蒜蓉炒豆苗 + 煎鯧魚 + 肉碎菜粒炒飯 + 紫蕃薯奶皇糯米糍 ( 26-NOV-2014 )

其實條魚都好厚身架   啖啖肉呢   唔錯唔錯

我呢個炒飯   勁過銀咖哩嘅富士山飯啦   自己見到都驚   哈

我覺得整得唔錯架真係   希望好食啦

里奧大人話 ok 喎   不過我無食   因為真係鬼飽

用 cupcake 杯裝住   咁樣靚好多   因為係比媽咪同家姐食架   唔好食都好睇嘛   哈

( 26-NOV-2014  WED )

9 點起身喇   食完早餐又 10 點 lu ~

番到屋企執下嘢   沖涼之後就抖陣   11 點幾去嘉豪   媽咪依家鍾意去嘉豪   因為順便去埋街市買餸   又買咗半斤豆苗 + 4 個橙 + 4 個 蘋果比我 ~

杏片沙律卷

艇家蒸蘿蔔糕

豬腳薑醋

燒肉切雞飯

紅棗糕拚黃金糕 - 好煙韌呀   紅棗糕好有紅棗味   唔錯唔錯

健康五糧糕 - 又係好煙韌架   我最鍾意食煙韌呢

我飽到好似佢咁嘔白泡   嘩哈哈

以羅果子鹽黎架   好記得果次去馬來西亞食到好滯好想嘔   阿表介紹飲以羅   飲完真係無咁滯   但香港無得買呢 d 包裝囉   得一樽果 d 囉   大佬   就算滯都飲唔到佢啦   唔通成日拎住樽嘢周圍去咩

飲到 2 點   諗住試整紫蕃薯奶皇糯米糍   咁去街市買紫蕃薯   之後諗住去恵康買糯米糍材料   點知只買到椰漿同椰絲   咁好啦   拎住袋生果都小小重   但又唔想番屋企擺低囉   行黎行去不如拎埋去買嘢   去到 MP 諗住實有吉士粉啦   點知又無   咁買無鹽牛油同朱古力粉囉 ~   

咁唔忿氣嘛   去埋 Piago 睇都係無   去到又行陣   買咗支清靜園醋同麵包糠   咁都開始攰喇   快快趣去埋得寶間恵康都係無吉士粉   咁都係無   咁都入到去咯   又買盒好立克粉   真係每間都買 d 嘢   叫做有 d 收穫   咁就無枉過行咁遠咁啦   之後去對面烘焙店買到吉士粉喇   勁驚無呀   我記得百佳之前係有吉士粉買嘅   所以又去百佳睇下先   如果有得買   我會痴線囉   好在佢係無嘅   嘩哈哈   同埋諗諗下應該一早去惠康同烘焙店就算啦   唔駛行咁遠   哈 ~

最後去埋 7-11 買盒鮮奶就真係完全買齊哂糯米糍嘅材料喇   yeah ~~~~

4 點先番到屋企   有 d 餓呀   食番尋晚剩嘅粥先   一路食一路睇食譜點整   食完粥就整糯米糍喇   整到差唔多 6 點呀   嗚   勁攰囉 ~

我叫里奧大人估下係咩   佢話係麵包   其實我都無心機搓   因為 d 粉糰都仲濕濕地咁

抖都無抖就要煮飯啦   因為今晚係炒嘢同煎嘢   要好有心機同好多時間囉 ~

煮完哂嘢都 8 點   勁熱呀   所以沖涼先   咁里奧大人 8 點 15 分先放工   我唔等佢喇   自己食先   因為唔想咁夜先食   無時間消化 ~      

是日晚餐 - 蒜蓉炒豆苗 + 煎鯧魚 + 蒜蓉炒豆苗 + 肉碎菜粒炒飯

蒜蓉炒豆苗 - 媽咪買架又   今次半斤都好多喎   同埋唔老喎   唔錯唔錯 ~

煎鯧魚 - 媽咪買咗 1 條比我同家姐 share   家姐要頭同尾   其他就比我呢   今次都係好有心機煎架   但唔知點解次次煎完   成屋都係煙   勁驚人地以為火燭呀   哈 ~

肉碎菜粒炒飯 - 炒埋一大碟   好驚囉 ~

紫蕃薯奶皇糯米糍 - 整奶皇餡都好易   係整個皮先煩   因為 recipe 嘅糯米粉份量都唔啱嘅   因為搓極 d 蕃薯蓉都仲係仲濕囉   好在最後都完成   希望好食啦   哈 ~ 

今餐煮得太多   所以都留咗好多比里奧大人   如果佢自己每樣夾黎食   佢一定食剩 d 菜   所以我整成碟比佢   迫佢食哂 d 菜   今餐我同里奧大人都好盡力架喇   但都仲剩一大碗炒飯   咁留番比我聽日食埋啦   食完再同媽咪飲茶食小小嘢囉 ~

洗埋碗   10 點就休息喇   今日全身都攰呀   哈   所以11 點即瞓喇 ~