韓式辣醬雞扒 + 腐乳唐生菜 ( 26-JUL-2016 )

( 26-JUL-2016  WED )

今朝里奧大人上大陸   所以 6 點 15 分都起身   咁我都起身去廁所   之後再叫佢帶參蜜   我都入番房瞓   之後無啦啦又起咗身   望下個鐘只係 6 點 35 分   但聽唔到水聲同關門聲   所以我出去開廁所門睇下   原來里奧大人啱啱沖完涼   咁我望一望佢   我又入番房瞓 ~

之後佢細細力摸下我塊臉   又細細聲問我乜事 ?!   我話頭先醒咗聽唔到水聲同關門聲   睇佢出門口未囉   佢可能以為我夢遊呀   哈哈 ~

7 點 25 分聽到滴滴聲   即醒啦   因為要出去廳關窗呀   頭先里奧大人話開咗窗嘛   真係好日唔開窗   一開窗就落雨 ~

咁唔瞓喇   起身沖涼番工啦 ~

食緊早餐又見到 8 卦   佢有佢食   我有我睇報紙   我睇完先同佢傾偈   8 點 45 分就一齊番菇場 lu   我驚落雨呀 ~

菇場唔忙   仍然整下相又 Hea 下咁過呢 ~

Lunch Time 出去綠盈坊幫家姐買龍眼肉   但今日無貨   咁我訂咗 4 包   同埋比咗錢先   因為張 $30 Coupon 月尾到期   唔記得用就蝕啦   之後再去埋 759 買百力滋比家姐 ~

又好餓呀   所以即去買酸辣米線番菇場食   今次好好味呀   可能真係好鬼餓   哈哈 ~

諗住仍然 Hea 啦   點知無啦啦勁忙   之後見到舊阿頭嚟咗   又有 Cake 食   呵呵 ~

放工要幫里奧大人買麵包   咁去 Taste 買菜算喇   順便買埋生果   一次買哂   聽晚唔駛買   正呀 ~

一入廚房又見到小強   嚇鬼死   之後狂噴 Bio Kill   上次買支細嘅   都差唔多用完添喇   因為我狂噴到佢死為止 ~

好啦   浸完菜又抹另一個櫃啦   我頂   無啦啦又有隻小強   有翼添㗎   不過佢係垂死掙扎咁囉   但比佢哋嚇到我有啲頭痛喇   咁屋企嘅煲同鑊都係 Stainless Steel   咁我又着黑色衫   一望到個煲有黑嘢就以為係小強   但其實係自己郁囉   自己嚇自己   有啲精神衰弱 ~

抹好就用漂白水拖地   之後再熨 2 機衫   等埋里奧大人先一齊食   因為我仲未餓 ~

里奧大人 7 點半已經喺上水   咁我都焗定雞扒 lu ~

佢 8 點 15 分番到屋企   啱啱煮好碗出前一丁比佢 ~

時日懶餐 - 韓式辣醬雞扒 + 腐乳唐生菜  

韓式辣醬雞扒 - 為咗清埋樽辣醬   所以整呢個雞扒   其實好鍾意焗雞扒   因為無難度   同埋雞肉唔會 "鞋"   哈哈 ~   

腐乳唐生菜 - $9/包最抵啦   因為菜心要 $12/包唔捨得買   買菜都係街市抵啲   不過今晚唔想滕嚟滕去 ~

洗埋碗   熨埋幾件衫就沖涼   咁入廚房啦   我頂   又見到小強喺牆度   我即拍死佢   之後我叫里奧大人清理現場 ~

真係顛喇   所以即刻整肥皂水   整兩碗擺廚房   之後再整啲入噴壺   真係唔係佢死就我亡喇 ~

今晚全晚都係緊張狀態   希望今晚好瞓啦   哈哈 ~ 

聽朝里奧大人又要上大陸   其實唔係咁眼瞓   但 11 點都瞓喇 ~

Number 9 Restaurant + 滿記甜品 @ 九龍灣 ( 25-JUL-2016 )

卡邦尼扁意粉 ($75) - 我都幾鍾意食 Carbonara   但里奧大人就唔太鍾意食忌廉汁   但我話試下啦   唔好成日食蕃茄汁   好在呢間忌廉汁唔漏咋   呵呵

黑松露炒什菌 ($88) - 鹹鹹香香都幾好味   但其實都幾油  

墨西哥粟米片 (粟米片 / 辣肉醬 / 墨西哥辣椒 / 牛油果醬 / 酸忌廉 ) ($68) - 我勁鍾意食 Nachos 架   但驚里奧大人話熱氣   佢話食先叫咋   唔係實食唔哂呢 

