客家原味粉 @ 紅磡 ( 24-FEB-2024 )

豬潤粉腸淮山麵 ($50) - 個湯底有薑絲   所以飲完啲湯   個人好暖好舒服

鮮牛肉肉丸淮山麵 ($50) - 肉丸係好味嘅   如果佢有生肉丸   我會買嚟打邊爐   哈哈   

( 24-FEB-2024  SAT )

尋晚比里奧大人啲鼻鼾聲嘈醒幾次   塞耳仔都唔掂呀   佢一嘈我就大力郁   不過佢都係仍然咁嘈   哈哈哈哈 ~

之後 2 點幾   我都校番鬧鐘 7 點 25 分先起身   本來諗住去做運動都唔做喇 ~

雖然沖涼洗頭係精神啲   但對眼好澀   好在今日番半日咋 ~

早餐食甜餐包夾芝士   食完就靈修 15 分鐘先番工 ~

菇場唔忙啦   溫總同我講話妳番呢個週㗎 ?!   我話妳咪嚇我啦   好在見埋阿花   咁就肯定自己無番錯工啦   哈哈 ~

今朝同 CC Plan 行程   又搞咗個幾鐘   咁就好啦   好想快啲放工   因為好鬼攰呀 ~   

放工即走   家姐尋日話請我食生日飯   真係覺得自己幾巴閉咁   哈哈 ~

因為里奧大人今日番晏   如果太夜食   我又唔想家姐咁夜番到屋企   所以話一齊食午餐喇 ~

里奧大人同家姐一齊去攞位先   感恩可以坐到最後一張卡枱呀 ~

家姐話買唔買生日蛋糕好 ?!   我話千其千其唔好買   我真係唔想食呀   真係食到驚咗 ~

我今想快啲到餐廳   所以搭貴車呀   咁佢哋 Send 餐牌比我睇   但其實我都已經到咗門口   佢哋都好愕然   點解會咁快到   哈哈 ~

叫完哂嘢就傾偈啦   里奧大人叫家姐食飯領禱呀   因為我哋平時食飯都會一齊拖住手祈禱呢 ~

暢飲套餐 (會員價 $253)

里奧大人好搞笑   居然影得仲快過我   咁都好㗎   佢開心先會咁呢   哈哈

食肉獸 (細) - 細細個都好   咁就唔駛食包包食飽

秘製燒豬排骨 - 幾入味

我鍾意炸薯條蘸茄汁 + Tabasco   勁重口味呀呢

炸雞 2 件 - 雞肉唔嫩滑   無以前咁好食囉

Asahi x 8 罐 - 飲品一係啤酒   一係一大 Jar 凍檸茶   咁我哋揀啤酒   因為我唔想飲凍嘢   同埋啤酒飲唔哂可以拎番屋企嘛   家姐見到辛口   居然話要試啖   仲以為佢想拎比姐夫飲添   哈哈

