住家飯 @ 媽咪屋企 ( 7-NOV-2012 )

荷蘭豆芹菜炒臘肉


茄汁煎白鯧


粟米蟹柳蝦仁炒蛋

白切雞

黑白胡椒鹹菜豬肚湯

我覺得最上嘅奇異果好好味   Orange Soda 同 Mango 就買比家姐嘅

( 7-NOV-2012  WED )

今朝食早餐時   8 卦打嚟話過嚟食   好多時同佢一齊就會 9 點前番到菇場   因為佢阿 Head 比我老闆更早番呢   所以可能準時   喺佢心目中算係遲㗎喇 ~

菇場忙咗一陣   好快又係 Free Time   今日食完 Lunch Box 就出去一田超市行下   越行越凍   好在都睇哂要睇嘅嘢   同埋係時候番菇場開工 lu ~

里奧大人今日全天侯見客   所以我都番媽咪屋企食飯喇 ~

今晚 8 點走喇   家姐一齊番我屋企   因為我整咗 2 盒沙律比佢   佢一嚟到就食零食   真係無停過口   我就真係超飽食唔落喇   佢差唔多 9 點半就走喇   我都去沖涼 lu ~

里奧大人 10 點先番到嚟   同客又食印度嘢   仲飲埋白酒   佢話覺得眼皮係攰塌落嚟   鬼咩   已經攰再飲埋酒   唔瞓着已經偷笑啦 ~  

蘋果粟米沙律 ( 6-NOV-2012 )

( 6-NOV-2012  TUE )

又好似無咁凍   同無咁乾燥咁噃   快啲 冬天啦   因為想一次過拎哂冬天啲衫出嚟呀 ~

早餐食奶油多   餓都唔咁食咁飽   因為晏晝同 8 卦出去食 ~

菇場忙   快快手搞掂就做私人嘢喇   所以好快又到 Lunch Time   今日同 8 卦行遠啲食   因為呢間茶餐廳食物都唔錯呀 ~

食完超級滯   番到菇場即沖茶包飲呀   望到張紙巾濕咗好多   我仲以為自己無抹乾淨隻杯   點知再認真望   原來啲茶喺係我隻杯入面滲出嚟   再認真望   原來隻杯有條裂痕   清潔呀姐真係勁   可以整到咁 ~

放工去超市買紅腰豆同沙律醬就番屋企   整完沙律就熨衫再抹櫃   之後即沖涼休息喇   仲係好飽   但又驚半夜餓醒   所以就咁食碗沙律就算喇 ~

里奧大人差唔多 9 點幾先喺大陸放工   番到嚟都差唔多 11 點   我都差唔多瞓 lu ~

是日懶餐 - 蘋果粟米沙律

蘋果粟米沙律 - 今次材料有 4 個蘋果 + 2 罐粟米 + 1 罐紅腰豆 + 1 罐大樹菠蘿 + 1 罐椰果   家姐嗰份就加埋蟹柳   佢勁鍾意食蟹柳   實會好開心呢 ~

黑椒蜜糖雞柳 + 清炒菜心 ( 5-NOV-2012 )

( 5-NOV-2012  MON )

尋晚成日發夢   仲好肯定係彩色添呀   同埋又係嗰間超市   次次發夢買嘢都係去嗰間超市   奇怪 ~

早餐食三文治   其實想食濕嘢   不過驚太飽呀 ~

菇場忙忙地   不過都係無 Mood 做嘢 ~

Lunch Time 都係出去食   趕走悶氣   又未餓   所以周圍行下先   差唔多 1 點先食 ~

放工即走喇   去超市買 2 Pack 菜就番屋企   本來唔想做家務   不過又想郁下   所以拖地算喇   之後再預備晚餐   諗住食先   點知里奧大人 8 點打黎話放工   咁我都等埋一齊食飯 lu ~

