越棧 @ 九龍灣 ( 9-OCT-2014 )

越式蒸粉包 - 呢個麻麻

雜錦拚盤 (豬扒 / 春卷 / 蝦餅 / 扎肉蝦片) - 我最愛嘅拚盤

生熟牛肉河粉 - 今次份量多咗呀   同埋好食咗呀

雞翼腩片撈檬

芒果雜飲 / 珍多冰 - 以前嘅珍多冰好好飲架   有埋石榴子同亞荅子   勁鍾意食   依家得啲啫喱條 

( 9-OCT-2014  THU )

今朝超勁餓呀   唔知係咪因為臨瞓前睇飲食節目有關呢 ~

其實想食米粉餐   不過食完真係超勁飽   我又唔想   因為我想晏晝食酸辣米線呀   哈哈 ~

菇場都忙忙哋   但就可以清哂之前無時間做嘅嘢   實在太好喇 ~

Lunch Time 出去買零食比家姐   之後就買酸辣米線番菇場食   終於食到有啲驚   咁就最好   我唔駛心掛掛再想食   哈哈哈哈 ~

我好耐無買薯片喇   因為我唔想再食薯片   不過上次聽家姐話 759 有隻牛肉味薯片   咁買比佢食啦   之後又買啲糖同朱古力比佢   Poifull 好難買到嘛   Double Deck 就每人 1 條   因為我好想食呀   兒時回憶嚟㗎

再見喇   酸辣米線

好嘢   無咩嘢做喇   呢幾個月真係好鬼忙   好想有啲休息時間 ~

放工即走喇   約咗媽咪同工人喺淘大等   媽咪又拎咗湯都買咗生果比我同家姐   所以要工人幫手拎上屋企先呀 ~

差唔多 6 點半就去越棧   家姐就 6 點 45 分左右到   好感恩佢咁快到   因為佢 6 點 15 分先放工 ~      

食到差唔多 8 點   送埋媽咪搭的士   家姐就同我一齊番屋企拎嘢   估唔到佢又話坐陣   我覺得佢好耐無上嚟坐咁呀   哈哈   不過同佢又係打機   里奧大人成日話我 2 仔底死跟   咁我都認㗎   家姐幫我抽新動物   抽到隻唔知咩來   佢大叫   因為佢以為係新動物   咁我又叫埋一份   之後佢睇清楚啲   原來我自己本身已經抽到   但佢自己就無呢隻動物   所以覺得係新嘢   之後佢話人叫我又叫   叫乜鬼   哈哈   咩喎   見佢咁開心大叫   我咪一齊叫囉 ~

同家姐一齊打機   佢都好投入   里奧大人唔理我㗎   叫佢幫我 Spin   咁最高係 5   佢 Spin 嘅係 1   仲好開心同我講話 1 都唔錯   哈哈 ~

我覺得同家姐間唔中都有心有靈犀嘅感覺   我今日買朱古力比佢   佢今日又買咗麥提莎比我呀   其實我之前想買   不過想特價先買囉   我好衰架   成日買咗又唔即刻食   到想食嘅時候就係咁啱做緊特價   激鬼氣 ~

里奧大人 8 點半先放工   所以我送埋家姐搭巴士   之後再去地鐵站接里奧大人   同佢一齊買 Subway 番屋企食 ~

番到屋企即沖涼喇   佢就差唔多 10 點半先沖涼   之後就瞓   我就 11 點幾先瞓呢 ~

大家樂 @ 九龍灣 ( 8-OCT-2014 )

( 8-OCT-2014  WED )

