黑蒜蔥油拌麵配滷水牛腱肉 + 辣肉腸粟米長披薩 (外賣) ( 20-MAR-2020 )

黑蒜蔥油拌麵配滷水牛腱肉配薯條 ($39) - 兩樣都好味道

辣肉腸粟米長披薩配粟米 ($56) - 呢款好似我喺一田買過嘅薄餅呀   哈哈

( 20-MAR-2020  FRI )

又一覺瞓天光   感恩感恩 ~

早咗落車   所以去麥記食早餐   我覺得食芝蛋包都幾健康   哈哈 ~

菇場唔太忙   係時候做最唔鍾意做嘅 Email Filing ~

聽日唔駛番工   但其實我聽日都 Off   呵呵 ~

Lunch Time 出去買生果   之後買埋菠蘿叉燒包同燒餅就番菇場食 ~

食完鹹要食甜真係好鬼正   但食完甜再食甜   真係想嘔   下次都係咪喇    嗚嗚 ~

4 點半放工   諗住去超市買排骨   但一 Pack 要 $57   我以為睇錯   雖然係新鮮一字排   但肥豬肉多過豬肉喎   幾乎半 Pack 係白色   點買得落喎   加埋多菜   呢餐都要接近 $70   我出去食算喇 ~

番到屋企抖陣   6 點前出去食   因為仲係下午茶時間   咁明明我話堂食   佢又比咗外賣   怪不得張單係寫住外賣啦   係里奧大人講比我聽   我先知咋   哈哈 ~

里奧大人話外賣仲好啦   又無帶搓手液   我話如果外賣   我買就可以嘛   唔駛兩個人去囉 ~

其實喺屋企食係舒服好多   因為我依家喺出面食嘢   節奏都比較快   朝早食完早餐都即番工   同埋依家又早咗放工   好似早啲番工好啲 ~

食完就抖陣   沖埋涼就可以休息喇 ~

睇下 Youtube   今晚 11 點幾都瞓先 ~

燻蹄 (外賣) + 蠔油菜心 + 韓式辣年糕 ( 19-MAR-2020 )

( 19-MAR-2020  THU )

感恩一覺瞓天光   不過有時半夜會醒一醒咁   但之後就好快瞓得番 ~

連續幾日個天都灰灰暗暗   又潮潮濕濕   真係唔係咁好啦 ~

早餐食芝腿治烘底   好耐無食喇 ~

菇場忙呀   眨下眼又到 12 點半 ~

Lunch Time 出去行陣   買埋牛雜河就番菇場喇 ~

仍然忙   好在忙到 3 點就搞掂 ~

4 點半準時放工   買埋燻蹄就番屋企喇 ~

抖到 5 點幾就預備   里奧大人 6 點幾番到屋企   啱啱好可以開餐 ~

是日懶餐 - 燻蹄 (外賣) + 蠔油菜心 + 韓式辣年糕

燻蹄 (外賣) - 最少要買 $50   但呢間麻麻哋   因為個皮唔夠爽脆   真係好難搵到間好味嘅燻蹄 ~

蠔油菜心 - 喺百住買菜心   呢度係 $7.9   份量都多喎 ~ 

韓式辣年糕 - 突然間好想食年糕   同辛辣麵一齊煮   我再用辛辣麵嘅味粉 + 半湯匙韓國辣椒醬加水撈埋一齊   咁就搞掂   勁簡單 ~

洗埋碗就開機洗衫   今晚諗住徑步   但落雨   想做運動嘅時候就有啲阻滯 ~

勁眼瞓   今晚 10 點 45 分都自己瞓先喇 ~

皇城餐廳小廚 @ 紅磡 ( 18-MAR-2020 )

椰菜香辣回窩肉套餐 ($63) - 好惹味呀

客家梅菜扣肉套餐 ($63) - 重口味   但我鍾意呀

好多肥膏   我唔敢食

( 18-MAR-2020  WED )

