敍苑粉麵茶餐廳 @ 九龍灣 ( 7-DEC-2011 )

( 7-DEC-2011  WED )

今朝一出街   勁有回南天呀   超級唔舒服   同埋令人好攰咁囉 ~

突然好想食麥當勞呀   好在有位   坐我隔離係一對男女   男嘅就一路食一路用 Ipad 睇報紙   女嘅就自己好悶咁喺度食   個樣真係好悶咁㗎   但又唔敢叫個男嘅唔好睇報紙咁囉   我同里奧大人一齊等嘢食都會各自用手機上網睇嘢或者玩 Game   但嘢食一到   我哋會收機囉   其一要食嘢   其二都要傾下偈家嘛   望住手機食嘢   咁不如各自分開食   唔得咁囉 ~

好忙呀   忙到 Lunch Time   好在 Lunch 都係食 K   慢慢食都得 ~

之後又繼續忙喇   我 Partner 就不知幾好瞓   好心啦   呢啲人真係不知所謂   真係唔明佢點教仔   學佢就慘啦   咩都唔要蝕底   9 點 20 分番工   食飯又食多 10 分鐘   開工時間就瞓   放工準時即刻走   真係得佢做得出   不知所謂 ~

放工出旺角睇中醫   睇完就搭巴士番屋企   等埋里奧大人一齊先食飯呢 ~

9 點幾先食嘢   都唔夠食咁飽咯   番屋企食埋啲沙律好過 ~

茄汁豬扒 + 蘋果粟米蟹柳沙律 ( 6-DEC-2011 )

( 6-DEC-2011  TUE )

尋晚 11 點 15 分瞓覺   但瞓到差唔多天光好似醒醒哋   不過我會繼續瞓 ~

早餐又食三文治   不過其實唔想食咁多蛋   但又唔想食芝腿治同粉麵喎 ~  

坐喺我對面嘅女人食火腿絲通粉   佢將啲通粉係咁撩   明明 "北" 咗匙更通粉   又放番落去   之後又係咁撩嚟了去   仲以為想食啲火腿絲   但最後都只係食通粉   都唔知撩嚟做咩   食就食嘛   如果想無咁熱   咪 "北" 起一更嚟吹囉   同埋又一路食嘢一路飲嘢   應該吞咗落肚先飲家嘛   點解我咁留意佢   因為之前人哋問佢塊方包轉唔轉多士   佢話唔轉   因為食唔哂   之後早餐到咗   佢唔食蛋黃   咁又將塊方包同蛋黃擺到好整齊   我以為佢食塊方包   原來唔食嘅   唔食就唔好要嘛   之後見佢飲杯茶   我見到個杯有啲好似細細粒麵包碎咁樣嘅物體   但佢成杯茶飲哂呀   我覺得好嘔心   我唔會飲茶餐廳啲茶同水㗎   硬係有陣味咁囉 ~

菇場好靜   啲氣氛令到我覺得好醃悶咁呀   加上呢排又唔夠瞓   好想瞓呀 ~

晏晝又食 K + 豆奶   依家天氣凍   所以好快餓   4 點左右就要食個包仔   唔係好難頂到開飯囉 ~

放工去超市買餸   番到屋企醃好豬扒就熨衫   抖陣就開始煮飯喇 ~

今晚里奧大人 9 點幾先番到屋企   不過都同佢一齊食飯啦   傾下食下   佢會食多啲咁呢 ~ 

是日懶餐 - 茄汁豬扒 + 蘋果粟米蟹柳沙律

茄汁豬扒 - 突然超勁想食茄汁豬扒   所以就整喇   不過好似真係好耐無整豬扒    加豉油同老抽重手咗   有啲鹹呀   如果唔係更好味   哈哈 ~

蘋果粟米蟹柳沙律 - 買咗富士蘋果成個星期   諗住即買即整   點知成日好攰無心機整   好彩無爛咋   所以今晚唔整唔得啦   不過我都好鍾意食蘋果沙律   爽爽甜甜   里奧大人就最 Like 添啦   因為唔駛切就有生果食嘛   但就要走醬囉 ~

鮑汁醬油雞 (外賣) + 蒜蓉炒菜心 ( 5-DEC-2011 )

( 5-DEC-2011  MON )

又星期一喇   又唔係好凍喎 ~

今朝又同 8 卦一齊食早餐   佢來來去去都係食嗰啲   食 Lunch 又係咁   又唔食芝士   又唔食得辣   又少食炸嘢   又早起身   成個阿伯咁 ~

  

菇場忙呀   都好   好快就 11 點半咁囉   之後就等 Lunch Time 喇 ~

唔係太餓   所以出去行陣   差唔多 1 點就番到菇場   Lunch 又係 Special K + 豆奶   天氣凍咗先嚟食啲咁嘅嘢   依家好後悔買咁多呀 ~ 

