和民居食屋 @ 九龍灣 + 英記油渣麵 @ 大角咀 ( 24-OCT-2014 )

關西章魚丸子

天婦羅冷蒿麥麵

黑椒粟米牛肉飯

炸雞軟骨

九洲風雞肉飯團   

鬼呀   哈哈

@ 英記油渣麵

勁勁勁辣椒油 - 我點咗芝麻 Size 咁細滴落碗   之後都覺得辣  

油渣麵 (細)

雞翼 - 無咩味

蠔油油麥菜 - 個蠔油好味  甜甜哋有啲蒜味  

( 24-OCT-2014  FRI )

10 點起身   所以去大家樂食早餐   不過無咩胃口   留番火腿同厚多士做 Lunch ~

行商場再行百佳   番到屋企沖涼   之後睇飲食男女 ~

1 點餓呀   食埋火腿厚多士   再加多包朱古力奶   飽哂 ~

我好鍾意星期五睇 "都市閒情"   因為全輯都係介紹嘢食   睇嘢食最好心呢 ~

睇完電視就睇聖經   之後就執 File 啲文件啦   勁耐無執過   所以係時候執下喇 ~

里奧大人 3 點喺上環見客   5 點半見完   今晚可以一齊食晚餐喇   勁開心 ~

6 點媽咪嚟到屋企樓下   叫工人幫手拎啲生果上屋企先   之後一齊去和民喇 ~

家姐 7 點嚟到   里奧大人就 7 點 15 分到   食下傾下都 8 點幾   之後我同家姐送媽咪搭的士   再同家姐行百佳買嘢 ~

家姐要上我屋企拎嘢   坐到 9 點半就走喇   佢話一陣會同糟糟去食油渣麵   咁我都想去呀   里奧大人話佢都做公司嘢   所以叫我出去傾下偈都好 ~

10 點 15 分打比家姐   問佢點解咁耐   因為我以為糟糟已經喺屋企   原來糟糟要幫公司翻譯   所以 10 點半先放工   其實咁夜真係唔想出去   但又勁想食油渣麵囉   所以等啦   哈哈 ~

終於 11 點出發   咁啱我翻轉頭入屋拎嘢比家姐   聽到里奧大人講嘢   原來係晴晴打嚟搵我呀   真係好啱囉   因為本身我唔入屋拎嘢家嘛   不過約咗家姐   所以叫佢 3 分鐘之後再打比我呀 ~

晴晴真係好乖   佢知我做完手術   話好擔心我呀   講咗幾次   之後知我去食油渣麵   就叫我要戒口呀   唔好食肥膩嘢   成個婆仔咁   同佢傾咗 5 分鐘   因為澳洲已經係夜晚 2 點幾   太夜喇   我要佢快啲瞓呀 ~

11 點幾去到英記   都有唔少人食   我就真係好少食宵夜   應該係無食宵夜嘅習慣   因為食飽瞓覺   會頂住頂住好辛苦囉   同埋 11 點喇   瞓覺㗎喇   哈哈 ~

食下傾下都差唔多 12 點幾   要走喇   勁眼瞓 ~

家姐車埋糟糟番屋企就車我番屋企喇    估唔到里奧大人已經瞓咗 lu   咁我沖涼嘅時候   無啦啦開門同我講 "番咗嚟喇"   之後就出番去   嚇死人咩 ~

等埋家姐 Whatsapp 我到屋企   抖多陣就瞓喇   吹完頭熱辣辣瞓唔到   所以 1 點幾先瞓   勁夜囉 ~

大快活 @ 九龍灣 ( 23-OCT-2014 )

( 23-OCT-2014  THU )

今朝 8 點半比電話嘈醒咗   原來係打錯   咁之後都瞓唔番 lu   但就懶床到 9 點先起身呢 ~

落去 KFC 食早餐   點知想落雨咁   所以都係買番屋企食算喇 ~

食完抖陣就沖涼   之後寫 Blog ~

又唔太餓   所以 2 點先食嘢   抖陣就落去商場行下喇 ~

行咗半個鐘   番到屋企都已經 3 點 15 分   抖陣就睇聖經   睇咗半個鐘就休息下 ~

里奧大人 5 點半喺大陸上車   8 點番到九龍灣   本來想去太興食   不過我得好少選擇   諗住去越棧食湯檬   但又唔知咩湯底   所以最後都好番大快活食嘢 lu ~

