雙倍印花   唔係家姐要印花   我真係唔會去買住囉 ~

番到屋企都 2 點幾   抖陣就同里奧大人出去食 Tea 喇 ~

今晚家姐嚟我屋企食飯   所以我要煮啲新嘢   4 點開始煲湯   之後就執下嘢   又預備其他嘢咁呢 ~

家姐差多 7 點半到   好在好多嘢都預備哂   一黎到可以即刻食呢 ~ 

是日晚餐 - 卡邦尼忌廉濃汁煙肉意粉 + 香草蒜蓉包 + 黑椒豬肉乾 + 馬來西亞沙爹朱肉 + 煙三文魚 + 南瓜粟米紅蘿蔔唐排湯

卡邦尼忌廉濃汁煙肉意粉 - 之前買咗樽卡邦尼醬汁   所以就整喇   同埋因為里奧大人唔多鍾意忌廉汁嘅嘢   平時好少會整囉   所以家姐喺度就整喇   因為佢可以幫手食呢 ~

香草蒜蓉包 - 1 條法包   加牛油  香草  蒜蓉一齊焗   真係非常之正呢  佢哋話好好食   不過呢啲無難度嘅   幾時食都可以整 ~

黑椒豬肉乾 - 我去街市買豬展   但要搞碎   豬肉佬話豬展搞碎會好韌   問我煮啲咩   我話整豬肉乾   佢話應該用梅頭   好在豬肉佬教路咋 ~  

馬來西亞沙爹朱肉 - 之前喺馬來西亞買嘅沙爹   跟住嚟整   不過我覺得應該落多啲水好啲 ~ 

煙三文魚 - 又係之前買   特登等埋家姐嚟食先開呢 ~  

南瓜粟米紅蘿蔔唐排湯 - 用咗一個南瓜 + 3 條甘筍 + 4 條迷你粟米 + $27 唐排   超甜呀 ~

食完就傾陣偈   家姐差唔多 9 點就走 lu ~

香煎司華力腸 + 菜心 ( 2-MAR-2012 )

( 2-MAR-2012  FRI )

終於有少少陽光啦   不過都有啲潮濕同埋焗囉   不過見到少少陽光已經好開心呢 ~

今朝坐車見到有對小朋友食珍寶珠   我真係覺得好怪囉   一早食糖好唔健康嘛 ~

早餐食榨菜肉絲腸仔麵   超級鹹呀 ~

Lunch 食 Special k + 朱古力奶   咁耐無食   又覺得幾好味噃   食完出去行陣   因為好想曬下呀 ~

放工即走 lu   去超市買菜   順便幫家姐買 4 Pack 9 包裝檸檬茶   因為有 2 Pack 福麵送呀   所以好抵   但拎到我得半條人命 ~  

勁潮濕呀   走廊全部濕哂   連屋企對門同雪櫃門都濕哂呀   第一次咁咋 ~

一入屋即放低嘢   我覺得隻手好似想斷咁呀   抖咗半個鐘就煮嘢 lu   今晚又係自己食先   所以煮冬蔭功河粉   其實唔想食   因為好酸呀   唔鍾意呢啲味道   仲有一包就清哂   好後悔買咗 3 包 ~

是日懶餐 - 香煎司華力腸 + 菜心

香煎司華力腸 - 終於煎哂喇   真係好開心呢 ~ 

菜心 - 好耐無食菜咁呀   所以唔想煮都要煮囉 ~

食完就沖涼熨衫   里奧大人差唔多 9 點半先放工   我就教啱時間淥菜同淥出前一丁比佢食呢 ~   

住家飯 @ 媽咪屋企 ( 1-MAR-2012 )

辣椒梅菜炒豬肉

蒸立魚 

炒豆角

蓮藕瑤柱鱆魚湯

滷水乳鴿

Smoothies - Raspberry & Summer Berries

( 1-MAR-2012  THU )

今朝瞓到 7 點 45 分   都幾夠瞓咁啦 ~  

早餐食燒賣粉果   好耐無食 lu   因為呢間坐位好迫   所以次次一入去都好焗咁   但今朝都幾凍就無咩所謂呢 ~

番到菇場好忙呀   但忙到 10 點幾就忙完 lu   有嘢做個人反而好精神呀 ~

到 12 點都未餓   咁一早同 8 卦講一齊出去食   之後我話都係買嘢番菇場食   但未知食咩   佢話陪我食其他嘢   不過我話唔好喇   我唔餓   但佢餓嘛   所以同佢一齊買飯盒呢 ~

里奧大人上咗大陸   咁我就番媽咪屋企食飯喇   家姐有嘢搞   所以 8 點就走   我就陪多媽咪一陣   9 點就走喇   因為我想睇 On call 36 小時呀 ~

