嘉華大酒樓 @ 官塘 ( 27-NOV-2014 )

薑蔥羔蟹仔 (2 隻)

脆奶京都骨

蒜蓉炒豆苗

玫瑰豉油雞 (半隻)


( 27-NOV-2014  THU )

又係 9 點起身   又係 KFC 食早餐   但估唔到又食唔厭喎 ~

食完早餐諗住打比媽咪   問佢要唔要東海堂啲蛋糕   但咁早打比佢   驚以為我咩事   點知無耐媽咪就打嚟   話今日都係唔去大家樂食 Tea   一陣去嘉豪飲茶喎   咁我順便問埋佢要唔要蛋糕   呵呵 ~

番到屋企沖涼   抖陣又去嘉豪攞位   依家多數拎本食譜去酒樓睇   咁唔駛咁悶嘛   同埋真係買咗好多食譜都無睇過   咁唔係咁好囉   睇定啲食譜   咁番工唔駛諗煮咩   都唔錯呢 ~

煎羅漢腐皮卷

星級點心拚盤

艇家蒸蘿蔔糕

干燒伊麵

孖 "邊" 好似鬼   哈哈

桂花紅豆糕

飲到 2 點   同媽咪一齊搭車番媽咪屋企   之後陪媽咪去百佳買埋嘢就番屋企喇 ~

睇緊電視   家姐打比媽咪   之後聽媽咪同家姐講話唔捨得我   所以呢排都會同我飲茶   我其實都係㗎   雖然我真係飲到驚   但好難得放假嘛   所以之後番到要自己一個人食   都覺得會有啲唔慣囉 ~      

話咁快就 6 點半   又出發去嘉華喇   家姐今晚 6 點 45 分就到喇   勁快 ~

家姐話想買蛋糕   咁佢突然醒起我整咗啲嘢比佢食   但佢唔知咩嚟㗎   因為我只係 Whatsapp 比佢睇   無講佢知係啲咩   咁呢   我有比媽咪家嘛   所以叫佢唔好同家姐講話係糯米糍   點知最後佢都講咗出嚟   不過佢唔係有心嘅   因為佢都聽到家姐話我整咗啲嘢比佢   媽咪話唔係蛋糕係糯米糍嚟㗎   當媽咪講話唔係蛋糕嘅時候   我已經 Hey Hey Hey 示意佢唔好繼續講   點知佢喺自己世界   仲要好完整咁一句講哂 "唔係蛋糕係糯米糍"   真係衰收尾   哈哈 ~ 

食完就番媽咪屋企拎湯   坐多陣   差唔多 8 點半就走 lu ~

里奧大人 8 點半先放工   我番到屋企都 9 點幾   之後佢都番埋嚟   咁我都沖涼 lu ~

我都好耐無食車仔麵喇   所以食番幾啖  

尋晚食剩咗碗炒飯嘛   咁聽日又係同媽咪飲茶   又無時間食   所以食埋去啦   食剩幾啖   真係食唔落喇   好在頭先同媽咪食飯   特登唔食飽呢 ~

出咗成日街   雖然都係坐同食   但其實都幾攰   哈哈   所以都係 11 點幾瞓啦 ~   

蒜蓉炒豆苗 + 煎鯧魚 + 肉碎菜粒炒飯 + 紫蕃薯奶皇糯米糍 ( 26-NOV-2014 )

其實條魚都好厚身   啖啖肉呢   唔錯唔錯

我覺得整得唔錯架真係   希望好食啦

里奧大人話 OK 喎   不過我無食   因為真係鬼飽

用 Cupcake 杯裝住   咁樣靚好多   因為係比媽咪同家姐食   唔好食都好睇嘛   哈哈

( 26-NOV-2014  WED )

