阿利水韓國料理 @ 鰂魚涌 ( 6-JAN-2014 )

前菜 - 泡菜好味呀   唔似喺超市買嗰啲一陣味咁

前菜 - 唔知咩   類似麵根   甜甜哋都好味呀

前菜 - 大豆芽菜無特別

辣燜豬排骨 - 熱到呢   所以真係好鬼鍾意食佢呀

靜止

雜菜牛肉炒粉絲 - OK 啦   唔點韓式甜辣醬係無味   哈哈

胡椒湯 - 飲完成身暖笠笠   我好鍾意飲

( 6-JAN-2014  MON )

星期一喇   感恩尋晚都瞓得 OK ~

今朝去另一間食早餐呀   因為覺得飲慣咗本身嗰間咖啡   無咩提神作用   所以就轉下咁呢 ~

菇場忙咗一陣就 Hea 過喇   呢排又成日打機   所以又成日眼濛濛   都唔敢再係咁上網喇   比對眼休息下 ~

晏晝有 Lunch Box   再飲埋燉肉汁   超勁飽   所以要出去行下呀 ~

放工去睇中醫   家姐今晚唔駛睇   所以幫我排隊   感恩去到等咗 5 分鐘就有得睇呀   搞掂哂都差唔多 7 點 lu ~

今晚我想食韓國嘢呀   家姐估唔到我會翻兜   哈哈 ~

食完行去北角   又去阿信屋睇下嘢   家姐又話食完鹹想食甜   問我食唔食麥記雪糕   不過我真係好飽   同埋驚食完好凍呀   我叫佢番屋企食啫喱啦 ~

我之前同家姐講   唔多鍾意搭 671   因為要喺九龍灣地鐵行上落   同埋家姐又要陪我去到九龍灣   之後先番屋企   嘥時間囉   去到巴士站見到兩架 671   家姐都話唔搭   之後到第 3 架   我話搭啦   家姐話唔好   619 好快   係好快到呀   但爆哂呢   仲無埋到站添   之後再有 671   我話照上喇 ~

原來家姐係可以喺官塘落車   不過佢驚我坐過龍   所以陪我一齊去九龍灣   哎呀   我話唔駛啦   我會睇個牌家嘛   同埋我上次又搭過都知個站落車   駛咩驚   叫佢喺官塘落得啦   之後佢講咗幾十次叫我記得落車   驚我搭過龍 ~

番到屋企已經見到里奧大人   傾咗幾句我就煲中藥   之後沖涼喇 ~

今晚有 d 攰   所以 10 點 45 分瞓覺 lu ~   

煎鮮蝦卷拚墨魚卷 + 沙茶醬炒油麥菜 ( 5-JAN-2014 )

( 5-JAN-2014  SUN )

今朝 9 點半起身喇   之後去麥當勞食早餐   好耐無食佢哋嘅早餐喇   咁里奧大人無啦啦加咗 $1 轉即磨咖啡比我   點知我一開蓋睇   根本係普通咖啡   即刻去換番呀   如果係里奧大人飲咖啡呢   佢一早飲咗添呀   因為佢都唔睇嘢嘅 ~

食完就番屋企抖陣   沖埋涼就番教會喇 ~

奉獻完就走喇   里奧大人去剪髮   我就去街市買餸呢 ~

番到屋企家姐就打嚟   話準備開車到停車場喇   我又要急急腳落樓呢   今次係我比把鴻運扇同埋掛衣格比佢   其實我諗住捐出去㗎喇   估唔到家姐咁啱想買鴻運扇   咁就實比佢啦 ~

里奧大人番到嚟都 2 點半   等佢沖埋涼就去食 Tea 喇 ~

番到屋企即開機洗衫   之後就燉肉汁   5 點就飲媽咪煲嘅湯   時間過得好快呀下 ~

7 點預備晚餐   星期日多數呢個時間食飯   咁樣食完之後可以早啲休息 ~

是日懶餐 - 煎鮮蝦卷拚墨魚卷 + 沙茶醬炒油麥菜

煎鮮蝦卷拚墨魚卷 - 喺牛丸哥哥買㗎   $33/磅   我每樣買半磅   雖然分開袋   阿姐仍幫我打唔同嘅結   不過我都唔知邊樣打邊樣   哈哈   因為味道同個餡又差唔多咁喎   呵呵   今次超勁有心機煎   所以無煎燶   真係好開心呢 ~

