漢和韓國料理 @ 銅鑼灣 ( 5-APR-2014 )

呢間韓燒都唔錯   因為個身無油煙味   呢下好緊要㗎   因為好多時食完韓燒完之後   一上車就會聞到自己好勁韓燒味呢   

終於食到唔係 Overcook 嘅牛仔骨喇

辣魷魚 / 辣豬肉 / 牛仔骨 - 都幾入味呢   因為限時關係   所以我拎一大堆先   咁唔駛行嚟行去   同埋我最主要食牛之嘛   之後里奧大人話食完先拎   話唔好浪費喎   呢句說話由佢口中講出嚟   覺得好好笑囉         

牛肉 / 牛扒 / 牛仔骨 / 辣雞翼

三文魚刺身 / 三文魚壽司 - Re-fill 得好快

三文魚腩 - 好味道

魚仔好味   但辣蘿蔔完全唔得   口感好怪

仲以為係酸青瓜添   原來唔係 

多春魚 - 熟食嚟㗎   里奧大人話以為係未熟   好難得佢話食多春魚   因為我都鍾意食   但無人陪食好無癮嘛   同埋再燒一陣   熱辣辣好鬼正呢   哈哈

里奧大人知我鍾意食煙韌嘢    所以第一碟就拎呢幾樣嘢   算佢啦

西瓜 / 桂花糕

涼粉 - 里奧大人深信食完就可以清哂啲熱氣   哈哈

雲厘拿雪糕 / 朱古力雪糕 - 我鍾意有碎朱古力粒   有啲咬口無咁悶

( 5-APR-2014  SAT )

今日係清明節假期   諗住瞓到好晏   估唔到 10 點就自然醒   咁里奧大人問我幾點   我話 10 點   佢竟然唔信   問我係咪睇錯   因為佢 9 點醒咗   抖陣再翻瞓   諗住自己會瞓到 11 點幾喎   大佬   咁都唔好唔信我吖 ~

好在又唔係好攰   依家年紀大   玩一晚要抖好耐先復原   不過我覺得其實自己未瞓夠   但我唔想浪費個假期囉   難得里奧大人可以放鬆心情出去行下嘛 ~

梳洗完就去食早餐   之後番屋企抖陣就出街   本來我諗住去荃灣 Shopping 嘅   但我真係好唔想搭地鐵   同埋唔鍾意搭地鐵焗促嘅感覺   又一頭一尾喎   叫里奧大人不如坐小巴去官塘   再喺官塘坐小巴去荃灣   不過佢話好嘥時間喎   咁我話去銅鑼灣囉   反正想去 GAP 睇下有無平嘢執 ~

奶油厚多 - 我要燶啲   但係我直頭覺得佢無烘過咁呀   如果唔係啲牛油點會唔溶喎     

如果我煎到咁呢   佢實呱呱叫話 Overcook Overcook 㗎喇   

無味嘅   我都同里奧大人講過啦   不過佢點都要自己試   最後要落胡椒粉先食到   呵呵

坐 619 去銅鑼灣   一落車里奧大人就話去南記   佢話佢有啲餓喎 ~

原來南記裝修咗   啲坐位都闊落咗   但相對啲嘢食又貴咗呢 ~

春卷 + 魚皮餃河粉   短短幾年內   由 $16 加到 $24   人工又唔見加得咁快

腩肉春卷酸辣小鍋米線 (中辣)

頭先媽咪打嚟話平安鐘同隨身寶壞咗   叫我搵人整   但佢又話已經叫咗人嚟整   咁即係點呀   講到我都亂   所以火起啦    之後我再問   佢先話平安鐘同隨身寶係唔同師傅   一早講清楚啲嘛 ~

火起咩都唔鬼理   咁里奧大人問點解媽咪無啦啦按平安鐘   係咪唔舒服 ?!   我先醒起問媽咪點解要按平安鐘添   原來平安鐘服務中心有心打比媽咪屋企   個女人搵完媽咪之後就無講嘢   但之後就有個男人同媽咪傾喇   初初媽咪都答咗佢啲嘢   後尾覺得個男人好似查家宅咁   所以媽咪即收線   再即按平安鐘   問啲職員係咪有咁嘅服務   但職員話真係有呢啲服務   不過唔會直接打電話同媽咪講   咁即係頭先個電話係呃人啦   估唔到媽咪今次咁醒   之後我再打番比媽咪   同佢講唔好意思   頭先咁掹   同埋同佢講   屋企所有嘢都係我同家姐登記   無人會知道佢嘅資料   再有呢啲人打嚟   妳即刻收線就得   唔駛理佢 

食飽去 Sogo 行下   最後喺超市買咗盒細韓式辣醬同埋環保袋就走 lu ~

去 GAP 睇下有無平嘢執    不過唔啱心水   之後去誠品買珍珠奶茶   再去 Food Court 坐下先   因為我着咗平底人字拖   行到對腳好鬼好鬼痛呀 ~