尋晚瞓得唔好呀   個肚扯住扯住   感恩起身都精神呢 ~

天色灰暗又凍凍哋   但我想見太陽多啲呀 ~

早咗落車   所以慢慢嘆個榨菜肉絲湯米粉餐 ~

菇場忙下停下   好快 Lunch Time ~

今日 Lunch 又食黑芝麻五谷麥粉   今次打孖上   因為過咗期   仲有七包   繼續會打孖上   阿齋問我做咩呢排咁鍾意食黑芝麻粉   我話實不相暪   係過期   唔係真係鍾意食得咁緊要   哈哈 ~

菇場仍然忙下停下   但 4 點半要即走 ~

感恩趕到巴士去里奧大人公司   我要幫手做嘢   之後佢要開會   6 點開完會要即去食晚餐喇 ~

食完就搭的士去大酒店   參加媚媚爸爸嘅安息禮拜 ~

雖然我未見過世伯   但見到佢哋喊   我都喊埋一份 ~

8 點半左右儀式完畢   我哋都搭的士番屋企喇 ~

沖埋涼就開機洗衫   之後休息 ~

今晚 10 點 40 分都自己瞓先喇   尋晚瞓得唔好   又唔知係咪喊完來   個人好攰咁 ~

滑蛋粟米魚塊 + 菠蘿咕嚕肉 (外賣) ( 17-MAR-2020 )

滑蛋粟米魚塊 + 菠蘿咕嚕肉 - 兩個餸都好味道

( 17-MAR-2020  TUE )

一覺瞓天光   鬧鐘響緊仲以為發夢   哈哈哈哈 ~

今朝個天又灰灰暗暗   感恩係尋日 BBQ 咋 ~

早餐食豬柳漢堡餐   呢個餐最正係無薯餅   我以前勁憎食豬柳漢堡   依家又幾鍾意食   哈哈 ~

菇場忙呀   其實我叫做連放 3 日   所以做起嘢上嚟都要啲時間 Pick Up   因為我仲有 Holiday Mood   哈哈 ~

Lunch Time 唔出去喇   朝早買咗個芝麻餐包   加多杯黑芝麻谷麥就搞掂 ~

仍然忙   但個肚扯住好唔舒服   好似每月一到咁   唔好啦   又來探我做咩呀 ~

4 點半即走   番到屋企要抖呀 ~

6 點左右去賣外賣   今晚食早飯   哈哈 ~

食完抖陣就沖涼   之後熨衫   本身諗住徑步   但個肚扯到我勁唔舒服   所以想休息 ~

今晚 11 點都自己瞓先   里奧大人仍然追劇~

BBQ @ 咖啡灣 ( 16-MAR-2020 )