沙茶醬炒油麥菜 - 又係好有心機炒   慢慢逐少逐少落鑊炒 ~

早食早休息   如果平時係咁就好喇   今晚 11 點可以瞓喇   開心開心 ~

傷心酸辣粉 @ 深水埗 ( 4-JAN-2014 )

精選 2 人套餐

傷心酸辣粉 - 我叫中辣   因為上次小辣唔辣嘛   點知今次辣到爆炸

皇牌口水雞 (下例) - 好味   但食咗酸辣粉之後   辣到好辛苦   所以我將啲雞點滷水汁呀   哈哈

滷水拚盤 - 細細碟   樣樣都薄切切   切功好勁呀

紅油蒜蓉青瓜 - 酸酸辣辣咁囉   我都係鍾意食蒜泥多啲

( 4-JAN-2014  SAT )

今日 Off 呀   不過都係 10 點起身呢 ~

家姐今朝會去星展搞嘢   我起身就即 Whatsapp 佢搞掂未 ?!   估唔到佢已經搞掂哂   所以叫佢去太興搵位   我哋梳洗完之後就即飛落樓喇   哈哈 ~

辣肉碎扎肉米粉 - 呢個好味呀   下次再食

雞扒腸仔配牛油多士

頂級午餐肉滑蛋公仔麵

家姐轉飲泡沫咖啡   侍應話特登整到咁喎   無嘢好講

食完就一齊番屋企  等我沖埋涼就一齊出門㗎喇 ~

同家姐一齊行去巴士站   之後我哋就搭地鐵去尖沙咀拎藥   咁我同家姐手分之後   隔無耐就會 Whatsapp 問佢喺邊 ?!   直到佢番到屋企為止   我就唔 Whatsapp 佢㗎喇   哈哈 ~  

咁佢覆我話要去搵 Fat Fat 呀   因為電話打極唔通   無理由會咁喎   驚佢有事呀   嚇瓜我啦   所以我狂打電話   但打極都係留言   屋企電話又無人聽   之後我話可能佢無交電話費呢   我要比番啲正能量比自己呀 ~

但其實聽完之後我心都離埋   因為我哋當 Fat Fat 係親戚嚟㗎喇   買咩都會預埋佢   不過我就好少探佢   家姐就有啦   好多時有新年曆呀   新銀紙都會拎比佢   又會年年排隊都買蛋卷比佢㗎   我就衰啦   無去探人   計落都起碼有 10 年無見添呀   我真係好衰好衰呢 ~

之後我仍然狂打比佢啦   隻手真係不停咁打電話   個口就不停咁祈禱   咁拎完藥就再打比家姐   睇下駛唔駛一齊去佢屋企   但家姐話唔駛   咁我就同里奧大人行下先   不過其實我都無心機行㗎喇   因為我真係好驚   唯有一路行一路打電話一路祈禱 ~      

因為我之前團購咗個 12 合 1 多功能切菜百寶箱同埋張特大矽膠墊   所以要出旺角   咁順便行埋女人街   之後先去換嘢   咁家姐仍都到咗親戚屋企   但無人認門呀   所以家姐就再問管理處   再打去醫院   又周圍睇下見唔見到佢 ~
   
之後我再問家姐駛唔駛一齊搵   佢又話唔駛   咁我哋都去咗換嘢先喇   咁去到嘅時候就按飛等換購啦   但要等 25 個號碼   咁家姐打嚟話管理處啲人話幾日無見 Fat Fat 呀   嚇死人啦   因為要報警嘛   所以我哋即走喇   叫家姐打 999 先   我哋即飛的過嚟 ~

咁里奧大人話口渴   所以去 OK 買嘢飲先   正想打的嘅時候   家姐打嚟話搵到 Fat Fat 喇   感謝主   我開心到喊呀   如果家姐遲 1 分鐘打嚟   我哋都已經上咗的士喇   但家姐話原來打過比我哋   不過打極唔通   因為我哋搭緊 Lift 嘛 ~