我每次番屋企都會睇下信箱有無信   好驚喜呀   因為收到老友表嘅明信片   好感動佢去親旅行都會記得我呢 ~

今晚里奧大人 10 點先番到屋企   等佢沖埋涼   傾下偈  睇陣電視   話咁快都 11 點半   要瞓喇 ~

齋滷味 + 炸魚皮角 + 炸魚皮 (外賣) ( 29-FEB-2012 )

( 29-FEB-2012  WED )

又係潮濕天氣   瞓幾多都會攰   真係飲完咖啡都無咩 Mood 想番工添 ~

9 點幾平安鐘又打嚟   媽咪又氣促頭暈入院   今次又係喺觀入察病房先   咁都好   代表無咩嘢嘛 ~

晏晝出去行陣再買嘢番菇場食   出去行下真係唔錯   不過我成日最驚就係亂咁買嘢囉 ~   

眼瞓都呢   我合埋眼真係可以瞓得着呀   之後家姐打嚟話媽咪出咗院   感恩呀   媽咪只係個腎唔太好   但唔駛食藥同洗腎   同埋胃脹影響   所以開咗啲藥比佢就番得屋企喇 ~

放工去九龍城睇中醫   本來想行去   不過太大風都係唔行   好易病   但搭的士又唔想   所以搭巴士喇 ~

去到九龍城買埋嘢先睇中醫   但我覺得呢個中醫好似麻麻哋咁   所以食埋呢幾劑唔睇 lu ~

番到屋企 7 點   即刻開機洗衫再煮晚餐   食完就熨衫   今晚里奧大人 9 點先收工   所以我煮埋麵比佢先沖涼 ~ 

唔知係咪未沖涼   覺得周身唔舒服   所以心情有啲唔好   同里奧大人講話   如果佢咁夜先食   叫佢自己洗埋碗   我唔會洗   我好攰呀   咩都分兩次做咁   佢話好   不過話完佢又覺得自己好衰咁   所以佢食完   我拎碗入廚房洗埋   佢以為我未洗   所以走入嚟廚房準備洗碗   佢估唔到我咁快洗好呢 ~

是日懶餐 - 齋滷味 + 炸魚皮 + 炸魚皮角

齋滷味 - $22/盒 (細)   我只係鍾意食酸齋 & 齋鴨腎   不過呢間麻麻   因為酸齋比較乾   齋鴨腎又好乾好硬   咬完一粒個口已經好攰喇 ~

炸魚皮 - $10/包   好脆呀   同埋我鍾意薄身炸魚皮 ~ 

炸魚皮角 - $56/斤   買咗 8 塊 ($23)   雖然唔腥   不過都幾鹹囉   但鍾意個口感   唔鍾意好似魚片咁薄身咁呢 ~

元綠壽司 + Yogurt Town @ 將軍澳 ( 28-FEB-2012 )

海老冷辣辣麵

蟹籽沙律豆腐皮

芥辣八爪魚壽司 / 鮮帶子壽司 / 太卷 / 醬油熱帆立貝壽司 / 蟹籽壽司 / 三文魚腩壽司 / 三文魚皮卷 / 中華沙律

炸墨魚軟骨

醬燒三文魚腩

帆立貝日式薄脆餅

味噌湯

@ Yogurt Town - 大杯裝原味 Yogurt ($24) (菠蘿 / 巨蜂提子糯米糍 / 爆爆珠 / 迷你棉花糖 / 芒果醬  合共 $18)

( 28-FEB-2012  TUE )

又落雨喇   真係凍上加凍呢 ~

呢排好鍾意食餐蛋治呀   好奇怪 ~

 

晏晝想郁下   所以陪 8 卦去買飯   之後先食 Lunch Box ~

今晚約咗家姐去元綠   本來諗住同埋里奧大人一齊食   不過佢又唔知幾時放工   所以就咁約家姐算 lu   放工即坐車去新都城   依家覺得坐半個鐘頭車係好耐好耐咁呀 ~ 

去到 6 點幾   自己周圍行陣先   差唔多 6 點 45 分就去元綠 lu ~

家姐差唔多 7 點 15 分到   食到 8 點 15 分就埋單走人   今次又係有 $100 Cash Coupon   所以覺得好抵食呀 ~

之後家姐無啦啦同我講   食完壽司   妳有無想食番啲好似雪糕啲甜嘢   哈哈   我話駛咩講咁多嘢呀   講食完鹹嘢要食甜嘢咪得囉   反正佢次次都係咁講嘅 ~

其實我哋都好飽   家姐話去聰嫂   我話好飽唔想食   佢話食乳酪   咁我問佢乳酪當唔當甜品先   唔係一陣話唔當食甜品   再要食真係甜嘅甜品   我唔會再陪妳食   好在佢話乳酪算係甜品啫 ~

食完就車我番屋企   原來里奧大人都食完嘢番咗屋企添呀 ~