食完就番屋企喇   其實想行下   不過里奧大人個背囊好重   所以我都係唔行喇   我想同佢一齊多啲   嘻嘻 ~

沖涼抖陣   睇下電視又打下機   都 11 點幾喇   要瞓喇 ~

燻蹄 (外賣) + 蒜蓉蒸節瓜 ( 22-OCT-2014 )

( 22-OCT-2014  WED )

今朝未夠 9 點就醒   所以出去食早餐喇 ~

行下商場   再去買寧買嘢就番屋企喇 ~

沖完涼就開始睇飲食男女   我想快啲睇哂   因為好多未睇 ~

1 點幾食 Lunch   之後又繼續睇飲食男女   睇到好鬼攰   3 點半頂唔順瞓鬼咗   不過都係瞓到 4 點   之後里奧大人打嚟話去葵興見客   仲以為佢話見完客放工添   哈哈 ~

抖陣就落去買燻蹄同麵包   之後再睇飲食男女   不過睇咗 1 本咋   成日睇真係好攰   但仲有幾本未睇   留番聽日睇 ~

依家媽咪勁搞笑   次次收線之前實會講句 " 有咩事記得話我知呀"   呢句說話不嬲都係我講家嘛   依家由媽咪講   不過今晚勁感恩呀   就係我諗緊買唔買蕃薯   點知媽咪問我要唔要   我梗要啦   因為想平日晏晝食呀   就咁蒸勁方便   無計啦   懶呀嘛 ~

里奧大人 6 點 45 分先見完客   咁我都要預備晚餐喇 ~

是日懶餐 - 燻蹄 (外賣) + 蒜蓉蒸節瓜

燻蹄 (外賣) - 又係買 $40   食唔哂就留番聽日 Lunch   唔錯呀 ~

蒜蓉蒸節瓜 - 之前買咗 3 個節瓜   想快啲食哂去呀 ~

里奧大人成日話佢洗碗   不過我自己洗到就唔駛佢洗囉 ~

搞掂哂就沖涼   睇埋電視   再睇 "急診男女"   好似幾好笑咁   好在我又唔會追劇   所以又係準時 11 點幾瞓喇 ~

大快活 @ 九龍灣 ( 21-OCT-2014 )

( 21-OCT-2014  TUE )

今朝 9 點半起身   喺屋企蒸鏝頭 + 玄米茶做早餐   幾咁清呀 ~

今日開始食鐵丸同葉酸喇   希望之後記得食啦 ~

抖陣就沖涼洗頭   雖然無出街   但都係習慣沖涼洗頭   好似醒神啲咁 ~

隻手仲瘀瘀青青

1 點幾食 Lunch  係自己煲嘅蕃茄薯仔排骨湯   我覺得好勁呀   因為同之前出院真係天同地   今次康復程度好好   因為行到同郁到嘛   但家務就真係唔敢做住喇   只係掃下地咁囉 ~

食完抖陣就去太興買現金券   之後去商場同百佳   真係勁想買嘢   但其實又唔知買嚟做咩   所以我同里奧大人講   落街唔好帶銀包就最好   呵呵 ~

番到屋企抖陣就打機   打到眼都盲   真係唔可以咁沉迷呢 ~

里奧大人 7 點打嚟話放工   我話想食飯   所以又去大快活   同埋最緊要係夠近又唔多人   好鬼驚啲人亂衝亂撞整到我傷口呀 ~

食埋最後一次嘅抗生素同止痛藥


好喇   又係抖陣就沖涼   睇下電視   又係 11 點幾瞓 lu ~

Saizeriya @ 九龍灣 ( 20-OCT-2014 )

煙三文魚凱撒沙律

帕馬火腿

蕃茄煙肉意大利粉

水牛芝士比薩

中華海草

( 20-OCT-2014  MON )

今朝媽咪 11 點打嚟   咁我哋都起身 lu   里奧大人請假倍我呀   驚我第一日有咩事喎 ~

起身即打電話去 Book 覆診時間   好感恩Bbook 到下星期一嘅 11 點半呢   唔駛咁早起身 ~

里奧大人仲話尋晚瞓得好好添   可能唔駛掛心啦 ~

都係覺得拎拐杖好啲   咁啲人睇到都會讓下妳   同埋唔會撞埋嚟    我覺得最好係我唔會彎毛蝦米咁就住傷口行囉   因為彎住嚟行呢   條腰骨痛之餘   傷口又痛喎 ~

去麻酸樂食早餐   食完就要走   真係唔坐得耐囉 ~

12 點幾佢去銀行整嘢   我就寫 Blog   呢期無咩記性   襯自己記得就好寫喇   比自己有個記錄   我覺得今次最勁係喺醫院影到相   睇番啲相覺得勁恐怖㗎   不過真係想比自己記錄囉 ~