( 25-JUL-2016  MON )

尋晚喺張床到碌到 1 點幾先瞓到   之後仲發埋惡夢   嚇醒咗里奧大人   我只記得我好驚   喺度 "umm umm" 聲   但當然又係無人聽到我叫啦   之後 Feel 到有人掂我膊頭   嗰下嚇醒咗   原來係里奧大人摸醒我   佢話我同佢講過   話如果我發夢大叫   佢要即刻整醒我呢   哈哈 ~

瞓得唔好   但又無話想懶床 ~

早餐食蛋治   以前一定食雙拚   但依家唔會喇   因為食單拚已經好鬼飽 ~

菇場唔忙   做埋 Report 就可以 Hea 喇 ~

Lunch Time 出去點點綠買芝麻粉   但無特價   所以唔買   但就買咗杞子同有機蕎麥 ~

杞子 ($32)  / 有機蕎麥 ($20)

買完就去綠盈坊買芝麻粉   阿 mi 話飲開話唔錯   所以我又試下   依家做緊特價   芝麻粉一罐係 $76   咁 2 件 9 折   3 件 88 折   4 件 85 折   咁反正我都要買   所以買 4 件   即係總數 258.4   除開四就係 $64.6/罐   咁都抵   呵呵 ~  

買完再去完莎莎買 BB Cream  再同笠傾傾下先記得無買龍眼肉   但其實我最主要係買龍眼肉   哈哈   實在太論盡了 ~

SPF30 Radiance Beauty Balm ($272)

頭先喺綠盈坊買嘢   有張 Coupon 係買滿 $150 (折實價) 就可以減 $30   咁我買 4 包龍眼肉 + 1包南北杏夠哂數啦   其實我睇錯 $180 囉   所以夾更買多包南北杏   咁依家總數係 $203.5   即係比 $173.5 就搞掂 ~   

龍眼肉 ($44/包) - 會員正價有 95 折

南北杏 ($38)

終於買咗 7 包嘢同 4 罐嘢   好在又唔係話好重咋   但個頭有啲痛   真係好怕計數呢 ~

望下手機已經 1 點 20 分   即買埋燒賣粉果番菇場食喇 ~

好快又放工   今晚去得寶剪頭髮   因為我真係頂唔順自己把頭髮   又旱又剩   咁我個樣已經夠哂殘   黑眼圈又勁   所以長頭髮顯得更殘   我成日同里奧大人講   好在我唔係瘦咋   唔係啲人一定以為我吸毒 ~

里奧大人最鍾意我扎起頭髮   話精神好多   但我番工一定唔扎頭髮囉   塊臉咁肥   要用頭髮遮住呢 ~

6 點 05 分開始剪   6 點半剪完   里奧大人話咁快剪完喎   哈哈   估唔到剪完頭髮   個人真係精神咗好多呢 ~

咁我番屋企等里奧大人啦   之後佢話聽日要上大陸   我又要即刻落樓買麵包比佢做早餐   因為 差唔多 7 點就會無哂齋包㗎喇 ~

今晚試新嘢   最開心係星期一至四有 9 折   呵呵 ~

里奧大人 7 點半左右到   食完再去滿記   因為里奧大人覺得熱氣   要飲椰汁沙冰喎 ~



無啦啦好攰呀   沖涼之後就咩都唔做   睇下電視   11 點幾都瞓喇 ~

丸龜製麵讚岐烏冬專門店 @ 九龍灣 ( 24-JUL-2016 )

我嘅野菜天婦羅 + 冷醬油烏冬 (中) - 烏冬煙煙韌韌真係好正   哈哈  

我好鍾意食野菜天婦羅

加埋蔥同炸蒜   咁就食已經好好食呢   

里奧大人嘅胡麻雞柳天婦羅 + 熱醬油烏冬 (大) - 我見里奧大人將啲烏冬咬幾咬就吞落肚   我叫佢咬耐啲   因為好煙韌   咁之後我試佢 1 條烏冬啦   原來無冷烏冬咁煙韌嘅   唔怪得可以咬幾咬吞落肚啦    

我成日覺得件雞柳賣相好恐怖

( 24-JUL-2016  SUN )

今朝 8 點起身去廁所   之後其實都瞓唔番   但又唔想出廳坐   不過最後都好似瞓着咗一陣   到 9 點半都起咗身   其實咁樣訓   仲衰過唔瞓   哈哈 ~

