銀芽韭菜肉絲炒麵 + 清補涼豬展湯 ( 7-JAN-2012 )

( 7-JAN-2012  SAT )

今朝幫菇場 Shopping 就食早餐   之後就番菇場 lu   阿 Head Off 喎   做哂啲 Urgent 嘢就上網寫 Blog 喇 ~

好快好快就放工   今日睇中醫調理下   再去超市買餸就番屋企 lu ~

里奧大人見到我個樣咁攰   話想同我去飲茶 Hea 下   我話咁去鴻星   因為好想食炸雲吞   不過去到原來今晚有人結婚   所以截咗人 lu   咁無計啦   去茶餐廳食算喇 ~

食完番屋企就執嘢啦   之後預備煲湯   去完旅行番嚟   覺得間屋執極都唔完咁嘅 ~

是日懶餐 - 銀芽韭菜肉絲炒麵 + 清補涼豬展湯

銀芽韭菜肉絲炒麵- 又係用煲湯豬展嚟做肉絲   唔好浪費嘛 ~

清補涼豬展湯 - 本來想煲粉葛   不過懶得買料   同埋記得仲有包清補涼未煲   難得我記得   梗係煲埋佢啦 ~

家姐今晚嚟食喺馬來西亞買嘅零食   因為我叫佢快啲嚟食   我驚啲脆脆好快腍   之後一齊玩魚蝦蟹同大細   每人分 $3,000 籌碼   雖然用籌碼   但都唔捨得買咁多   買 $100 已經覺得好豪咁呱呱叫   之後再買 $500   個心真係卜卜跳   如果要我真金白銀拎 $500 出嚟玩一舖嘅話   我一定唔會囉   好心痛㗎 ~

家姐 9 點半走   咁我都沖涼   再陪里奧大人睇之前錄咗嘅電視劇集就瞓 lu ~

雲南桂林過橋米線 @ 荃灣 ( 6-JAN-2012 )

( 6-JAN-2012  FRI )

今朝又同 8 卦一齊食早餐   不過多數係我食到咁上下佢先打嚟   咁都好   佢食嘢好快嘛   同佢同步食我就好有壓力   同埋我早餐唔想比自己食得咁趕嘛 ~

菇場又忙到爆炸   之前老友 "祝福" 我日日做到無停手   我話我最鍾意做嘢   依家真係好鬼忙   唔係咁邪呀嘛 ~

今日晏晝 Off   半來約咗老友 Tea 再去表妹度剪髮   不過佢最後唔得閒   所以我都買嘢去媽咪屋企食   坐到 3 點半就出發去荃灣呢 ~

我無咩方向咁   日光日白都好   夜媽媽真係啲驚   一落小巴就行千色店   但出錯門口   唔知出咗邊度   所以要行番入商場再出過   終於搵啱出口 ~

之後去瓜子大王買瓜子   都幾多人   不過好在我都買到一斤紅瓜子   買完再去正隆行買無花果同 Nuts   超重呀   幾咁辛苦先行到表妹度呀 ~

去到有得剪   家姐 7 點幾到埋   但佢要等   所以同佢一齊落去食豪大大雞扒   熱辣辣好正呀   之後再買珍珠奶茶   勁似喺台灣掃街呀   因為無留意之前點行   但我記得有間粥舖   咁我話我記得有間粥舖   所以同家姐講話行番粥舖嗰頭   之後我拎轉頭話邊度係粥舖   家姐勁笑話以為我知粥舖係邊呀   我唔認路嘛   所以好怕去唔熟嘅地方呢 ~

上到去家姐等咗陣就有得剪喇   剪到差唔多 10 點   本來約好表妹一齊食   不過佢有個客仲整緊   所以我哋都唔等佢喇   唔係 11 點都未食得呢 ~

同家姐食酸辣米線   但頭先食咗雞扒   我話 Share 一碗算喇   如果家姐自己食一碗會叫大辣   就番我就中辣啦   點知我覺得中辣都好辣   食到個咀唇發麻   我要狂飲檸茶   咁家姐又唔覺辣   之後話呢隻辣係慢慢辣   越食越辣呀   我都食完啦   太遲喇   同埋佢話呢間我哋之前食過   我又係食中辣   但食咗少少要人哋比碗清湯呀 ~