咁我哋即刻上番去拎嘢啦   喺門口已經聽到我哋個 Number 喇   所以叫里奧大人飛去呀   因為我哋無諗過咁快   同埋無諗過會番上去拎呢   哈哈 ~

呢兩件事當中   我切切實實感受到神嘅保守帶領   因為前後 1 分鐘時間   所做嘅嘢係完全唔同呢   感恩感恩 ~

之後我哋打的去 Fat Fat 屋企喇   叫家姐等埋我哋一齊食 Lunch ~

坐緊的士嘅時候   我同里奧大人講話要買部平安手機比 Fat Fat   所以里奧大人即上網搵資料   同埋打去問有關資料   仲留埋佢自己電話做聯絡人   我真係好感激佢咁盡心幫我呢 ~   

上到 Fat Fat 屋企   佢見到我就非常開心啦   因為真係好耐無見嘛   等佢笑完   我就即刻話佢喇   今次真係比佢嚇死   家姐話我去到嘅時候   個咀唇係白哂㗎   大佬   真係好驚嘛 ~      

家姐再同我講   如果佢早 5 分鐘嚟到就真係報咗警㗎喇   因為 Fat Fat 當時仲未番到屋企   但家姐話其實佢 12 點半已經嚟過屋企   不過無人認   所以家姐要走嚟走去問人囉 ~ 

原來親戚真係無交電話費呀   所以頭先落去交電話費囉   真係唔知好嬲定好笑   不過佢交咗一年電話費   所以就唔同佢申請平安手機喇   等佢完咗約先申請   同埋好在佢都有平安鐘   咁都好啲 ~   

差唔多 2 點 45 分   諗住同佢一齊食嘢   佢又唔食喎   因為佢已經食咗嘢   咁我哋都走喇 ~

同家姐一齊去食 Tea   估唔到一連兩餐都一齊食   好似啱啱同佢食完嘢無耐又食咁   哈哈 ~

炸雞肶薯條

干炒牛河

家姐仲搞笑啦   佢話驚到諗埋啲鬼故情節呀   痴黐線   叫佢咪睇咁多鬼片㗎啦   自己嚇自己 ~

食完都 4 點喇   咁去家品店買嘢   之後家姐去美心買 Cake   里奧大人無啦啦又話想食栗子 Cake 喎 ~

原來黃色果粒係栗子   我成日見到都唔知係咩嚟

之後同家姐去洗手間   家姐問我有無 Tissue ?!   我都未答佢   佢已經講話唔知咩美心餅卡   咁我話我要 1 張 (其實我係話要 1 張 Tissue)  佢好快咁話話佢無美心餅卡㗎喎   笑死我啦   我係要 Tissue 唔係要餅卡呀   黐線 ~

家姐坐巴士   我就同里奧大人行去黃金商場   因為想買部手機比 Fat Fat 呢 ~

經過西九龍中心又行下啦   行下行下覺得有啲攰   之後我話唔行喇   但原來已經行咗個幾鐘 ~

咁去埋鴨療街   我第一次去咋   原來都好多人行   因為啲嘢真係好平   買開 $59 嘅   呢度買 $20   暈喇 ~

行完就去番黃金嗰頭   見到牛丸哥哥呀   超勁開心   因為成日唔記得佢喺邊嘛   所以即買鮮蝦卷同墨魚卷   再買埋墨魚丸就去食嘢喇 ~

我勁想食傷心酸辣粉   但今次我覺得好辣呀 ~

食完就去買電話   感恩買到部平靚正 Nokia 112 手機   $378 仲要係行貨   啱哂老人家呢 ~

今晚搭地鐵   不過就去油麻地轉車   因為我想坐呀   哈哈 ~

番到屋企即沖涼喇   頻頻樸樸真係好攰呀   所以 11 點瞓喇 ~   

12 合 1 多功能切菜百寶箱 ($98) / 特大矽膠墊 ($39)

嘉華大酒樓 @ 官塘 ( 3-JAN-2014 )

鮮果黃金卷 - 食完覺得好熱氣   哈哈

泰皇醬豬扒 - 份量都唔少

紅燒班腩煲 - 如果自己識整就好 lu

燒鴨 / 白切雞

鮑參燴肚翅

( 3-JAN-2014  FRI )