凍檸檬茶 ($28) - 家姐成日話新年食滯咗   所以依家一定飲檸檬茶

香蒜大蝦炒意粉 (無汁) ($78) - 一致認為好普通   但我哋唔想食焗飯   又唔想食肉醬呢啲重口味醬汁   所以諗住呢個最啱食囉

即磨咖啡 - 我話要飲咖啡   因為尋晚好似無瞓過咁呀   哈哈

食下傾下   好快又 3 點   里奧大人要去番工喇   我同家姐 3 點幾先走 ~

家姐陪我番屋放低嘢   一入屋見到枱面好多嘢   終於比家姐見到里奧大人拎完啲嘢   唔會放番原位嘅境況喇   呵呵 ~

家姐話士多啤梨好抵喎   所以又買比我哋食

又比埋蝴蝶酥同 2 條 Tempo 抽取式紙巾   咁樣加加埋埋就重啦   我已經諗定聽日去佢屋企拎嘛

我同家姐都要去整嘢   所以我送完佢搭車都要走喇 ~

搞掂就番崇拜   估唔到見到麵包   佢想約食飯   但里奧大人呢排又忙   要等佢得閒啲先可以食飯呢 ~

崇拜完畢就去里奧大人公司坐陣   差唔多 7 點半先放工   咁食埋晚餐就番屋企休息喇 ~

沖埋涼就抖下   都唔想做任務家務呀 ~

家姐話中午嗰餐好飽   夜晚可能食啲零食就算   但工人話買咗飯   同佢 Share 食喎 ~

咁工人今日係放假嘅   但佢都會帶 Berry 行街   所以家姐出門口前比小小心意比佢呢 ~

巴東牛肉飯唔錯咁喎   但家姐話工人唔餓得   一定會自己食先   哈哈

睇多陣 Youtube 又打陣機   今晚 10 點 40 分都瞓覺喇 ~

海悠 @ 官塘 ( 23-FEB-2024 )

炸子雞半隻 - 皮脆肉嫩   同平時喺酒樓食嘅唔一樣   哈哈

椒鹽魷魚鬚 - CC 不嬲好少食熱氣嘢   所以佢話叫   我以為自己聽錯   我話星期二喺一田已經想買嚟食   不過懶焗所以唔買   咁今晚有得食真係好開心呀

羅定豆豉雞半隻 - 我老花又手殘   掃錯咗呢個餸   我話真係唔好意思   阿濤就話唔係咁樣   又點可以試多款新嘢呢 ?!   之後我哋覺得呢個雞好食過炸子雞添呀   哈哈

脆米金沙炒福花 - 我好鍾意食脆米㗎   我食咗好多   但因為有好多鹹蛋黃醬   所以食完好滯   哈哈

安格斯牛粒西炒飯 - 一放上枱已經聞到好香西炒飯嘅味道   平時無味家嘛   同埋份量好巨   最後食剩大半碟   要 CC 拎走呢

( 23-FEB-2024  FRI )

好感恩又一覺瞓天光呀   其實鬧鐘未響都醒醒哋   所以鬧鐘一響都可以即刻彈起身 lu   呵呵 ~

今朝同里奧大人出去食早餐   開心開心 ~

因為里奧大人本身今日放假   但佢唔記得原來約咗人早上同下午開會   所以就要番工喇 ~

里奧大人話切開一嚿嚿   我話都好大嚿下喎   因為我係會切開一粒粒咁呢

食食下里奧大人夾塊雞皮比我   我心諗唔係話雞皮無益咩 ?!   之後佢話塊雞皮脆呀   有時佢做埋啲嘢係幾令人感動嘅   因為我覺得我講嘅說話   佢唔會記得嘛 ~

食完都搭車番工   唔駛整早餐真係好舒服   行路都快啲   哈哈哈哈 ~

菇場唔忙啦   但無啦啦胃痛   唔知係咪杯咖啡太濃呢 ?!

Lunch Time 出去行下先   今日凍咗好多咁呀   所以行 Mikiki 算喇 ~

行咗半個鐘都走人   感恩無胃痛喇   咁可以食杯麵   因為諗唔到想食咩呢 ~

泡菜拉麵

呢包漬物只係 $15.9   所以買嚟試下

又係好日唔打去里奧大人公司搵佢   佢又咁啱出咗去   真係好多時係咁㗎喎 ~

咁阿妹都聽得出係我   所以又同我傾陣偈   佢話里奧大人去訂枱食飯   但知我又無話放假   所以一定唔係我請佢哋食飯喎   佢個邏輯都係啱嘅   哈哈 ~

菇場仍然唔忙   咁安心等放工喇 ~ 

放工即走   今晚約咗 CC 同兔兔食飯   我哋約咗 6 點 15 分喺 Circle K 等   但里奧大人塞車   佢話自己去飯店   咁我想去 APM 洗手間   咁啱 CC 佢哋都喺 APM   所以我約佢哋一齊去飯店 ~