3 點去食 Tea   再去街市買定幾日送   豬肉婆見到我咁   我又話做完手術   佢話唔怪得呢排唔見我喎   之後叫我唔好行   里奧大人話行下好啲   豬肉婆話行都唔好行街市啦   人咁多   寫張紙比里奧大人買咪得囉   我話佢都識邊檔   所以要帶佢嚟囉 ~

買完即番屋企喇   感恩天氣非常之舒服呀   因為我唔想開冷氣   覺得特別凍咁呀   不過如果有少少熱   我就會即開冷氣   我唔想有汗醃住個傷口囉 ~

今晚媽咪 5 點幾打比我   問我係咪唔記得打比佢 ?!   我真係唔記得打比佢噃   因為平時放工就會打比佢家嘛   依家都唔駛番工   所以真係唔記得囉   咁我順便講埋佢知   我做完手術   尋日出院   佢又好驚啦   把聲都變都實哂   佢又問我係咪搵上次醫生同我開刀   又問家姐知唔知   我話家姐一早知啦   所以成日叫我食牛肉補血補血補血 ~

其實本身諗住做手術前幾日同媽咪講   不過里奧大人話唔好講   因為知媽咪咩都驚一餐   一陣血壓高仲慘   又驚媽咪嚟探我頻樸   所以唔比佢知好過囉 ~

里奧大人做公司嘢   差唔多 7 點就落去食嘢喇   我勁想食 Prama Ham   所以去 Saizeriya   里奧大人唔想去㗎   不過知我唔想食飯   所以陪我食呢   佢話佢嚟醫院幾日   覺得好似肥咗   哈哈   鬼咩   食完無得郁   咁我食唔哂又要佢食埋   想唔肥都難咯 ~

食完行陣就番屋企喇   抖陣就沖涼   之後睇電視   我同里奧大人尋晚瞓得勁唔好呀   所以今晚 10 點幾就瞓喇 ~

出院 ( 19-OCT-2014 )

( 19-OCT-2014 SUN )

尋晚 12 點 45 分醒咗喇   熱到成條頸都濕哂   之後去廁所啦   一出嚟又覺得勁凍   想點呀   哈哈 ~

都係 7 點起身   今朝 8 點先食早餐再食藥   之後等霍醫生嚟喇 ~

芝腿治 + 熱華田   我成日覺得病人先飲華田呢   哈哈

霍醫生 10 點半巡房   話我可以出院喇   幫我換埋防水膠布   再叫我小心身體   唔想再幫我做第 3 次手術呢   之後等佢寫埋醫生紙再等拎藥就走得 ~

里奧大人 11 點到   我仲諗住好快走得   點知 12 點幾先搞掂   最緊要係 1 點前 Check-out   如果 1  點後就當從新一日計㗎喇 ~

呢個袋裝咗日用品 + 3 盒糖 + 3 件睡衣 + 3 件褸 + 1 件披肩 + 1 個暖杯 + 1 把風扇仔 + 1 本聖經   不過大部份嘢都無用過   哈哈   辛苦了里奧大人呢

我出院瘦咗啲嘛   里奧大人聽錯咗   以為我話肥咗   笑得幾開心呀   黐線咩   應該無咩人會肥咗出院囉 ~

打的走喇   勁開心   因為里奧大人唔駛再頻頻樸樸嘛 ~

番到屋企真係唔敢做嘢呀   反而里奧大人就不停做屋企嘢   開機洗衫   熨衫換床單   尋晚仲煲定水添   勁好啦   之後我話係咪好忙呢   我平時就係咁㗎喇   佢話唔忙喎   真係一啲都唔忙囉   又唔辛苦   衰 ~

抖陣就沖涼啦   超勁舒服   真係好鍾意沖完涼洗完頭   乾乾淨淨嘅感覺 ~

2 點幾去大快活食嘢   食我最唔鍾意嘅叉燒飯   我依家只可以食豬肉同飯   我要有啲米氣嘛   但次次食一半就好飽   要回一回氣先再食 ~

真係勁迷你囉

行去百佳買乳酪   不過無大盒 Size   所以今晚先去 Piago 買 ~

今次食得行得   好感恩好感恩呀 ~

6 點幾出門口   見到隔離單位嘅會計哥哥   佢見我按住肚又拎拐杖好愕然   我話做完手術呀   之後佢話佢去咗九洲工幹   係都要比 3 包薯條我   話好好食   好搞笑呀   唔通知我為食 ?!  