Happy Friday 喇   今日里奧大人上大陸   所以我朝早都唔滾熱啲中藥喇   唔想搞到自己咁緊張   因為我次次滾完中藥   到臨出門口就會叫里奧大人 Double Check 個雪櫃同個爐嘛 ~

我覺得今朝有啲熱   不過都照食五香肉丁腸蛋米   但食完真係好熱囉   哈哈 ~

菇場有嘢做   差唔多 11 點幾先做完   所以覺得時間過得勁快呀 ~

今日有 Lunch Box   因為早餐飽得滯   所以龜速咁食   食完都點幾 lu   好快又開工啦 ~

放工番媽咪屋企坐陣   之後就去食飯喇 ~

家姐又係 7 點到   一嚟到就有得食嘛   食完就去百佳買 Tempo 廁紙比媽咪   因為 $99/3 條呀   都算抵   買完之後就番媽咪屋企 lu ~

差唔多 9 點走喇   因為今日 Enjoy 卡有 95 折   所以我又去惠康睇下有無得買   感恩最後 3 條比我買到呀   之後家姐打嚟   企喺度傾咗 15 分鐘   幾鬼攰呀 ~

番到屋企即沖涼喇   無幾耐里奧大人都番嚟 lu ~

今年係第一個星期六 Off   所以聽日唔駛番   實在太開心喇   咁當然又無咁早瞓啦   12 點幾先瞓呀 ~

香蒜蜆肉辣肉腸扁意粉 + 牛油香草金菇 ( 2-JAN-2014 )

( 2-JAN-2014  THU )

今日好似無咁凍喇噃   不過仍然要着厚褸同毛毛靴呢 ~

唔係好餓   所以食奶油多   今次試下飲央走   但唔太啱我呀 ~

諗住喺菇場 Hea 過等放工   點知突然間好鬼忙   好在喺 Lunch Time 前就搞掂   唔係就會想做埋先食 Lunch 呢 ~

次次一忙之後就好快餓   所以食辛辣杯麵算喇   因為唔想行唔想等   哈哈 ~

放工即走喇   唔駛去街市   咁就行下超市啦   不過原來想買嘅嘢屋企都有   所以番屋企 lu ~

番到屋企開機洗衫就抖陣   7 點半想煮嘅時候   里奧大人打嚟話放工   咁我又可以再抖多陣完煮呢 ~

是日晚餐 - 香蒜蜆肉辣肉腸扁意粉 + 牛油香草金菇

香蒜蜆肉辣肉腸扁意粉 - 平時多數用茄汁煮意粉   咁香蒜意粉唔會有汁家嘛   所以就用牛油撈扁意粉   勁高卡呀   今次用 Johnsonville 嘅 Hot & Spicy 腸嚟切粒粒   味道真係唔錯噃   最邪係家姐今晚又係食 Johnsonville 嘅芝士腸   不過我無買芝士腸呀   我覺得好難煎囉   好易爆腸   啲芝士漏哂出嚟呀   嘥哂㗎 ~

牛油香草金菇 - 都係用牛油起鑊再炒   但越炒越出水   所以之後我再用大火烘乾佢呀   下次唔整喇 ~

搞掂哂就沖涼喇   食埋生果就休息 ~

呢個星期瞓得唔係咁好   里奧大人話因為電毯熱喎   但我話無電毯嘅時候都瞓得唔好噃   佢叫我今晚唔係咁凍   應該唔駛用   不過我照用呀   暖笠笠好舒服呢 ~

今日勁攰   所以 10 點半瞓喇 ~

別府 @ 九龍灣 ( 1-JAN-2014 )

七味炸三文魚骨

鹽燒秋刀魚

飯團 (觟 & 明太子)

飯團 (明太子)

嘅三文魚壽司

吞拿魚壽司

( 1-JAN-2014  WED )

2014 年喇   希望個個人都開心健康   凡事感恩   珍惜所有呢 ~

一早諗定好去長洲行小長城   不過我哋無教鬧鐘呀   瞓到自然醒   但我 10 點都醒咗 lu   咁我就拆信啦   見到 AEON 寄張新卡比我   仲有 $30 Coupon   咁我梗開心啦   里奧大人一起身   我就話唔去長洲   去 AEON 買嘢   但我驚自己睇錯嘛   無理由咁着數   所以叫里奧大人再睇多次   佢問我有無睇啲 Terms   我求其話有呀   之後佢話   人哋話消費滿 $300 先可以用 $30 Coupon   都唔知我睇咩   哈哈 ~