是日懶餐 - 黑椒蜜糖雞柳 + 清炒菜心

黑椒蜜糖雞柳 - 其實想整泡菜雞柳   不過里奧大人喉嚨唔多舒服   所以用蜜糖焗算喇 ~ 

清炒菜心 - 反正開咗鑊   所以炒埋菜啦   炒嘅菜係好味好多 ~

真係好鬼攰   其實真係好想熨衫   不過超勁唔願郁   所以沖完涼之後真係灘喺梳化睇 Ipad   再睇下電視就瞓覺喇 ~

焗野生三文魚塊 + 美極煎蝦碌 + 酸齋 + 粉葛齋湯 ( 4-NOV-2012 )

( 4-NOV-2012  SUN )

今朝 10 點 40 分起身   趕唔切番教會   其實里奧大人好早醒咗   不過見我瞓得咁淋   唔想叫醒我喎 ~

食完早餐就去買餸   里奧大人就做公司嘢 ~

番到屋企開機洗衫同熨衫   再煲埋湯   都已經差唔多 2 點喇 ~

2 點幾去 Piago Food Court 食嘢   坐我隔離幾個男仔   十幾歲讀緊書嗰啲   係咁講粗口  係咪都加個助語詞   以為自己好型   其實真係知唔知係好無家教呢   可悲 ~

食完就去拎嘢    番到屋企都 4 點   抖陣又預備晚餐   早啲食早啲休息 ~

是日懶餐 - 焗野生三文魚塊 + 美極煎蝦碌 + 酸齋 + 粉葛齋湯

焗野生三文魚塊 - 之前喺一田買   1 包 7 件仔   差唔多 $70   我覺得幾貴呀   不過好好食   因為唔腥 ~

美極煎蝦碌 - 媽咪比咗啲蝦碌   所以又用美極煎香   超惹味 ~ 

酸齋 - 想整好耐   所以的起心肝整   不過我覺得味道可以再濃啲   同埋色水唔夠   下次再整好啲先 ~ 

粉葛齋湯 - 媽咪睇電視學煲㗎   所以我又煲   材料有粉葛 1 斤 + 3 條粟米 + 1 條紅蘿蔔 + 紅腰豆 + 合桃 + 蜜棗 + 陳皮   煲 2 個鐘   不過我又衰咗   煲出嚟得 3 碗   嘥煤氣添   下次都係落多啲水 ~

食完飯   洗埋碗   沖埋涼都係 8 點幾   實在太好喇   可以舒舒服服咁睇電視呢 ~

越興苑越南美食菜館 @ 旺角 ( 3-NOV-2012 )

越式拚盤 - 除咗春卷好味啲之外   其他真係唔多掂   完全係無味

越式炒金邊粉 - 難得里奧大人食金邊粉   我超勁開心啦   可惜係無味道

馬拉盞炒通菜 - 算 OK 啦

椰汁珍多冰 - 呢個 OK 呀  話哂有椰味

椰汁石榴子冰 - 好難有得食石榴子 lu

( 3-NOV-2012  SAT )

今朝同 8 卦一齊食早餐   唔夠 9 點番到菇場   同佢食嘢真係好鬼趕   但叫佢走先   佢又唔制   要等埋我 ~

菇場忙呀   差唔多 12 點幾先忙完   好在都可以準時走啫 ~

去完惠康買嘢先番屋企   買咗 1 Pack 梨 + 16 包出前一丁 +  4 支茄汁   但無帶環保袋   係咁質落手袋   幾驚爛埋個袋呀 ~

3 點先去食米線   之後番屋企 Hea   差唔多 6 點就出旺角睇相機   不過無得買 lu ~

去埋信和買色粉   之後周圍行   好感恩買到毛毛靴   因為冬天嘅菇場實在太凍喇   其實里奧大人次次同我出街   見到鞋舖都會入去望   想我快啲買到對毛毛靴   驚我冬天無得着   又問買唔買多對   我話唔駛住   雖然好暖   但差唔多款就唔喇   咁我鞋都未除   佢已經企咗喺 Cashier 度等比錢   快到呢 ~

行到 7 點幾就去食嘢   我帶佢去越興苑呢 ~

諗住坐巴士   但里奧大人話食飽唔想企巴士   唔係好易嘔   所以去搭小巴喇 ~

經過商場   又買咗個袋   女人真係好容易買到嘢 ~

住家飯 @ 媽咪屋企 ( 2-NOV-2012 )