今朝里奧大人話頭痛唔番工呀   最衰我啦   尋晚搞到佢咁夜瞓 ~

為咗彌補我嘅過失   我幫佢打去診所掛號   再叫佢起身睇醫生   算係咁啦 ~

唔知做咩無啦啦勁塞車   8 點 35 分先落車呀   所以食早餐要快呀 ~

菇場忙呀   又要做 Report   真係人都顛 ~

今日請 8 卦出去食生日飯呀   之後叫佢陪我買生果 ~

差唔多 5 點先做完哂嘢   今日真係好嬲呀   佢哋錯到離哂大譜   真係可以講話係 98% 錯囉   我呢個月真係 Check 佢哋啲嘢搞到好大壓力   瞓得又唔好   甩咗好多頭髮添呀   好在食力仲喺度咋   哈哈 ~

無啦啦老闆請食 Cake   咁都好   食啲甜甜哋嘅嘢會開心啲 ~

放工即走啦   里奧大人喺屋企等我嘛 ~ 

6 點半又食嘢喇   因為我食到 ~

番到屋企就沖涼   之後開機洗衫   呢幾晚又打機打到手痛 ~

里奧大人 10 點半瞓喇   不過我又唔眼瞓   所以 11 點半先瞓呢 ~

潮館 @ APM ( 7-OCT-2014 )

鹵水拼盤 - OK 啦

蠔仔肉碎粥 (碗) - 我自己食哂一碗   

細細碗咁食最好   最驚成碗咁食   好似好大食咁

濃湯野菌浸時蔬 - CC 本身話食節瓜蝦米煲   我唔制呀   因為自己都整到   哈哈

( 7-OCT-2014  TUE )

今朝里奧大人上大陸   咁我都 7 點 40 分起身喇   因為呢期等好耐車   唔想咁趕食早餐呢 ~

好清涼呀   我最愛嘅秋天終於降臨喇 ~

早餐又係食三文治   唔想諗 ~

菇場忙呀   我都要幫手做番嘢呀   真係邪囉   我之前寫咗天書比阿齋同花   其實都諗住有啲係唔會接觸到嘅   可能我唔喺度時先有得做   點知呢   自從佢哋接手之後   真係樣樣都有接觸   我喺菇場做咁耐都未試過咁 ~       

今日有 Lunch Box   唔駛諗食咩都唔錯   哈哈 ~ 

準時開工   不過好難專心做到嘢   因為佢哋間唔中又問呀問   我又要 Check 番佢哋做嘅嘢   佢哋又成日錯   等佢哋改完又要再 Double Check   其實真係好嘥我時間   因為做完要 Check 係基本嘢嚟   呢步點都要做家嘛   不論妳係咪暫時幫手做   都係要做呢個 Step 囉   依家我幫妳把關   我會好聲好氣同妳講   但其他同事一定唔會啦   錯一次錯兩次錯三次唔係問題   但妳單單都錯   就真係好有問題 ~

最慘就係佢問我嘢   我又要停哂手答佢   之後我都唔記得自己做緊啲咩喇   連我自己都出錯呀   錯到我自己接受唔到添呀   人生污點 ~    

今晚同 CC 食生日飯   佢 8 月頭生日   本來 8 月同佢食㗎   之後佢又話驚熱   唔食住喎   到我得佢又唔得   搞搞下到依家先食   同埋我想喺入院前同佢食生日飯呀 ~

Book 咗 6 點半   我同 CC 差唔多時間到   一坐低就係咁傾傾傾   傾到 7 點先一齊叫嘢食 ~ 

個口好攰呀   唔係食就講   哈哈   不過同 CC 識咗超級耐   所以真係乜鬼都傾到一大餐   可惜佢唔係咁舒服啦   所以 9 點走喇 ~

我搭地鐵番屋企   見到 Mrs.fields 喺 9 點半之後嘅曲奇係買 3 送 3   家姐成日想買嚟食   咁即打比佢啦   佢話要喎   咁我就排隊買啦   買完比佢之後再嚇佢   話見佢咁鍾意食   下次我自家焗一盤曲奇比佢慢慢食   佢個樣由  ^_^ 即刻變成 --_--"   哈哈哈哈 ~ 