我初初睇到包裝以為係人參呀   哈哈

行呀行   去到地鐵站見到家庭醫生嘅姑娘   又好驚訝問我咩事   叫我小心保重身體喇 ~

途經商場又見到牧師   不過佢講緊電話   唔知我望到佢呢   出一出街見到咁多人   世界真係細呀 ~

 
去大快活食嘢   不過依家食完就想走   因為坐得耐呢   一起身個傷口會扯住   要行一陣先鬆番囉   所以我依家鍾意行多過食   勁唔似我囉 ~    

好似哨牙嘅豬軟骨

去 Piago 買乳酪   里奧大人見到 Pasco  $13 有 5 個包仔又話買嚟食   之後去買乳酪啦   我指比里奧大人睇話 475g 只係 $23   抵過細細杯要 $9 啦   咁我其實想買另一隻牌字   因為我想要更加大盒嘅   咁買完嘢   佢睇張單   問我知唔知盒乳酪要 $74 ?!   我話知呀  食開家嘛   之後佢話我指就指住 $24 話平   但買就買 $74 果嗰   好似啲奸商咁   哈哈 ~

買完就番屋企喇   里奧大人話我今次好勁   可以行咁耐   事實真係呀   我都估唔到可以行咁耐   不過我都話過   出院之後要做運動   做唔到都要行下   要血氣運行呀 ~

沖完涼就抖喇   睇下電視   11 點幾都瞓 lu ~

入院 ( 15-OCT-2014 ) + ( 16-OCT-2014 ) + ( 17-OCT-2014 ) + ( 18-OCT-2014 )

( 15-OCT-2014  WED )

今朝 8 點 45 分起身喇   去太興食餐蛋麵早餐   咁就可以頂好耐呢   不過我覺得次次食完   成個口腔都唔知點咁   應該係勁多味精呢 ~

食完就番屋企沖涼洗頭   又 Double Check 入院啲嘢   差唔多 9 點半出發   好在打的唔塞車咋   因為我之前啲同事話去九龍塘方向都好塞車囉 ~

未到 10 點就到醫院 Check-in 喇   登記嘅姑娘好靚女呀   哈哈 ~

今次勁呀   我一早計劃好   今次咩都要影相   里奧大人以為我講笑呀   不過影到相即係我身體 OK 啦   唔係點會有 Mood 影喎   係咪先 ~

入院登記處

另一邊係拎藥嘅

等上房

悶起上嚟真係拎嚟睇㗎   哈哈

搞掂哂就上房再 Check 嘢   之後驗尿抽血   差唔多 10 點半先搞掂呢 ~

輸血程序

今次都係住大房   諗住係 6 人房   點知係 3 人房   勁感恩呀   因為無咁嘈嘛 ~

望多幾眼先


最入個床位已經有人住緊   之後隔離床都有人住 lu   今晚唔駛咁驚   呵呵

瞓住睇電視都唔錯呀   關機時間係 12am - 7am

有衣櫃有雪櫃   唔錯喎   勁似酒店

廁所都好乾淨㗎   一日清潔幾次   最正係之後得我一個人住   變咗私家廁所呀

凍 / 熱水   阿姐好好人呀   有晚里奧大人話唔駛換熱水   阿姐話換啦   擺咗成晚唔熱㗎喇 

之後我問姑娘係咪因為裝修咗   所以大房變咗係 3 人房 ?!   原來佢話大房係有 12 入房同 6 人房架   不過 Full 哂   所以比婦產科嘅房比我   哈哈哈哈   係生完仔瞓嘅房嚟㗎   不過我開刀都似生完仔咁囉   仲要係大頭嗰隻   呵呵 ~

我問姑娘探訪時間   佢話 7:30am - 10pm   哈哈哈哈   仲唔係產科   上次我住一般病房   探訪時間係 10am - 10pm 呢

好喇   其實開始有啲驚喇   不過驚還驚   我第一件事係拎本 Menu 出嚟睇有咩嘢食   里奧大人話我睇咩鬼啫   又食唔到   咁我話可以幫佢落定 Order 嘛   咁一嚟到就可以食到嘢嘛   唔係唔知我出名細心呀嘛 ~

Menu 一定要睇㗎   真係睇手術同意書都無咁認真逐樣睇呀   哈哈哈哈

袋仔入面有個鎖   同埋有對 Ear Phone for 睇電視

估唔到有睡裙同夾棉綿褸   條睡裙勁舒服㗎   里奧大人知我勁鍾意   出院嗰時問阿姐有無得買 ?!   阿姐個樣好愕然   話應該無得買   哈哈哈哈   咁又係   無咩人會買醫院用嘅嘢嘅 

