芋頭魚 (外賣) + 腐皮卷 (外賣) + 齋滷味 (外賣) + 菜心苗 ( 21-SEP-2018 )

( 21-SEP-2018  FRI )

又到星期五   呢個星期過得好快呀 ~



菇場忙呀   咁就好喇   唔想成日太 Hea   咁樣反而個人仲吽吽哋咁 ~

Lunch Time 同 8 卦出去食   順便還書   佢明明要丁丁辣湯底   點知比咗小辣   嚇到佢碌大對眼   就嚟跌出嚟咁滯   笑死我   之後佢話個口開始麻喎   仲話我重慶酸辣小辣無料到添呀 ~

同佢一齊食嘢咁多年   佢第一次食得咁慢   要是平時   佢食完   我只係食咗 1/3 咋   之後我叫佢食完抖陣   唔係一陣又熱   你又辣得滯驚你暈低呀 ~

去埋圖書館還書就番菇場喇   番到又要即刻開工了 ~

無啦啦超級勁忙   話咁快又到放工 ~

里奧大人上大陸見客   咁我就去 Taste 買餸   大家都差唔多 6 點半番到屋企 ~

今晚想等埋家姐一齊食   所以我可以抖陣   里奧大人就幫手熨衫 ~

睇完新聞   我都抹下嘢   呢個幾月無做運動   個人又攰   所以郁得到就要郁   唔可以比自己太懶 ~

家姐 8 點半放工   咁我都預備晚餐喇   今晚超勁簡單方便   焗同淥就搞掂 ~

估唔到家姐咁快到喎   9 點已經嚟到   可以即開餐喇 ~

是日懶餐 - 芋頭魚 (外賣) + 腐皮卷 (外賣) + 齋滷味 (外賣) + 菜心苗

芋頭魚 (外賣) - $15 都抵   但無咩味道   都係喺齋舖即炸先好味道   哈哈 ~   

腐皮卷 (外賣) - 感恩又做 $15/3條   我就買 6 條   蘸喼汁好正呢 ~   

齋滷味 (外賣) - 買咗 1 盒酸齋同 1 盒齋鴨腎   平時一盒有 2 樣   但見家姐嚟食就每樣買一盒   飽到上腦 ~

菜心苗 - 食埋尋晚嘅 1 斤   估唔到咁鬼多 ~

食完都 10 點   洗埋嘢再開機洗衫   之後就招呼佢哋食雪糕   佢哋最開心   哈哈 ~

喺 Taste 買夠 $88 就可以用 $55 換購   我真係好好彩   啱啱買咗 $90.2   我已經諗定   如果唔夠錢就即買 2 支飲品   咁就肯定過 $88 呢



質感好 Soft   好記得對上一次喺一田買咗 3 盒番屋企   點知我無關實冰格門   最後雪櫃都壞埋   乜鬼都要掉哂   心都痛呀   所以次次見親 Movenpick 就有種心痛嘅感覺   哈哈





之後掛住睇細個嘅相   家姐睇到過咗時間搭車   咁唯有等多班車囉   所以成 11 點先走 ~

我都即沖涼喇   今晚又唔係太眼瞓   咁上 Youtube 睇嘢   但無啦啦個胃脹到不得了   直頭想嘔咁   我即同里奧大人講囉   佢都覺奇怪   食嘅嘢又無特別   佢即刻諗到條芋頭魚呀   芋頭難消化   咁佢哋又話唔係咁好食   我咪食哂囉   唔想嘥嘢嘛   無諗過腍 Pat Pat 嘅芋蓉都令我咁辛苦囉 ~

唉   雖然都 12 點   但我都唔敢瞓住   過咗半個鐘仲係咁   不過我已經開始好眼瞓   點都瞓喇   哈哈 ~

鵝掌翼 & 鴨腎 + 海蜇燻蹄 + 菜心苗 ( 20-SEP-2018 )

( 20-SEP-2018  THU )