差唔多 10 點先番到屋企   之前同里奧大人講話 9 點半會番到屋企  佢諗住等埋我先沖涼嘛   點知最後又係我沖涼先   累佢遲咗休息添 ~

雖然唔眼瞓   但睇多陣電視都瞓喇 ~ 

梅菜炒豬肉 + 蒜蓉炒菜心 ( 6-OCT-2014 )

( 6-OCT-2014  MON )

餓呀   所以食腿蛋治 ~

今朝啲同事見到我番菇場就好愕然   因為個 Board 寫我放 S/L 放到 15 號   其實之前 8 卦 Whatsapp 比我睇咗   不過佢話等我番嚟講好啲呢 ~

菇場唔忙   因為佢哋晏晝先做我啲嘢   所以基本上依家晏晝就最忙囉 ~

Lunch Time 又未餓   咁出去行下   之後又勁想食酸辣米線   所以就買番菇場食喇   差唔多 1 點 10 分先番到去   食得好趕   哈哈 ~  

忙呀   好快就放工咁呢   今晚去街市買餸   番到屋企先醒起要幫里奧大人買麵包   又要落番去買 ~

所以番到屋企就要即刻預備晚餐   抖陣就煮喇 ~  

里奧大人 7 點半放工   咁我自己食先呀   因為我想 8 點前食飯呀 ~

是日晚餐 - 梅菜炒豬肉 + 蒜蓉炒菜心 

梅菜炒豬肉 - 其實我都好耐無整呢個餸   估唔到今次整得好好食   真係好難得   因為我求求其其嘛   哈 ~

蒜蓉炒菜心 - 我淥熟啲菜   之後再加蒜蓉炒   其實蒜蓉炒菜真係好食   不過我難   因為炒菜要用好多時間慢慢炒   呢期攰   唔想郁咁多 ~ 

搞掂哂就拖地   之後即沖涼休息喇 ~   

大快活 @ 九龍灣 ( 5-OCT-2014 )

( 5-OCT-2014  SUN )

尋晚瞓得麻麻哋   所以今朝瞓到 10 點幾呀   所以無番主日學同崇拜 ~

好感恩食完早餐都好精神   想出去行下   不過旺角銅鑼灣唔駛諗啦   所以去 Mega Box 喇 ~

12 點出發   又唔多人喎   勁正 ~

行到 1 點幾   里奧大人話想飲茶   咁等多 15 分鐘就下午茶時間   咁梗係等啦 ~

好耐無食薯片蝦片喇   所以博命食   哈哈   要好好珍惜呢啲機會

鮑魚菇鴨掌

金菇牛肉腸粉

柴魚花生粥 - 唔熱嘅

安蝦鹹水角

高力豆沙

食完就周圍行   其實今次主要係去 AEON 同 IKEA 買肉丸   今次我又勁樣衰啦   同里奧大人去 IKEA 買肉丸   因為包裝唔知寫咩文   我就懶醒指住話呢包係經典肉丸囉   唔好買錯   因為有雞肉丸   佢以為我真係咁勁認得啲咩文   之後佢睇價錢牌   搵極都搵唔到 "經典肉丸"   之後佢同我講話係咪呢隻呀 ?!   人哋係叫 "瑞典肉丸" 呀   哈哈哈哈   是鬼但啦 ~ 

好感恩買到廁所水龍頭用嘅濾水器呀   因為想買好耐呢 ~     

 
5 點坐 Shuttle Bus 走人   番到屋企就休息喇   太耐無郁   突然覺得今日出咗成日街咁   好攰 ~

今晚去大快活食嘢   行陣商場就番屋企喇 ~

沖埋涼   睇陣電視   11 點幾就瞓 lu ~

國泰美食車仔麵 @ 官塘 ( 4-OCT-2014 )

( 4-OCT-2014  SAT )