呢對襪係做手術時包住對腳   有保暖作用   因為手術室好凍呢

彈性襪   做手術前要着定㗎喇   但勁熱囉   不過唔着唔得   因為驚做完手術之後   對腳無得郁   血液唔循環   所以一定要着   直到醫生話唔駛着為止

里奧大人幫我帶咗薄褸 / 有帽厚褸 / 風褸 / 大披肩   不過最後一件都無着過   哈哈

里奧大人爭取時間做 Power Point   咁我做完手術就可以全程照顧我   Love U

知道自己幾日無得沖涼   所以再沖涼洗頭一次   乾乾淨淨最舒服 ~

無耐有院牧嚟同我傾偈   傾咗差唔多 15 分鐘   之後為我禱告   我又無咁驚   哈哈 ~

2 姑奶同 4 姑奶都12 點到喇   同我按手禱告   佢哋知我入院已經話要嚟探我   不過我話唔駛啦   我驚到時佢哋嚟到   我瞓緊覺   所以我叫個個都唔好嚟   等我休養好再出嚟食飯仲好   起碼有精神嘛 ~   

坐咗陣就一齊落 Canteen 食嘢   但原來 12 點半 - 1 點半只 For 員工 lunch   訪客無得坐喺 Canteen 食   咁唯有上房叫 Order 囉   佢哋食楊洲炒飯同干炒牛河   姑娘話佢哋好殘忍   咁嚟引我   所以我點都要聞一聞   索兩索啲嘢食   當自己食過啦   哈哈 ~

今次仍都係搵霍醫生同我開刀   佢手勢好   傷口唔太痛   同埋我覺得佢好 Nice   講嘢又好 Firm  比到我信心囉   對病人嚟講好緊要嘛 ~

因為霍醫生今日全日喺醫院   所以啲姑娘同我講可能 3 點鐘左右可以做手術   咁都好喎  早個半鐘   咁里奧大人可以早啲番屋企休息 ~    

1 點幾要換定衫   今次仲要着埋彈性襪   但上次都無咁嘅   有啲驚添 ~

咁快換定衫   咁睇嚟真係可以早啲做㗎喇 ~

差唔多 2 點半   5 姑奶都到咗   佢係特登嚟為我按手禱告呢 ~

傾多陣偈   3 點就去手術室喇   我開始忍唔住喊   老實講   我好驚會死呀   所以瞓喺張手術床係咁喊   喊到成臉眼淚   但又驚里奧大人睇到喎   但其實好辛苦囉   因為抹唔到眼淚   哈哈 ~

God Bless me  AMEN

不過原來里奧大人其實係全程望住我   嚇到佢呢   佢無諗過我會喊呀   因為以我性格   要喊一早喊咗嘛   佢全程喺我視線範圍之內   好溫柔咁幫我抹眼淚   又係咁話傻豬嚟嘅   駛咩驚呀   主與我同在   姑娘又叫我唔駛驚呢   咁聽佢講完仲喊得犀利   因為我好驚再見唔到里奧大人同屋企人呀 ~

入去喇

喊到入手術室   姑娘都要比紙巾我抹眼淚   哈哈 ~

我望到個鐘係 3 點 15 分   之後麻醉科呂醫生嚟咗   一嚟到就話咁曳呀   我知醫生係話個瘤咁曳   所以即刻話係啦   姑娘一頭霧水   之後先知我哋講緊係個瘤   哈哈   咁醫生睇啲 Report   無啦啦擰哂頭好凝重咁話 7.9   但我又無問咩喎   我估係貧血啩 ~

我之前同同事講   話我貧血要輸血   咁佢話貧血做手術係比較危險   所以我今次做手術咪特別驚囉 ~

無耐霍醫生嚟咗   同我講話我貧血   我都同呂醫生講   都知妳第一句會同我講貧血呢   咁之前呂醫生都配定 2 包血比我㗎喇 ~ 

3 點 45 分轉手術床喇   勁勁勁驚種豆   之後再聽到霍醫生把聲   呂醫生就開始幫我打麻醉藥   之後有啲攰   不過又唔係昏迷咁   再吸咗 4 啖氣   就瞓鬼着 lu ~