諗住行去飯店   咁啱里奧大人又到咗 Circle K   咁一齊行去啦 ~

點完餸就開始傾偈啦   又係咩都傾一餐   不過兩個男人飲咗酒有啲眼瞓咁   所以我同 CC 就係主力講嘢喇   哈哈 ~

最搞笑係 CC 有個同事叫溫總   身體又係好弱雞   講嘅特徵同我公司嘅溫總係一樣   之後我話有時啲人名相同   個格都係一樣咁㗎   我身邊正正有 3 個人就係咁   所以有時知道佢哋個名係一樣   基本上都知佢係咩人 lu ~

之後講開搭巴士   我話之前個司機勁衰   真係一上車就開車   有次差啲連個袋都比隻門夾住   可想而知佢幾快關門   又成日叫老人家行快啲   小朋友上車慢啲又鬧   真係不知所謂囉 ~

我話開咁快   比盡你早 10 分鐘到站頭   但你次次早 10 分鐘   分分鐘追得住前面班車   咁里奧大人話係咪快到站頭有 Bonus 呢啲呀 ?!   CC 碌大對眼話咁樣仲得了   個個衝紅燈都要快去站頭啦   我話可能飛埋站添啦   到時最危險係我哋啲乘客啦   所以唔會咁啦應該 ~

傾呀傾   好快又到 9 點   見到成個場無人喇   所以我哋都走 lu ~

今餐係 CC 兩公婆請我食生日飯   真係太客氣啦   其實初初我係諗住 1 月同佢哋食飯   但里奧大人 12 月底身體又唔好   諗住再睇下 1 月點先   咁啱 CC 年三十晚話去完旅行再約我哋食飯   所以約咗今晚食喇 ~

CC 話去海悠   因為佢哋之前食過   話好夠鑊氣同好味道   咁我哋又無咩所謂   唔駛我哋諗最好   哈哈   里奧大人都對呢餐都讚不絕口呀   同埋最緊要夠靜   咁傾偈就舒服好多呢 ~

一齊行去 APM   男人們去洗手間   我同 CC 就行去巴士站等佢哋   感恩大家都係 5 分鐘就有車呀 ~

里奧大人無啦啦話要食朱古力雪糕   不過我話有買一送一先食   哈哈 ~

番到屋企即刻食雪糕   食完就開機洗衫同沖涼喇 ~

CC 送比我哋嘅潮汕手打牛丸   里奧大人話個個都比嘢我食   哈哈

里奧大人 10 點 45 分都瞓   我就 11 點半先瞓呀 ~

臘潤腸 + 臘肉炒芥蘭苗 ( 22-FEB-2024 )

( 22-FEB-2024  THU )

感恩一覺瞓天光呀   真係好耐無試過   唔通食咗中藥先咁好瞓 ?!

依家如果做運動   就會 6 點 50 分起身   因為咁早起身   係想慢慢刷牙洗臉換衫囉   太快好易暈㗎   哈哈 ~

里奧大人今日番晏   所以我自己食早餐   就咁食個甜餐包就算喇 ~

食完就靈修 20 分鐘   之後番工 lu ~

菇場唔太忙   抖下又做自己嘢喇 ~

阿花去完韓國   又買咗手信比我   Sanha 好鍾意 Ryan 㗎

Lunch Time 出去買菜   之後再去 MOS BURGER 食午餐   食完又行一田   行到差唔多 12 點 45 分都走喇 ~

VIP 會員優惠週   只係 $18 就買到個 MOS BURGER   我星期二都諗定遲啲食下 MOS BURGER   咁尋日又想食熱嘢就無食啦   之後就見到有優惠週   所以好感恩呀   因為平咗十幾蚊㗎

菇場突然間忙呀   但忙咗個幾鐘就搞掂 lu ~

放工即走   番到屋企都即預備晚餐   里奧大人番到屋企就休息   但佢唔記得拎手機   所以又要番番公司拎   之後阿妹 Whatsapp 我   話我親愛嘅老公留咗手機喺公司   哈哈   因為頭先打比佢都無手機響   咁里奧大人先知無帶手機囉 ~