今朝 10 點醒咗喇   難得有胃口食早餐呢   感恩感恩 ~

雖然身體都 OK   但都係唔想周圍去   想喺屋企抖下   咁里奧大人就做公司嘢   咁聽日佢就可以抖下喇 ~

3 點幾去食 Tea   食完就番屋企   咁身體都 OK   抖到 5 點幾就打的去姑奶屋企整嘢喇 ~

里奧大人整嘢   咁我個肚又少少扯住痛喎   好在 7 點搞掂哂咋 ~   

我勁想食車仔麵   所以去官塘廣場喇 ~

番到屋企即沖涼   Hea 到 11 點幾都瞓 lu ~

金加利餐廳 @ 九龍灣 ( 1-OCT-2014 ) + ( 2-OCT-2014 ) + ( 3-OCT-2014 )

( 1-OCT-2014  WED )

今朝同里奧大人 10 點幾醒咗 lu   咁就落去食早餐啦 ~

我覺得塊豬潤   好似隻豬嘅外型咁呀   豬仔月餅嗰啲呢   佢仲要瞓埋喺條芝士腸度添

食完要番屋企喇   因為媽咪同家姐嚟淘大食嘢   約咗佢哋 12 點半喺越棧   點知又話要人齊   我話其中 1 個泊緊車   佢哋都唔比入   麻鬼煩   所以里奧大人去和民睇下有無位   感恩有位呀   即轉場 ~

雪蟹肉鮭魚子卷 - 我覺得色彩繽紛好靚呀

海鮮沙律 - 好少海鮮

天婦羅盛合 - 居然有炸蛋 

和風比薩 (叉燒 / 照燒雞) - 好味呀 

廣島風鐵板炒麵 - 齋炒油麵   唔好食囉   又無料   哈哈

食到 2 點半   里奧大人就番屋企做公司嘢   我就同家姐行新都城   家姐好鬼鍾意細細聲叫我名   咁我咁啱同家姐分開行   行行下聽到有人細細聲叫我名   仲以為係家姐   點知原來係舊公司同事   差唔多 10 年無見喇   最搞笑佢話我個樣無變   反而家姐個樣就變咗   好奇怪囉   原來佢見過我家姐   我真係唔記得喇   太耐嘛 ~

同家姐一路行呀行   我一路口噏噏   話唔好再見到我同事   哈哈   家姐問我做咩咁驚   我話大佬   肥咗咁多   所以唔想比人知   好在今日唔係街坊裝打扮咋   唔係仲肉酸囉 ~

之後去街市買嘢   再去 Panash 買麵包   最後去埋廣良興買嘢就去家姐屋企拎湯   之後家姐就車我番屋企 ~

今晚 7 點去食嘢喇   我要食牛呀   所以去金加利   估唔到淘大好多食肆都有位   好難得㗎 ~

食完行陣就番屋企 lu   里奧大人去徑步   我就番屋企沖涼休息 ~

個肚谷住谷住唔舒服   都係 11 點就瞓喇 ~

( 2-OCT-2014  THU )

終於每月一到喇   我就係咁瞓係咁瞓   都唔知里奧大人幾點起身   食咗啲咩   哈哈 ~

瞓到 4 點   出廳 Hea 下囉   但其實個肚都有少少唔舒服 ~

真係無胃口   所以叫里奧大人自己買嘢番屋企食 ~

11 點幾食粒勁嘢   希望聽日番到工啦 ~

( 3-OCT-2014  FRI )

感恩個肚唔痛   不過個人好攰   所以都係打番菇場請假 ~

媽咪 11 點打嚟   咁我都醒喇   掛號要 12 點 15 分先有得睇   咁食埋早餐先去睇醫生 lu ~

4 點幾又有啲痛   所以又瞓下咁囉 ~

里奧大人特登 7 點放工   諗住買嘢比我食   可惜我真係食唔落   叫佢買 Subway   因為想用埋最後 1 張 Coupon 呀 ~

聽日每月一 Off   原來我即係連放 5 日 ~  

仍然勉攰   所以都係 11 點幾瞓呀 ~