手術 5 點 45 分完成   因為我濛濛查查都睇到個鐘   都做咗差唔多 2 個鐘   不過傷口超級勁痛呀  要落止痛藥   所以唔出得去住 ~

今次唔係打支勁止痛針   係落藥喺包鹽水度   止痛比較慢啲   咁落 1 次要勁大力深呼吸幾次   次次深咗 1 次呼吸就瞓咗   無計啦   麻醉藥未過嘛   之後再落多 2 次止痛藥   但仲喺痛   姑娘話已經落咗 3 次 5g 唔知咩咩   唔可以再落   咁之後都開始無咁痛   我一開眼望到已經 6 點 15 分啦   好想快啲出去見里奧大人呀 ~

入到病房先過床   之後我問番里奧大人我係咪出嚟先過床 ?!   佢話係呀   仲聽到啲姑娘話好重好重   唔該叫多 4 個姑娘入嚟幫手過床   哈哈哈哈   勁衰呀佢 ~

里奧大人 5 點 45 分喺手術室出面等   等到 6 點 10 分頂唔順要上番病房等我   因為好凍呀   佢話估唔到佢上房無耐   我就上到病房   無錯   我一世都會跟住佢呢   哈哈 ~

估唔到 5 姑奶等埋我出嚟先走   佢坐多陣   我都叫佢走喇   唔想阻住佢嘛 ~

上次我一出手術室   已經輸緊血   今次唔見包血   仲以為唔駛   不過之後霍醫生話要輸 2 包血 ~

姑娘話我唔知咩咩   應該好難咩咩   濛濛瀧瀧都唔知佢講咩   但記得佢話我啲血管唔算幼   但插咗支針落去呢   支針就彎咗   要插多次   救命 ~

我叫里奧大人幫我影相   今次入院勁寫實   哈哈

左 1 包   右 1 包   姑娘要我用鼻吸氣   口呼氣   仲要連續幾次   咁啲血先落到去   我唔係唔想咁做   但真係無氣咁做囉   嗚嗚

一輸血呢   姑娘就會每半個鐘頭同我量血壓探熱   叫我抖大氣 ~

每半個鐘頭就量一次血壓同探熱   第 1 次量血壓係好高   所以要隔一陣再量   但上壓仍然係 14x 

姑娘話我對眼好腫   驚我唔知係咪對藥物敏感   但我話做手術前喊過嚟呀   所以對眼腫囉   之後又話我血壓好高   心跳好快   又會咁嘅 ~

之後我都瞓下醒下   因為里奧大人陪緊我嘛    叫佢快啲食嘢快啲走呀   聽日仲要番工嘛   但佢係都要 10 點先走 ~

雖然麻醉藥未過   不過我堅持等埋佢番屋企之後 Line 我平安回家   我先瞓㗎 ~

( 16-OCT-2014  THU )

其實係超勁攰   不過半個鐘就有姑娘嚟量血壓同探熱   所以我都瞓得唔太好   終於朝早 4 點半之後   唔駛再半個鐘頭嚟呢 ~  

7 點起身   有姑娘幫我抹身   勁正呀   大大張暖嘅濕紙巾全身抹哂   乾淨好多呀 ~

雖然唔駛輸血   但要落抗生素囉   都好痛㗎   因為要用鹽水洗完針口先落抗生素   之後再用鹽水洗番   都成 10 秒㗎   所以次次落完隻手都痛   無哂心機呢

右手仍然吊鹽水   所以我要食多啲嘢   仲要唔可以嘔   咁就可以唔駛吊㗎喇   其實隻手都腫腫哋   同埋有啲痛囉

白粥   姑娘幫我叫啲粥要杰啲   真係勁細心   不過我食咗 1/3 碗就唔想食   頂住頂住咁

之後食藥   霍醫生 8 點嚟巡房   佢話我血色素仲係低   做手術前驗血得 7.9   正常係 11.5   所以又要我輸多包血   嗚嗚   即係又無得好好哋瞓咯 ~

醫生仲比咗張瘤嘅相我睇   個瘤成 10cm 呀   所以今次出院之後   真係要食清啲   同埋多做運動喇   真係好驚囉 ~ 

再輸 1 包血   嗚嗚  

隔離 2 個人出咗院喇   今晚得我一個人   勁驚囉   因為姑娘會關哂對木門

幫我輸血個姑娘話我食咗 2 包紅豆沙   臉色都好咗喎   哈哈 ~

因為兩隻手都種豆   所以我其實都唔係點敢郁   驚論論盡盡扯甩咗呀   咁我又插尿喉   無啦啦好急尿又去唔到   勁驚囉   之後即 Call 姑娘   原來自己壓住咗   唉 ~

