咖哩薯仔雞翼 + 印度煎餅 ( 24-MAR-2021 )

前晚食剩嘅白飯   尋晚飲剩嘅紫菜魚蛋湯   其實做一個湯飯都唔錯   哈哈

( 24-MAR-2021  WED )

里奧大人尋晚半夜熄咗風扇   佢話佢覺得凍   同埋我瞓到攣毛蝦米咁   即係我都凍喎   都唔知係咪   哈哈 ~

感恩都一覺瞓天光   同埋起身都精神咋 ~

今朝食芝腿治烘底   仍然覺得超級好味道 ~ 

菇場忙呀   一忙就忙到 11 點幾   話咁快又 Lunch Time ~

去一田買蛋糕比里奧大人   之後再買牛雜米番菇場   今次好多牛膀同牛肺 (唔知係咪咁叫)   食完好鬼滯   同埋勁反胃添呀 ~

又唔忙啦   真係 hHea 住等放工 ~

去超市幫里奧大人買 Flakes   之後諗住行多陣   點知里奧大人話放工   咁我都即番屋企煮晚餐喇 ~

里奧大人打嚟話我買錯   因為有瓜子   我望清楚其實係 Oats 呀   佢仲話我做咩影背面   哈哈

我睇住呢張相嚟買家嘛   無可能錯囉

里奧大人 6 點 45 分左右番到屋企   今晚要 7 點半先開餐   之得頭先快快行啦 ~

第一次見咖哩有層油

是日晚餐 - 咖哩薯仔雞翼 + 印度煎餅

咖哩薯仔雞翼 - 尋晚整定   今晚翻熱就可以了   無諗過份量咁多   我要分兩個碟蒸熱呀   今次仍都係用田師傅咖哩醬   但覺得辣咗好多   以前我係要加指天椒先覺得辣㗎   今次用澳洲薯仔   其實同食中國薯仔口感無咩分別   哈哈   但我覺得一包澳洲薯仔都平   都好似有 10 小個   因為依家喺街市買 2 個中薯仔都唔平呢 ~

澳洲薯仔 ($21.9)

印度煎餅 - 第一塊差啲煎燶   我見好快脹卜卜   所以即刻反佢   之後就痴哂鑊   第二塊又無脹卜卜   咁樣反而無痴底   真係比佢玩死   哈哈 ~

洗埋碗就開機洗衫   之後即沖涼休息   個頭有少少痛   好在今晚唔駛追劇 ~

喺一田買嘅日本海鹽 ($13.9) / 幸堂紅茶蛋糕 ($29.9)

買比里奧大人嘅午餐   買嘢比佢好煩㗎   又要唔甜又要唔熱氣   最慘係我唔食蛋糕同餅乾   只係覺得好食就買咋   之前買比佢嘅窩夫   話脆卜卜好熱氣喎   成盒比番我

 

今晚睇 "女神降臨" 花絮   里奧大人話我真係好鍾意睇佢哋   因為無字幕都可以睇到咁開心   哈哈 ~

我睇花絮就覺得佢哋拍攝真係非常認真   一個好簡單嘅鏡頭   原來都拍咗幾次   同埋天氣係超級凍   但拍嘅時候就肯定唔可以着厚褸   真係睇見都辛苦 ~

今晚個人都好似占寒占凍咁   唔多舒服呀   所以 11 點唔夠都瞓喇 ~

燒汁焗鯖魚 + 清甜白菜仔 + 紫菜魚蛋湯 ( 23-MAR-2021 )

( 23-MAR-2021  TUE )