沖涼之後就即刻去食早餐   因為好餓呀又 ~

我一坐低   咁想拎張早餐紙嘅時候   望到有粒黑色嘢   即刻大叫咗一下   之後差啲推到里奧大人出去添呀   最搞笑係坐我對面嘅女人都比我嚇親   佢都想企身走開咁款呀   哈哈   大佬   呢排成日見到強   真係比較敏感啲囉

平時番工食三文治食到驚   但假期又想食三文治   真係神經病   哈哈         

咁行行下   見到里奧大人着咗件泰國買嘅 Tee   我話啲 Pattern 咁似我條 One Piece 嘅   佢都話覺得好似呀   但買嘅時候就無為意囉   之後佢好認真同我講   話佢着嘅時候   叫我唔好着喎   我話鬼得閒同你情侶裝咩   黐線 ~

食完就番屋企抖下   之後就番教會喇 ~

講道完畢都走喇   因為今日同婆婆阿姨食 Lunch 呢 ~

經過印尼店   買咗呢個中辣 Sambal ($12)

1 點唔夠就到婆婆屋企   之後家姐同姐夫都上埋嚟 lu ~

諗住飲茶   但都 1 點半   所以驚無位   不過紅磡咁多嘢食   落咗樓先再搵 ~

咁見金坊好似有人走   咁去攞位啦   唔夠 1 分鐘都可以入去坐 lu   感恩 ~

無骨海南雞飯 - 個汁好味   

炒鮮蝦金邊粉 - 呢個無咩味喎   但婆婆話辣辣哋

香茅燒豬扒金邊粉 (+$10 轉冬蔭功湯底) - 家姐同阿姨好鍾意冬蔭功湯底   

牛丸湯河 - 我無食呀   但睇個樣都 OK

飛天通菜 (套餐 +$25) - 好味呀   

泰式鳳爪沙律 (套餐 +$25) - 我覺得辣   

泰式炸春卷 - 我無食呀  

我真係覺得兩碗湯粉好巨   我同家姐講話佢哋拎緊兩個鋅盤出嚟咁   哈哈

食到差唔多 3 點就走人喇   咁原來午市無 9 折卡用   之後婆婆就拎啲卡出嚟   問呢張得唔得   嗰張得唔得   之後阿姨好搞笑   話拎咁多種卡無用   因為只係用得 1 張   如果用得 10 張   咁呢餐就 Free 啦   哈哈 ~

再上婆婆屋企坐陣   傾到 4 點左右都走喇 ~

頭先出門口去食嘢嘅時候   我聽到婆婆話好開心好開心   講咗幾次   所以我同里奧大人講話得閒再同婆婆飲茶呢 ~      

阿姨坐火車   家姐坐巴士   我哋就坐小巴番屋企 ~

之前我問家姐   藍罐曲奇依家兩盒要 $2x   咁抵唔抵 ?!   佢話唔知道   咁我問得佢   佢知我一定想食   佢之前喺百佳買嘢   話呢盒係 $7.9 換購價   所以就買比我   記得我講過想食呢   所以我好驚話佢知鍾意食咩   一陣撲去買就唔好啦   

番到九龍灣   咁去萬寧買染髮劑就走喇   好攰呀   今晚唔煮喇 ~

差唔多 7 點落樓   諗住去 Teawood   不過要排隊   所以唔等 lu   即轉場食烏冬 ~

食完再食雪糕   之後番屋企抖陣   差唔多 8 點 15 分就去徑步 ~

今晚都熱   但唔焗   所以係時候要郁下 ~

徑 20 分鐘就走喇   出完一身汗   再沖暖水涼真係好正   但最緊要之後係唔駛做嘢   唔係郁兩郁就出汗   好慘囉 ~

咁里奧大人繼續淘嘢   我就執下書櫃啦   又掉一大埋嘢   爽呀 ~

慘啦   今晚無睡意   但 11 點幾都要瞓   聽日番工呢 ~

好好肥牛雞煲店 @ 佐敦 ( 23-JUL-2016 )

阿 Mi 話每人細細杯影張相先   其實個個隻手已經揸住手機   預備影相 

有人拎杯 有人影相 有人點菜   所以個個隻手都好忙   哈哈

里奧大人話佢兩隻手一齊影會穿崩   所以阿喂自己拎番呀  

藍妹 x 2 ($30/支) x 2 / 黑啤 ($38/支) - 里奧大人話飲咗黑啤有啲燥   係咪真係咁補呀 ?!   阿 Mi 話飲黑啤好補   咁其實好耐之前冰姑都成日叫我飲黑啤   又係話補   但我唔想飲咁多凍嘢   之後阿 Mi 陰陰咀笑住話飲室溫囉   即係暖啤 ?!   想下都覺得難飲呀   仲要係黑啤   完全係飲緊豉油嘅感覺   哈哈      