今次唔駛插條 Tube 放血真係好感恩   因為上次醫生幫我拆條喉嘅時候勁痛呀   今次由佢自然洗出嚟   咁都好啲 ~

問姑娘幾時可以幫我拆豆   佢話食到嘢而又唔嘔就可以拆㗎喇 ~

估唔到要食抗生素   因為我都打緊抗生素囉   但消炎藥就一定要食   我話唔痛   姑娘都要我食   不過都啱嘅   唔通痛先食咩   同埋始終有傷口嘛 ~

12 點幾即叫嘢食   勁㗎喇   有胃口食嘢   不過都係食瘦肉粥   我唔想留多日醫院呀   我要番屋企呀 ~

3 點幾姑娘幫我拆尿喉   勁開心啦   可以郁下嘛 ~

睇下電視又瞓下   7 點幾終於可以拆豆喇   勁開心   因為隻手成日就住就住好鬼攰呢 ~

里奧大人 8 點嚟到   無耐家姐同糟糟都嚟埋   糟糟 8 點半走喇   佢趕住番屋企食飯呀   之後就到里奧大人同家姐開餐 ~ 

我嘅病人餐

里奧大人同家姐 Share 星洲炒米

干炒牛河

一齊傾下偈   咁我唔想家姐 10 點先走嘛   所以叫里奧大人同家姐 9 點半一齊打的走喇 ~

今晚間房得我一個人咋   都驚驚哋   開電視又只可以去到 12 點   想有啲聲陪住瞓都唔得   哈哈   所以我叫姑娘唔好熄燈呀   因為我好驚 ~

( 17-OCT-2014  FRI )

嘩   尋晚一個鐘醒一次呀   咁開住燈槽瞓又熱喎   我瞓瞓下除咗對彈性襪都唔知呀   其實要醫生批准先可以除㗎 ~

又係 7 點起身啦   食早餐食藥   姑娘好奇怪問我    係咪醫生話可以除對彈性襪 ?!   我話尋晚太熱所以除咗   之後佢叫我同醫生講 ~  

霍醫生 8 點巡房   話我臉色好好多呀   星期日可以出院呢   又問我駛唔駛用腰封包住傷口 ?!   咁樣我轉身無咁辛苦   咁我都要啦   因為之前有姑娘問我要唔要腰封㗎喇   不過我唔記得同醫生講話除咗對襪添   因為我覺得問幾時出院緊要啲   哈哈 ~

食瘦肉粥   想有啲味呀

今日血壓同心跳都非常之好呀   因為姑娘話之前次次心跳都過百   勁呀 ~

呢幾日都係食行瞓   好感恩可以行到呀   因為上次真係痛到郁都郁唔到呢 ~

12 點幾 Order 肉餅飯   居然所有蒸飯賣哂   咁但係我只想食豬肉   咁叫咗豉椒排骨飯   其實驚辣   不過真係無其他選擇   我唔食得魚   牛同辣又唔食得   我又唔想食粥喎   不過好感恩   個豉椒排骨係無味   哈哈哈哈 ~

豉椒排骨飯勁難食   個汁無味   啲飯又腍

食完又行   行完又瞓   都好鬼悶   雖然有 Wifi   但又唔想打機   勁少何呢 ~

4 點幾無啦啦沾寒沾凍   又好鬼攰   勁驚發燒呀   即刻叫姑娘幫我探熱   一邊耳 37.9   一邊耳 37.7   咁其實係無燒嘅   不過唔理喇   食咗消炎藥先   之後一瞓瞓到 7 點幾呀 ~

里奧大人 7 點半放工即打比我   佢話仲以為係 7 點添   所以嚇到佢即走   佢又以為家姐陪我   我話無呀   佢話唔好意思要我孤零零   駛唔駛講到我咁慘呀   哈哈   反正今日我都唔舒服   都無咩 Mood ~

佢一上車   我就落 Order 晚餐   咁佢一嚟到就有得食呢   今晚佢食蟹籽三文魚炒飯   我就食公司三文治走蛋   仲以為係即烘   點知係凍冰冰嘅   即係整定哂   喺雪櫃拎出嚟咁囉 ~

見里奧大人咁辛苦樸嚟睇我   真係睇見都心痛   所以我出院之後   我唔食咁多零食   唔食刺激嘢   同埋一定要做運動    血氣運行   真係身體都好啲   同埋霍醫生都要我食完一定要行陣   可能佢都覺得我需要減肥呀   哈哈 ~  

等里奧大人食完抖陣   我叫佢幫我沖身呀   我勁想洗頭嘛   不過太夜都係唔好喇 ~

里奧大人 10 點走喇   佢仲要番屋企洗衫   因為佢知我一番到屋企就想洗衫做家務呢   所以佢要做哂先   嘻嘻 ~

今晚熄燈槽瞓喇   唔想熱醒 ~

( 18-OCT-2014  SAT )