美極蝦碌


咖哩炒蟹

滷水乳鴿

滷水鴨翼

炒椰菜花

五指毛桃粟米雞腳豬骨湯

( 2-NOV-2012  FRI )

星期五喇   真開心 ~

菇場超忙呀   做到 11 點半先做完   Hea 咗陣又到 Lunch Time   今日食番尋日嘅 Lunch Box   好在無壞啫 ~

飯氣攻心   超級眼瞓   好在有嘢做   唔係瞓得着呢 ~

里奧大人又上咗大陸   我放工就番屋企拎 Macaroon 先   之後再去媽咪屋企食飯 ~

平時 6 點左右就會打比家姐   問佢喺邊   一係佢就會打嚟話喺邊   點知我 5 點 45 分打比佢   之後打到 6 點半都無人聽   SMS 又無覆   糟糟打去又無人聽   SMS 又係無覆   真係擔心到我顛   後尾佢差唔多 7 點打嚟   原來開會   所以聽唔到電話   要差唔多 8 點先走得   咁我同媽咪食飯先 lu ~

家姐差唔多 8 點幾先番到嚟   我一定要等埋佢   因為佢有雪糕比我嘛   不過我其實點都等埋佢嘅   反正番到屋企都係一個人 ~

9 點半走喇   里奧大人遲我少少就番到屋企   之後一齊睇下電視   整呢樣嗰樣又 12 點幾先瞓   好在聽日番半日咋 ~

華姐清湯腩 @ 天后 + Macaroon @ Coup Kitchen ( 1-NOV-2012 )

清湯腩河 x 3


腩汁蘿蔔

半製成品 / 原來好難唧㗎 / 凍咗   可以反轉 / 焗埋玫瑰紅色 / 色粉係助手落嘅   無指定份量   糟糟嘅比較淺色 / 我嘅靚好多 / 唧餡最好玩   因為知道就嚟完成   可惜啲餡唔夠囉  

製成品 / 所有同學都帶圍裙   得我哋 3 個無帶   仲要 3 個都係黑色衫   好在我哋都無整污糟件衫啫

( 2-NOV-2012  THU )

今朝好似又凍咗   但又懶搵長袖衫   就咁披條大披肩就算喇   咁樣都好暖呢 ~

早餐食腿蛋治烘底   坐對面個男人次次都係食鮑片火腿米粉   又唔落辣油   白雪雪咁   真係好健康呢   但唔明點解可以次次都食同一款早餐   我一定唔得囉 ~

菇場忙喇   好快又到 Lunch Time   本來帶咗 Lunch Box   不過要去旅行社   所以留番聽日先食   搞掂哂嘢都已經 1 點 10 分   拿拿聲食碗米粉算喇 ~ 

里奧大人今日上大陸   咁我就約家姐同糟糟去天后學整 Macaroon   食完嘢先去   其實都幾趕   所以好感恩大家都放 5 點半 ~

7 點開始   阿 Sir 首先教整麵團   之後就我哋自己整   所有份量已經喺哂枱面   超級方便   整完比助手焗   之後阿 Sir 再教整餡   中場休息   太好喇   因為企到腳都軟呀   同埋好開心有 Cake 食呀   呢度教整嘅 Cake 嚟嘅   好食就可以即報名學整   一舉兩得 ~ 

焗完再唧埋餡   完成品真係差唔多 10 點先出爐   個個都好期待呢一刻呀   原來一齊學整嘢係咁開心   可以同同學交流下   傾下焗下咁   2 個半鐘頭真係好快過呢 ~

差唔多 10 點 20 分就走喇   糟糟搭地鐵   我就同家姐一齊搭 619   差唔多半個鐘就番到屋企   都算快 ~

里奧大人同我差唔多時間番到屋企   佢一見我就問學成點   好唔好玩咁   之後我比咗粒佢食   佢又話好味   咁更好味嘅   學校校好哂份量   度數又準確嘛   下次我整就唔擔保同味道同口感囉 ~