又一覺瞓天光   真的感恩感恩 ~

今朝得 15.5 度咋   簡直係冬天嘅溫度   哈哈 ~

無咩胃口   又食奶醬多   阿姐好好笑   用堅定嘅口吻話: 我知係妳   因為咖啡少奶走甜 ~

菇場唔太忙   咁做 Email Filing 喇 ~

諗住唔出街   不過家姐話想買珍珍薯片   因為 $10 一包好抵   咁我出去買啦 ~

買完再行陣   今日 Lunch 食杯麵   原來已經過期 1 日   好在記得食佢咋   哈哈 ~

一路食一路睇 "女神降臨"   其實每次睇韓劇   真係要睇兩次   因為睇得表情又睇唔切字幕   真係睇第兩次先知原來對白係咁講 ~

阿齋見我睇   佢話佢已經睇哂   佢都覺得套劇好搞笑 ~

菇場唔忙   但又無啦啦好眼瞓   我估係因為頭先睇劇 ~

賀年零食   又係食極唔完

放工即走   番到屋企可以抖下先煮 ~

里奧大人 6 點 45 分放工   我都預備   等埋里奧大人沖涼就再煮出前一丁 ~

是日晚餐 - 燒汁焗鯖魚 + 清甜白菜仔 + 紫菜魚蛋湯 

燒汁焗鯖魚 - 其實我幾鍾意食鯖魚   出面食鮪魚定食都貴㗎   同埋我知道原來鯖魚咁平   仲更加唔會喺出面食呢   哈哈 ~

清甜白菜仔 - 有渣嘅   平時我半斤半斤菜咁買   今晚買一斤就出事   哈哈 ~

紫菜魚蛋湯 - 估唔到煲起來咁多   要分兩餐了 ~

洗埋碗就沖涼喇   抖到 9 點就睇女神降臨 ~

睇到 11 點 40 分   終於追哂成套劇喇   又要抖抖先 ~

臨瞓前   我話呢套劇都帶咗啲訊息出來   笑人哋點點點   但就唔會關心人哋感受   我話真係 "捧頭當喝"   但我同里奧大人講話係呢四個字   叫佢同我擺番啱位置   佢真係諗㗎   之後好激動話係咪 "當頭捧喝" 呀 ?!   我話係呀   我笑到流哂眼水 ~

燒鴨拚叉燒 + 翠肉瓜黑蒜燜雞 + 菠蘿咕嚕肉 (外賣) ( 22-MAR-2021 )

( 22-MAR-2021  MON )

尋晚瞓得唔係咁好   感恩起身都 OK ~

今朝得 15.5 度   又好有冬天 Feel   無諗過 3 月尾係咁嘅天氣呢   但濕度就 65%   今日天氣又濕又凍又灰灰的天   加埋係星期一   真係好在有 Mood 番工咋 ~

對眼咁樣   我覺得好搞笑

早餐食奶醬多   唔想諗食咩呀   以前覺得啲人成日話唔想諗食咩   所以食嚟食去都係嗰樣   估唔到依家自己係咁   哈哈 ~ 

Lunch Time 去一田幫家姐買芝士   之後去譚仔買麻辣米線   因為我占寒占凍又打噴嚏呀   所以食麻辣米線驅驅寒 ~

菇場唔忙   可以抖抖喇 ~ 

無啦啦勁眼瞓   下次都係唔好睇劇喇   始終唔係高清   哈哈 ~

家姐今日成日影佢眼瞓個樣   下次叫佢逢星期一要影啲開眼嘅相先得   哈哈

放工即走   今晚唔煮喇   買埋外賣就番屋企 lu ~

沖埋涼就開機洗衫   之後即刻開餐喇   好想快啲搞掂就睇 "女神降臨" 呀 ~

7 點 45 分開始睇喇   一睇又睇到睇到 11 點半呀又   如果唔係要番工   真係會睇埋大結局   哈哈 ~

西洋菜餃拚鮮蝦雲吞 + 紅油青瓜拚松花皮蛋 + 滷水雞翼雞腎拚牛筋 ( 21-MAR-2021 )

家姐喺 Muji 買咗包醬油餅比我   又比多包棉花糖   里奧大人同事就送包櫻花蝦比我

( 21-MAR-2021  SUN )