今朝早 5 點半就量血壓   又會咁早嘅   咁 7 點都要食藥   不過懶床都 8 點先刷牙   霍醫生 8 點半巡房   話傷口都好好 ~

之後食完早餐   睇下電視又瞓咗 ~

皮蛋瘦肉粥   今次差唔多食哂

千奇百趣之大咀鳥藥丸   佢放低嘅時候係咁㗎   之後我即 Whatsapp 比家姐睇   佢又比埋工人睇   之後同工人講   我應該係好悶定喇   哈哈哈哈

10 點聽到有人關門   之後無理   一開眼見到家姐踎低   以為佢嚇我   原來佢話想將電話教靜音   哈哈 ~

家姐頭先已經係咁問我想食咩 ?!   問咗幾百次   不過我真係無咩想食   之後佢問工人   唔知買咩比我食好   佢工人話買夾糖吖   因為上次家姐買咗包一大包夾糖比我   家姐工人都對我好好㗎   會記得我食咩   嘻嘻 ~

里奧大人同大姑奶 11 點幾到   大姑奶之前成日要探我   又話要煮嘢比我食   不過我唔想啦   驚自己無胃口食唔落   嘥咗人哋心機嘛 ~

同埋原來里奧大人話忍唔住同佢講咗   上次佢煮啲嘢好污糟   所以今次真係唔好煮   唔係肚屙好麻煩啦   始終有傷口嘛 ~

12 點姑娘幫我打支貴針   完全唔痛   勁勁勁勁好手勢 ~

諗住一齊落去食嘢   不過 Canteen 12 點半就只 For 員工 Lunch   咁我同家姐話 12 點半唔比人食嘢㗎   家姐個樣好驚訝   問點解醫院唔 12 點半唔比人食嘢 ?!   之後里奧大人一路笑一路講話係 12 點半 Canteen 只係比員工 Lunch   訪客無得留喺 Canteen 入面食   唔係唔比人食嘢   係我講嘢唔清唔楚咋   之後我自己都笑到傷口痛呢 ~

12 點半叫餐   大姑奶唔餓呀   所以都走咯   最搞笑啲食物嚟到   姑娘望一望啲嘢食   個樣嚇一嚇咁呀   哈哈   可能成枱都係嘢 ~

家姐真係超級勁錫我   因為我話想食蒸飯   但之前 Order 話買哂   佢話叫嘅時候勁緊張呀   個心不斷話有蒸飯有蒸飯有蒸飯   知我勁想食嘛   哈哈 ~

我同家姐講話妳哋可以叫什扒   家姐居然話又唔係鐵板上   咪玩啦 ~ 

瑤柱北菇肉餅飯 - 勁好味呀   熱辣辣   啲飯又一粒粒   我差唔多食哂呀

辣茄醬鮮菌天使麵   家姐話辣辣哋好味   里奧大人都話食咁多樣嘢   得呢樣最有味   哈哈

煙三文魚凱撒沙律

同家姐講開   呢間應該係媽咪房   因為每朝 8 點   中午 12 點同 4 點   夜晚 8 點就會有廣播 "各位媽咪   距離餵奶時間仲有 10 分鐘   請各位媽咪洗手"   原來家姐同里奧大人都有留意   所以真係好肯定呢間係媽咪房   初初都覺得奇㗎喇   點解會有本 "共享育兒樂"   心諗   就算悶都唔會睇呢啲書啦   哈哈   依家終於真相大白咯 ~

家姐 2 點半走喇   里奧大人就做公司嘢   4 點半叫下下午茶   佢最鍾意食西多士   仲要係夾花生醬嗰隻 ~

因為仲未換防水膠布   所以仲未沖得涼   但可以洗頭喇   真係一千萬個舒服   里奧大人唔信   仲話我黐線 ~

呢排生理時鐘係食完抖陣就想瞓   所以里奧大人喺度   我都忍唔住瞓咗呢 ~

7 點幾落去 Canteen 食嘢   反正我行到   唔想屈住喺病房 ~

瑞士肉丸天使麵   個汁有少少辣   所以我食無咁多汁嗰啲   不過食幾啖之後就胃脹   勁辛苦   要企身行下先得   之後唔敢食 lu   唯有叫里奧大人食哂去啦   哈哈   佢全日無停過口咁呀

食完就上房喇   因為我要抹身 ~

里奧大人10 點走   我又係睇電視啦   12 點就瞓咯 ~