天氣唔錯   感恩感恩

我背住阿 mi 整嘢   但聽到佢話排到好似祭祖咁   笑死我   最搞笑佢話細細聲同阿喂講   點解我會聽到   哈哈

即場整醬汁

好耐無試過咁排喇

開爐就個個都好忙   唯獨係我最得閒   哈哈

我同里奧大人嘅早餐   菠蘿包 & 吞拿魚包

自制泰汁   我勁鍾意

隔離嗰枱係 3 個媽媽帶住仔女來燒烤   呢啲時候係要啲親子活動㗎喇

開始燒喇

里奧大人都幫手燒   依家係我最懶

影呢張相   我真係覺得自己好得閒   哈哈哈哈

阿喂話醬汁同燒賣唔夾   咁可以唔蘸嘛   其實次次都係得我同阿 mi 蘸哂啲醬汁   我覺得真係好好味喎

蒜蓉扇貝

里奧大人仍然係 2 隻

我哋 4 個都覺得今次啲玫瑰腸好乾呀

阿 mi 話我有幫手燒魚

其實都係反下佢哋   因為啲蕉葉好易燶

香茅蕉葉燒魚柳 - 好味喎   阿 mi 問我哋食唔食香草 ?!   我話食㗎   蒜蓉包加牛油 & 香草好好味㗎

香葉包雞 - 阿 mi 用班蘭葉包雞   好香呀   啲雞又醃得入味

燒雞翼 & 豬鞍架

燒得好靚

里奧大人捉實比阿 mi 切

豬鞍架

燒大蝦

好多膏呀

拎住碟蝦   即刻諗起喺頭頓食大頭蝦嘅時候   所以嗰刻係覺得好舒服好嘆呀

雞翼好味   可能好耐無食   哈哈

繼續燒

葡汁魷魚 & 吊桶

 金沙骨

我行咗出去影張相   因為好似無影過海灘   哈哈

用心掃茄子

蒜蓉燒茄子好味道   加咗豬媽媽辣醬   好鬼辣

印尼蕃薯

燒馬拉糕 - 里奧大人好有心機切   所以我好放心交比佢做

佢哋反來反去   又夾來夾去   勁似炸緊臭豆腐   嘩哈哈哈   佢哋都好合拍   第時開檔賣臭豆腐都唔錯   哈哈

燒到金金黃黃

口感係外脆內嫩   哈哈哈哈

加咗蜜糖都好好味   因為呢件馬拉糕唔係好甜

自制冰菠蘿

一咬勁凍   敏感牙齒出哂來   所以灘一灘先可以食   勁甜勁 Juicy 呀

( 16-MAR-2020  MON )

今朝 8 點起身   沖埋涼就出門口喇 ~

約咗阿 mi 喂 BBQ   所以去佢哋屋企先 ~

本身諗住食埋早餐先出發   但里奧大人今晚 8 點要 Conf Call   佢話爭取時間見面   同埋要揀個靚爐位置   所以 10 點要到阿 mi 屋企喇 ~

一入屋   阿 mi 就教里奧大人點擦皮褸   之後又比咗一大袋手信比我哋   次次去佢哋屋企都必定有收鑊   我行過見到啲咩零食餅乾呀   阿 mi 阿喂實會叫我拎啲番去食   所以里奧大人成日話我好為食   其實我想睇下阿 mi 食啲咩零食之嘛   因為我覺得佢近期口味唔同哂   哈哈 ~

里奧大人無啦啦好認真咁去睇阿喂口罩嘅規格   之後把聲又好認真同阿 mi 講   如果要口罩就搵佢   睇得出里奧大人好緊張阿喂   哈哈 ~

咁事實阿 mi 阿喂係好抵錫嘅   因為佢哋對我哋好好   同埋成日咩都留比我哋   佢哋對我哋   就好似我家姐對我哋咁㗎 ~

掛住傾   我仲以為要等埋阿 mi 執嘢先 Call 車   咁正想開聲話幫手   點知原來佢哋一早已經執好哂   咁即刻 Call 車走人喇 ~

我同阿 mi 坐車係咁傾   佢教我點玩遊戲儲分   之後落車   佢笑笑口同我講話得我哋開車傾到落車   哈哈 ~

11 點左右到   已經有三個爐比人霸咗   但仲有兩個靚位置   阿 mi 揀咗近沙灘嘅位置   因為唔會曬住 ~

今日超級大風   但就真係唔熱喎   阿喂話一滴汗都無出過   里奧大人同阿 mi 要着番件風褸   我就要戴番條頸巾 ~

燒下食下傾下   勁開心   因為耐無見   又好難得可以唔駛帶口罩傾偈   身心靈都舒暢呀 ~

日落了

準備走人

差唔多 5 點就要走喇   感恩坐到 5 點半左右就上巴士 ~

我同里奧大人喺中轉站落車   阿 mi 佢哋就唔駛   辛苦佢哋又要推架車番屋企   因為拎上車都要 2 個人抬起㗎 ~

番到屋企都 7 點   叫里奧大人即沖涼先喇   之後可以即刻 Set-up 所有嘢   咁就可以 8 點準時 Conf Call ~

阿 mi 比我哋嘅泰國手信 & 自制蜂蠟

我就睇電視啦   里奧大人 10 點終於傾完 ~

今晚 11 點幾都瞓覺先   里奧大人就繼續追劇 ~