放工去大家樂買鮑汁醬油雞   今晚終於有得買喇   可以煮少樣嘢 ~

番到屋企即浸菜   整蘋果沙律   再拖地   之後就等里奧大人番嚟先煮飯   不過我太餓喇   自己食咗辛辣麵先   唔係頂唔順 ~

是日懶餐 - 鮑汁醬油雞 (外賣) + 蒜蓉炒菜心

鮑汁醬油雞 (外賣) - 上次喺媽咪屋企食呢   好入味㗎   呢隻唔好味嘅   同一機構唔同分店   差距咁大   好唔掂喎 ~

蒜蓉炒菜心 - 之前同媽咪講話要蒜頭   點知次次番屋企食飯都買咗蒜頭比我   買到我唔要啦   屋企有好多嘛   我又唔係成日炒菜   所以今晚炒菜落好多蒜頭呀   因為啲蒜頭發芽無咩味囉 ~  

今晚里奧大人差唔多 9 點先番到屋企   我就咁食菜同雞   無話比佢知我食咗辛辣麵   唔係佢又唔食飯   要食辛辣麵㗎喇   不過就算食我都唔會煮   因為煮咗好多飯   我覺得男人真係好煩   食就食啦  又揀 3 揀 4   大佬   唔駛番工就話妳想食咩幾夜都煮   我又番工又做家務   煮埋飯又依樣嗰樣   叫你諗食咩又唔諗   我唔夠狠咋   唔係等你餐餐出去食你就知慘 ~  

雲興隆小廚 @ 九龍灣 ( 4-DEC-2011 )

薑蔥焗桶蠔 ($98)  - 啲蠔都唔大隻嘅   有 6 隻   不過唔夠鑊氣   呢個價錢唔值囉  

窩蛋牛肉煲仔飯 ($45) - 里奧大人話想試   點知超級極度失望啦   因為最緊要嘅煲仔飯豉油係無味嘅   唔係話咩   鹹到算   但呢間真係無味囉   完全唔掂   唔脆嘅飯焦 

胡椒豬肚湯 ($68) - 呢個湯好夠胡椒味   豬肚好腍又唔羶   不過配菜就好少囉

( 4-DEC-2011  SUN )

今朝 10 點醒咗   梳洗之後就落街食早餐喇   之後去超市買雪梨就番屋企喇 ~

條腰又好痛   都唔知做乜鬼   醫師話做過手術多數係咁   我又唔記得點解   但上次飲完佢啲中藥又真係唔痛喎   下星期再睇睇佢先 ~

番到屋企就開機洗衫   再抹櫃   之後熨衫就唔再做家務 lu ~

差唔多 2 點半就去飲茶   好感恩超快有位   好耐無飲茶   覺得好好味   不過無炸雲吞就好失望囉 ~

鮮蝦蒸粉果 / 廣川紅油抄手 / 鮮菇牛肉腸粉 / 冰鎮鵝掌翼 / 蜂巢海鮮酥 / 高湯鮮竹卷 / 蜜汁叉燒酥

飲到 4 點就走喇   今朝同里奧大人講話想買腰墊比我番菇場    因為張櫈非常之唔好坐呀   估唔到里奧大人又記得   話去日本城睇睇喎   估唔到有得買呢   超感恩呀 ~

好攰好攰   其實買咗菜   但無買餸   因為我又覺得自己好多濕毒 所以好想飲胡椒豬肚湯   順便驅驅風呢 ~

Hea 到 7 點就出門口   其實未餓   不過驚無位囉 ~

去到要等   好感恩等咗 10 分鐘左右就有位呢   唔駛喺門口食西北風 ~

呢間小菜之前食過   其實真係麻麻哋   煲仔飯豉油無味嘅   無哂靈魂   但個湯又好好飲喎   夠熱夠辣   不過都應該唔會再嚟呢間   無理由就咁飲個湯家嘛   搵過另一間算數 ~

海港酒家 @ 將軍澳 ( 3-DEC-2011 )

魚腐

蟹捧 / 海膽丸 / 蟹籽丸 / 蝦滑 / 水餃 / 雲吞 / 鮮腐竹 / 炸腐竹 / 美國肥牛 / 炸魚皮 / 醬料 / 沙爹湯底 / 西瓜汁

( 3-DEC-2011  SAT )

星期六多數 8 點先起身   因為老闆多數 9 點半先番   咁我 9 點 10 分番到菇場   佢都唔知我遲到呢 ~  

菇場多嘢做啦   次次都係咁嘅 ~

放工約埋家姐番屋企   坐咗陣就同埋里奧大人一齊出去 Delifrance 食嘢   其實我想飲茶   不過家姐唔制 ~  

黑椒豬柳扁意粉 / 肉醬煙肉香腸粟米炒長通粉 / 薯仔沙律

食完就各自活動啦   家姐搭車番屋企   我就同里奧大人去買相機   今次買 G12   雖然出咗年幾   我又無咩所謂   出嘅時候自己部相機未壞嘛   無理由咁浪費嘛   依家部相機微距好似有啲問題   所以就買新機喇 ~  