酸木瓜好味呀   其實唔係好酸   但食完就好開胃   唔係阿 Mi 話係青木瓜   我仲以為係醃蘋果添 

阿喂第一個 "北"   佢未 "北" 完㗎   我搶咗嚟影相   之後阿 Mi 問阿喂你 "北" 完喇 ?!   我話佢未㗎   我搶嚟影相   佢好無奈咁款   哈哈   我覺得生蒜無咩味   

我影完比阿 Mi 影   之後阿 Mi 影完比阿喂影   阿喂影完比阿奧影   所以傳嚟傳去   影完之後   發覺啲嘢食都已經嚟齊哂   哈哈

海底椰雞窩 (半隻雞) ($128) - 個湯底正呀   大家飲咗碗湯先   之後佢哋無飲   我就繼續飲   肥死囉   但熱湯真係好正   繼續飲

有海底椰 粟米 杞子 馬蹄   真材實料   依家睇見都想飲   哈哈     

半隻雞 - 佢哋唔係點食咁嘅   最後我食埋去啦   唔好嘥   同埋我好似唔係好飽   但我又唔想叫其他嘢食  

炸響鈴卷 ($38) - 呀笠話上網睇啲人係就咁食   唔會灼嘅   估唔到真係超勁好味呀   又鬆化   之後入口即溶   我一路食一路 "umm umm" 咁聲   衰里奧大人喺度笑呀   可能覺得我誇張

脆鯇骨腩片拚盤 ($98) - 啲顏色靚到呢   阿 Mi 教我食脆鯇骨嘅油脂部位   本來我已經掉咗   但都拎番嚟食囉   呵呵   果然堅正   下次我識食 lu   不過唔知有無咁新鮮

好爽脆   又唔腥   唔怪得阿喂咁鍾意打邊爐食脆鯇骨腩片啦

美國桶蠔 ($138) - 碟蠔一放落枱   已經聞到好大陣蠔味   已經覺得會好好味   咁其中 2 隻係好大隻添呀   阿 Mi 話我同佢食最大隻   阿喂好唔捨得   哈哈

日本黑豚肉片 ($88) - 顏色好靚   唔似我食開嗰啲死死實實肉色

自家制鮮四寶丸 ($75) - 呀喂揀咗蝦丸 / 蟹籽包心丸 / 墨魚丸 / 貢丸 - 我聽到阿 Mi 話我唔食貢丸   哈哈   咁應該佢食埋去呢    

田園什菜藍 ($48) - 都唔記得自己食過啲咩嘢菜添   

杞子圓肉桂花糕 - 老闆請食嘅   呢個甜品超正   真材實料     

滬式豆沙窩餅 ($45) - 好味呀   唔太甜又唔太漏   

( 23-JUL-2016  SAT )

今朝 7 點 45 分起身   搞掂哂都 8 點 05 分   即出門口喇 ~

早餐叫完又唔想食   食剩哂啲麵包   勁折墮   但唔知點鮮當時又諗唔到打包喎 ~

菇場唔忙啦   快快整埋啲相   差唔多 11 點又餓喎   咁食糖啦   9 月到期   要快啲食哂去 ~

呢包二寶果汁糖喺泰國買㗎   仲以為係新嘢添   希望無買貴到啦   哈哈

尋晚執咗成晚廚房勁攰   咁今日又咁好天氣   好想出去行   同埋勁想食蠔仔粥   諗住 4 點出去旺角行   行完去妹記   咁問阿 Mi 佢哋去唔去   佢哋唔想去   之後問阿喂   再問去唔去食雞煲火鍋   咁雞煲有興趣呀   所以又約埋今晚一齊食飯喇   今日完全係即慶   因為即慶先成事   哈哈 ~