里奧大人今朝 6 點要起身喇   要同同事上大陸廠   叫佢帶埋咖啡   我都即刻瞓番了 ~   

話咁快就星期四   我仲以為今日星期三添 ~

今日身體狀況非常 OK   實在太感恩喇 ~

早餐食吞拿魚治烘底   依家啲吞拿魚醬越來越少   所以就覺得乾哽咁 ~

菇場忙呀   所以好快又到 Lunch Time ~

無啦啦勁餓   要買兩餸飯食呀   食來食去都係呢兩樣餸   不過呢啲自己煮好難整得好食   因為佢哋用好多油   我唔會㗎   哈哈 ~

仍然忙   但有啲飯氣攻心   好在都已經 4 點半 ~

阿花好搞笑   佢特登過嚟問我個熨斗仔喺邊 ?!   我聽到一頭霧水   佢話我之前放喺枱嗰個呀   笑死我   我話暖水袋叉電器嚟㗎   但其實離遠望又幾似迷你熨斗嘅   之前好 Hit 家嘛 ~

放工去街市買餸   番到屋企都 6 點 15 分   居然見到里奧大人   原來佢今日 4 點見客   我完全唔記得添 ~

不過今晚勁方便   就咁淥菜同米粉就搞掂   所以 7 點半都可以開餐 lu ~

家姐 8 點幾嚟到   即刻拎嘢比佢食   佢好驚我辛苦   我話煮到飯就最開心   即係身體無問題嘛   同埋今晚都係外賣嘢   真係唔駛煮囉   哈哈 ~

是日懶餐 - 鵝掌翼 & 鴨腎 + 海蜇燻蹄 + 菜心苗 

鵝掌翼 & 鴨腎 + 海蜇燻蹄 - 總共買咗 $120   如果喺酒樓食就肯定過 $200 ~   

菜心苗 - $12 就 1 斤   但 $18 有 2 斤   平時都係差 1 蚊   但今次多 4 蚊有 2 斤   所以買夠 2 斤   家姐仲話啲菜好甜 ~

家姐 10 點幾走   約咗糟糟交收   所以佢要陪糟糟食嘢   之後糟糟就車埋佢番屋企   都唔方早啦   哈哈 ~

我沖埋涼就開機洗衫   睇多陣電視   11 點 15 分都瞓 lu ~

沙樂美腸薄餅 (外賣) + 蜜汁豬肋骨 (外賣) + 蜜汁雞翼 (外賣) @ 屋企 ( 19-SEP-2018 )

兩樣都有格甩底味喎   頂



( 19-SEP-2018  WED )

今朝起身都 OK 呀   希望全日都 OK 啦   哈哈 ~

早餐食丁米   想食熱嘢   但同時又想飲凍啡   不過呢間凍啡始終都係偏甜唔夠濃   所以都應該唔會再飲 lu ~



菇場勁忙呀   但 11 點幾個肚又有啲扯住痛 ~

Lunch Time 食番尋日買嘅吞拿魚包   咁都幾好   唔駛落街有得食咁   哈哈 ~

仍然忙啦   但放工前都搞掂哂 lu ~

諗住去一田買炸物   但原來無嘅   咁買蜜汁燒雞翼 ($22.5) 同埋金牌醬燒豬仔骨 ($41.4)   再買多 2 個薄餅都走人喇 ~

里奧大人諗住放工拎月餅   點知佢唔見咗張劵   所以番屋企啦   我就抖陣先   個肚仍然有啲扯住痛呀 ~

佢番到屋企話要地毯式搜尋喎   我話你咁肯定放喺個袋   我又完全無見過   係咪跌咗喺公司 ?!   佢又話唔會   咁是但啦   只怪佢自己論盡囉   我唔會幫佢搵㗎 ~

家姐今晚 9 點先嚟到   即焗嘢佢食喇 ~

里奧大人仍然唔甘心   再 Check 下個斜揹袋   之後再搵埋出街個背囊   我同家姐咪話囉   頭先啲人好肯定話放喺番工背囊   咁做咩要搵其他袋有無呢 ?!   之後真係比佢喺出街背囊搵到   頂佢   原來公司星期六派比佢囉   好在佢 Line 咗比我知   咁我同家姐咪鬧爆佢囉   頭先仲咁肯定 ~

家姐 10 點幾走   我沖埋涼   睇埋新聞都瞓 lu ~

榮基打冷小食 @ 官塘 ( 18-SEP-2018 )