之後一齊坐小巴番屋企   番到屋企都 11 點幾   但飲咗杯檸茶又唔係好眼瞓喎   好在里奧大人睇電視食零食無咁早瞓啫 ~

住家飯 @ 媽咪屋企 ( 5-JAN-2012 )

菜心炒牛肉

髮菜冬菇蠔豉燜排骨

蒸撻沙

燻蹄 + 叉燒 @ 太興 

粉葛蠔豉豬骨湯

買咗雜錦朱古力   無無聊聊數下有幾多塊咁囉

( 5-JAN-2012  THU )

今朝好凍呀   凍到唔願起身   里奧大人以為我唔舒服添呀 ~  

早餐食腿蛋治   其實唔想食   不過又諗唔到食咩好 ~  

菇場忙到爆炸   做到 Lunch Time   有 Lunch Box 唔駛煩食咩   但 Lunch 食飯就成日好滯咁   有好有唔好啦 ~

又係忙啦   忙到放工   一出門口超凍呀   可以噴覆氣   好有真正冬天嘅感覺呢 ~

里奧大人上咗大陸   所以我又番媽咪屋企食飯喇 ~

同家姐坐到 8 點半就走喇   又係好凍   縮下縮下咁行   之後同家姐講   如果着短衫短褲食雪糕   再坐喺度一個鐘   肺炎都似   但家姐話肺炎好f少事   我即刻話肺炎可以死人喎   之後家姐好認真講話   如果真係短衫短褲食雪糕   再坐喺度一個鐘係會凍死囉   同埋出現低溫症即死   低溫症都諗到   勁呀   佢真係好怕凍呢 ~

番到屋企即洗衫熨衫拖地   之後沖涼   里奧大人打嚟話好想食湯丸   但我話無片糖   佢話用老薑黑糖咪得囉   我話無喎   佢話台灣買嗰啲呀   佢唔講真係唔記得屋企有老薑黑糖添   如果唔提我   我之後又會去買黑糖番屋企呢 ~

茄汁豬扒 + 唐生菜 ( 4-JAN-2012 )

(  4-JAN-2012  WED )

今朝唔太餓   所以食奶油多   呢間茶餐廳好多 Waitress   所以好鬼煩   一個人講樣嘢   幾個一齊搭咀   嘈到暈   所以佢哋次次一討論一個話題   我就會快快食即走   唔想影響自己情緒呀 ~ 

菇場無咩嘢做   咁就寫 Blog 同 Load 相   點知無啦啦成個相簿都無埋   真係麻鬼煩 ~

晏晝有 Lunch Box   不過差唔多 1 點先想食   都仲係無咩胃口咁 ~

里奧大人晏晝上咗大陸開會   又唔知幾點番   本來想煮粟米湯唔買菜   但太夜嘅話   里奧大人唔會飲湯   所以都係去超市買菜好過 lu ~

番到屋企又係最忙嘅時候   好在尋晚醃定咗豬扒   慳唔少時間   所以可以即開機洗衫   跟住熨衫   抹櫃執嘢   抖陣再煮飯呢 ~

今晚自己 8 點食飯先   食食下里奧大人話已經喺上水   話想食麵喎   人哋一早諗好炒飯家嘛   一碗佢一碗做 Lunch Box   點知又要我食埋去 ~

是日懶餐 -茄汁豬扒 + 唐生菜

茄汁豬扒 - 今次用茄汁調味咋   最緊要方便 ~

唐生菜 - 我就咁點腐乳醬食咋   里奧大人就齋食   因為佢仲咳緊 ~

老少平安 + 菜心 ( 3-JAN-2012 )

( 3-JAN-2012  TUE )

今朝要番工啦   放咗 10 日假   心情依然仲係振奮   不過又無話唔想番工咁呢   賺錢先可以去旅行盡情狂歡嘛 ~

早餐食腿蛋治   好耐無食咁呀 ~

菇場好忙呀   忙咗成朝   好快到 Lunch Time   本來想食水餃麵   不過好多人   所以唔食喇   之後途經一間舖頭   早餐係賣炒米粉同燒賣嗰啲   我就問佢有無炒米粉同燒賣   估唔到仲有   好開心呀   因為我好鍾意食炒米粉同燒賣呢 ~