凍珍珠奶茶 ($18) - 我去台北飲第一杯珍珠奶茶就係用天仁茶   所以覺得好好飲   知道誠品有就已經成日想試㗎喇   估唔到真係好飲呀   因為唔澀口呢   珍珠又煙韌   我最鍾意呢

我勁想食韓燒   咁啱銅鑼灣有漢和   所以去誠品睇下書先再去   今次買咗本意大利粉嘅食譜   里奧大人話我買咁多食譜又唔見我煮裡面啲嘢   我話係想支持下佢哋之嘛   呵呵 ~

差唔多 6 點去到漢和   任飲任食限時個半鐘   其實幾趕   之前同里奧大人講咗㗎啦   佢又話啲時間夠食   點知去到坐低拎下嘢食   燒下嘢食   佢話個半鐘其實幾趕   我咪話囉   燒嘅係肉類   點都要啲時間   同埋無理由燒好哂一堆先嚟食家嘛   咁咪凍哂囉   我唔鍾意咁樣 ~

我部相機嘅鏡頭葉無啦啦開得一半   關就關得一半   要 "鄧" 下先可以關得哂   仲要有條罅添   可能換咗相機袋   我成日扯部相機出嚟   一日扯幾次   所以整壞咗都未定 ~   

食到 7 點半都要走喇   好飽呀   所以又去 Broadway 睇下啲電視機   因為屋企部電視都應該壽終正寢 lu ~

睇完就坐 671 番九龍灣   去咗 Zara 睇西裝   之後再去 Broadway 睇電視機   睇啱咗部 Samsung   不過要格價先呢 ~

番到屋企即沖涼   之後飲湯   都原來已經 10 點幾   我睇咗陣 "心計" 都瞓喇   好攰呀   鬼咩   尋晚玩到咁夜   想唔攰都難 ~

誠品買嘅意大利麵食譜 ($62)

Sogo 買嘅韓式辣醬 (細)   好似 $15.9  

      

常滿雞煲火鍋專門店 @ 荃灣 + Neway CEO @ mega BOX ( 九龍灣 ) ( 4-APR-2014 )

麻辣常滿雞煲 - 半隻 (中麻小辣) - 一睇到個色已經好吸引

之後 Waitress 幫我哋搞下煲雞   咁就食得喇   估唔到都好辣   家姐非常之鍾意啦   講咗好多次好味呀好味呀   好在蘿蘿無嚟   唔係發脾氣走都似   因為佢唔食得辣   呵呵

炸魚皮 x 2 - 我哋 3 個都好鍾意食   因為好難得食到好味嘅炸魚皮   呢間唔錯   所以食完之後再叫多碟   嗰碟仲比之前嗰碟新鮮鬆化   正呀 

手打鮮墨魚滑 / 鮮蝦滑 - 都幾彈牙   唔錯唔錯

牛骨髓 - 我同家姐都鍾意食呢

新鮮肥鵝腸 - 糟糟必叫

手切本地肥牛 (小) - 唔太得囉   淥耐咗會好 "鞋"   安格斯好味啲

皇帝菜 - 份量都好多   同埋佢擺到好似啱啱喺田園扎出嚟咁   個碗又靚   賣相超掂呀   同埋感覺好乾淨    

( 4-Apr-2014  FRI )

今日我着中袖   但一出大堂就覺得有啲凍   不過都唔番屋企拎外套㗎喇   反正菇場有褸有頸巾   如果夜晚係咁凍   就拎埋出街着算喇 ~

早餐去另一間食   因為去開嗰間無冷氣好焗   最驚咁呢 ~

菇場忙呀   呵呵   勁快到 Lunch Time ~

一忙就想出去抖抖氣   所以行一陣   再買埋 Lunch 番菇場食 ~

台灣黑椒腸   無味嘅

忙呀忙   做到 3 點幾有啲餓   所以一路做一路食件拿破崙   不過咁樣食真係一啲都唔享受 ~

今晚我請家姐同糟糟食辣雞煲   因為糟糟之前去韓國幫我買咗 Lanegie 無收我錢   所以我請佢食雞煲啦   但家姐話係佢比   但我覺得家姐幫我比囉   不過佢又話唔係 ~  

放工即走喇   糟糟已經喺菇場附近等緊我呢    之後再去接家姐 ~

今晚我遊車河呀   又有少少塞車喎   好在糟糟避開到勁塞嘅地方   唔係就唔知塞到幾時咯 ~

入到荃灣都差唔多 7 點   糟糟多數去愉景新地   我就多數去路德圍   所以我哋唔知二陂坊喺邊   開 GPS 仲要人肉搜尋   不過我同家姐都係路盲   去到三坡坊   糟糟同我哋講二坡坊應該隔離   叫我哋一個睇左一個睇右   我同家姐都未睇   佢已經搵到   呵呵   都叫佢咪靠我哋㗎啦 ~