魚皮餃米粉



紫菜四寶河粉 



炸魚皮
 


腐乳通菜



( 18-SEP-2018  TUE )

尋晚半夜都要沖個熱水涼   好在沖完涼都瞓得番 ~

雖然個肚有啲痛   不過就唔係每月一痛嘅冤冤痛   但都辛苦囉 ~

菇場唔太忙   所有大粒又唔喺度   我都中下中下咁呢 ~

11 點幾開始超級唔舒服   居然要嘔   12 點 20 分都頂唔順要瞓覺呀   一瞓瞓到 12 點 40 分   咁去買吞拿魚包啦   我唔想食 K 餐   不過行到一半勁後悔落街   差啲暈咁滯   所以加快速度番菇場呢 ~

頭先好似用盡咗一生氣力咁   所以番到菇場都即刻抖陣   但瞓唔到囉 ~

無啦啦又有嘢忙   好在好快搞掂    今日嘔咗 3 次   煩死 ~

4 點超級頂唔順   終於又要瞓   瞓咗半個鐘   之後完全 ok 呀   感恩感恩 ~

放工即走喇   諗住打的又無的   咁搭巴士啦   諗住關愛座都照坐呀   因為我個樣真係面無血色   堅需要坐呀 ~

感恩好多位   唔駛坐批判座 ~

等埋里奧大人放工就去食嘢   食完就番屋企   之後開機洗衫 ~

今晚家姐要嚟我屋企整嘢   差唔多 9 點先到   整埋傾多陣又 10 點   佢都番屋企了 ~

沖埋涼就睇多陣電視   11 點都瞓 lu ~

鳳爪排骨飯 (外賣) ( 17-SEP-2018 )

( 17-SEP-2018  MON )

尋晚瞓得唔係咁好   個肚都有啲痛   咁今朝已經 3 號風球   所以都刷牙沖涼番工啦   正想換衫出門口就睇下 Whatsapp   原來 Admin 通知我哋   老闆知道交通會有阻滯   所以可以中午後先番工   實在太感恩喇 ~

里奧大人就慘啲   佢要番工啦   但就要搭地鐵囉   根本無巴士 ~

我就繼續瞓   8 點瞓到 10 點   當堂舒服好多   但仍然有啲扯住痛 ~

食埋早餐就番工啦   反正喺屋企都係 Hea   不如番工好過 ~

感恩有小巴都菇場附近   但有段路封咗   所以要行番去   行行下都幾熱咁 ~

11 點半番到菇場喇   計埋老闆都係 8 個人番到 ~

Lunch Time 就落去買嘢食   其實唔太餓   但想食啲熱嘢暖暖肚囉 ~

放工即走   個肚扯住痛   最後都係打的番屋企 ~

番到屋企即沖涼休息   里奧大人去完姑奶屋企整嘢   差唔多 9 點就番到嚟   我叫佢買飯比我食呀 ~

感恩都有胃口   雖然個肚都唔舒服   但食到嘢已然好好㗎喇 ~

睇多陣電視   11 點都瞓 lu ~

煎紅腸 + 粟米蛋花湯 ( 16-SEP-2018 )

( 16-SEP-2018  SUN )

今朝瞓到 11 點自然醒   好似朝早已經掛 10 號風球呀   今次個風真係好勁   東南位嘅話就真係食到正囉 ~

聽到啲風聲都覺得超級恐怖   再睇埋新聞   難以想像係發生喺香港   唉 ~

刷埋牙就煮早餐   幾有心機煎午餐肉呀   煎到脆卜卜   好味道 ~



洗埋碗又執下嘢抹下嘢   又大清潔廁所   之後沖埋涼就休息喇   開始有啲攰   呢排個肚又扯住痛咁   搞到個人成日好攰囉 ~

差唔多 4 點   又蒸啲魚肉燒賣做下午茶   想盡量清哂冰格啲嘢   哈哈 ~

粒粒都充滿豉油辣油   真係超級好味道



見有時間就煲埋龍眼肉桃膠糖水   之後睇下電視   又 5 點瞓到 5 點半   爽呀 ~

今晚淥刀削麵算喇   想食啲濕濕哋嘅嘢 ~

是日懶餐 - 煎紅腸 + 粟米蛋花湯

煎紅腸 - 清埋半條紅腸   今次切薄啲   好似無咁硬   唔係又咬到牙骹都軟埋呀 ~   

粟米蛋花湯 - 無買菜就粟米湯啦   又方便 ~

洗埋碗再大清楚廚房   抖陣就沖涼 lu ~

條腰又勁痛   個肚又扯住痛   辛苦到我呢   所以 10 點半都瞓先喇 ~

榮基打冷小菜 @ 官塘 ( 15-SEP-2018 )