諗住蒸會快啲   點知都要 7 點先開餐 ~

是日晚餐 - 臘潤腸 + 臘肉炒芥蘭苗

臘潤腸 - 因為尋晚食剩盒油雞燒鴨飯要食   所以就咁蒸細條嘅臘潤腸就算   咁里奧大人可以帶飯呢 ~

臘肉炒芥蘭苗 - 好耐無買芥蘭   見到錢大媽有芥蘭苗都即買喇   一盒只係 $5.2 都好抵食 ~

食完飯都即刻食腐竹白果糖水喇   里奧大人話係細細聲煲㗎   佢食緊嘅時候   叻叻叫佢拎碗比太太   咁佢自己 "北" 啦   佢話原來底部好多白合同湯丸   但啲同事只係 "北" 咗糖水 ~

估唔到有 5 粒湯丸   我其實想食好耐㗎喇   但懶去超市買   所以今晚食到好開心呀   里奧大人係咁問好唔好味 ?!   我話真係好味道呀

皇太后又買咗木瓜比里奧大人   之後里奧大人話一陣太太又會回禮   皇太后話自己食咗唔好話佢知啦   但里奧大人話食物對太太嚟講係好重要   錢都可以唔比   但食物一定要上繳   哈哈

食完就做小清潔   之後沖涼休息 lu ~

睇多陣 Youtube   今晚 10 點半都瞓覺先喇 ~

油雞燒鴨飯 + 燒鴨叉燒飯 (外賣) ( 21-FEB-2024 )

油雞燒鴨飯 - 因為尋晚仲剩咗少少燜冬菇   咁一定食埋去啦   所以呢盒完全無食過   之得唔買啦   哈哈

燒鴨叉燒飯 - 係比里奧大人做聽日嘅午餐   但佢食半白盒飯就夠   所以我同佢 Share 食呢盒白飯

剩番 1 棵唐生菜   咁又食埋去啦   如果聽晚食   兩個人食又太少咁

( 21-FEB-2024  WED )

尋晚去完廁所   都幾難先瞓得番   其實呢排都係咁   所以好怕半夜醒 ~

今朝 6 點 50 分都起身做運動   感恩起身都精神   唔係又可能唔做㗎喇   哈哈 ~

煲埋薑茶再焗麵包   諗住早咗整嘢   點知都係  7 點 50 分先食得 ~

早餐食丹麥條同牛油排包夾芝士   食完鹹要食甜   哈哈 ~

菇場唔忙   又做自己嘢 ~

Lunch Time 行咗陣就去食牛筋河   食完又行一田   行到 12 點 45 分都走人喇 ~

忙咗陣又可以抖下   之後等放工 lu ~

放工去睇中醫   因為里奧大人今晚送水姑機   所以我唔駛煮飯呢 ~

同醫師講話條腰劇痛   佢話每月一到影響   之後幫我把咗 3 次脈   再話我好虛好虛   因為每月一到太耐啦   所以食完要再睇   平時佢叫我兩星期後睇都無問題   但今次我身體太虛   要加緊好好調理一下喎 ~

睇完就買晚餐番屋企   本來想出去食   但都係想早啲番屋企 ~

沖埋涼就開餐   食完抖陣就休息喇 ~

睇睇下 Youtube 都瞓着咗   我記得係 9 點 15 分瞓覺   里奧大人 9 點半番到屋企   我就醒咗喇 ~

里奧大人話今日開咗機洗衫   咁等我番屋企做少一樣嘢   咁又唔錯喎   知我喺屋企多嘢做   哈哈 ~

之後話知道我今晚一定好攰   因為我朝早話幫佢放好啲抓毛衫   但無放到呀   我平時講得出多數做得到家嘛   哈哈 ~

睇多陣 Youtube   今晚 10 點半都即刻瞓覺 ~

辣汁焗五花腩 + 冬菇唐生菜 ( 20-FEB-2024 )

食埋聽晚應該食哂

( 20-FEB-2024  TUE )

