上海排骨酸辣上海麵 ($48) - 依家鍾意飲酸辣湯 因為夠熱
酥炸雲吞 (5 粒 $27) - 好想食呀 所以一定要叫嚟食
再叫多個鹹粢飯 ($20) + 冰凍豆漿 ($10)
( 7-FEB-2026 SAT )
今朝 7 點 15 分起身 沖埋涼就去家姐屋企喇 ~
一落車打比家姐 佢咁啱同 U 姐一齊帶 Berry 女行街 咁我都一齊行喇 我離遠見到 Berry 之後再同佢擦身而過 Berry 即刻企定定 U 姐話媽咪呢 ?! 佢隻耳仔即刻豎起 再擰轉頭望我呀 見到我就即衝埋嚟 撲到我就差啲跌呀 佢啲力真係唔野少 ~
諗住影張相 但佢繼續撲埋嚟
Berry 望住家姐唔肯走 咁我哋陪埋佢番屋企先食早餐呢 ~
好耐無同家姐一齊食早餐咁 所以我好開心呀 哈哈 ~
家姐屋企 9 點會有師傅嚟整嘢 佢叫姐夫早啲食完早餐番屋企 咁我哋就可以慢慢嘆喇 呵呵 ~
珍寶農場雞扒 + 奶油脆脆豬配雙餐肉 ($45) - 估唔到家姐唔鍾意食奶油脆豬 因為真係好少同佢食茶記 同埋佢話佢麻麻哋鍾意去茶記 但我同糟糟就好鍾意 呵呵
沙爹牛肉即食麵 + 牛油多士配腸仔炒蛋 ($39) - 家姐要啲麵爽啲 我無問題 但如果要淋啲就會話唔可以㗎喇 有時里奧大人食麵要淋啲 我就會食米粉 一陣兩個都淋麵就慘喇
我一入屋 Berry 又係撲唔停 好似無見過我咁 哈哈 ~
師傅整嘢咁就入房啦 咁就嚟新年 所以幫家姐執下個櫃 我正想拎嘢出嚟嘅時候 U 姐話 No 我即刻望下佢啦 原來佢係同 Berry 講 No 奇怪佢唔會用呢啲語氣對我家嘛 ~
唔望我
U 姐點引佢都唔望我
扮乖
師傅整完嘢 咁姐夫話出去 我以為佢送師傅出門口 原來係同朋友出去飲茶 我仲諗住晏晝請飲茶添 ~
我繼續幫家姐執櫃嘛 之後佢叫我幫下 Berry 女 因為 Berry 女托喺佢大脾上面瞓覺呀
家姐今日唔駛出去旺角同何文田 因為糟糟今晚嚟家姐屋企食飯 所以佢去幫手 咁就好喇 我可以喺家姐屋企耐啲 ~
本身同里奧大人食午餐 但家姐唔駛出旺角 所以同家姐食午餐喇 ~
差唔多 1 點半先出去 家姐想去壽司郎 但等 80 張枱 真係唔會等囉 之後再周圍睇下 最後我話想去食越南嘢呀 ~
去到 1 點 53 分 我同家姐講話睇下有無下午茶 職員話食下午茶要等到 2 點先入去 如果入咗去就係食午餐 咁我更係等啦 ~
香茅牛柳絲撈檬 ($55) - 家姐話想食撈檬 牛肉都幾好味
越式春卷撈檬 ($55) - 同家姐 Share 啲餸 我食咗春卷再牛肉再春卷 估唔到家姐都係咁食 因為我同佢最後剩番嘅都係春卷 哈哈 其實真係好得意 因為我都無同家姐住咁耐 同埋又唔係成日一齊食嘢 但好多時飲食習慣都差唔多 所以里奧大人成日都會話我哋真係兩姊妹 哈哈
香茅豬肉蝦片 2 件 (+$20) - 我都唔知做咩叫呢個小食 因為大家根本食碗撈檬已經好飽
我飲熱檸茶 家姐飲椰汁三色冰 (+$8) 我同家姐講話唔想飲凍嘢 家姐碌大對眼話真係㗎 ?! 我話呃妳做咩鬼呀 之後佢又再問多次喎 佢好難想像我咁怕熱 但會飲熱嘢呀 仲要係熱檸茶
食下傾下又差唔多 3 點 到我要走喇 ~
我已經將張單擺喺我前面 點知家姐襯我轉身拎袋就搶咗張單 但我話明我請嘛 之後同佢扮哂傾偈 等佢放下戒備就再搶番張單比錢 哈哈 ~
家姐送我搭車 好在佢見到架車駛近去車站咋 唔係就送車尾了 ~
今日遲咗半個鐘先參加 LA 活動呀 活動完畢再 Debriefing 到 5 點 我今晚要番自己教會事奉 所以即刻番屋企沖涼換衫 之後再約里奧大人一齊去自己教會呀 ~
散會之後就去食晚餐 我覺得今日係食完就做嘢 做完嘢就食嘢咁 哈哈 ~
今日由朝出到晚 我話有啲攰 所以食完就想番屋企 ~
見架巴士仲有 10 分鐘 咁就慢慢行去巴士站啦 不過企唔夠 2 分鐘 里奧大人話巴士嚟緊 我問佢有無睇錯呀 ?! 點知真係無錯 原來係我自己睇錯巴士站位置嘅時間呀 真係勁樣衰呢 ~
番到屋企都即刻沖涼 之後真係要抖下喇 ~
糟糟喺錦祥號買臘腸 所以家姐叫佢買三花腸同鵝肝腸各 1 斤 咁可以同我 Share 佢話買咗少少咋 我話每人半斤真係好夠喇 次次買 1 斤要食好耐 真係濃味都變淡味 哈哈
家姐公司送嘅奇華蘿蔔糕 咁今年 Y 姑又整蘿蔔糕 但我話唔要喇 因為我一早已經訂咗蘿蔔糕芋頭糕同紅豆年糕嘛 佢話佢整得好好食㗎 我話妳成日整咩都話自己整得好食㗎啦 同埋我真係要唔到咁多呀 唔係我都想試下嘅
尋晚喺菜菜仔舖頭買嘅古田雪耳 我都好鍾意飲雪耳湯㗎 不過見親啲雪耳都好大包 家姐又唔幫手要 我又食唔到咁多 所以見到呢包份量啱啱好就即刻買喇
睇多陣 Youtube 今晚 10 點 45 分都瞓 lu ~
沒有留言:
發佈留言