9 點起身喇   食完早餐又 10 點 lu ~

番到屋企執下嘢   沖涼之後就抖陣   11 點幾去嘉豪   媽咪依家鍾意去嘉豪   因為順便去埋街市買餸   又買咗半斤豆苗 + 4 個橙 + 4 個 蘋果比我 ~

杏片沙律卷

艇家蒸蘿蔔糕

豬腳薑醋

燒肉切雞飯

紅棗糕拚黃金糕 - 好煙韌呀   紅棗糕好有紅棗味   唔錯唔錯

健康五糧糕 - 又係好煙韌   我最鍾意食煙韌嘢

我飽到好似佢咁嘔白泡   哈哈

以羅果子鹽嚟㗎   好記得果次去馬來西亞食到好滯好想嘔   阿表介紹飲以羅   飲完真係無咁滯   但香港無得買呢啲包裝囉   得一樽嗰啲   大佬   就算滯都飲唔到佢啦   唔通成日拎住樽嘢周圍去咩

飲到 2 點   諗住試整紫蕃薯奶皇糯米糍   咁去街市買紫蕃薯   之後諗住去恵康買糯米糍材料   點知只買到椰漿同椰絲   咁好啦   拎住袋生果都少少重   但又唔想番屋企擺低囉   行嚟行去不如拎埋去買嘢   去到 MP 諗住實有吉士粉啦   點知又無   咁買無鹽牛油同朱古力粉囉 ~   

咁唔忿氣嘛   去埋 Piago 睇都係無   去到又行陣   買咗支清靜園醋同麵包糠   咁都開始攰喇   快快趣去埋得寶間恵康都係無吉士粉   咁都係無   咁都入到去咯   又買盒好立克粉   真係每間都買啲嘢   叫做有啲收穫   咁就無枉過行咁遠咁啦   之後去對面烘焙店買到吉士粉喇   勁驚無呀   我記得百佳之前係有吉士粉買嘅   所以又去百佳睇下先   如果有得買   我會黐線囉   好在佢係無嘅   嘩哈哈   同埋諗諗下應該一早去惠康同烘焙店就算啦   唔駛行咁遠   哈哈 ~

最後去埋 7-11 買盒鮮奶就真係完全買齊哂糯米糍嘅材料喇 ~

4 點先番到屋企   有啲餓呀   食番尋晚剩嘅粥先   一路食一路睇食譜點整   食完粥就整糯米糍喇   整到差唔多 6 點呀   嗚   勁攰囉 ~

我叫里奧大人估下係咩   佢話係麵包   其實我都無心機搓   因為啲粉糰都仲濕濕地咁

抖都無抖就要煮飯啦   因為今晚係炒嘢同煎嘢   要好有心機同好多時間囉 ~

煮完哂嘢都 8 點   勁熱呀   所以沖涼先   咁里奧大人 8 點 15 分先放工   我唔等佢喇   自己食先   因為唔想咁夜先食   無時間消化 ~      

是日晚餐 - 蒜蓉炒豆苗 + 煎鯧魚 + 蒜蓉炒豆苗 + 肉碎菜粒炒飯

蒜蓉炒豆苗 - 媽咪買架又   今次半斤都好多喎   同埋唔老喎   唔錯唔錯 ~

煎鯧魚 - 媽咪買咗 1 條比我同家姐 Share   家姐要頭同尾   其他就比我呢   今次都係好有心機煎架   但唔知點解次次煎完   成屋都係煙   勁驚人哋以為火燭呀   哈哈 ~

肉碎菜粒炒飯 - 炒埋一大碟   好驚囉 ~

紫蕃薯奶皇糯米糍 - 整奶皇餡都好易   係整個皮先煩   因為 Recipe 嘅糯米粉份量都唔啱嘅   因為搓極啲蕃薯蓉都仲係仲濕囉   好在最後都完成   希望好食啦   哈哈 ~ 

