鹹豬手茄汁扁意粉 + 當參紅棗百合黃鰂魚湯 ( 24-NOV-2014 )

( 24-NOV-2014  MON )

今朝 9 點都起身喇   meme 摩摩   差唔多 9 點半先去食早餐 ~

諗住番屋企   點知家姐打黎   企咗喺商場同佢傾咗半個鐘   佢真係好多嘢講   一陣飲茶講都嫌太遲咁   哈哈 ~

番到屋企都 10 點 45 分喇   沖埋涼   抖陣   11 點半出去嘉豪攞位喇 ~

媽咪同家姐 姐夫 12 點幾先到   飲到 2 點幾就走喇 ~   

星級點心拼盤 - 樣樣有啲都唔錯

香芹牛肉腸

XO 醬炒蘿蔔糕

沙薑大雞腳 - 同家姐次次飲茶   佢一見到鳳爪或者雞腳   就會問我食唔食   因為之前我成日都無啦啦想食嘛   同埋佢知里奧大人唔啜腳指   我一個人又食唔哂   咁家姐就會特登叫黎陪我食呢

金牌四寶飯

湯灼菜心

車埋媽咪番屋企   我就跟車去家姐屋企擺低嘢   再車埋工人一齊去新都城 ~

今日有啲熱   不過我都鍾意有陽光多啲   因為難得依家晏晝可以周圍行嘛   哈 

我學車時最鍾意係行呢啲凹凸不平嘅路   咁先有揸車 feel 嘛   "鄧"下"鄧"下包唔會眼瞓   好似啲越野車咁   哈   

工人就自己去買餸   我就同家姐 姐夫去銀行整嘢   整完就去買嘢食   不過姐夫話想飲凍檸茶   咁佢自己去大快活坐   我同家姐去買嘢食   之後去大快活 join 番姐夫就走喇 ~

丫   個工人又唔記得帶電話喎   最慘家姐張八達通喺佢度   想開車走又唔得   不過姐夫話佢應該會喺車度等我地   咁我地去停車場啦   真係見到佢   好在佢都醒   識企喺車度等   唔係真係唔知等到幾時 ~

去埋家姐屋企拎番啲嘢就走喇   家姐車我番屋企   佢今日車黎車去都幾辛苦   哈 ~

幫埋家姐去銀行入票就番屋企喇   都已經 5 點   話咁快就過咗一日 ~   

買咗芒果乾 + 蜜汁豬肉乾 + 豬肉鬆 + 糖 

家姐買比我啲手信   極力推介三星蔥牛舌餅   因為佢唔食蔥都覺得好味   因為無蔥味   哈哈

脆豬肉紙 + 蜜汁豬肉乾 - 我都唔記得叫咗家姐買豬肉乾添   咁之得頭先唔買啦   家姐仲話以為里奧大人真係鍾意食得咁緊要   所以由得我買   哈

我咩都要啲   依家真係唔會嘥嘢   格言真係小食多滋味    李儀太陽餅真係唔錯喎   我之前公司嘅老闆成日買太陽餅比我地食   食到好驚   同埋佢買嗰啲口感似老婆餅   但李儀就好鬆化架喎   口感完全唔同

原味黑糖 - 同家姐講話要黑糖  但就唔要薑味嗰啲   不過佢就買咗黑糖薑茶   又比幾粒我咁啦   咁家姐拎比我嘅時候   姐夫話為咗呢包黑糖由山頭跑到山尾   係都要買到   聽完勁心痛啦我   我一早講話無就算   唔好特登搵   買佢自己鍾意嘅嘢好過   不過都知佢一定點都會買比我架喇   下次想要啲咩都真係唔同佢講好喇

家姐話糖村烏結糖好出名同好好食   咁我又無咩好大興趣   我話要 2 粒試下就算   咁家姐又比咗 6 粒我喎   話焦糖好好味   成 HK$7 一粒   我覺得好貴啊 

6 點半開始煮嘢喇   想快啲食完快啲休息   咁 7 點已經食得   諗住自己食先   點知里奧大人打黎話放工   咁等埋佢一齊食囉   咁我都沖涼先喇 ~

是日懶餐 - 鹹豬手茄汁扁意粉 + 當參紅棗百合黃鰂魚湯  

鹹豬手茄汁扁意粉 -  啲鹹豬手係星期六食剩㗎   終於今晚清哂  依家我真係唔嘥嘢㗎   勁 ~     

當參紅棗百合黃鰂魚湯 - 媽咪煲架   媽咪話喺我番工前飲多啲湯   唔係番工之後就只係每星期一次湯水喎 ~ 

搞掂哂都差唔多 9 點   食埋生果   真係坐低休息喇   今日好似好頻樸咁   里奧大人話我今日無事忙喎   但我話家姐放假   咪陪下佢囉   反正我一個人係屋企之嘛 ~

等里奧大人沖完涼就睇電視   11 點瞓喇   依家想 11 點就瞓   咁之後 7 點半起身都可以瞓到 8 個半鐘嘛 ~