之後家姐打嚟話聽日可能約婆婆飲茶   咁問我哋去唔去   我話睇下佢哋飲幾點先囉   太早唔去喇   要番教會嘛 ~

我又諗起媽咪   好在放工即走囉   已經忍唔住喊   一路行一路喊   喊到落車   喊完舒服好多 ~

我無啦啦勁餓   但里奧大人 11 點先食完早餐   我唔想佢特登陪我食   佢居然叫我食薯片呀   呵呵   佢尋晚食剩大半包熱浪   咁我幫佢清埋啦 ~  

無嘢做就開機洗衫   咁等到 2 點 15 分就落樓食嘢啦   食下午茶最好   又平又份量唔多   唔駛咁飽 ~

食完都番屋企喇   里奧大人話想瞓一陣   我話太飽喇   要熨衫當做運動   但熨完 2 機衫又好攰   哈哈 ~   

佢有佢瞓   咁我喺廳睇下雜誌咁啦   之後都瞓着咗   好在校定鬧鐘 3 點 45 分響   唔係唔知瞓到幾時   哈哈 ~

4 點半出發   諗住搭小巴去佐敦   點知去到見到架小巴走咗   咁唔等喇   搭地鐵算喇   因為條街超勁熱   太陽曬落嚟係辣肉呢 ~

我哋同阿 Mi 喂都差唔多時間到佐敦   所以約埋一齊喺 C2 出口等   但我哋係想去廟街   再睇地圖   正確出口位置應該係 A   所以里奧大人打比佢哋改位置呢 ~ 

我同阿 Mi 行前   阿喂阿奧就行後   我哋去完都市買焗油同髮泥   其實我無諗住買焗油   不過阿 Mi 介紹話好   咁我都買 lu   因為佢買得嘅嘢   一定做哂 Research 同用過   覺得好先介紹我用囉   我其實買啲 Skin Care 都係跟佢買   佢買我又買   佢轉我又轉   哈哈   真係懶得諗呢 ~   

之後再去千齊買洗頭水   買完都係 5 點 15 分   所以行埋莎莎睇嘢   順便涼下冷氣 ~

咁難得見到阿 Mi   佢同我搵佢用開嗰隻 Dr. Jart+ BB Cream   咁諗住問個 Sales 嘢啦   點知條友居然合埋對眼  好悔氣話 "妳等陣先啦"   頂佢吖   咩態度呀 ?!   阿 Mi 即放番低支 Cream   我真係第一次見到啲 Sales 係咁態度   咁可能佢覺得我哋阻住佢 Sell 強國人買嘢啦   不知所謂   不過都知佢唔會番轉頭搵番我哋㗎喇   咁我都唔會話佢嘅   但就一定唔會喺呢間買嘢囉   我初初以為我 EQ 低所以激氣   原來阿 Mi 都覺得條友勁衰囉   忍唔住話佢正一死八婆呀 ~  

過完馬路   唔見阿喂阿奧   阿 Mi 即刻話可能我哋行得太快   咁番轉頭搵番佢哋啦   之後我哋同一時間講話: 咁好傾   咁唔叫佢哋喇   知佢哋跟住我哋就算喇   佢哋真係由見面開始傾傾傾㗎喇   多嘢講過我同阿 Mi   哈哈 ~

6 點唔夠去到食店   我以為食雞煲   原來係打邊爐   呵呵 ~

一坐低就睇下叫咩嘢食先   因為我又有啲餓 ~

今晚阿喂阿奧太好傾   所以叫佢哋一齊坐   我就同阿 Mi 一齊坐   真係話時話   我好似無咩點夾嘢嚟食   但個口就不停食嘢   一定係阿 Mi 阿奧夾比我   阿喂都好似有夾比我哋   呵呵 ~

點好哂嘢就傾下偈啦   衰 Mi 成日話我同阿喂好似   仲要係啲衰嘢特別似 ~

之後傾係咩血型   阿 Mi 好開心好開心知道同阿奧係同一血型   因為佢哋成日覺得自己係受害者   見佢笑得咁開心   我話其實我同佢都係同一血型喎   呵呵   鋤一鋤佢銳氣 ~

又係乜都傾一餐   咁講起冷氣   里奧大人話次次要開定冷氣等我   咁阿 Mi 就話知道阿喂一放工   佢都要開定冷氣等佢   所以衰 Mi 話我哋同阿喂一樣咁衰   一啖擔 ~

食到唔知幾點   有枱客入嚟   一坐低已經開始嘈   之後無耐又有枱客   講嘢又係好大聲   真係好唔明點解啲人講嘢咁大聲   唔知以為鬧交 ~

阿喂聽日要番工呀   所以 9 點左右都走喇   我哋都係坐小巴番屋企   我哋要等齊人呀   佢哋就
好快已經開車   但就差唔多時間一齊番到屋企呢 ~

我個喉嚨同脷邊無啦啦好痛呀   唔通黑啤加打邊爐燥得滯 ?!   

番到屋企即沖涼   之後里奧大人就淘嘢   我就執下嘢   依家好鍾意掉嘢   因為屋企實在太多嘢 ~

12 點幾先瞓呀   好在聽日可以晏啲起身   呵呵 ~