番到屋企就煲雪梨茶   今次用 5 個雪梨 + 1 個蘋果 + 1 個雪耳   夠哂潤啦   不過仲諗住夠甜   點知無味   要加冰糖   加咗好飲好多呢 ~

抖咗陣就出發去官塘廣場買嘢   突然好想食粉果   咁當然要去食啦   之後再去將軍澳   約咗水姑食飯   今晚家姐都嚟埋   因為佢一聽見話打邊爐就流哂口水呀   如果普通小菜佢就肯定唔嚟 lu ~

同里奧大人屋企人打邊爐   次次都係淥哂然後擺喺碟   之後拎嚟食   話驚熱喎   大佬   咁擺法又核突   隻碟實有啲湯家嘛   好似食剩咁   同埋妳擺埋一邊   人哋都唔記得食添啦   打邊爐唔係咁打家嘛   食下淥下又食下咁先過癮家嘛 ~

我哋食到差唔多 10 點就走喇   家姐自己搭巴士   我哋就搭地鐵   咁里奧大人就拍家姐膊頭叫佢小心啲   但家姐話佢好大力   真係唔死都一身潺呀   里奧大人捉人又係好鬼大力   有次我隻手嘅不見天位瘀咗   諗咗好耐先記得係佢捉過我嚟   因為呢啲位真係好難瘀囉 ~

覺得好熱同埋好口渴   所以去麥記買杯思樂冰   飲完舒服都震呀 ~

蕃茄意式肉丸青口長通粉 ( 2-DEC-2011 )

( 2-DEC-2011  FRI )

今朝好凍   係寒添呀   但都要着褸保暖呢 ~

話咁快就星期五 lu   應該係話話咁快就 12 月   之後就好快新年 lu ~

今朝 8 卦又打嚟問我去邊度食早餐   所以又一齊食喇 ~  

菇場會計部又有新同事番工   次次有新同事番工   我同 8 卦就會第一時間估聽日番唔番   番先再改花名 ~

晏晝又脆米通 + 鮮奶   終於食完包脆米通喇 ~  

好眼瞓呀   呢排真係好鬼攰囉   真係飯都無 Mood 煮   但今日里奧大人見客   所以可以 7 點鐘番屋企   咁難得佢可以番屋企食飯   點都煮啲啦 ~

是日懶餐 - 蕃茄意式肉丸青口長通粉

蕃茄意式肉丸青口長通粉 - 終於清哂包肉丸同青口   其實有肉丸真係好方便   可以話煮就煮   但又覺得好似好多防腐劑咁   所以食完都唔買住喇 ~

食完就要洗嘢啦   依家 2 隻手指公都爛哂   所以帶手套   想懶都唔得 ~  

住家飯 @ 媽咪屋企 ( 1-DEC-2011 )

白灼蝦

果皮蒸泥猛

鮑汁醬油雞 (大家樂)

炒白菜

蓮藕栗子粟米豬展湯

( 1-DEC-2011  THU )

今朝超想食三文治呀   如果里奧大人或者家姐喺菇場附近番工就好啦   可以 Share 食早餐幾咁好呢 ~  

番到菇場諗住放 File 入櫃   點知個衰格 Partner 又放到密質質   咁樣好難拎家嘛   之前我都話過佢   MSN 又話過佢   佢都係咁   賤格自私到無人有   今次我就好重語氣同佢講咁咁咁   佢駁咀話無位放   我話無位咪擺喺另一張枱囉   妳次次都係咁   佢 O 哂個賤人咀望住我呀   估唔到我咁話佢   之後佢話哦   不知所謂 ~

晏晝食朱古力脆米通 + 鮮奶   食多一餐就清哂   不過食果時又好飽   但 4 點幾又好餓㗎喎   唔知係咪之前 Lunch 食大咗個胃呢 ~

放工一出門口就覺得好凍啦   話得 15 度咋   最怕大風   吹到頭都痛 ~

今晚番媽咪屋企食飯   坐到 8 點 45 分就走喇   又係一出門口凍到呢 ~

超攰呀   番到屋企就咁拖地同開機洗衫算喇   唔想熨衫   間屋有啲亂都無執添呀 ~

里奧大人又差唔多 11 點先番到屋企   以前間公司   佢番大陸做嘢就好準時可以放工   因為公司車   司機都要準時放工嘛   依家就自己坐車   地鐵火車再地鐵   我覺得車程耐唔係問題   話哂可以瞓下   但最煩係轉嚟轉去   想瞓都瞓唔到   唔係過咗站仲浪費時間 ~