見到常滿   我同家姐就落車去常滿先   糟糟去泊車   佢話去商場泊車   入去之後就即刻 Full 喇   遲一步佢又唔知要泊邊度 lu   所以勁感恩呢 ~

衰糟講明話今次辣雞要食中辣   咁家姐又想大辣   我都話想大辣   同衰糟講話即係妳去滑雪   都唔會去小雪嘅地方滑啦   佢好慘咁答番我話   人哋識滑雪先去多雪嘅地方滑   哈哈哈哈  佢其實講得好啱   不過唔會理佢 ~

我問個職員   麻辣係咩程度 ?!   佢話小辣已經好勁   不過佢又唔食得辣   所以我又唔係咁信佢噃   最後一致要中麻中辣   已經落咗單㗎喇   之後有另一個職員同我哋講   中麻中辣驚我哋頂唔順喎   因為係越煲越辣   無得番轉頭   咁好啦   糟糟真係好驚囉   所以最後轉中麻小辣 ~

糟糟最鍾意叫到萬里長城咁㗎   但又食唔哂㗎喎   所以我唔會比佢咁啦   食到一半唔飽再叫 ~

今次小辣真係好辣喎   因為家姐都話辣   佢話辣即係辣㗎喇   所以糟糟都好勁   可以食到   呵呵   不過一加湯打邊爐   個湯底變咗完全無味囉   又話越滾越麻辣   都唔係嘅 ~

無咗蘿蘿真係食得好鬼開心   一路食一路傾一路笑   好快都差唔多 8 點半   糟糟話想唱 K   所以我話去 mega BOX   呵呵   近我屋企嘛   我哋當中最唔捱得係我嘛   平時 11 點就瞓   但衰糟唔信 ~

我啦   里奧大人啦   糟糟啦   都比家姐嗰句 " 食完鹹要食甜 " 洗哂腦   咁事實真係食完鹹想食甜嘅   但問題係食完甜之後又想食番鹹呢   沒完沒了   哈哈 ~

去到 mega BOX 都係 9 點左右   估唔到停車場幾層都 Full 哂   兜到暈   咁泊完車之後就去麥記買雪糕   之後我話 mega BOX 我成日去   等我帶路   勁呀 ~

好感激好感激佢哋好信我   不過我帶佢哋搭扶手電梯   無啦啦唔知點解去咗 AEON 另一邊   哈哈   平時去都唔係咁㗎噃   之後要行番入超市先可以再搭電梯   佢哋開始懷疑我   又話我成日去   點解帶錯路 ?!   我咪話囉   反正妳地又飽   雪糕又未食完   咪行下囉   真係信我一成雙目失明呀   我幾大都唔認衰呢 ~

Book 咗 10 點   不過 9 點半都可以入房 lu   仲可以係大房添   不過如果有人要房   我哋就轉番細房呢 ~

諗住 mega BOX 咁隔涉無人嚟啦   估唔到啲房都 Full 囉 ~

$265/位   另加 2 Nuts + 1 Fruit   東亞信用卡有 9 折

我好鍾意佢啲歌㗎

9 點半唱到 2 點幾   都夠喉㗎喇   所以都走喇   埋單 $795   糟糟請呀   開心開心 ~

有 2 個鐘頭 Free Parking   所以要落番去 G/F Chop 車飛   之後再上番 14 樓攞車   頭先嚟嘅時候得番一個位泊車   依家就第番我哋一架車泊喺度   好似突然間全層嘅車都無哂   好有鬼片 Feel ~

因為係揸家姐架車   所以送完我番屋企   之後車糟糟番屋企   最後先到家姐番屋企呀   我番到屋企即沖涼喇   差唔多 3 點家姐就番到屋企   咁我都瞓喇   超勁攰 ~

如果突然有狗吠   我會嚇到大叫   哈哈

住家飯 @ 媽咪屋企 ( 3-APR-2014 )

陳皮絲蒸鮑魚

蒸斑

炒菜心

炸乳鴿 (外賣)

沙薑雞腳 (外賣) - 呢期我勁想食沙薑雞腳   

髮菜眉豆淮山瘦肉湯

( 3-APR-2014  THU )