今餐煮得太多   所以都留咗好多比里奧大人   如果佢自己每樣格嚟食   佢一定食剩啲菜   所以我整成碟比佢   迫佢食哂啲菜   今餐我同里奧大人都好盡力㗎喇   但都仲剩一大碗炒飯   咁留番比我聽日食埋啦   食完再同媽咪飲茶食少少嘢囉 ~

洗埋碗   10 點就休息喇   今日全身都攰呀   哈哈   所以11 點即瞓喇 ~

燜豬腩肉魷魚 + 菜心 + 皮蛋豬骨粥 + 馬蹄露 ( 25-NOV-2014 )

( 25-NOV-2014  TUE )

尋晚半夜熱醒   要開冷氣瞓呀 ~

8 點醒咗   所以開機洗衫   最後懶床到 8 點 45 分要起身喇   因為好餓呀   要去食早餐呢 ~

食完行陣就番屋企喇   沖埋涼   Load 埋啲相   11 點幾又出去嘉豪喇 ~

皮蛋叉燒酥 - 完全食唔到皮蛋囉

羅漢齋炒麵

南瓜西米露

飲到 2 點   去街市買菜   番到屋企就熨衫   抖陣就整糖水   咁都 5 點喇   要抖下 lu ~

食埋媽咪比我嘅芋頭同唔知咩薯   再抖到 6 點就煮飯喇 ~

里奧大人 7 點放工   咁我就食咗粥先   因為想食完即刻沖涼   今日都好熱下囉   咁等埋佢番嚟再食啲餸就算喇 ~

是日晚餐 - 燜豬腩肉魷魚 + 菜心 + 皮蛋豬骨粥 + 馬蹄露

燜豬腩肉魷魚 - 媽咪星期日整咗比我㗎喇   不過排到依家先食呢   但都食唔哂   所以將啲豬肉同魷魚切粒   留番聽晚炒飯   我用鉸剪剪㗎   勁有心機   但超勁攰囉   我鍾意用鉸剪剪嘅原因係唔駛洗針板同刀   懶得就懶喇 ~

菜心 - 留番啲菜 "kwan" 聽晚炒飯   因為我食完碗粥已經好飽好飽 ~ 

皮蛋豬骨粥 - 清埋隻鹹豬骨   咁一定係煲粥啦   落得太多米啦   仲剩番一碗   又要聽日食過 ~

馬蹄露 - 里奧大人話喉嚨唔多舒服   咁我見到有馬蹄就買嚟整糖水啦   同埋屋企又有包馬蹄粉好似下年到期   依家有 Mood 開嚟用啦   唔係又掉㗎喇   但今次加得太少冰糖   所以完成無甜味   所以叫里奧大人食哂啲馬蹄算喇 ~

搞掂哂都 9 點   要休息啦   仍然都係 11 點幾瞓 ~

鹹豬手茄汁扁意粉 + 當參紅棗百合黃鰂魚湯 ( 24-NOV-2014 )

( 24-NOV-2014  MON )

今朝 9 點都起身喇   但差唔多 9 點半先去食早餐 ~

諗住番屋企   點知家姐打嚟   企咗喺商場同佢傾咗半個鐘   佢真係好多嘢講   一陣飲茶講都嫌太遲咁   哈哈 ~

番到屋企都 10 點 45 分喇   沖埋涼   抖陣   11 點半出去嘉豪攞位喇 ~

媽咪同家姐 姐夫 12 點幾先到   飲到 2 點幾就走喇 ~   

星級點心拼盤 - 樣樣有啲都唔錯

香芹牛肉腸

XO 醬炒蘿蔔糕

沙薑大雞腳 - 同家姐次次飲茶   佢一見到鳳爪或者雞腳   就會問我食唔食   因為之前我成日都無啦啦想食嘛   同埋佢知里奧大人唔啜腳指   我一個人又食唔哂   咁家姐就會特登叫嚟陪我食呢

