遇見小麵 @ 紅磡 ( 5-FEB-2026 )

超級碗 (多拚澆頭麵) 套餐 ($69) - 滷水蛋好入味呀

牛𦟌都好食

豬骨丸子小鍋冒菜套餐 ($54) - 食唔哂白飯   所以夾咗 2 粒丸同啲魚腐就可以成為一個午餐㗎喇

琥珀冰粉 - 呢個冰粉好味呀   有點兒煙煙韌韌   因為之前喺十二味食過   口感係腍劈劈咁呢

( 5-FEB-2026  THU )

感恩瞓得唔錯   今朝我鬧鐘響咗以為 7 點半   但原來係 7 點   好奇怪點解 7 點響囉   里奧大人話可以起身食埋早餐先陪 Y 姑去醫院   之後佢就開焗爐焗熱麵包   本身諗住佢要晏啲先食㗎   咁依家食埋就更好了 ~

早餐食甜餐包搽花生醬   里奧大人就鍾意食鹹餐包多啲   我記得細個病嘅時候   食完鹹餐包先食藥   所以食鹹餐包係一個兒時陰影   哈哈 ~

菇場唔忙   家姐喺 Email 比咗張蘿蔔糕劵比我   有效期 25-01-2026 至 13-02-2026   我即睇日曆幾時拎好啦   咁諗住 3 月 1 日先拎   之後同家姐講話點解咁奇怪   叫人新年後先拎糕嘅 ?!   家姐話 2 月17 號過年喎   好在同家姐講啫   我又衰心急睇嘢   以為張劵係 25-02-2026 至 13-03-2026 呀 ~

我都好唔明白自己   點解咁都可以睇錯   哈哈

Lunch Time 蒸好飯就出去行下   咁正想入間舖頭睇下啲薑   職員叫家姐入嚟睇下啦   我即望後面啦   原來佢係叫我   咁叫法都幾搞笑 ~

經過 759 就買薯圈比里奧大人   佢尋晚見到包薯圈好開心呀   即刻拎起手仲笑哂話拎番公司食   但我話係比糟糟㗎   咁所以今日再買比佢呢 ~

明明二件價 $32.9   但收咗 $36.2   我行去睇多次個牌啦   真係 $32.9 噃   之後職員再拎個牌出嚟睇   話優惠期至 2 月 1 日   我話今日 2 月 5 號喎   職員呆咗   我話唔緊要啦   我都會買嘅   真係勁樣衰呀   我口講 2 月但個心仲停留喺 1 月   以為仲有成個月先到呀   今日真係對所有日子都錯哂   不過無計啦   今個月好忙   又多嘢要拎   記到我都亂哂 ~

桃哈多家庭裝厚切薯格鹽味 / 桃哈多家庭裝薯圈清湯味

菇場忙呀   但忙到 2 點就可以抖下喇 ~

做下自己嘢又好快放工   今晚去睇中醫   感恩血氣好咗   但下星期都要再嚟睇多次   之後就可以得閒先睇 ~

我走嘅時候打比里奧大人   佢好驚訝話已經睇完 ?!   因為佢頭先比人捉住傾嘢走唔到   所以依家要急急腳嚟同我食晚餐呢 ~

今晚去遇見小麵   上次先話唔好食咁密   估唔到又去食   哈哈 ~

食完就去 AEON 行下   之後買糯米雞比里奧大人做午餐   最後買埋糖水就番屋企 lu ~

開埋機洗衫就沖涼   差唔多 9 點 40 分先食糖水   因為錄咗 "非常檢察觀"   咁等錄完先睇嘛   唔駛睇廣告正好多㗎 ~

睇完就再睇番第 1 集   原來都幾好睇喎   所以睇到 11 點 15 分先瞓 ~