今朝起身見到陽光   感覺好似見到彩虹咁振奮呀   實在好耐無見到陽光喇 ~

里奧大人今朝要見客   所以又陪我食早餐呢   開心開心 ~

菇場忙啦   好在抖下又忙下   忙下又抖下咁囉 ~

Lunch 食吞拿魚燒餅   係今朝喺聖安娜買㗎   因為驚晏晝落雨   估唔到晏晝又灰灰暗暗 ~

好喇   忙下停下又收工   今晚番媽咪屋企食飯   實在太好喇 ~

家姐今晚快咗   所以 6 點 45 分番到屋企 lu ~

食下傾下又打下機   食埋生果都已經 8 點   家姐要番屋企揸車去糟糟度   所以坐多陣就走喇 ~

最搞笑係家姐一出門口就講佢同事啲嘢   頭先喺屋企又唔講   之後講到去車站   咁我其實已經有車   不過都等埋家姐講完先   之後到佢有車就叫佢走喇   我就自己再等車呢 ~

差唔多番到屋企佢又打嚟講呀講   講呀講   到佢落車就唔講喇   都講咗成半個鐘  ~   

番到屋企即開機洗衫   之後就即沖涼休息喇   里奧大人好慘   9 點半先放工   番到嚟都係食杯麵同橙   佢仲話好慘喎   要自己淥杯麵食   因為我叫佢自己淥嘛   之後我咪話囉   一路食杯麵一路睇電視都唔係慘啦   呵呵 ~

今晚 11 點都瞓喇   潮潮濕濕嘅天氣真係令人特別攰呢 ~

蕃茄洋蔥豬柳 + 瑤柱燜節瓜 ( 2-APR-2014 )

( 2-APR-2014  WED )

天黑黑又落雨   真係無咩 Mood 喇 ~

食完早餐諗住走   點知原來渠王坐喺隔離枱   咁傾多兩句我都走喇   因為無落雨嘛 ~

菇場忙啦   忙到 Lunch Time   做到個人好攰   雖然落緊雨   不過都出去行下   順便去埋銀行換提款卡同入票   估唔到銀行無人   第一次咁快搞掂呢   之後食牛雜米   再行下商場   又買到條洗水 Legging   咁都有收穫   實在太開心喇 ~

仍然忙啦   放工都未做完   留番聽日做喇   因為真係好鬼攰囉 ~

唔駛買餸勁開心啦   咁去萬寧買嘢   點知番到上屋企先醒起要買龜苓膏比里奧大人   所以又要落番去買 ~   

番到屋企即燉肉汁   之後就預備晚餐喇   里奧大人 9 點先放工   所以叫我食先   食完抖陣就沖涼   舒服哂 ~         

是日晚餐 - 蕃茄洋蔥豬柳 + 瑤柱燜節瓜

蕃茄洋蔥豬柳 - 今次買 $15 梅頭   不過都覺得好鬼多   但一樣係 Overcook   所以里奧大人話食到好攰   呵呵 ~

瑤柱燜節瓜 - 媽咪之前浸咗啲瑤柱比我   不過浸得好淋   我真係唔鍾意食囉   所以要快快食埋佢   今次落得多水   所以燜耐咗   啲節瓜好林呀   里奧大人仲衰   話連節瓜都煮到 Overcook   我同佢講話夠未呀   佢話我鍾意聽意見家嘛   所以咪講出嚟囉   哈哈 ~

其實依家多數睇 2 集 "心計"   不過依家電視壞壞哋   睇到對眼好攰   所以睇 1 集算喇   今日勁攰   10 點 45 分自己瞓先 lu ~       

什錦 + 墨魚卷 + 菜心 ( 1-APR-2014 )

( 1-APR-2014  TUE )

又係灰灰暗暗   好想見到陽光呀 ~

唔知食咩好   又食番芝腿治烘底   呵呵 ~

菇場忙   之後抖陣又忙   持續係咁   所以啲時間過得好快 ~

Lunch 食脆麥片 + 朱古力奶   啲脆麥片甜甜哋幾好味   好在買咗低糖朱古力奶咋   唔係 Double 甜呢 ~

為咗食麥片   特登買隻巨杯   因為長身杯好難 "北" 出嚟呢     

比佢錯誤引導咗   以為有藍莓乾添

放工去街市買餸   我多數會買埋聽日嘅餸   唔想日日做埋啲嘢重覆又重覆呀 ~

今晚自己食先   里奧大人差唔多 8 點先放工   真係好在無等佢咋 ~

是日懶餐 - 什錦 + 墨魚卷 + 菜心

什錦 - $15 一盒咋   樣樣都有好似唔錯咁   所以就買嚟試下   又幾好食噃   因為唔腥 ~

墨魚卷 - $22/半磅   我最鍾意蘸埋泰式雞醬一齊呢 ~

菜心 - 淥咗嘅菜心加咗蔥油真係好食好多   不過我咁懶   唔會成日咁整囉 ~

電視機應該壞咗啦   因為好黑呀   睇到我好辛苦   不過我仍然會睇 "心計"   哈哈 ~

睇到對眼超級攰   所以 11 點就瞓喇 ~