四川回鍋肉 ($58) - 呢個餸麻麻哋

潮州三寶  ($48) - 鹹酸菜得個酸字   今次失手啦   兩個餸都麻麻哋   哈哈

( 15-SEP-2018  SAT )

今朝 7 點 05 分起身   里奧大人就 7 點 15 分起身   我沖埋涼就等埋里奧大人一齊落樓   佢以為我做咩咁早番工   我話約咗家姐食早餐咋   哈哈 ~

我同家姐今朝都早咗   家姐已經講咗幾次話我做咩咁早 ?!   我話平時都係咁啦   之後望下時間   原來只係 7 點 50 分咋   平時 8 點左右嘛   怪不得家姐成日話我早咗啦   哈哈 ~

我話好在我早咗   因為無諗過佢都早咗嘛 ~

家姐雖然鍾意飲 Toast Box 嘅咖啡   但唔想食到咁飽   所以去 Delifrance 喇 ~



食滿 $100 有 $20 Cash Coupon   咁呢餐都 $87   所以加多個包 ($15)   咁就啱啱過 $100 喇

家姐無啦啦話今朝飽飽滯滯   以為佢尋晚食咗咩   原來係食咗芝士條   怪不得啦 ~

一切開個奄列   家姐即刻諗起自己細個   媽咪迫佢同媽咪 Share 奄列   我就食牛扒   但家姐好鬼乖   點都食奄列 ~
   
之後又話我好衰   係都要買部跑馬機玩具   哈哈   仲講到眼濕濕添呀   所以我同自己講過   有家姐一日   我都會對佢好好   盡量拻番哂佢啲童年陰影出來   哈哈 ~

差唔多 9 點就走人喇   家姐有車之後   我無耐都有車了   感恩感恩 ~

菇場唔太忙   但到 11 點又無啦啦忙啦   成日係咁   搞到我好緊張 ~

好在 12 點半做完   又可以放鬆心情等放工 lu ~

本來約咗里奧大人喺九龍灣食 Lunch   點知佢同同事傾偈遲咗 15 分鐘   咁我唔等佢食啦   我 2 點半要番教會嘛 ~

之後我去食米線   2 點唔夠就番教會   其實 2 點半先開始   不過早番去睇下有咩嘢要幫手咁囉 ~

撈埋就好辣

今日去探訪獨居老人   我係第一次參加呢啲活動   又開心又緊張 ~

今次程序有啲亂   所以接近 3 點半先出發   比預期咗遲咗 40 分鐘   變咗勁趕 ~

我同一個姐妹加一個組長一齊落區   但無小巴   所以直接打的喇   唔想浪費時間等 ~

我同姊妹就探訪 2 個家庭   組長就去另一個家庭   諗住 4 點 15 分集合   點知差唔多 4 點 35 分先集合   因為我哋要記錄探訪者要求   搞到遲咗 ~

填埋哂所有資料再祈禱   5 點終於搞掂喇   組長仲要趕去另一個家庭探訪   我同姊妹就各自歸家喇 ~

條街熱到爆炸   太陽曬落嚟係辣肉   本來諗住出去等里奧大人   最後都係番屋企等算喇 ~

里奧大人個講座差唔多 7 點先完   咁我都唔煮飯喇   出去食呢 ~

食完番到屋企就休息   今日頻樸又出一身汗   勁攰 ~

沖埋涼就睇戲   里奧大人居然話要食薯片   呢期佢食零食多過我啦 ~  

泰國買嘅薯片   25B 一包咋   青檸梳打就喺香港買嘅

一拎就係呢塊心型薯片



睇到差唔多 12 點都瞓喇   聽朝 10 號風球   都無得番教會 lu ~