今朝里奧大人出咗門口   我居然好好瞓呀   瞓到 9 點半鬧鐘響就起身 ~

拖埋地就沖涼   抖陣就出門口喇 ~

本身起身唔餓   但唔知係咪用力拖地   所以勁餓   要食熱狗餐 ~

如果我銀包有好多散紙   我多數用嚟比早餐錢   咁唔駛咁重嘛   我呢餐係 $29   咁拎咗 2 個 $5 + 3 個 $2 + 3 個 $1   比錢嘅時候就一定會講今次比得好散 ~

行咗十幾步   有人叫小姐小姐   我感覺係叫我   我見佢拎住張單出嚟   即話係咪比漏錢呀 ?!   佢話係呀   妳比漏 $10 呀   唉   真係肉酸嫂呀 ~

食完就要去聽嘢   之後就同里奧大人一齊食 Lunch ~

一路行一路腳震震   因為突然間凍到好似冬天咁呀   明明朝早出門口都熱熱哋 ~

 

焗黑椒芝士牛柳飯 - 同里奧大人 Share 食算喇   我唔係咁餓

有 5 塊牛柳   份量算多呀

食完就分頭行事   里奧大人去開會   我就去家姐屋企 ~

Berry 好搞笑   想撲我但又唔撲   但我一行入廁所洗手   佢又係咁跟住我 ~

好大塊牛舌片

 

又食芝士骨喇

我成條裙都係 Berry 啲毛   肯定又比里奧大人鬧   哈哈

其實咁樣好迫   不過佢成日都鍾意咁    

佢瞓到好林咁   但其實幾秒之後又會醒哂

晚餐係狗糧+三文魚+風乾雞肉粒

個樣好搞笑

又食

之後又望   永遠企定定一次食哂   但今晚勁呀   清哂成碗狗糧

鍾意周圍望

左望右望   但就唔望我

但望我就咁嘅樣   哈哈哈哈    

呆呆哋嘅樣   好似好乖咁   家姐叫佢傻妹   我叫佢做顛婆   家姐話我好衰呀   哈哈

其實佢個樣都係攰

我坐喺梳化抖陣   之後家姐拎疊錢出嚟   話出咗 Bonus   所以要比我同里奧大人   我已經話唔要   佢係都比   咁我要啦   基本上都係買番嘢比佢同 Berry 姐   再唔係就比佢生日大利是   所以我成日話佢真係比嚟比去   哈哈 ~

佢之前去咗 MUJI 買咗朱古力同棉花糖   又係咁問我要唔要   話唔要就即刻開嚟兩份食   勁搞笑   係都要我食咁 ~

里奧大人 5 點 40 分開完會   咁我都番屋企喇   家姐好搞笑   話里奧大人好少咁早放工   仲話個天仲咁光就車我番屋企 ~

沖埋涼就預備晚餐   里奧大人無耐都番到屋企 ~   

今晚都要 6 點 45 分開餐   比我想像中遲呢 ~

是日懶餐 - 西洋菜餃拚鮮蝦雲吞 + 紅油青瓜拚松花皮蛋 + 滷水雞翼雞腎拚牛筋

西洋菜餃拚鮮蝦雲吞 - 我頭先先同里奧大人講話今晚食八方雲集餃子   咁啱家姐話喺三才買餃   我叫佢幫我買雙拚呀   因為里奧大人鍾意食薄皮雲吞餃子呢 ~   

紅油青瓜拚松花皮蛋 - 想食濃味邢簡單嘅嘢   整呢碟就最方便   哈哈 ~

滷水雞翼雞腎拚牛筋 - 里奧大人同事整㗎   勁好味 ~

洗埋碗就可以抖   今晚都凍呀   洗完碗都無出汗   唔駛再沖多次身 ~

我叫里奧大人聽朝蒸粉果   中午食杯麵   佢話食麵食到驚   之後我話咁掉咗去啦   佢偷笑話咁又唔駛掉   咁我話我拎哂番公司食   等你無得食   佢當堂唔敢再講   哈哈 ~

隻眼得少少眼白   真係勁樣衰   但我覺得好得意呀   哈哈

9 點即睇 "女神降臨"   我真係坐定定睇㗎   所以里奧大人知我真係鍾意睇呢 ~

里奧大人話未眼瞓   咁我話睇多半集   終於 12 點 10 分先瞓覺 ~

日式雞肉餃子 + 黑芝麻湯丸 ( 20-MAR-2021 )