梳洗完之後就去太興食早餐   感恩等咗 10 分鐘就有位呢 ~

食完番屋企抖下   想入西貢睇日落   但咁早去又無咩嘢做   咁諗住入赤柱   不過里奧大人話唔好咁遲番屋企   因為佢有公司嘢做   但佢話照入赤柱   我話如果入赤柱   來回真係用唔少時間   咁不如去銅鑼灣啦   所以最後決定去銅鑼灣喇 ~

好感恩去到巴士站   等咗唔夠 1 分鐘就有車喇   因為假期要等好耐㗎   之後我聽到隔離講話呢班車等咗好耐添呀 ~

咁去旅行社睇下資料   諗住新年去旅行嘛   咁假期唔多都係東南亞啦   台中同台北要 $8,000 一位   但其實我又唔太想去台灣   咁問新加坡啦   佢仲勁   無哂經濟位   只得商務位   初三出發   4 日 3 夜要 $20,850 一位呀   我初初以為佢寫錯呀   之後我問係咪兩萬一位 ?!   佢話係喎   我話講真   去新加坡 4 日 3 夜真係唔值呢個價錢囉 ~   

因為我想買甜糕點   所以去 Sogo 地庫先囉   但我唔記得咩嘢樣   要啲時間搵   里奧大人對零食真係無咩興趣   佢一行入去已經打喊露   但佢都會陪我搵嘅   如果唔係我實會話鬼佢   哈哈 ~

不過最後都搵唔到   咁就繼續行 Sogo 喇   行到差唔多 2 點半就走喇   講明唔食南記   所以就行咗 2 條街   睇下有咩食   不過又無咩想食   里奧大人又話餓   所以最後去番南記啦   咁南記其實都 OK 嘅   酸辣米線夠哂開胃嘛   去到又係等咗唔夠 1 分鐘就有位喇   仲要係卡位   非常非常之感恩呢 ~

我嘅春卷魚皮餃小鍋米線 (中辣) - 食咗咁多年   我依家先知可以咁樣雙拼咋   因為次次都唔係我排隊買   咁里奧大人又唔會咁細心咁逐樣睇家嘛   因為佢眼中只有豬腩肉春卷小鍋米線呢 

里奧大人嘅豬腩肉春卷小鍋米線 (小辣)

我依家鍾意食埋啲冬菜

食完就去希慎   又入去 GAP 睇下先   又比我買到筍嘢   就係 2 件線衫喇   啲質地真係好 Soft 㗎   仲要係 $148/件   抵呀   之後再去誠品   點知去咗 11 樓   原來係 Food Court   咁就兜個圈睇下有咩食先   估唔到有 Triple's-O 呀   下次要嚟食 ~ 

之後落番去 9 樓誠品喇   依家無咁多人去襯虛   所以行得都幾舒服   又比我見到天仁茶   仲要排隊買添   里奧大人問我飲唔飲   我梗唔飲啦   啱啱先飲完凍咖啡   無理由又飲珍珠奶茶囉    所以話下次要買番嚟飲呀   哈哈 ~

行到 5 點幾走喇   諗住坐巴士家嘛   不過有遊行   所以封哂路   咁唯有搭地鐵啦   又熱又焗勁辛苦呀 ~

好口渴呀   所以去德福麥記食思樂冰新地   飲完之後勁凍   麻煩啦   哈哈 ~  

左手篤電話   右手拎住雪糕筒   雙眼又望住電話   當我唔存在啦   所以我唔準佢成日咁樣   要同我傾偈呢

番到屋企里奧大人就做公司嘢喇   我就開機洗衫同煲中藥   差唔多 8 點先去食嘢   諗住 8 點唔駛等位添   我哋等咗 15 分鐘先有位呀 ~

食完諗住行下   但因為都已經 9 點幾   里奧大人仲未做完嘢   所以都係番屋企喇 ~

沖完涼就休息 lu   我自己 11 點半就瞓覺先喇   呢排夜瞓   濕痕又搵我呀   我唔想見佢呀 ~