尋晚都要開冷氣瞓   雖然去咗次廁所   但感恩都好快瞓得番 ~

今朝 7 點 14 分都醒咗   咁起身煲薑茶同整早餐 lu ~

早餐食牛油排包加芝士   好耐無食排包   好似無咁好味咁噃 ~

里奧大人話依家 8 點 05 分咋   我話今日我早咗 10 分鐘起身   所以啲時間咪好似早咗好多咁囉 ~

食完就靈修   但只係靈修 10 分鐘就出發番工喇 ~

菇場忙咗陣   之後又等放飯 lu ~

Lunch Time 去食牛肉麻辣米線   因為好想祛濕呀   哈哈 ~

食完就去一田買嘢比 CC   行完去買蛋撻比茶記啲人   順便派埋利是比佢哋   搞掂就即番菇場喇   已經 12 點 57 分啦 ~

蜂蜜牛油什錦果仁 ($45) - 算係健康嘅零食   哈哈 

唔忙又做下自己嘢   之後 4 點就開始忙   好在放工前搞掂 ~

放工即走   今晚里奧大人 6 點 45 分先放工   我先啱啱煮好 ~

是日晚餐 - 辣汁焗五花腩 + 冬菇唐生菜

辣汁焗五花腩 - 整呢個餸又係好簡單   雖然係五花腩   但我哋就唔會食肥膏嘅部份   我試過一口咬嚿肥膏   但真係頂唔順嗰下口感   哈哈 ~

冬菇唐生菜 - 咁樣個菜就無咁寡   所以我鍾意整燜餸   留番個汁煮菜都唔錯㗎 ~

洗埋碗就同里奧大人去大生買嘢   之後都番屋企 lu ~

沖埋涼就休息   里奧大人就要熨兩機衫   因為我條腰好痛呀   企唔到咁耐呢 ~

睇多陣 Youtube   今晚 10 點 25 分瞓覺 ~

蠔油燜冬菇支竹五花腩 + 菜心苗 ( 19-FEB-2024 )

我今晚飲咗兩碗湯   真係飽到連飯都唔駛食㗎

( 19-FEB-2024  MON )

呢排瞓得麻麻哋   真係最怕呢啲天氣   凍又唔係凍   熱又唔係熱咁   加埋又潮潮濕濕仲慘 ~

早餐食窩夫   里奧大人晏啲約咗水姑食早餐   本來我想出去食   但最後都係喺屋企食 ~

食完就靈修 15 分鐘   之後家姐 Whatsapp 佢食咗咩早餐   之後又繼續傾   由 8 點 25 分傾到 9 點 05 分呀   但其實唔覺唔覺又半個鐘   傾偈時間真係覺得特別快   哈哈 ~

菇場忙咗陣就可以做自己嘢   咁就好啲啦   無咁悶嘛 ~

Lunch Time 出去行陣再去食鯪魚球河   食完就去買波子提   之後又行埋一田   行到 12 點 55 分先番到菇場呀 ~

~

仍然唔忙   可以抖下 ~

放工即走   番到屋企都即預備晚餐 lu ~

一煲可以食幾餐   所以我好鍾意燜嘢就係咁解   哈哈

是日懶餐 - 蠔油燜冬菇支竹五花腩 + 菜心苗

蠔油燜冬菇支竹五花腩 - 尋日燜定㗎   今次里奧大人都話好味道   睇佢食飯嘅速度就知㗎喇   哈哈 ~

菜心苗 - 終於食哂   好在無變冰咋 ~

洗埋碗再開機洗衫   咁又已經 8 點了 ~

之前喺家姐屋企拎兩個 Rockit Apple   真係好好食呀   好爽脆   口感完全唔似食蘋果咁㗎   下次等一田大減價先再買嚟食   唔怪得次次都見咁多人買啦   原來咁好食

睇下電視又睇下 Youtube 又打下機   今晚 10 點半都瞓覺   呢排瞓得麻麻哋   所以想早啲瞓   瞓多啲都好㗎 ~