( 20-MAR-2021  SAT )

間唔中嘅星期六   都會諗如果唔駛番工都唔錯   哈哈哈哈 ~

早餐明明要少米粉   但比錯公仔麵   我唔想食嘛   因為次次食完都好滯囉   嗚嗚 ~

菇場唔忙呀   個個 Hea 住等放工 ~

我同里奧大人一齊去 mega BOX   所以我行住一田等佢   佢放工我先去巴士站 ~

2 點左右落車   食埋午餐先行 mega BOX ~

咖哩雞扒飯 ($40) - 都幾好味喎

迷你干燒伊麵 ($40) - 呢個都好味   最緊要唔油

一去到又買咗兩條 One Piece   感恩 AEON 會員有 95 折   哈哈 ~

其實今次主要係想買張薄嘅冷氣被   我同里奧大人講話唔要粉紅色就可以   咁有張係黃色   圖案係 Line 嘅 Sally   但我話 Line 都 Out Out 哋   所以再去睇其他   點知睇到野口同小丸子就勁鍾意   但係粉紅色   不過我話照買啦   哈哈哈哈   里奧大人好驚訝話粉紅色喎 ?!   我話呢啲咪邪囉   仲講   哈哈哈哈 ~

買完再去超市買嘢   我叫里奧大人睇其他嘢   之後佢去睇高達   我完全唔記得呢回事   好在佢自己周圍行下咋 ~

GUNDAM 完全唔吸引

鯊魚肉燒賣 $61.9/包   因為我唔知價   打比家姐   佢話買開係 $60   之後我話有 95 折抵嗎 ?!   佢話都抵   咁我其實咪仲買得平過佢喎   不過佢又話唔要   咁我自己買 1 包算喇

mega BOX 有得儲電子印花   但原來唔可以同一商店有兩張單   真係好 Cheap 啦   咁 AEON 超市同服裝部唔同層數   根本無可能夾單買嘛 ~

搞掂哂就搭車番屋企   但我就要再去超市買廁紙 ~

Andrex 廁紙 3 卷只係 $99   因為買滿 $150 有 95 折   其實買埋其他嘢都好快過 $150 㗎喇   之後家姐話維他奶都起碼 $15 啦   真係好在家姐話我知咋   我完全唔知送維他奶   我次次一覺得抵就會 Whatsapp 比家姐先   有啲細細隻圖話送啲咩   我唔睇架 ~

買廁紙都只係 $99   起碼要買多 $60 先過 $150   所以我買急凍鮪魚   價錢係 $21/2 Pack ~

我計好要買夠 $63   即係 $99+$63 = $162 就啱啱過 $150 ~

比錢嘅時候   Cashier 話 $12x   我仲問鯖魚唔係 $21/2 Pack 咩 ?!   但我居然拎咗 3 Pack 呀   其實我係應該要拎 6 Pack 嘛   最後叫 Cashier 嘟夠過咗 $150 就得   之後我再拎番 3 Pack 就走人   勁樣衰   哈哈 ~

番到屋企即沖涼   里奧大人話要開冷氣添呀 ~

是日晚餐 - 日式雞肉餃子 + 黑芝麻湯丸

日式雞肉餃子 - 又焗又煎   個樣都唔熟咁   我已經焗到啲餃子皮好硬喇   激鬼死我   但里奧大人話唔關我事   係啲餃子皮問題   可能佢知我又熱又攰   所以唔會話係我問題呢   哈哈 ~

黑芝麻湯丸 - 好想食呀   所以食完餃子就即煮嚟食呢 ~

洗埋碗再沖涼   諗住 8 點睇 "女神降臨"   點知都係 9 點先睇   激死我   因為真係諗住食餃子係好方便   唔駛咁多時間煮嘛 ~

睇到 11 點幾都瞓喇   今晚要開冷氣瞓 lu ~