咩事呀   正想睇 Blog 又有嘢做   做完諗住再睇   又有嘢做喎   咁邪嘅 ~

放工去超市買餸就番屋企喇   洗衫熨衫等里奧大人番   好在佢 9 點左右番到嚟   咁我都可以同佢一齊開飯呢 ~  

是日懶餐 - 老少平安 + 菜心

老少平安 - 里奧大人喉嚨唔舒服   咁一定要清清哋啦   但真係唔想蒸排骨囉   估唔到佢都鍾意食喎 ~  

菜心 - 尋日買嗰啲嚟㗎   今次就咁淥算喇   好攰嘛 ~

洗哂嘢再沖埋涼已經 10 點幾   喺屋企啲時間真係好唔夠用   不過我唔因為咁而夜瞓囉   皮膚唔好又易殘   咪搞 ~

蜜糖骨 + 蒜蓉炒菜心 + 芫茜皮蛋湯 ( 2-JAN-2012 )

( 2-JAN-2012  MON )

今日又係假期   真係好開心喇 ~

今朝超開心呀   因為同媽咪同家姐飲茶   我 10 點起咗身   沖涼洗頭就去鴻星攞位 lu ~

佢哋同里奧大人差唔多時間到   又係一路食一路傾   如果里奧大人無唔舒服就好啦   可以打麻將   不過唔舒服就唔好喇   唔想惹到媽咪呀 ~

狗狗臘腸卷 / 蜜汁叉燒腸粉 / 水晶蝦餃皇 / 醬汁花生蒸鳳爪 / 蜜汁叉燒包 / 回味銀針粉 / 鹹酸菜豬肚湯 / 臘味煲仔飯 / 圓肉桂花糕

飲完我就去街市買餸   諗住買少少   點知買下買下又幾袋   好鬼重啦 ~

番到屋企就洗衫熨衫   冬天真係要隔日開機   啲衫又厚   好在好快乾   唔係都幾煩 ~

今日里奧大人都開始做公司嘢 lu   不過唔緊要   依家可以同阿表無間斷   日子過得超級充實呀 ~ 

3 點幾去食 Tea   好想食雞翼   所以去大快活食喇 ~  

今晚又煮飯   不過好簡單   所以好快搞掂 ~  

是日懶餐 - 蜜糖骨 + 蒜蓉炒菜心 + 芫茜皮蛋湯

蜜糖骨 - 水姑整㗎   就咁蒸番熱就食得 ~

蒜蓉炒菜心 - 炒菜真係好味好多   不過我成日覺得啲油彈到周圍都係好煩囉 ~

芫茜皮蛋湯 - 媽咪叫我煲芫茜魚片湯比里奧大人飲   不過我懶唔想整魚呀   所以就咁芫茜皮蛋湯算喇 ~

海港酒家 @ 將軍澳中心 ( 1-JAN-2012 )

( 1-JAN-2012  SUN )

因為里奧大人要睇醫生   所以瞓到 9 點幾要起身 lu   好多醫生都放假呀   所以打去邊間有人聽就去睇喇 ~

去診所附近食早餐   里奧大人就自己去睇   我就喺附近行下   超想搵 100 PLUS   不過香港真係無囉   如果有   里奧大人可以長時間陪我食熱氣嘢都唔怕 lu ~

里奧大人番到屋企就瞓 lu   我就再執整齊啲零食同醬料   心情又番番去馬來西亞喇   又係好開心呢   仍同時希望啲醬料真係可以食得哂 ~

3 點幾就去食 Tea   之後我又寫 Blog   好想快啲寫哂呀 ~  

今晚同里奧大人屋企補做冬   所以差唔多 5 點半就出門口喇   又係去海港啦   食到 8 點幾就走 lu ~

里奧大人做公司嘢   想做哂聽日去街   不過我話去唔去都得啦   休息最緊要呢 ~