金牌四寶飯

湯灼菜心

車埋媽咪番屋企   我就跟車去家姐屋企擺低嘢   再車埋工人一齊去新都城 ~

今日有啲熱   不過我都鍾意有陽光多啲   因為難得依家晏晝可以周圍行嘛   哈哈 

我學車時最鍾意係行呢啲凹凸不平嘅路   咁先有揸車 Feel 嘛   "鄧"下"鄧"下包唔會眼瞓   好似啲越野車咁   哈哈   

工人就自己去買餸   我就同家姐 姐夫去銀行整嘢   整完就去買嘢食   不過姐夫話想飲凍檸茶   咁佢自己去大快活坐   我同家姐去買嘢食   之後去大快活 Join 番姐夫就走喇 ~

工人又唔記得帶電話喎   最慘家姐張八達通喺佢度   想開車走又唔得   不過姐夫話佢應該會喺車度等我哋   咁我哋去停車場啦   真係見到佢   好在佢都醒   識企喺車度等   唔係真係唔知等到幾時 ~

去埋家姐屋企拎番啲嘢就走喇   家姐車我番屋企   佢今日車嚟車去都幾辛苦   哈哈 ~

幫埋家姐去銀行入票就番屋企喇   都已經 5 點   話咁快就過咗一日 ~   

買咗芒果乾 + 蜜汁豬肉乾 + 豬肉鬆 + 糖 

家姐買比我啲手信   極力推介三星蔥牛舌餅   因為佢唔食蔥都覺得好味   因為無蔥味   哈哈

脆豬肉紙 + 蜜汁豬肉乾 - 我都唔記得叫咗家姐買豬肉乾添   咁之得頭先唔買啦   家姐仲話以為里奧大人真係鍾意食得咁緊要   所以由得我買   哈哈

我咩都要啲   依家真係唔會嘥嘢   格言真係少食多滋味    李儀太陽餅真係唔錯喎   我之前公司嘅老闆成日買太陽餅比我哋食   食到好驚   同埋佢買嗰啲口感似老婆餅   但李儀就好鬆化㗎喎   口感完全唔同

原味黑糖 - 同家姐講話要黑糖   但就唔要薑味嗰啲   不過佢就買咗黑糖薑茶   又比幾粒我咁啦   咁家姐拎比我嘅時候   姐夫話為咗呢包黑糖由山頭跑到山尾   係都要買到   聽完勁心痛啦我   我一早講話無就算   唔好特登搵   買佢自己鍾意嘅嘢好過   不過都知佢一定點都會買比我㗎喇   下次想要啲咩都真係唔同佢講好喇

家姐話糖村鳥結糖好出名同好好食   咁我又無咩好大興趣   我話要 2 粒試下就算   咁家姐又比咗 6 粒我喎   話焦糖好好味   成 HK$7 一粒   我覺得好貴啦 

6 點半開始煮嘢喇   想快啲食完快啲休息   咁 7 點已經食得   諗住自己食先   點知里奧大人打嚟話放工   咁等埋佢一齊食囉   咁我都沖涼先喇 ~

是日懶餐 - 鹹豬手茄汁扁意粉 + 當參紅棗百合黃鰂魚湯  

鹹豬手茄汁扁意粉 -  啲鹹豬手係星期六食剩㗎   終於今晚清哂  依家我真係唔嘥嘢㗎 ~

當參紅棗百合黃鰂魚湯 - 媽咪煲㗎   媽咪話喺我番工前飲多啲湯   唔係番工之後就只係每星期一次湯水喎 ~ 

搞掂哂都差唔多 9 點   食埋生果   真係坐低休息喇   今日好似好頻樸咁   里奧大人話我今日無事忙喎   但我話家姐放假   咪陪下佢囉   反正我一個人係屋企之嘛 ~

等里奧大人沖完涼就睇電視   11 點瞓喇   依家想 11 點就瞓   咁之後 7 點半起身都可以瞓到 8 個半鐘嘛 ~